ئەڤرۆ نیۆز،زنار تۆڤی:
وەرزێ پاییزێ هات و برنجێ دەڤەرا بەرواری بالا گەهشت،لەورا ئەڤرۆ ئێکشەمبی 24.9.2017 خەلکێ دەست ب دروینا برنجی کر ل دەڤەرا بەرواری بالا،هەروەسا ژ ئەگەرێ چاندنا رێژەکا باش یا برنجی ل ڤێ دەڤەرێ،خودانێن برنجی ب زبارە برنجێ خوە د دروی،وەکو دیار کو هژمارەکا باش یا وەلاتیان پشکداری د دروین و کێشانا برنجی دا کریە.
هەروەسا هەر ژ کەڤندا خەلکێ گوندان هەڤکاریا ئێک کریە و چووینە هاری ئێکودۆ ب د دروینا برنجی و جهی و گەنمی و هەروەسا برینا چلی،ب شێوێ زبارەیان هاریکاریا ئێک کریە
ئەڤرۆ نیوز ، نەوزاد ھلۆری:
ئەمنیدارێ گشتیێ ئێکگرتوویا ئیسلامی یا کوردستانێ دیارکر کو دەما ریفراندۆمێ زور گونجایە و گەلێ کوردستانێ ب کەرنەڤالێن خوە ئەڤ یەک سەلماند، و درۆستبوونا قەیران و گرتنا سنوران و شەر و ئالوزیان ب کرنا ریفراندۆمێ بتنێ چەند ئاخفتنەکێن سیاسیێن درۆستکرینە.
سەلاحەددین بھائەددین ئەمنیدارێ گشتیێ ئێکگرتوویا ئیسلامی یا کوردستانێ دەمەک بەریا نھا د پرێسکونفرانسەکێ دا ل ھەولێر دیارکر کو ئەو وەکو ئێکگرتوو ھەردەم د مەسەلێن دیموکراسی و مەدەنی دا دەستپێشخەربوینە و گۆت ژی: (ئەم وەکو ئێکگرتوو ب ھەموو قەناعەتا خوڤە پشکداریێ د سەرئێخستنا ریفراندۆمێ بوینە و مە سوپاسیێن کەسێ ژی نەڤێن و چوو مزایدان ژی ناکەین و سەربخوە بونا کوردستانێ و پشکداریکرنا سەرئێخستنا وێ شانازیەکا مەزنە بەری کو ئەرکێ مە بیت وەکو ئێکگرتوو ، و ئەم وەکو ئێکگرتوو دپرسێن نیشتمانی دا ھەردەم دەستپێشخەربوین )
زێدەتر گۆت: ( دوست و دوژمنێن مە چاڤەرێ نە کا قوناغا پشتی ریفراندۆمێ دێ چ روودەت و پێدڤی ناکەت دنھادا ئەم خەلکێ خوە ب ترسینین و و نابیت ئەم ریفراندۆمێ تێکەلی بابەتێن دن بکەین و تشتەک نورمالە کو رەخنە ل دەم و شێوازێ ریفراندۆمێ بھێتەگرتن بەلی َنابیت کو ھندەک کەس و لایەن بھانەیان بینن بو ئەنجامنەدانا ریفراندۆمێ و خەلکی ب بابەتێن مینا گرتنا سنوران و درۆستبوونا شەر و ئالوزیان و قەیرانان ڤە ب ترسینن و دنیا ھوسا بێ خودان نینە ھەرکەس و لایەنێ ڤیا ھێرشێ کوردستانێ بکەت و چوو تشتێن پلان بو دارشتی نینن)
ئەمنیدارێ گشتیێ ئێکگرتوویا ئیسلامی یا کوردستانێ د درێژاھیا پرێسکونفرانسا خوە دا دیارکر ژی کو ئەگەر ریفراندۆم نەھێتەکرن دێ بێئومێدیەکا دن بو گەلێ کوردستانێ ل گەل ھەموو ئەو بێئومێدیێن کو نھا ھەیی درۆست بیت و گۆت ژی: ( ھەر ھەلویست و تشتەکێ پشتی ریفراندۆمێ ھەبیت ژی مینا گرتنا سنوران دی یا دەمکی بیت و زیانا وێ بەری کو بومە بیت دێ بو وان بیت یێن ب گرتنا سنوران رادبن)
ئەڤرۆ نیوز ، ھلوری:
دەمەک بەریا نھا ل پیرمام کومبوونا دناڤبەرا پارتی و ئێکەتی و ئێکگرتوو ب دوماھی ھات و ل گورەی ئەوان زانیاریێن کو دەست ئەڤرۆ نیوز کەفتین ، ھەرسێ حزبان دوپاتکر کو ریفراندۆم دێ ل کەرکوکێ ھێتەکرن.
