ئەڤرۆ نیوز :
ژبەر سەدەما پوتەنەدان ب ژیانا وەلاتیان و درۆستکرنا خزمەتگوزاریان ژلایێ حکومەتا ھەرێما کوردستان و کارگێریا خوجھی یا سلێمانیێ سەرجەم رێڤەبەرێن دام و دەزگەھێن حکومەتێ ل قەزا کفری یا سەر ب کارگێریا دەڤەرا گەرمیان ل پارێزگەھا سلێمانیێ دەستکارکێشا.
ئەڤ دەستکارکێشانا ھەموو رێڤەبەرێن قەزا کفری پشتی دەستکارکێشانا قایمقامێ قەزا کفری ھات ل بارا پوتنەدان ب دەڤەرا کفری و دەروبەران ژلایێ حکومەتا ھەرێما کوردستانێ ڤە
ئەڤرۆ نیۆز،زنار تۆڤی:
وه‌كو پووته‌دان ب مالباتێن خێزانێن شه‌هیدێن شه‌رێ دژی تیرورستێن داعش و ژپێخه‌مه‌ت باشكرنا ژیارا خێزانێن وان ئه‌ڤرۆ 20-6-2017 ل هولا كونفرانسان ب ئاماده‌بونا فه‌رهاد ئه‌تروشی پارێزگه‌رێ دهوكێ و چه‌ند به‌رپرسێن حزبی و ئیداری وله‌شكری و مالباتێن شه‌هیدێن شه‌رێ دژی تیرورستێن داعش رێورسمه‌كێ تایبه‌ت هاته ئه‌نجامدان و هاریكاری ل سه‌ر(150) خێزانێن شه‌هیدان ل سه‌نته‌رێ دهوكێ هاتنه به‌لاڤكرن.
ل ده‌ستپێكێ پارێزگه‌رێ دهوكێ په‌یڤه‌ك پێشكێشكر بناڤێ كارگێریا پارێزگه‌ها دهوكێ ده‌ست خوشی ل ده‌زگه‌هێ بارزانی یێ خێرخوازی كر و سوپاسیا فه‌رمانده شێخ سیروان بارزانی كر كو ئه‌ڤ ده‌ستپێشخه‌ریه كریه كو هاریكاریێن دراڤی ل سه‌ر هه‌موو شه‌هیدێن شه‌رێ تیرورستێن داعش به‌لاڤكه‌ت.
پارێزگه‌رێ دهوكێ ته‌كه‌زكر كو خێزانێن شه‌هیدا پێدڤی ب هاریكاریا هه‌موو لایه‌كی هه‌یه و ئه‌ركه‌كێ نه‌ته‌وه‌یی و نیشتمانی و ئاینی یه ل سه‌ر مللێن هه‌موویان کو هاریكاریا وان بكه‌ن و ئاماژه دا دو خالا یا ئێكێ بابه‌تێ ئه‌نجامدانا ریفراندومێ كو دڤێت هه‌موو لایه‌ن پشكداربن چونكی بابه‌ته‌كێ نیشتیمانی ونه‌ته‌وه‌یی یه و ملله‌تێ كورد گه‌له‌ك قوربانی ژبۆ ئازادی و سه‌رخوه‌بوونێ داینه و ئەڤە یا گرێدایه ب هه‌موو خه‌لكێ كوردستانێ ڤه و ژ كه‌ڤندا ملله‌تێ كورد گه‌له‌ك قوربانی بۆ ئازادی و سه‌رخوه‌بوونا كوردستانێ داینه.
هه‌روه‌سا گوت:دڤێت خه‌لكێ كوردستانێ ب خوە بریارێ ل سه‌ر چاره‌نڤیسێ خوە بده‌ن،لێ جهێ داخێ یه هنده‌ك دبێژن ریفراندۆم بابه‌ته‌كێ كه‌سوكی و حزبی یه و ئه‌م دبێژین ئه‌ڤه بریارا خه‌لكێ كوردستانێ یه و گه‌ل دێ قه‌ستا سندوقێن ده‌نگ دانێ كه‌ت و برێكێن ئاشتیانه چاره‌نڤیسێ خوە دیاركه‌ت و مافێ خوە بده‌ستڤه ئینیت .
