ئەڤرۆ نیۆز،زنار تۆڤی:
دلاوەر خالد ئاژگەیی نوونەرێ حوکمەتا هەرێما کوردستانێ ل ئێکەتیا ئوڕۆپا بۆ ئەڤرۆ نیۆز دیارکر:کو
ل سەر داخوازیا فەرمی یا ئێکەتیا ئورۆپا و وەزیرێ دەرڤە یێ ھۆلەندا بڕیارە ئەڤرۆ 12.6.2017 شاندەکێ بلند یێ حوکمەتا ھەرێما کوردستانێ ب سەرۆکایەتیا قوباد تالەبانی جێگرێ سەرۆکێ حوکمەتا ھەرێما کوردستانێ بگەهیتە بروکسلا پایتەختێ بەلجیکا.
ئەو ژی گۆت:بڕیارە دڤێ سەردانێ دا جێگرێ سەرۆکێ حوکمەتا ھەرێما کوردستانێ چاڤ ب بەرپرسێن بلند یێن ئێکەتیا ئورۆپا و جێگرێ سەرۆک وەزیرێن بەلجیکا و وەزیرێ بەرەڤانیێ بکەڤیت،ھەروھا د وێستگەهێ دویێ یێ سەرەدانا خۆدا بڕیارە شاندێ کوردستانێ سەرەدانا ھۆلەندا بکەن و چاڤ ب ھەردو وەزیرێن دەرڤە و وەزیرێ بازرگانی یێ نێڤدەوڵەتی و پەرەپێدانا
ھۆلەندا بکەڤیت و دێ سەردانا پەرلەمانێ ھۆلەندا و دادگەها تاوانێن نێڤدەوڵەتی ژی کەن.
هەروەسا دلاوەری دیارکر ژی:ئەڤ سەرەدانە پشتی سەرەدانا ھەر سێ وەزیرێن دەرڤە یێن بەلجیکا و ھۆلەندا و لۆکسەمبۆرگ بۆ ھەریما کوردستانێ دهێت و ئارمانجا سەرەکی یا ڤێ سەرەدانێ بۆ بهێزکرنا پەیوەندیانە دناڤبەرا ھەرێما کوردستانێ و ئێکەتیا ئورۆپا و ھەروەسا حوکمەتا ھۆلەندا و بەلجیکا دا،هەروەسا ل ماوێ بوری دا پەیوەندیێن دناڤبەرا ھەرێما کوردستانێ و وەلاتێن ئێکەتیا ئورۆپا گەهشتینە ئاستەکێ باش ژلایێ سیاسی و سەربازی و وارێن دیتر و ئەڤە یا گرنگە بۆ ھەردو لایان.

ئه‌ڤرۆ نیۆز،زنار تۆڤى:
عه‌بدولسه‌لام به‌روارى ئه‌و چاڤدێرێ سیاسى یه‌ د دیداره‌كێ دا بۆ ئه‌ڤرۆ نیۆز دبێژیت:پشكداریا شاندێ حوكمه‌تا هه‌رێما كوردستانێ د كۆربه‌ندێ ئابوورى یێ جیهانى یێ سان پترسبۆگ دا ل وه‌لاتێ ل رووسیا،ب دیدار و كومبوون و رێككه‌فتنا ستراتیجى د وارێ نه‌فتێ دا،نیشانا به‌رده‌وامبوونا سیاسه‌ته‌كا راست و دروستا سه‌ركردایه‌تیا كوردستانێ یه‌ و هه‌روه‌سا نیشانا باوه‌رپێكرن و گرنگى پێدانا جڤاكێ نێڤده‌وله‌تى و زلهێزێن جیهانى یه‌ ب كوردستانێ و گۆت ژى:ده‌مێ كۆمپانیا ئێكسۆن مۆبیل یا ئه‌مریكى بریار داى كو ملكه‌چى هێرشێن عێراقێ نه‌بیت و گرێبه‌ستێ ل گه‌ل حوكمه‌تا هه‌رێما كوردستانێ گرێبده‌ت،ئه‌ڤه‌ بوو ئه‌گه‌رێ هندێ كو ئه‌ڤ كۆمپانییه‌ بكه‌ڤیته‌ دناڤ لیستا ره‌شا عێراقێ دا،د وى ده‌مى دا گه‌له‌ك كه‌سان ئه‌ڤ نووچه‌ ب گۆمان وه‌ردگرت و پرسیار دكر،چاوا ئه‌مریكا رێكێ ب ڤى كارى دده‌ت؟،كو د ده‌مه‌كى دا سه‌ركه‌فتنا عێراقێ ب واتایا سه‌ركه‌فتنا سیاسه‌تا ئه‌مریكایه‌.هێشتا دبێژیت:نوكه‌ ژى ئه‌و گرێبه‌ستا ستراتیجى یا ل گه‌ل كۆمپانیا روسنه‌فت یا نیمچه‌ حكومى یا رووسى هاتیه‌ ئیمزاكرن،هه‌ر زوو و بێى زانینا هووربینیێن ڤێ رێككه‌فتنێ،ده‌نگێن نه‌شاز ده‌ست ب گۆمان خستنا ڤێ نووچه‌ى كر،ب بهانه‌یا هندێ كو رووسیا چ ده‌مان یا به‌رهه‌ڤ نینه‌ هه‌موو وان به‌رژه‌وه‌ندیێن خوه‌ یێن ئابوورى ل گه‌ل عێراقێ ژبیر بكه‌ت و راسته‌وخۆ ل گه‌ل هه‌رێما كوردستانێ رێككه‌فتنه‌كێ ئیمزا بكه‌ت،هه‌روه‌سا مه‌ دیتن كو هه‌ردو رێككه‌فتن سه‌ركه‌فتن و كه‌فتنه‌ وارێ بجهئینانێ،وه‌كو چاوا رێككه‌فتنا ل گه‌ل ئێكسۆن مۆبیل یا ئه‌مریكى كۆسپێن ل سه‌ر رێیا بازارێ فرۆشتنا نه‌فتا هه‌رێمێ لابرین،وه‌سا رێككه‌فتنا ل گه‌ل كۆمپانیا روسنه‌فت یا رووسى فرۆشتنا نه‌فتا هه‌رێمێ بۆ چه‌ندین سالان زامنكر،ل گه‌ل پلانا په‌ره‌پێدانا پرۆسا ده‌ركرن و هنارتنا نه‌فتێ و پێشخستنا ژێرخانا ئابوورى یا هه‌رێمێ.
