ئەڤرۆ نیۆز،زنار تۆڤى:
هه‌كه ته ل به‌ربیت ب شێوه‌یه‌كێ به‌رده‌وام گۆتارا پێشكێش بكه‌ى،یان ژى چه‌ند جاره‌كان،پێدڤیه تۆ كۆمه‌كا رێیان په‌یره‌و بكه‌ى،بۆ هندێ داكو تۆ بشێى ب ئاخفتنێ ئه‌و مه‌به‌ستا ته هه‌ى بگه‌هینى.
.بلا لڤینێن ته دمه‌به‌ستداربن.
زمانێ له‌شى ب ده‌نگه‌كێ بلندتر ژ ته ئاخفتنێ دكه‌ت،ئانكو ژبلى په‌یڤێن ته،چاوانیا ئاماژێ و لڤینێن ته گه‌له‌ك واتایێ دگه‌هینن،هه‌كه ل ده‌مێ رێككه‌فتنه‌كا بازرگانى دا ته دڤێت بكرى رازى بكه‌ى،به‌لێ د لڤینێن ته‌دا،دل نه‌رحه‌تیه‌ك هه‌بیت،ئه‌و رێككه‌فتن سه‌ر ناگریت،ژبه‌ر هندێ ئه‌و بكر دبینیت كو تۆ چه‌ند نه‌یێ ئارامى د لڤینێن خوه دا،له‌ورا پیێن خوه جێگیر بكه و بتنێ د وان ده‌مان دا لڤینێ بكه،یاكو ته دڤێت جه‌ختێ ل سه‌ر خاله‌كێ بكه‌ى،هه‌ر چه‌نده دبیت ئه‌ڤه ژلایێ تیۆرى ڤه یا ب ساناهى بیت،به‌لێ ژ لایێ پراكتیكى ڤه‌یا ب ساناهى نینه،له‌ورا یا باشتره كو تۆ د ژووره‌كا ڤالادا ئه‌ڤێ تاقى بكه‌ى،به‌رى گۆتار گۆتنێ.
.ب روونى و هێمنى باخڤه.
خه‌لكێ پێدڤى ب ده‌مى هه‌یه بۆ لێكدانا په‌یڤێن ته،رستێن خوه هه‌موویان ل سه‌ر ئێك نه‌بێژه،بلا چركه‌یه‌ك یان دو دناڤبه‌را هه‌ر رسته‌یه‌كێ دا هه‌بیت،بۆ ڤێ مه‌به‌ستێ ژى تۆ دشێى دبن ئه‌زمانێ خوڤه بێژى”هزار و ئێك،هزار و دو”،ب ڤى ره‌نگى تۆ دشێى ماوه‌ى بێخیه دناڤبه‌را رسته‌یان دا،ل ده‌ستپێكا راهێنانان دا ب ده‌نگه‌كێ بلند ڤێ چه‌ندێ ئه‌نجام بده،به‌لێ ل ده‌مێ پێشكێشكرنا گۆتارێ دا ب بێ ده‌نگى ئه‌نجام بده.
هه‌روه‌سا بۆ راهێنانێن باشتر،ژووره‌كا مه‌زن ببینه و گازى هه‌ڤالێ خوه بكه،كو ل دوماهیا وێ ژوورێ راوه‌ستیت و گوهێ خوه بده‌ته ته،هه‌روه‌سا د تێنه‌گه‌هشتێ یان گوه لێنه‌بوونێ ته ئاگه‌هدار بكه‌ت،ب ڤى ره‌نگى دێ زانى كادێ چه‌ند ده‌نگێ خوه بلندكه‌ى و دێ هه‌تا چو راده گۆتنێن خوه روون كه‌ى.
.رووناهیێ بێخه سه‌ر په‌یاما سه‌ره‌كى.
ده‌مێ ل زانكۆیێ قوتابیه‌ك هه‌ول بده‌ت مێژوویا ئه‌مریكا د ماوێ ده‌مژمێره‌كێ دا به‌حس بكه‌ت،دبیت ئه‌ڤه ل ده‌ف ته یا سه‌یر بیت،به‌لێ پشتراست به كو تۆ نه‌شێى هیچ زانیاریه‌كێ ژ وێ گۆتارێ وه‌ربگرى،له‌ورا پێدڤیه هه‌مووگاڤا د گۆتار و ئاخفتنێن خوه دا بابه‌ته‌كێ دیاركرى هه‌لبژێرین،بۆ نموونه ل جهێ به‌حسكرنا هه‌موو مێژوویا ئه‌مریكا،باشتره رووناهیێ بێخیته سه‌ر قۆناغه‌كا تایبه‌ت یا مێژوویا ئه‌مریكا،هه‌روه‌سا هه‌رده‌م خالێن سه‌ه‌ركى یێن گۆتارا خوه ل سه‌ر پارچه كاغه‌زه‌كێ بنڤێسه،داكو رێزبه‌ندیا بابه‌تێ گۆتارا ته تێكنه‌چیت.
.راهێنانان بكه.
تۆ دشێى چه‌ندین په‌رتووكان ل سه‌ر پێشكێشكرنا گۆتارێ بخوینى،به‌لێ خۆ ئێكا ژ وان مفاى ناگه‌هینیته ته،هه‌تاكو تۆ راهێنانان دكه‌ى و ل سه‌ر هندێ فێر ببى،چونكى هه‌موو گاڤا راهێنان و خوه ئاماده‌كرن،دێ بنه گرنگترین خالێن سه‌ركه‌فتنا گۆتارا ته.
نيشاندان