پاشی په‌یڤا رێڤه‌به‌ریا گشتی یا شه‌هید و ئه‌نفالا و پێشمه‌رگێ كوردستانێ و ئێكه‌تیا زانایێن ئاینی ئیسلامی كوردستان لقێ دهوك و په‌یڤا بنه‌مالێن شه‌هیدا و په‌یڤا ده‌زگه‌هێ بارزانی یێ خێرخوازی هاتنه خواندن، هه‌موویان په‌سنا رولێ شه‌هیدان و قوربانیدانا هێزێن پێشمه‌رگێ كوردستانێ ل دژی تیرورستان كر و داخواز ژ ده‌وله‌مه‌ند وخودان شیانان كر كو چاڤ ل ده‌ستپێشخه‌ریا فه‌رمانده سیروان بارزانی بكه‌ن و هاریكاریكاریا مالباتێن شه‌هیدان بكه‌ن،هه‌روه‌سا داخواز ژ خه‌لكێ كر كو ل رۆژا 25-9-2017 قه‌ستا سندوقێن ده‌نگدانێ بكه‌ن و دەنگی ب بەلێ بۆ سه‌رخوه‌بوونێ بدەن وجانێ شه‌هیدان شاد بكه‌ن.
پاشی ده‌ست ب به‌لاڤكرنا هاریكاریا ل سه‌ر خێزانێن شه‌هیدان هاته كرن.
هه‌ژی گوتنێ یه پتریا شه‌هیدێن شه‌رێ داعش ل سنورێ پارێزگه‌ها دهوكێ نه، وه‌كو ده‌ست پێشخه‌ری فه‌رمانده سیروان بارزانی بریار دایه کو هاریكاریه‌كا دراڤی یا ئێك ملیۆن دیناری بۆ هه‌موو شه‌هیدێن دژی تیرورستێن داعش ب رێیا ده‌زگه‌هێ بارزانی یێ خێرخوازی به‌لاڤكه‌ت،هەروەسا سوبه‌هی ودوزبه ژی به‌رده‌وامی ب لاڤكرنا ڤان هاریكاریا دێ هێته‌دان ل ده‌ڤه‌رێن ئامێدیێ وزاخو و ئاكرێ و به‌رده‌ره‌ش و دێ پتری 1410 خێزانان ژڤێ هاریكاریێ سودمه‌ندبن.
ئه‌ڤرۆ نیۆز،زنار تۆڤى:
ل شه‌ڤێن ره‌مه‌زانێ دا ل باژێرێ زاخۆ چه‌ندین چالاكیێن هه‌مه‌جور بۆ گه‌نجێن ڤى باژێرى هاتینه پێشكێش كرن و هه‌ر شه‌ڤ گه‌نجان ژى ب رێژه‌یه‌كا باش پشگدارى د ڤان چالاكى و به‌ریكانان دا كریه.
حه‌مید سه‌لمان خۆرشید به‌رپرسێ ناڤه‌ندا بالا یا ئێكه‌تیا لاوێن دیمۆكراتا كوردستانێ بۆ ئه‌ڤرۆ نیۆز دیاركر:هه‌ر ژ شه‌ڤا ئێكێ یا ره‌مه‌زانا پیرۆز ناڤه‌ندا بالا یا ئێكه‌تیا لاوێن دیمۆكراتا كوردستانێ ب هه‌ڤكارى ل گه‌ل شاره‌وانیا زاخۆ،ل ناڤا پاركا شه‌هیدان ل باژێرێ زاخۆ چه‌ندین به‌ریكانێن زانستى و ره‌وشه‌نبیرى و هونه‌رى و ئایینى بۆ گه‌نجێن زاخۆ رێكخستینه و د هه‌ر شه‌ڤه‌كا ره‌مه‌زانێ دا ب سه‌دان گه‌نجێن زاخۆ پشكدارى د ئه‌ڤان چالاكیان دا كرینه و گۆت ژى:د شه‌ڤێن ره‌مه‌زانێ دا گه‌نجێن زاخۆ ب خواندنا هه‌لبه‌ستان و ب گۆتنا سترانان شه‌ڤێن مه گه‌رمتر لێكرینه،هه‌روه‌سا چه‌ندین گه‌نج شیان به‌رهه‌م و به‌هره‌یێن خوه دناڤا ڤان شه‌ڤان دا دیار بكه‌ن و شیان خۆ بۆ خه‌لكێ بده‌نه نیاسین و ده‌لیڤه بۆ وان په‌یدابوویه كو ئه‌و بشێن به‌رده‌وامیێ بده‌نه كارێ خوه،هه‌روه‌سا