به‌روارى ئه‌و ژى دیاركر:گرنگیا ڤێ رێككه‌فتنێ د هندێ دایه‌ كو حوكمه‌تا هه‌رێما كوردستانێ زیره‌كانه‌ هه‌ڤسه‌نگیا په‌یوه‌ندیێن ستراتیجى ل گه‌ل هه‌ردو جه‌مسه‌رێن سیاسه‌تێ ل ده‌ڤه‌را رۆژهه‌لاتا ناڤین كو رووسیا و ئه‌مریكانه‌ دپارێزیت،هه‌روه‌سا هه‌موو ئه‌و ره‌خنێن هاتینه‌ ئاراسته‌كرن ژى بۆ حوكمه‌تا هه‌رێما كوردستانێ،كو دگوت یا یاریا ب ئاگرى دكه‌ت و بتنێ لایه‌نه‌ك ل بیره‌،بێ بنه‌ما كر،دیسا نیشا وان دا كو هه‌رێما كوردستانێ و ئایینده‌یێ وێ كو ده‌وله‌تا سه‌ربخۆیا كوردستانێ یه‌،نوكه‌ جهێ باوه‌ریێ و هیڤییا هه‌موو جیهانێ یه‌ و حسابه‌كا تایبه‌ت ژى بۆ دهێته‌ كرن.هێشتا دبێژیت:هه‌ر چه‌نده‌ نوكه‌ رووسیا ل گه‌ل ئیرانێ و سووریا و تاراده‌یه‌كێ عێراق ژى د به‌ره‌یه‌كێ دانه‌،كو ب لایه‌نێ كێم هه‌مبه‌رى به‌ره‌یێ ئه‌مریكا و ئسرائیلێ و سعودیێ راوه‌ستیاینه‌،به‌لێ هه‌ر ئه‌ڤ گرنگیدانه‌ ب هه‌رێمێ و ئایینده‌یێ وێ نه‌بوو رێگر،كو رووسیا ڤێ پێنگاڤا گرنگ و ستراتیجى ل گه‌ل حوكمه‌تا هه‌رێما كوردستانێ بێى ڤه‌گه‌ران بۆ به‌غدا بهاڤێژیت،هه‌روه‌سا هه‌ر ئاخفتنه‌كا ده‌رباره‌ى نه‌بوونا شه‌فافیه‌تێ د گرێبه‌سته‌كێ دا ل گه‌ل كۆمپانیێن زه‌به‌لاحێن جیهانى،نیشانه‌یا نه‌ زانین و بێ ئاگه‌هیێ یه‌،چونكى چاڤێ ناڤه‌ندێن جیهانى و نێڤده‌وله‌تى ل سه‌رن و دیسا پابه‌ندن ب یاسایێن وه‌لاتێن خوه‌ و هه‌موو جموجولێن دارایى ژى د شه‌فافن،هه‌روه‌سا ئه‌و چه‌ند ژى خویاكر:كو دابینكرنا داهاتیه‌كێ به‌رده‌وام بۆ هه‌رێما كوردستانێ بتنێ مفا بۆ پارتى و نێچیرڤان بارزانى و قۆباد تاله‌بانى نینه‌،بولكو زامنكرنا قووتێ هه‌ر تاكه‌كێ كوردستانێ یه‌،دیسا گرێبه‌ستا ستراتیجى و درێژخایه‌ن ل گه‌ل مه‌زنترین كۆمپانیێن ئه‌مریكا و رووسیا،نیشانا باوه‌ریا جڤاكێ نێڤده‌وله‌تییه‌ ب وێ حوكومرانیا مه‌ هه‌ى و ب وێ ده‌وله‌تا سه‌ربه‌خۆ یاكو هه‌ول بۆ دهێنه‌دان،له‌وما یا فه‌ره‌ هه‌ر وه‌لاتیه‌كێ كوردستانێ پێشوازیێ ل ڤێ سیاسه‌تا سه‌ركه‌فتى بكه‌ت و ب ده‌ستكه‌فت بۆ خوه‌ بزانیت و گۆمانێ ژى نه‌ ئێخیته‌ سه‌ر.