ئه‌ڤرۆ نیۆز،زنار تۆڤى:

ئه‌ڤه‌ ماوه‌یه‌كه‌ توركیا و رووسیا خوه‌ نێزیكى ئێك دكه‌ن و چه‌ندین گرێبه‌ست ژى ل گه‌ل هه‌ڤدو گرێداینه‌ و ل سه‌ر ڤێ مژارێ زێره‌ڤان به‌روارى ماموستایێ زانكۆیا دهوكێ و شاره‌زا دكاروبارێن وه‌لاتێ توركیا دا بۆ ئه‌ڤرۆ نیۆز دبێژیت:به‌رژه‌وه‌ندیێن ئابوورى و سیاسى توركیا و رووسیا لێك نێزیك كرینه‌،ب تایبه‌تى پرۆژێ “تورك ستریم” بۆ هنارتنا گازا سرۆشتى ب رێیا توركیا و هه‌روه‌سا ئالوگۆركرنا بازرگانى،دیسا د وارێ سیاسى دا لاوازبوونا رۆلێ ئه‌مریكا پشتى بوهارا عه‌ره‌بى و نه‌ گرنگیا ئه‌مریكا ب هه‌ڤپه‌یمانێن خوه‌،ب تایبه‌تى توركیا فاكته‌رێن سه‌ره‌كى بوون،بۆ تێگه‌هشتنا توركى رووسى،هه‌روه‌سا ئالوزبوونا په‌یوه‌ندیێن توركیا و ئه‌لمانیا فاكته‌ره‌كێ دى بوو بۆ لێك نێزیكبوونا توركیا و رووسیا.

زێده‌تر دبێژیت:هه‌ر چه‌نده‌ نوكه‌ هه‌ردو وه‌لات د قه‌یرانه‌كا دبلۆماسى دانه‌ ل گه‌ل ئێكه‌تیا ئورۆپى،له‌ورا هه‌ڤكاریا ئه‌نقه‌ر و موسكۆ بۆ لاوازكرنا رۆلێ ئورۆپا و ئه‌مریكا یه‌ ل رۆژهه‌لاتا ناڤین،د وارێ جیۆسیاسى دا هه‌بوونا هێزێن ئه‌مریكا ل رۆژئاڤایێ كوردستانێ كارتێكرنه‌كا نه‌رێنى ل سه‌ر به‌رژه‌وه‌ندیێن ئه‌منى یێن رووسیا و توركیا دكه‌ت،ب تایبه‌تى پشتى به‌رفره‌هبوونا ب كارئینانا سیاسه‌تا هێزێ بۆ گوهۆرینا هێزێ د به‌رژه‌وه‌ندا ده‌وله‌تێن هه‌رێمى و زلهێز دا،دیسا رێككه‌فتنا له‌شكرى یا گرێدایى سیسته‌مێ به‌رگریا مۆشه‌كێن “ئێس 400″ دناڤبه‌را توركیا و رووسیا دا هه‌ولێن دیار یێن توركیا نه‌ بۆ كێمكرنا پشت به‌ستنێ ل سه‌ر سیسته‌مێ به‌رگریا ناتۆ.

ماموستایێ زانكۆیێ زێده‌تر دیاركر:لێك نێزیكبوونا توركیا و رووسیا دێ ل سه‌ر حسێبا ئه‌مریكا و سعودیێ و هه‌تا راده‌یه‌كێ یا ئیرانێ ژى بیت،هه‌روه‌سا توركیا ب گرنگیا خوه‌ یا جیۆسیاسى رۆلێ ئیرانێ لاواز دكه‌ت،دیسا رێگرتنێ ل خه‌ونێن سعودیێ دگریت،بۆ به‌رفره‌هبوونا وێ یا هه‌رێمى ب تایبه‌تى پشتى گوهۆرینا فه‌لسه‌فا حوكومرانیا سعودیێ و هه‌ولێن وێ بۆ رێبه‌ریا ده‌وله‌تێن عه‌ره‌بى،پشتى لاوازبوونا مسرێ و كارتێكرنا حوكومرانیا سعودیێ ل سه‌ر قاهیره‌،له‌ورا به‌رفره‌هبوونا رۆلێ توركیا و هه‌ڤكاریا وێ ل گه‌ل رووسیا خواندنێن ئه‌منى و جیۆسیاسى هه‌نه‌ ب تایبه‌تى د وارێ به‌لانسا هێزێ دا.