باوه‌ریه‌كا مه‌زن ژى بۆ وان گه‌نجان چێبوویه،ناڤهاتى دیاركر ژى:مه به‌ریكانێن فلكلۆرى یێن كورده‌وارى ژى هه‌بوون و ئه‌م شیان ب رێیا ڤان شه‌ڤان یاریێن كورده‌وارى ژى بۆ گه‌نجێن خوه بده‌ینه دیاركرن،هه‌روه‌سا مه چه‌ندین برگێن ب كه‌نى ژى بۆ گه‌نجێن خوه پێشكێش كرینه،دیسا ل هه‌موو شه‌ڤان رێژه‌یه‌كا مه‌زن یا گه‌نجان ژى پشكدارى دڤان به‌ریكانان دا كریه،ئه‌ڤه بوویه هوكاره‌ك كو گه‌نجێن مه نه میننه دناڤا بازارى دا و قه‌ستا ڤێ پاركێ بكه‌ن،هه‌روه‌سا هه‌تاكو ده‌مێ پاشیڤێ مه هه‌ر شه‌ڤ چالاكى ئه‌نجامداینه و شه‌ڤ بۆ شه‌ڤێ پتر گه‌نج به‌رهه‌ڤبووینه،دیاركر ژى:هه‌ر چه‌نده مه گرنگى ب به‌ریكانێن زانستى ددا و لێ دیسا شه‌ڤه‌كێ ژى مه یاریا گۆستیلانێ كریه،زێده‌بارى ڤێ چه‌ندێ ئه‌و ناڤه‌ندێن دى یێن ب سه‌ر زاخۆ ڤه مه چه‌ندین خۆلێن ته‌پاپێ و یاریێن گۆستیلانێ بۆ گه‌نجێن وان ژى ئه‌نجامداینه،هه‌روه‌سا مه خۆله‌كا سه‌رتراشینێ ژى بۆ 85 قوتابیان د ره‌مه‌زانێ دا ڤه‌كریه و ئه‌م دێ به‌ردوام بین ل سه‌ر ڤان خزمه‌ت و چالاكیان بۆ گه‌نجێن باژێرێ خوه.
ئەڤرۆ نیوز ، مه‌حمود نهێلى
به‌رپرسێ هوبا چاندنا دێره‌لۆك بۆ ئه‌ڤرۆ دیار كر، كو رێژه‌یه‌كا ده‌رمانێ ژ ناڤبرنا كرم و كێزان گه‌شتیه به‌رده‌ستێ وانا و ل سه‌ر جوتیارێن ده‌ڤه‌رێ دا ب نیڤ بها دهێته دابه‌شكرن.
عسمه‌ت ئیبراهیم به‌رپرسێ هوبا چاندنا دێره‌لۆك بۆ ئه‌ڤرۆ نیوز دیاركر، كو دوو جورێن ده‌رمانێ ژ ناڤبرنا كرم و كێزان و كولیان گه‌هشتیه هوبا وانا بناڤێ فلاش و كاراتى و گۆت: ( ئه‌ڤ هه‌ر دوو ده‌رمانه بۆ پاراستنا ده‌رامه‌تى وه‌ك باجانسوركى و خیارى و هه‌روه‌سا داروبارى و شینكاتى دهێته بكار ئینان).
ناڤبرى دیار ژى كر، كو ئه‌ڤ ده‌رمانه ژلایێ حكومه‌تێ ڤه هاتیه دابینكرن و ب بهایه‌كى كێم دێ ب سه‌ر جوتیاران دا هێـته دابه‌شكرن و ئاشكرا كر، كو مه‌ره‌م ژڤێ یه‌كێ بۆ هاندانا جوتیارى یه كو گرنگیه‌كا پتر ب چاندنێ بده‌ن و ده‌رامه‌تێ وان ب سه‌ر كه‌فتیانه به‌رهه‌مى بینت.
ئەڤرۆ نيوز:
جۆن مەکین سیناتۆرێ ئەمریکی د داخۆیانیەکێ دا بۆ دەزگەھێن راگەھاندنا ئەمریکا دیار کر کو نھا رژێما ئیرانێ زێدەتر ژ داعشێ مەترسیان بۆ ئارامیا جیھانێ دروست دکەت و ئیران ب رەنگەکێ راستەوخوە ھێرشی بەرژوەندیێن مە دکەت، ژ بەر ھندێ ژی دەم یێ ھاتی کو رژێما ئیرانێ بھێتە گوھۆڕین، ئەز ھێڤیدارم کو ئەو سۆزێن ترامپی ل دۆر ئیرانێ دایە خەلکی نھا بجە بینیت.