ئەڤرۆ ب سەرپەرشتسا مەسعود بارزانی سەرۆکێ ھەرێما کوردستانێ ھەر ئێک ژ پارتی دیموکراتی کوردستان و ئێکەتیا نیشتمایا کوردستانێ و ئێکگرتوویا ئیسلامیا کوردستانێ ل بارا ب رێڤەچوون و ئەنجامدانا ریفراندۆمێ ل کەرکوک کومبوونەک ل پیرمام ئەنجام دا و د کومبوونێ دا ھەرسێ حزبان دوپاتکر کو ریفراندۆم دێ ل کەرکوک ھێتە ئەنامدان.
دوھی د چەند راگەھاندنەکان دا ھاتبوویە راگەھاندن کو پرۆسەیا ریفراندۆمێ ل کەرکوک ناھێتە ئەنجامدان بەلێ دوڤدا ئەنجومەنا بلند یا ریفراندۆمێ ئەڤ یەک رەتکر و ب نوچەیێ نەراست وەسفکر و دوپات ژی کر کو ریفراندۆم دێ ل کەرکوک و ھەموو کوردستانێ ھێتە ئەنجامدان.
ئەڤرۆ نیۆز،رەمەزان هەرنی:
گوندێ شوشێ دكه‌ڤیته رۆژئاڤایێ قه‌زا ئاكرێ (20 كم) ژ ئاكرێ دووره و ئێك ژوان جهێن پری دیمه‌ن و شوونوارێن سه‌رده‌مێن به‌رێ دهێته نیاسین،ب تایبه‌تی كه‌لا دێرینا شوشێ و چه‌ندین جهێن دى ل ڤى گوندى هه‌نه كو مێژوویا وان ڤه‌دگه‌رێته ڤه بو به‌رى چه‌ندین سه‌ده‌یان نها ب تنێ ئه‌ڤ شوونواره وه‌ك ناڤ ماینه و گه‌له‌ك بێ سه‌روبه‌ر بووینه هند ژ وان دیمه‌نان ژى نێزیكێ ژناڤ چوونێ نه.
نادر زاهر موختارێ گوندێ شوشێ بۆ ئه‌ڤرۆ نیۆز دیاركر:شوونوارێن گوندێ شوشێ چه‌ند جهه‌كن وه‌ك كه‌لا شوشێ،كنیشتا جوهیا،گرێ قه‌سروك، گورستا قوپى حەجى،لێ شوونوارێن شوشێ پێدڤى ب چاڤدێریه‌كا باش هه‌یه هه‌روه‌سا دانانا زێره‌ڤان بۆ وێ چه‌ندێ ئه‌وێن ماى ژناڤ نه‌چن،كه‌س گرنگى ب شوونوارێن گوندێ شوشێ نه‌دایه، نه ژلایێ نووژه‌نكرنێ نه ژلایێ ناساندنێ ڤه،لێ مە رێك نه‌دایه چو پارچه بهێنه ڤه‌گوهاستن ب تنێ شوونه‌وارناسێن ئاكرێ هنده‌ك پارچه برینه ل گورى زانیاریێن من بۆ پاراستنێ بوویه،هه‌یا نها ژى چو ڤه‌كولین نه‌هاتینه كرن ژبلى كو به‌ریا نها تیمه‌كا ئیتالى بۆ هه‌یاما حه‌فتیه‌كێ كار ل سه‌ر كر و وان گوت مه پێدڤى ب ساله‌كێ هه‌یه،ڤان جهێن شوونوارى پێدڤى ب سه‌خبێریه‌گا باش هه‌یه تایبه‌ت برنا جاده‌یه‌كێ بۆ وان جهان،داکو خه‌لك پتر قه‌ست بكه‌نێ و ببینن،هەروەسا خه‌لكى گوندى چو مفا ژڤان شوونه‌واران نه‌دیتیه به‌لێ شانازیێ ژى پێ دكه‌ن،لێ ئه‌م ژى دخوازین چاڤدانه‌كا باش ل سه‌ر ڤان شوونواران بهێنەکرن.
رۆژنامه‌ڤان عه‌بدولا مه‌هدى خه‌لكى گوندێ شوشێ یە ل قه‌زا ئاكرێ و بۆ ئه‌ڤرۆ نیۆز خویاكر:گۆندێ شوشێ ل ده‌ڤه‌ره‌كا چیایى و ده‌وله‌مه‌نده ب به‌روبۆمێن سرۆشتى یێن خوارنێ و ب كه‌ڤنترین گوند ل ده‌ڤه‌رێ دهێته نیاسین،چه‌ندین ساله بوویه جهێ ژیارا خه‌لكى و گه‌له‌ك جهێن شوونه‌وارى د ناڤ و ده‌وروبه‌رێن گوندى یێن هه‌ین،هژماره‌كا به‌رچاڤا جوهیان ل گوندێ شوشێ ئاكنجى بووینه هه‌تا نها ژى ناڤێ گه‌له‌ك ژ جهێن گوندى ب ناڤێ جوهیان دهێته گوتن، بۆ په‌رستنێ جوهیان (كنیشتە) دروستكربوو، ئه‌ڤه وێ چه‌ندێ دگه‌هینیت پێكڤه‌ژیان و برایه‌تى دناڤ گوندى دا هه،به‌لێ ب مخابنى ڤه هه‌مى جهێن شوونوارى یێن هاتینه پشت گۆهـ هاڤێتن، هه‌م ژ لایێ خه‌لكێ گۆندى و هه‌م ژ بال حكومه‌تێ، ئه‌م خه‌لكێ گۆندى وه‌ك پێدڤى ل هه‌مبه‌ر شوونه‌وارێن گوندێ خۆ نه‌هاتینه مه كێم ته‌رخه‌مى یه‌كا زۆر یا كرى د ده‌رهه‌ق جهێن شوونه‌وارى یێن گۆندى.
هیوا شه‌مال رێڤه‌به‌رێ شوونواران ل ئاكرێ بۆ ئه‌ڤرۆ نیۆز ئاشكراكر:ل سه‌ر جهێن شوونوارى ل ده‌ڤه‌را ئاكرێ و به‌رده‌ره‌ش مه چه‌ندین جاران ب نڤیسارێن فه‌رمى داخواز ژ رێڤه‌به‌ریا گشتیا شوونوارێن پارێزگه‌ها دهۆكێ و جهێن شوله‌ژێ كریه بو پتر خزمه‌تكرنا جهێن شوونوارى ل ده‌ڤه‌رى كو پتر بهێنه پاراستن و دووركرن ل سه‌ر وان ده‌ست درێژیین ل سه‌ر دهێنه كرن.
هه‌روه‌سا هێشتا ب دروستى دیار نینه کو مێژویا ڤان جهێن شوونوارى بۆ كه‌نگى و چو سه‌رده‌م دزڤریته‌ڤه ژبه‌ركو هه‌یا نها چو دیراسه‌یێن دروست ل سه‌ر نه‌هاتینه كرن،ده‌ڤه‌را ئاكرێ و گوندێ شوشێ گه‌له‌ك جه و پارچه شوونه‌وارێن كه‌ڤنار لێ هه‌نه و چه‌ندین گورستان هەنە،بەلێ چو تشت نه‌هاتیه كرن بۆ پتر ناساندنا ڤان شوونه‌واران ل كوردستانێ كو خه‌لك مفاى ژێ بینن یان بناسن.
