راسته ژ دلسۆزییا خوه ئه‌م گه‌له‌ك ره‌خنه‌یا حزبێن كوردى دكه‌ین، هه‌ر ئێكى ژ مه ل دووڤ بۆچۆنێن خوه تێبنى ل سه‌ر سیسته‌مێ حوكمرانییا وانا خه‌له‌ت هه‌نه؛ لێ ئه‌ڤه وێ ناگه‌هینت كو ئه‌ڤ خه‌لكه حه‌ز ژ وه‌لاتێ خوه ناكه‌ت. ره‌نگه گه‌له‌ك ژ وى خه‌لكێ ره‌خنه‌یێ دكن دووربینتر ل ره‌وشێ ته‌ماشه دكه‌ن، وه‌ك گۆتنا كوردى دبێژت: ((مار گه‌زتى ژ وه‌ریسى دترست!)) واته ئه‌نجامێ وان كاره‌ساتێن د درێژییا دیرۆكێ دا هاتینه سه‌رێ ملله‌تێ كورد، ئه‌و دترسن كو كاره‌سه‌ته‌ك كامباختر ببته باجا دیاركرنا چاره‌نڤیسێ كوردستانێ د ڤێ قۆناغا نازك دا.
راسته خه‌لكه‌ك ناڤخوه‌یى هه‌یه ژ دلسۆزییا خوه و خه‌لكێ بیانى ژ به‌ر به‌رژه‌وه‌ندیێن خوه نها داخوازێ ژ ده‌ستهه‌لاتا هه‌رێمێ دكه‌ن كو نها گشتپرسى نه‌هێت ئه‌نجامدان یان هنده‌ك ژ وان فه‌رمانێن شۆڤینى دده‌ن كو هه‌ما دبنى دا نابت ملله‌تێ كورد بڕیارێ ل سه‌ر چاره‌نڤیسێ خوه بده‌ت… پرسیارا ل ڤێره دهێت: هه‌كه هات و سه‌ركرداتییا هه‌رێمێ رژد بوو، ریفراندۆم هات ئه‌نجامدان و ملله‌ته‌كێ بنده‌ست چاره‌نڤیسێ خوه دیار كر دێ چ رووده‌ت؟!.
راسته ئه‌وا دژمنێن ملله‌تێ كورد دشێن دێ دژى كوردان كه‌ن و دلۆڤانیێ ب چو ره‌نگان پێ نابن. ئه‌ڤێ بلا ئه‌م به‌رچاڤ وه‌ربگرین؛ لێ یا كامباختر ئه‌وه ده‌مێ هه‌ر پرانییا سه‌ركرداتییا هه‌رێما كوردستانێ لسه‌ر هه‌لوه‌ستێ خوه رژدبوو كو ریفراندۆم بهێته كرن، فه‌ره ئه‌م ئه‌قلانه هزرا خوه د ڤى هه‌لوه‌ستى دا بكه‌ین كو هه‌كه مه ده‌نگێن خوه ب ((به‌لێ)) دان دێ چ رووده‌ت و هه‌كه مه ب ((نه‌خێر)) دان دێ چ رووده‌ت؟ هه‌لبه‌ت ده‌نگدانا نه‌خێر و بایكۆتكرن ژ ریفراندۆما دیرۆكى یا ملله‌تێ كورد د به‌رژه‌وه‌ندییا دژمنێن ملله‌تێ كورد دانه، ژ به‌ر كو ئه‌و دێ ب جۆش و خوه‌شى كه‌نه گازى: كوردان نه‌ڤیا ببنه ده‌وله‌ت، ڤێجا ما ئه‌م چ بكه‌ین؟
بلا ئه‌م هه‌مى ڤى هه‌لوه‌ستێ دژمنان لبه‌ر چاڤ وه‌ربگرین و لۆژیكى سه‌ره‌ده‌ریێ دگه‌ل واقعى بكه‌ین و كه‌یفا نه‌یاران نه‌هینین بێژین: ((به‌لێ بۆ سه‌ربه‌خوه‌ییا ملله‌ته‌كى د درێژییا دیرۆكێ دا مایى بن ده‌ست و كیانێ خوه نه‌دیتى!)). ئه‌ڤه هه‌مى نه ژ به‌ر خاترا دز و گه‌نده‌لچى و قانوونشكێنێن د 26 سالن حوكمرانییا خوه‌یى ب رێڤه‌دبه‌ن و ئه‌ڤ خه‌لكه ژ گه‌له‌ك مافێن وانێن ره‌وا بێبه‌هركرین، ره‌نگه ((به‌لێ)) یا مه ژ به‌رخاترا كێشه‌یه‌كا ره‌وایا ملله‌ته‌كى ب ناڤێ كوردستان دهێته نیاسین كو دێ د دیرۆكێ دا هێته تۆماركرن كو كوردان ب خوه نه‌ڤیا ببنه ده‌وله‌ت.
هه‌لبه‌ت دیرۆك چ راست چ دره‌و دلۆڤانیێ ب كه‌سێ نابت، سه‌ره‌ده‌ریێ ل گه‌ل وان داتایان و پێزانینێن هاتینه تۆماركرن دكه‌ت. واته خودێ نه‌كه‌ت ل 25/9/ 2017 رێژه‌یا زێده‌تر نه‌خێر هینا، جڤاكێ نێڤده‌وله‌تى، هینگێ دێ بێژت هه‌وه ده‌وله‌ت نه‌ڤیا.. راسته نها جڤاكێ ده‌ولى به‌رییا دژمنان دانپێدانێ ب ریفراندۆما هه‌رێما كوردستانێ ناكه‌ن و پرانییا وان دژبه‌رن، لێ وه‌ك مه گۆتى ئه‌و دێ ل پاشه‌رۆژێ سه‌ره‌ده‌ریێ دگه‌ل وى ئه‌نجامێ د دیرۆكێ دا هاتییه تۆماركرن كه‌ن. ئه‌ڤجا دبێژم، ب چ قاس نها مه ناكۆكى ل گه‌ل حزبێن كوردى و هه‌بت و ئه‌م نه‌دگه‌ل سیسته‌مێ خه‌له‌تێ حوكمرانییا وان بین، واقع ئه‌ڤه‌یه و نه‌هاتییه گوهه‌ڕتن، ئه‌ركێ هه‌ر كورده‌كییه ل جیهانێ نها چاڤ ژ ڤێ هه‌میێ بگرت و بێژت به‌لێ بۆ ده‌وله‌ته‌كا كوردى، نه ژبه‌ر خاترا به‌رپرسێن گه‌نده‌ل، ره‌نگه ركمانى دگه‌ل دژمنێن ملله‌تێ كورد یێن شۆڤینى داكو سوباهى نه‌كنه قیژى و هه‌وار كو كوردان ده‌وله‌ت نه‌ڤیا، ڤێجا ما چ گوننه‌ها مه‌یه؟!
نها چاڤان ژ دز و گه‌نده‌لان بگرن
نيشاندان