مەکین د بەردەوامیا ئاخڤتنا خوە دا ئەو یەک ژی دیار کر کو مخابن سیاسەتا شاش یا ئۆبامای وەسا کر کو ئیرانێ شیا جارەکا دی خوە ب ھێز کەت و نھا مەترسیا رژێما ئیرانێ گەلەکێ زێدەتر بوویە و ئیرانێ دڤێت ب رێیا عیراقێ و سووریایێ خوە بگەھینتە ئوردنێ و ئەو یەک مەترسیەکا مەزنە و ژ بەر ھندێ ژی دڤێت ئەمریکا دەست ب بەرنامێ خوە بۆ گوھۆڕینا رژێما ئیرانێ بکەت و ھەکە ئەم گیرو بین پاشی نەشێین رێگریێ ل ب ھێزبوونا وی وەلاتی بگرین، ژ بەر ھندێ ژی دڤێت ترامپ ل سووریێ و عیراقێ رێگریێ ل ب ھێزبوونا ئیرانێ بگریت و گۆت: (دڤێت ئەمریکا پشتەڤانیێ ل ئۆپۆزسیۆنا ئیرانی ژی بکەت، چونکو ئەو دێ شێن رۆلەکا بەرچاڤ بۆ لاوازکرنا رژێما نھا یا ئیرانێ بگێرن).
ئه‌ڤرۆ نیۆز،زنار تۆڤى:
عه‌لى عه‌ونى ئه‌ندامێ سه‌ركردایه‌تیا پارتى دیمۆكراتى كوردستان ل سه‌ر چه‌ندین پرسێن گرنگ د دیداره‌كێ دا بۆ ئه‌ڤرۆ نیۆز دیاركر:ژلایێ قانوونى ڤه هه‌كه ئێكه‌تى نیشتیمانى كوردستان ل گه‌ل پارتى دیمۆكراتى كوردستان ملێ خوه بده‌ته به‌ر دێ په‌رله‌مانێ كوردستانێ هێته كاراكرن،هه‌روه‌سا پارتى و ئێكگرتوو ژى دشێن په‌رله‌مانێ كوردستانێ كارا بكه‌ن،هه‌روه‌سا هه‌كه رێژه‌یا قانوونى ته‌مام ببیت،ئه‌و دشێن پێكڤه ده‌سته‌كه‌كا نوو و یاسایه‌كا نوو بۆ په‌رله‌مانى ژى دانن،دیسا پارتى گه‌له‌ك هه‌ولدان كو ئه‌ڤ په‌رله‌مانێ بوویه ئێخسیرێ ده‌ستێ بزاڤا گۆران رزگار بكه‌ت،چونكى وان په‌رله‌مان كربوو ناڤه‌نده‌كا موزایه‌داتێن سیاسى بۆ خوه و كربوو جهێ ململانه‌كا دوور ژ به‌رژه‌وه‌ندا خه‌لكێ كوردستانێ،بتنێ كارێ وان بوو،كو بێ رێزیێ ل حوكمه‌تا هه‌رێمێ بگرن و بۆختانا بۆ چێكه‌ن،له‌ورا پێدڤیه په‌رله‌مانێ كوردستانێ بهێته كاراكرن،هه‌روه‌سا نوكه ئێكگرتوو و ئێكه‌تى ژى نه‌شێن ژ ترسا گۆرانێ چ بریاران بده‌ن،هێشتا دبێژیت:هه‌كه ستافه‌كێ نوو بۆ سه‌رۆكاتیا په‌رله‌مانى بهێته دانان و په‌رله‌مان چاڤدێریا كارێن حوكمه‌تێ بكه‌ت،زه‌مینێ خۆش بكه‌ت بۆ رێكخستنا ناڤمالا كوردى و هه‌روه‌سا بۆ هه‌لبژارتنێن بهێن په‌رله‌مانه‌كێ باشتر و كاراتر بهێته ده‌ست نیشانكرن،ئه‌ڤ چه‌نده زۆر یا پێدڤیه بهێته كرن،چونكى مه‌ترسیا هندێ ژى هه‌یه كو به‌لایه‌كا دیتر بۆ هه‌رێما كوردستانێ په‌یدا ببیت،دناڤبه‌را حه‌شدا شه‌عبى و هه‌رێما كوردستانێ دا شه‌ر و ئالۆزى په‌یدا ببن و دیسا جاره‌كادى هه‌لبژارتن ل ده‌مێ خوه نه‌هێنه ئه‌نجامدان،له‌ورا پێدڤیه په‌رله‌مان ژیێ خوه درێژ بكه‌ت،داكو ئه‌ڤ حوكمه‌ته ژى شه‌رعیه‌تا خوه ژ ده‌ست نه‌ده‌ت،له‌ورا پێدڤیه په‌رله‌مان بهێته كاراكرن،عه‌لى عه‌ونى زێده‌تر دیاركر:بزاڤا گۆران و كۆمه‌لا ئیسلامى وه‌سا هزر دكه‌ن،كو هه‌كه ئه‌و ل گه‌ل لایه‌نێن سیاسى پشكداریێ د پرسا ریفراندۆمێ دا نه‌كه‌ن،ئێدى ریفراندۆم ناهێته‌كرن،لێ ریفراندۆم دێ هێته ئه‌نجامدان و هه‌روه‌سا گه‌له‌ك ژ لایه‌نگرێن دناڤ وان هه‌ردو لایه‌نان ژى دا دێ ده‌نگێ خوه ده‌نه ریفراندۆمێ،چونكى هه‌ر تاكه‌كێ كورد كو ژ چ لایه‌نێ حزبى بیت،حه‌ز دكه‌ت كوردستان ب بیته ده‌وله‌ت،له‌ورا رێژه‌یا ده‌نگێن ب به‌لێ بۆ پرسا ریفراندۆمێ ل جادا كوردستانێ دێ ل ده‌رڤه‌ى ته‌خمینكرنا وان لایه‌نان بیت،لێ ده‌رگه‌ه یێ ڤه‌كریه و پێدڤیه ئه‌و لایه‌ن ژى بهێنه دناڤ مه‌یدانا سیاسى دا،دڤێت ئه‌و ده‌ست ژڤێ ركمانێ به‌رده‌ن،چونكى بابه‌تێ ریفراندۆمێ نه گرێدایى چ لایه‌نێن سیاسى یه ل هه‌رێما كوردستانێ،به‌لكو ئه‌ڤه پرسه‌كا نه‌ته‌وه‌یى یه و یا گرێدایه ب هه‌موو خه‌لكێ كوردستانێ ڤه،عه‌لى عه‌ونى ئه‌و ژى دیاركر:ئه‌ڤه پترى سه‌د سالانه ئه‌م ل بن ده‌ستیێ دا دژین ل عێراقێ،هه‌روه‌سا نوكه عێراق وه‌لاته‌كێ هه‌لوه‌شیایه و هه‌روه‌سا دڤێت ئه‌م خوه به‌رهه‌ڤ بكه‌ین ل ده‌مێ هه‌لوه‌شاندنا ڤێ ده‌وله‌تێ،چونكى ریفراندۆم و سه‌ربخۆیى مافێ مه‌یه و ئه‌م دخوازین وه‌لاتێن جیهانى ژى هاریكاریا مه بكه‌ن و هه‌كه هاریكاریا مه ژى نه‌كه‌ن،بلا دوژمناتیا مه نه‌كه‌ن،له‌ورا هه‌تاكو نوكه ده‌وله‌تێن هه‌رێمى و هه‌روه‌سا یێن دوور ژى وه‌كى ئه‌مریكا و روسیا ژى هه‌لویستێ وان هه‌لویسته‌كێ خراب نه‌بوویه،ئه‌م خالێن ئه‌رێنى تێدا دبینین.
ئەڤرۆ نیۆز،زنار تۆڤی:
کۆمپانیا ڤایبەری دێ خزمەتگوزارییەکا نوو بۆ ب کارھێنەرێن پڕۆگرامێ تۆڕا پەیوەندیا ڤایبەر ی بەردەست کەت.
ماڵپەرێن تەکنۆلۆژییا یێن جیھانی ئاماژێ ب هندێ دکەن، کو ل داھاتیەکێ نێزیکدا،کۆمپانیا ڤایبەر ی دێ خزمەتگوزاریا ڤەکرنا ماڵپەری دناڤ ڤایبەری دا،بۆ ب کارھێنەرێن ڤێ پڕۆگرامی زێدەکەت.