هیواى خویاكر ژى:ل سه‌ر ده‌مێ جوهیان ده‌مێ كه‌سه‌كێ وان دمر، هه‌رتشتێ هەبا ل گه‌ل وى ڤه‌دشارت و ڤان جهان پتر پێدڤى ب چاڤدانێ و پاراستنێ هه‌یه،مه گه‌له‌ك جاران ژى داخوازكریه كو كاره‌ك بهێته كرن بۆ وێ چه‌ندێ پتر ئه‌ڤ جهه بهێنه ناسین و پاراستن و نووژه‌كرن، به‌لێ هه‌یا نها چو لایه‌نان به‌رسڤا مه نه‌دایه،ئه‌م چاڤه‌رێ نه پشتى دوماهیا قه‌یرانا دارایى جارەکا دی داخوازیێن خوه بلند بكه‌ینه‌ڤه مه پاسه‌وان هه‌نه زێره‌ڤانیا به‌رده‌واما شوونه‌وارێن گوندێ شوشێ و گوندێن دی دكه‌ن،لێ هنده‌ك جاران ده‌ستكارى ل سه‌ر جهێن شوونوارى دهێنه كرن.
ئەڤرۆ نیوز ، نەوزاد ھلۆری:
نیڤرۆیا ئەڤرۆ سوپایێ کومارا ئیسلامیا ئیرانێ سنوورێ ناحیا سیدەکان یا سەر ب قەزا سوران ل پارێزگەھا ھەولێر بومبەبارانکر و زیان گەھاندیە رەز و بیستان و سرۆشت و ژینگەە و پوش و پاوانێ دەڤەرێ.
ئەحمەد برادۆستی وەلاتیەکێ ناحیا سیدەکان سا سەر ب قەزا سورانە بۆ ئەڤرۆ نیوز گۆت: ( نیڤرویا دوپخانەیێن سوپایێ کومارا ئیسلامیا ئیرانێ سنوورێ ناحیا سیدەکان یا سەر ب قەزا سوران بومبەبارانکر و زیان گەھاندیە رەز و بیستان و سرۆشت و ژینگەە و پوش و پاوانێ دەڤەرێ بومبەبارانکرن )
زێدەتر گۆت: ( ژ ئەگەرا بومبەبارانکرنێ ترس لدەف وەلاتیێن گوندێن نێزیک سیدەکان پەیدا بوویە ، و دخوازین کو ئەڤ یەک بھێتە راگرتن)
ئەڤرۆ نیۆز،زنار تۆڤی:
وەزارەتا دارایی و ئابووری راگەهاند:کو مووچێ ڤان وەزارەت و دەستەیان دێ هێتە دابەشکرن.
1- رۆژا سێشەمبی 26/9/2017، مووچێ مانگا 7 یێ ڤان جهان دێ هێتە دابەشکرن.
– وەزارەتا خواندنا بلند و ڤەکۆلینێن زانستی
– وەزارەتا ڤەگوهاستن و گەهاندنێ
– وەزارەتا پیشەسازی و بازرگانی
– وەزارەتا سامانێن سروشتی
– وەزارەتا پلاندانانێ
– دەزگەهێ مینان
– كۆمسیۆنا بلند یا هەلبژارتنێن كوردستانێ
– دەستەیا دەستپاكی
– دەستەیا وەبەرهێنانێ
– دەستەیا ژینگەهێ
– دەڤەرێن كوردستانی یێن دەرڤەی ئیدارا هەرێمێ
– دەستەیا مافێن مرۆڤی
– دیوانا چاڤدێریا دارایی
2- رۆژا چارشەمبی 27/9/2017، مووچێ مانگا 7 یێ ڤان جهان دێ هێتە دابەشکرن.
– وەزارەتا كارەبێ.
– وەزارەتا چاندنێ و ژێدەرێن ئاڤێ.
– وەزارەتا ئاڤەدانکرنێ و نیشتەجێ‌كرنێ
– وەزارەتا رەوشەنبیری و لاوان
– وەزارەتا كار و كاروبارێن كۆمەلایەتی
– مووچەیێ (كێم ئەندامان) یێ سەر ب وەزارەتا كار و كاروبارێن كۆمەلایەتی.
3- رۆژا پێنجشەمبی 28/9/2017، مووچێ مانگا 7 دێ ب ڤی رەنگی بیت.
