ئەڤرۆ نیوز ، نەوزاد ھلۆری:
بەراورد ل گەل پارێزگەھێن دن یێن ھەرێما کوردستانێ ب تایبەتی ژی بەرامبەر ھەولێر و سلێمانی ل گورەی ھژمارا رونشتڤانا پارێزگەھا دھۆک کێمترین کارگەھێن پێشەسازی ھەنە.
دڤی واریدا “رێبین فەتاح ” ڤەکولەرێ ئابووری ل پارێزگەھا ھەولێر بۆ ئەڤرۆ نیوز گۆت: (پارێزگەھا دھۆک ئێکە ژ وان پارێزگەھێن باشوورێ کوردستانێ کو د ھەموو سکتەران دا یا پشتگوە ھاڤێتیە و کێمترین پرۆژەیێن وەبەرھێنان و پێشەسازی و بارزگانی و خزمەتگوزاری لێ دھێنە ئەنجام دان ھەر بوو نموونە ژ ژ سەرجەمێ ١٨٢ کارگەھێن پێشەسازیێن ناڤنجی بتنێ ٢٩ کارگەە ل دھۆکێ ھەنە ، و دیسان ژ سەرجەمێ ٩٢ کارگەھێنێن پێشەسازیێن مەزن تنێ ١١ کارگەە ل دھۆکێ ھەنە ، و دیسان ژ سەرجەمێ ١٠٣٨٧ کارگەھێن بچوکێن پێشەسازی بتنێ ١٧% دکەڤنە سنوورێ پارێزگەھا دھۆک کو ئەڤ یەک ژی رێژەیەکا زۆر کێمە بەراورد ل گەل ھژمارا رونشتڤانێن وێ)
زێدەتر گۆت: (ژ ئەگەرا نە ھەڤسەنگی و نە ئێکسانیا دابەشکرنا ئەوان کارگەھان ل سەر پارێزگەھێن ھەرێمێ زیانێن ھەری مەزن ب پارێزگەھا دھۆک و خەلکێ وێ کەفتیە ژبەرکو ئەڤ یەک بویە سەدەم کو ھژمارەکا زۆر یا وەلاتیان بێ کار ب مین ئانکو رێژەیا بێکاریێ بەرامبەر ھەردوو پارێزگەھێن ھەولێر و سلێمانیێ زور بلندە)

ئەڤرۆ نیوز ، نەوزاد ھلۆری:
دەستەیا گەشت و گوزار یا سەر ب وەزارەتا گەشت و گۆزارا ھەرێما کوردستانێ ب رێیا ئاگەھداریەکێ مەترسیەکا مەزن لسەر گەشت و گوزارا ھەرێما کوردستانێ ئاشکرا دکەت کو ئەو ژی دەلیڤە دیتنا گەشتیارایە ژلایێ خودانێن ئوتێل و موتێلان و ددەتن دیارکرن ئەڤ یەک مەترسیا ڤەرەڤاندنا گەشتیاران لسەر ھەرێمی درۆست دکەت.
نادر روستایی ئاخفتنکەرێ دەستەیا گەشت و گوزارا ھەرێما کوردستانێ بۆ ئەڤرۆ نیوز گۆت: ( ھندەک ژ ئوتێل و موتێلان ھاتنا ھژمارەکا زۆر یا گەشتیار و مێھڤانان بو باشوورێ کوردستانێ ب مەرەما پشکداریکرن د جەژنا رەمەزانا پیروز دا بخوە ب دەلیڤە دبنن بو گرانکرنا ئوتێل و موتێلان و مفا وەرگرتن ژ گرێبەستێن کومپانیێن گەشت و گوزاری ، و زانیاری ھەنە کو پشکەک ژ خودانێن ئوتێل و موتێلان ئەڤ یەکێ ب دەلیڤە ببینن کو کریا ئوتێل و موتێلان لسەر وان ب رەنگەکێ بەرچاڤ گران بکەن ب تایبەتی ژی مفا وەرگرتن ل دەما ئەنجامدان و گرێدانا گرێبەستان کو بەری نھا ل گەل کومپانیێن گەشتیاری ب رەنگەکێ دن ئیمزاکرینە)
زێدەتر گۆت: (ئەم ئاگەھداریا ئەوان ئوتێل و موتێلان دکەین کو ڤێ یەکێ مەترسیەکا زۆر بو سەر گەشت و گوزارا ھەرێما کوردستانێ ب گشتی و ئوتێل و موتێلان ب تایبەتی ھەیە و دێ ناڤ و دەنگیێن ھەرێما کوردستانێ دوارێ گەشتیاری دا کێم کەت و کارتێکرنەکا زۆر لسەر ھاتنا گەشتیاران ژی کەتن)
روستایی د درێژاھیا ئاخفتنێن خودا دیارکر ژی کو ئەو دێ پێرابوونێن قانونی دژی ھەر ئوتێل و موتێلەکێ وەرگرن کو ب رەنگەک ژ رەنگان گەشتیار و مێھڤانان ب دەلیڤە ببینن.