هەروەسا ئەڤ خزمەتگوزارییە بۆ هندێ یە،کو ل دەمێ چاتکرنێدا بێی کو تۆ د ڤی پڕۆگرامی دا ب چییە ژ دەرڤە،هەکە ھەر ماڵپەرەکێ تە پێدڤی پێ هەبیت، راستەوخۆ دێ ڤایبەری وەک براوسەرەکێ ب کار ئینی و دێ وی مالپەری ڤەکەی.
پڕۆگرامێ ڤایبەری ب کارھێنەرەکێ زۆر ل سەرانسەری جیھانێدا ھەیە، ھەروەسا ب ئێک ژ باشترین پڕۆگرامێن تۆڕا پەیوەندیان دهێتە دانان.
ئەڤرۆ نیۆز،زنار تۆڤی:
یەدەکێ نەفتا هەرێما کوردستانێ ژ یەدەکێ نەفتا پێنج وەلاتێن بەرهەمهێنەرێن نەفتێ پترە.
زانیاری دیاردکەن کو نەفتا کوردستانێ کوالێتیەکا زۆر باش ل سەر ئاستێ جیهانێ هەیە،چونکی یا نێزیکی روویێ ئەردی یە و جهێ جۆگرافیا کێلگەیێن نەفتێ دباشن و دەرئینانا نەفتێ ژی یا ب ساناهیە،هەروەسا کوردستان ژلایێ بەرهەمئینانا نەفتێ ڤە،پلا 18 یا جیهانی هەیە.
زانایێن وارێ نەفتێ ئاماژێ ب هندێ دکەن،کو هەرێما کوردستانێ 45 ملیار بەرمیلێن نەفتا یەدەک هەنە،کو ئەڤە زێدەترە ل یەدەکێ قەتەرێ و ل گەل یەدەکێ هەر پێنج وەلاتێن گابۆن،ئندۆنیسیا، ئیکوادۆر،ئەنگۆلا و جەزائیرێ پێکڤە،کو ئەو پێنج وەلات پێکڤە خۆدانێن 35 ملیار بەرمیلێن نەفتا یەدەکن.
هەروەسا ژ ئەگەرێ سەربەخۆیا هەرێما کوردستانێ دێ ئابوورێ عێراقێ ژی بەرەف لاوازیێ ڤە چیت و دێ پشکا وێ ل رێکخراوا وەلاتێن هنارتنا نەفتا جیهانی دا “ئۆپک”ێ دا کێم بیت،چونکی زێدەتر ژ %31 یا نەفتا عێراقێ ل هەرێما کوردستانێ دایە.
ئەڤرۆ نیوز ، نەوزاد هلوری:
شڤێدی چەکدارێن داعش خوە گەهاندە سنورێ مێحوەرێ دوزخورماتو و پشتی سێ دەمژمێرێن شەرەکێ گران پێشمەرگیان شیان هێرشا داعش بشکێنن و هژمارەکا چەکدارێن وان ژی بکوژن.
ژێدرەکێ دناڤا هێزێن پێشمەرگەی ل مێحوەرێ دوزخورماتو تایبەت بو ئەڤرۆ نیوز گۆت: (شڤێدی دەردورێن دەمژمێر 1:00 ب شەڤ چەکدارێن داعش ژ سێ لایان ڤە شیان خوە بگەهینن سەنگەرێن پێشمەرگەی ل گوندێ زەرگە ل مێحوەرێ دوزخورماتو ل پارێزگەها
کەرکوکێ ، ھێزێن پێشمەرگەی ژی ب توندی بەرسڤا وان دا ، پشتی سێ دەژمێران ژ شەرەکێ گران ب هاریکاریا فروکێن هەڤپەیمانان هێرشا داعش هاتە شکاندن و هژمارەکا چەکدارێن داعشێ هاتینە کوشتن و تەرمێن وان کەفتینە دەستێن پێشمەرگەیان)
زێدەتر گۆت: (ب مخابنیڤە هێزێن پێشمەرگەی شەهیدەک هەیە کو خەلکێ پارێزگەها حەلەبچەیە ل گەل بریندارەکێ سڤک)
ل گۆرەی زانیارێن ئەوی ژێدەری شەرێ شڤێدی ب هێزترین شەربوویە ل مێحوەرێ دوزخورماتو و چەند ترومبێلەکێن TNT کری و چەکدارێن خوە کوژ ژی دناڤ دا هەبون بەلێ هەموو هاتن ژناڤبرن.