– وەزارەتا باژێرڤانی و گەشتوگوزار
– وەزارەتا ئەوقاف و كاروبارێن ئاینی
– وەزارەتا داد
– ئەنجومەنێ دادوەری
– سەرۆكاتیا هەرێمێ
– سەرۆكاتیا پەرلەمانی
– سەرۆكاتیا ئەنجومەنێ وەزیران
ئه‌ڤرۆ نیۆز،ره‌مه‌زان هه‌رنى:
به‌رپرسێ گروپێ پێشمه‌رگه یێ خوبه‌خش ل ئاكرێ خویاكر: وه‌كو گروپێ پێشمه‌رگه هزر دوێ چه‌ندێ دا كریە كو چه‌ندین تیمێن خوبه‌خش و ب ترومبێلێن خۆڤه به‌رهه‌ڤ بكه‌ین كو ل رۆژا ده‌نگدانێ وەلاتیان ڤه‌گوهێزن بۆ سه‌ر سندوقێن ده‌نگدانێ.
عه‌دنان عه‌بدولوه‌هاب به‌رپرسێ گروپێ پێشمه‌رگه یێ خوبه‌خش ل ئاكرێ بۆ ئه‌ڤرۆنیۆز دیار كر:مه 14 تیم به‌رهه‌ڤكرینه كو هه‌ر تیمه‌ك ل 10 كه‌سان پێك دهێت و ئه‌ڤ تیمه هاتینه دابه‌شكرن ل سه‌ر گه‌ره‌كا و دیسان ل قه‌زا به‌رده‌ره‌ش مه تیمه‌ك به‌رهه‌ڤكرى یه و ل سنورێ هه‌ر ناحیه‌ك ژى مه تیمه‌ك به‌رهه‌ڤکریه و هه‌تا ل سنورى قه‌زا ئاكرێ ژى ئه‌م ده‌رباز بووینه و ل قه‌سروك و دومیز ژى مه تیم به‌رهه‌ڤكرینه بۆ ڤێ پرسێ و هه‌ر ل خوله‌كا ئێكێ یا ده‌نگدانێ دێ د به‌رده‌وام بین تاكو چركه‌یا دوماهییا ده‌نگدانێ دێ وان وەلاتیان ڤه‌گوهێزێن سه‌ر سندوقێن ده‌نگدانێ.
عه‌دنان خویاژى كر:مه باوه‌ره دێ كارێن تا ئاسته‌كێ باش وێ رۆژى خزمه‌تا وەلاتیێن خۆ كه‌ین و ئه‌م منه‌تێ ل كه‌س ژى ناكه‌ین چونكه ب ئه‌ركێ خۆ دزانین و هیڤیا مه ئه‌وه ئه‌م هه‌مى بكارین ب هه‌ڤرا خزمه‌ته‌كا باش بكه‌ین بۆ سه‌ركه‌فتنا پرسا ریفراندومێ بۆ سه‌ربخویا كوردستانێ.
به‌رپرسێ گروپێ پێشمه‌رگه ئاشكراکر ژی:بۆ پتر سه‌ركه‌فتنا پرسا ریفراندۆمێ كو پرسه‌كا نه‌ته‌وى و نیشتیمانى و دیموكراسى یه و ب ده‌ستڤه ئینانا رێژه‌یه‌كا بلند یا ده‌نگان و هاریكاریكرنا وەلاتیان بۆ ڤه‌گوهاستنا وان بۆ سه‌ر سندوقێن ده‌نگدانێ گروپێ پێشمه‌رگه یێ خوبه‌خش ل ئاكرێ 14 تیم به‌رهه‌ڤكرینه كو وەلاتیێن نه‌خوش و كێم ئه‌ندام ڤه‌گوهێزینه سه‌ر سندوقێن ده‌نگدانێ.
ئەڤرۆ نیوز ، ھلوری:
ئاخفتنکەرێ حکومەتا ھەرێما کوردستانێ دیارکر کو سوبەھی ب ھەلکەفتا ریفراندۆما سەربخوەی یا کوردستانێ ل ھەرێما کوردستانێ و ھەموو ئەوان دەڤەر و جھێن کو ریفراندۆم تێدا دھێتەکرن بێھنڤەدانا فەرمی یە.