هێشتا دبێژیت:پرۆژێ رووسیا و توركیا دروستكرنا به‌لانسا هێزێ یه‌ ل رۆژهه‌لاتا ناڤین،بتایبه‌تى رێگرتنه‌ ل دروستبوونا هێزێن هه‌رێمى كو ببنه‌ نوونه‌رێن ئه‌مریكا ل ده‌ڤه‌رێ،هه‌روه‌سا هه‌ردو وه‌لاتان به‌رژه‌وه‌ندیێن خوه‌ یێن تایبه‌ت هه‌نه‌،بۆ نموونه‌ توركیا بۆ پاراستنا به‌لانسا ئابوورى و سیاسى ل گه‌ل ئورۆپا و ئیرانێ پێدڤى ب په‌یوه‌ندیێن نورمال و ب هێز هه‌یه‌ ل گه‌ل رووسیا،دیسا هه‌ولێن توركیا بۆ ڤه‌كرنا ده‌رگه‌هێن جودا بۆ لاوازكرنا گڤاشتنێن ئورۆپا و ئه‌مریكا یه‌،ئه‌و ژى گۆت:هه‌روه‌سا رووسیا هه‌ول دده‌ت گڤاشتنێن ئورۆپا ل سه‌ر موسكۆ كێم بكه‌ت،ب رێیا به‌رفره‌هبوونا په‌یوه‌ندیێن رووسى و ئه‌نقه‌ره‌،دیسا هه‌ولدانا رووسى بۆ هندێ یه‌ كو هێرشێن ئابوورى ل سه‌ر رووسیا سڤك بكه‌ت،بتایبه‌تى ژلایێ ئێكه‌تیا ئورۆپى ڤه‌.

زیرَه‌ڤان به‌روارى ئه‌و ژى دیاركر:كورد دێ هێنه‌ ب كارئینان ژلایێ رووسیا ڤه‌ بۆ رازیكرنا توركیا ب تایبه‌تى هه‌كه‌ رووسیا بریارا گوهۆرینا سیسته‌مێ سوورى بده‌ت،دیسا به‌رفره‌هبوونا هێزا رژێما سووریێ د به‌رژه‌وه‌ندا رووسیا دا نینه‌،ب تایبه‌تى پشتى زێده‌بوونا پێشێلكاریێن هێزێن بشار ئه‌سه‌دى ب رێككه‌فتنێن هه‌رێمى،وه‌ك رێككه‌فتنا ئه‌ستانا كو رووسیا ب چاره‌سه‌ر دزانیت بۆ كێشه‌یا سووریێ،ئه‌و چه‌ند ژى گۆت:كورد فاكته‌ره‌كێ گرنگه‌ ل رۆژئاڤا یێ كوردستانێ،هه‌روه‌سا لێك نێزیكبوونا ئه‌مریكا و په‌یه‌دێ دێ بیته‌ سه‌ده‌مێ گوهۆرینا سیاسه‌تا رووسیا به‌رامبه‌ر كوردان و ب تایبه‌تى پشتى لاوازبوونا هه‌ڤكاریا له‌شكرى دناڤبه‌را رووسیا و ئه‌مریكا دا و راوه‌ستاندنا هه‌ڤكاریا ئه‌سمانى زێده‌تر كاودانێن كوردان ل رۆژئاڤا ئالوزكرینه‌ بۆ هه‌لبژارتنا ئێك ژ هێزێن گرنگ ئه‌و ژى ئه‌مریكا یان ژى رووسیا،له‌ورا نێزیكبوونا توركیا و رووسیا و به‌رفره‌هبوونا هه‌ڤكاریا كوردان ل گه‌ل ئه‌مریكا دێ ڤه‌رێژێن نه‌رێنى هه‌بن ل سه‌ر كوردان.

ئەڤرۆ نیۆز،زنار تۆڤی:

حوکمه‌تا رووسیا ب فه‌رمی بۆچوونا خوە ل ‌سه‌ر ئاماده‌كاریێن توركیا بۆ هێرشکرنا‌ سه‌ر عه‌فرینێ ده‌ربری و راگەهاند کو رووسیا ل ‌گه‌ل هندێ دایە کو‌ كه‌س ئاخا  سووریا نه‌به‌زینیت و یاسایێن وێ نه‌شكێنیت، هه‌روه‌سا داخوازکریە کو‌ رێز ل‌ سه‌روه‌ریا سووریا بگرن.

رۆژناما (حوریه‌ت) یا توركی د‌ نووچەیەکێدا بەلاڤکریە ‌ كو د‌ كۆنگرێ رۆژنامه‌ڤانی یێ حەفتیانه‌ یێ خوە دا، ماریا زاخارۆڤا پەیڤدارا وه‌زاره‌تا ده‌رڤە یا رووسیا هه‌لویستی رووسیا ئاشكراکریە ل بارێ ئاماده‌كاریێن توركیا بۆ هێرشكرنا‌ سه‌ر عه‌فرینێ.

ماریا یێ گۆتیە ژی “رووسیا هه‌ر ل دەستپێکێ‌ هه‌لویستێ وێ یێ روون بوو‌،دەربارەی بارودۆخێ سووریا،هەروەسا دڤێت رێز ل ئێکپارچه‌یا ئاخا سووریێ بهێته گرتن و رێز ژی ل سه‌ره‌وه‌ریا وێ بهێته گرتن،هەروەسا ل سووریا زۆر نه‌ته‌وێن جۆدا هەنە،لەورا پێدڤیە ئەو ب خوە كێشێن خوە چاره‌سه‌ر بكه‌ن نه‌كو وەلاتەکێ دی بچیتە ناڤ ئاخا وان.

بەحس ل هندێ ژی کریە،کو ل داهاتیێ سووریێ دا دڤێت كوردان پێگه‌هەکێ باش هه‌بیت، چونكی‌ ئه‌و ژی پێكهاته‌کێ سه‌ره‌كی یێ وی وەلاتینە و دڤێت بۆچوونا ‌وان ژی بهێتە وه‌رگرتن.