شەرێ شڤێدی دبیتە شەرێ سێ ل مەها رەمەزانا پیرۆز کو دناڤبەرا هێزێن پێشمەرگەی و داعش ل دەڤەرێ دروست دبیت.
ئه‌ڤرۆ نیۆز،زنار تۆڤى:
میدیایێن توركى وه‌سا داینه دیاركرن،كو هه‌تاكو نوكه بتنێ مه‌هه‌پێ وه‌ك چاره‌مین پارتا مه‌زن دناڤ توركیا دا،دژایه‌تیا خوه بۆ ریفراندۆمێ و سه‌ربخۆیا كوردستانێ ده‌ربریه،هه‌روه‌سا ئاكپارتى ژى كو مه‌زنه پارتا ده‌ستهه‌لاتداره ل توركیا هه‌تاكو نوكه بێده‌نگى هه‌لبژارتیه و هه‌ده‌پێ ژى پشته‌ڤانیا خوه بۆ ریفراندۆما كوردستانێ دوپاتكریه.
ژلایه‌كێ دیڤه گۆتیه،نوكه دناڤ په‌رله‌مانێ توركیا دا بتنێ 4 پارتێن سه‌ره‌كى چووینه دناڤ په‌رله‌مانى دا،ئه‌و ژى ئاكپارتى و جه‌هه‌په و هه‌ده‌په و مه‌هه‌په نه،پارتێن دى یێن توركیا،ژبه‌ركو نه شیاینه به‌ربه‌ستا هه‌لبژارتنا بشكێنن كو رێژا 10% یا ده‌نگانه،له‌ورا وان پارتان ئێك كورسییێ په‌رله‌مانى ژى نینه.
د ڤان هه‌لبژارتنێن دوماهیێ دا ئاكپارتى 317 كورسیێن په‌رله‌مانى ب ده‌ستڤه ئیناینه و شیایه بتنێ حوكمه‌تێ پێك بینیت،هه‌تاكو نوكه ئاكپارتیێ ب فه‌رمى دژایه‌یتا خوه بۆ سه‌ربخۆیا كوردستانێ رانه‌گه‌هاندیه،هه‌روه‌سا بتنێ وه‌زاره‌تا ده‌رڤه و هنده‌ك رایه‌دارێن حوكمه‌تا توركیا راگه‌هاندنه‌ك به‌لاڤكریه و گۆتیه،نوكه ده‌م نه‌یێ گونجایه بۆ سه‌ربخۆیا كوردستانێ و ئه‌م ل گه‌ل ئێكپارچه‌یا ئاخا عێراقێ داینه،به‌لێ هه‌تاكو نوكه ئاكپارتى چ به‌یاننامێن فه‌رمى دڤى وارى دا به‌لاڤ نه‌كرینه،هه‌روه‌سا ب فه‌رمى دژایه‌تیا خوه بۆ ریفراندۆمێ دیار نه‌كریه،دیسا هنده‌ك ئه‌ندام په‌رله‌مانێن ئاكپارتى ژى ب ئاشكرایى داخواز ژ پارتا خوه كرییه كو پشتگیریا سه‌ربخۆیا كوردستانێ بكه‌ن،چونكى ب چ ره‌نگان نابیته مه‌ترسى بۆ سه‌ر ئاخا توركیا.
میدیایا توركیا ئه‌و ژى دیاركریه،كو جه‌هه‌پێ ژى 134 كورسى دناڤ په‌رله‌مانێ توركیا دا هه‌نه،هه‌تاكو نوكه وان چ داخویانى ل سه‌ر ریفراندۆمێ و سه‌ربخۆیا كوردستانێ نه گۆتینه،هه‌ر چه‌نده هنده‌ك ژ نه‌ته‌وه په‌رستێن توركیا داخواز كریه كو جه‌هه‌په ب فه‌رمى بۆچوونا خوه ل سه‌ر ڤێ پرسێ دیار بكه‌ت،لێ جه‌هه‌پێ هه‌تاكو نوكه بێده‌نگى هه‌لبژارتیه،هه‌ر چه‌نده ئه‌م دشێین بێژین،كو بێده‌نگیا جه‌هه‌پێ بۆ هندێ بوویه،كو دژایه‌تیا ریفراندۆمێ و سه‌ربخۆیا كوردستانێ ناكه‌ت،چونكى وێ دڤێت سه‌رنجا كوردێن باكۆر بۆ خوه راكێشیت،داكو د هه‌لبژارتنێن سالا 2019 بشێت سه‌ركه‌فتنێ ب ده‌ستڤه بینیت.