سەفین موحسن دزیی ئاخفتنکەرێ حکومەتا ھەرێما کوردستانێ دیارکر کو سوبەھی رۆژا دوشەمبی رێکەفتی ٢٥ ئیلونا ٢٠١٧ ب ھەلکەفتا ب رێڤەچوونا پرۆسەیا ریفراندۆم بۆ سەربخوەی یا کوردستانێ ل ھەرێما کوردستانێ و ھەموو ئەوان دەڤەر و جهـ و باژێرێن کو دێ ریفراندۆم تێدا ھێتەکرن بێھنڤەدانا فەرمی یە و رۆژا ٢٦ ئیلونێ ٢٠١٧ دێ دەواما ئاسایی دەستپێکەت ڤە.
ئەڤرۆ نیوز ،ھلۆری:
ئەمیندارێ گشتیێ ئێکگرتوویا ئیسلامی یا کوردستانێ ل دەما سەرەدانەکێ دا بو لقێ بەنسلاوەیێ ئێکگرتوو ل ھەولێر دوماھی ھەلویستێ خوە لسەر پرۆسەیا ریفراندۆمێ راگەیاند و دیارکر کو سەرەرای ھەموو تێبینیێن وان لسەر دەستھەلاداریا ھەرێما کوردستانێ ھەیی یا گرنگ ئەوە کو دنھا دا ئێکگرتوو پشکداریێ د پرۆسەیا دەنگدانێ دا بکەن و ب بەلێ دەنگ بو بدەن.
د راگەھاندنا ئێکگرتوو دا ھاتیە ژی کو ئەو وەکو ئێکگرتوو ل گەل سەربخوەی یا کوردستانێ نە و ئەوان ھەڤکاریێن باش ل گەل ئەنجومەنا بلند یا ریفراندۆمێ ھەنە و ب بەرنامەیێ ستراتیجیێ خوە دزانن و داخوازی و کارێن خوە لسەر کەسێ نادانین ،و راگەھاند ژی کو ئەو ھەردەم مژولێ ناڤندەگیریێ بوینە دناڤبەرا ھەموو ھێزێن سیاسی.
ئەمیندارێ گشتیێ ئێکگرتوو دیارکر ژی کو ئەو لایەنێن کو ھەتا نھا دناڤا ئەنجومەنا بلند یا ریفراندۆمێ نەیی رامان ئەو نینە کو ئەو ل گەل سەربخوەی یا کوردستانێ دا نینە ، و دڤێت ئەم وێ یەکێ بزانین ژی کو ھێزێن نیڤدەولەتی چوو جاران نابێژن فەرموون وەرن ھەوە بەر ب سەربخوەیێ ڤە ببەین ، و ئەگەر ئەم ئێکرێزیەکا باشتر دەستخوڤە بینین ، دا بو ریفراندۆمێ باشتر بیت.
ئەڤرۆ نیوز ، ھلۆری:
ئەنجومەنا بلند یا ریفراندۆمێ د کونگرەیەکێ رۆژنامەڤانی دا بنەمایێن دەولەتا کوردستانێ راگەھاندن و تێدا بەلگەنامەیا سیاسیی یا ھەموو پێکھاتەیێن ئاینی و نەتەوەیێن کوردستانێ ھاتەخواندن و کو ھەموو بنەمایێن دەولەتا کوردستانێ تێدابوون.
ل گورەی بەلگەنامەیا ئەنومەنا بلند یا ریفراندۆمێ کو د کونگرەیەکێ رۆژنامەڤانی دا ژلایی دکتور خەلیل ئیبراھیم ئەندامێ سەرکرداتیا ئێکگرتوویا ئیسلامی یا کوردستانێ و ئەندامێ ئەنجومەنا بلند یا ریفراندۆمێ ھاتیە خواندن ئەو بەلگەنامە وەکو پشکەک ژ دەستوورێ ئایندەیێ کوردستانێ دھێتە دیتن کو ژ ١٥ ماددەیان پێکدھێت ، و تێدا ھەموو مافێن ئاین و نەتەوەیێن کوردستانێ ھاتینە دابینکرن و ھەموو ئەو پێکھاتە بخوە لسەر ڤێ یەکێ پێکھاتینە و رێکەفتن لسەر کریە و ئەوان ئەڤ یەک ب باشترین بنەمایێن مافێن خوە داناینە و سەررداتیا سیاسیا ھەرێما کوردستانێ گەرنتیا بھکرنا ھەموو ئەوان ماددەیان دێ کەت.
نيشاندان