هه‌روه‌سا هه‌ده‌په ژى مه‌زنترین پارتا كوردییه ل باكۆر كو 59 كورسى د په‌رله‌مانێ توركیا دا هه‌نه و پارتا سییێ یه دناڤ پەرلەمانێ توركیا دا،ب ئاشكرایى پشتگیریا خوه بۆ ریفراندۆمێ و سه‌ربۆخیا كوردستانێ دیاركریه و په‌یڤدارێ وى پارتیێ ئۆسمان بایده‌میرى ژى پشتگیریا خوه بۆ ریفراندۆمێ و سه‌ربخۆیا كوردستانێ ده‌ربریه،دیسا چه‌ندین په‌رله‌مانتارێن هه‌ده‌پێ ب رێیا سۆسیال میدیایێ دلخۆشیا خوه بۆ ڤێ پێنگاڤێ ده‌ربریه و پشتگیریا ریفراندۆما هه‌رێمێ كریه،هه‌روه‌سا مه‌هه‌په پارتیا ئێكانه‌یه دناڤ په‌رله‌مانێ توركیا دا كو ب فه‌رمى دژایه‌تیا خوه بۆ ریفراندۆمێ و سه‌ربخۆیا كوردستانێ ده‌ربریه،هه‌لویستێ ڤێ پارتیێ هه‌موو گاڤان ل دژى كوردانه،دیسا د هه‌لبژارتنێن بورى دا 40 كوردى ب ده‌ستڤه ئیناینه،هه‌روه‌سا ده‌وله‌ت باخچه‌لى كو سه‌رۆكێ ڤێ پارتیێ د گۆتاره‌كێ دا كو بۆ ئه‌ندامێن پارتیا خوه دناڤ په‌رله‌مانى دا پێشكێشكریه،داخواز ژ حوكمه‌تا توركیا كریه،كو هه‌لویسته‌كێ توند هه‌بیت هه‌مبه‌رى ریفراندۆما كوردستانێ و داخواز ژ حوكمه‌تا توركیا كریه،كو هێزێ ژى ب كار بینیت،به‌لێ ب چ ره‌نگان كه‌سێ پشته‌ڤانیا گۆتنێن وى نه‌كر و گۆتنێن وى كوردێن باكۆر نیگه‌ران كربوون.
پارتا وه‌ته‌نیا توركى كو دۆگۆ په‌رینجه‌ك سه‌رۆكاتیا وێ دكه‌ت و چ كورسى ژى د په‌رله‌مانێ توركیا دا نینن،د هه‌ڤپه‌یڤینه‌كێ دا گۆتیه،توركیا هه‌مبه‌رى ریفراندۆمێ بۆ سه‌ربخۆیا كوردستانێ نابیته بینه‌ر،چونكى ئه‌ڤە پلانه‌كا ئه‌مریكا یه و وێ دڤێت ده‌وله‌تا ئسرائیلا دویێ ل ڤێ ده‌ڤه‌رێ دروست بكه‌ت،هه‌روه‌سا هه‌كه كوردستان ببیته ده‌وله‌ت دێ كاریگه‌ریه‌كا خراب كه‌ته سه‌ر ئێكپارچه‌یا ئاخا توركیا،هه‌روه‌سا دۆگۆى دیاركریه ژى،ماده‌م ئه‌نقه‌ره رێك دایه هه‌رێما كوردستانێ كو نوونه‌راتیا خوه ل توركیا ڤه‌كه‌ت،ئه‌و دێ رازى ژى بیت كو ئه‌ڤ نوونه‌راتیه ببیته كۆنسلخانه و بالیۆزخانه ژى،دیسا داخواز كریه كو پێدڤیه توركیا بۆ ئێك پارچه‌یا ئاخا سوریێ و عێراقێ هێزێ ژى ب كار بینیت،چونكى د داهاتى دا ئه‌ڤه دێ بیته مه‌ترسى بۆ سه‌ر ئێك پارچه‌یا ئاخا توركیا.
نيشاندان