ئه‌ڤرۆ نیۆز،زنار تۆڤى:
هونه‌رمه‌ند ته‌حسین تاها ل سالا 1941 ل قه‌زا ئامێدیێ یا سه‌ر ب پارێزگه‌ها دهوكێ ڤه‌ ژ دایك بوویه‌،دناڤ ماله‌كا كورد په‌روه‌ر و ئه‌ڤیندارێن هونه‌ر و مۆزیكا كوردى دا مه‌زن بوویه‌،سالا 1960 دچیته‌ به‌غدا و ل كۆلیژا هونه‌رێن جوان پشكا شانۆیێ دخوینیت،لێ ژ ئه‌گه‌رێ هه‌لویستێن وى یێن كوردایه‌تى دهێته‌ دورخستن و زیندانكرن،ل ده‌ستپێكا سالێن 1970 جاره‌كادى ڤه‌دگه‌ریته‌ وارێ سترانگۆتنێ ل رادیۆیا كوردى ل به‌غدا و 120 سترانان ل وێ رادیۆیێ تۆمار دكه‌ت،هه‌روه‌سا ل سالا 1987 ب هه‌فكارى ل گه‌ل تیپا دهوك یا مۆزیكێ چه‌ندین سترانان تۆمار دكه‌ت.
ته‌حسین تاها ل سالا 1994 به‌ره‌ف ئورۆپا ڤه‌ دچیت بۆ ئه‌نجامدانا چه‌ندین ئاهه‌نگێن هونه‌رى و پاشى دچیته‌ وه‌لاتێ هوله‌ندا و ل وێرێ دمینیت،لێ تۆشى ئێشا دلى دبیت و ل 28/5/1995 ل وه‌لاتێ هوله‌ندا وه‌غه‌ر دكه‌ت و پاشى ته‌رمێ وى دهێته‌ ڤه‌گۆهاستن بۆ باژێرێ ئامێدیێ و ل گۆرستانا ئامێدیێ دهێته‌ ڤه‌شارتن.
ته‌حسین تاهاى خزمه‌ته‌كا مه‌زن پێشكێشى هونه‌رێ كوردى كریه‌ و ل سالا 1958 چه‌ندین ستران ل رادیۆیا كوردى ل به‌غدا گۆتینه‌،هه‌روه‌سا چه‌ندین سترانێن دوقولى ل گه‌ل عه‌یشه‌ شانێ و گولبهارێ و شه‌مال سائیبى و فوئاد ئه‌حمه‌دى گۆتینه‌ و ته‌حسین تاهاى د هه‌موو وارێن ژیانێ دا سترانگۆتینه‌ و ب هونه‌رمه‌نده‌كێ نه‌مر دهێته‌ نیاسین و هه‌ر و هه‌ر دێ مینیت ستێره‌كا گه‌ش ل ئه‌سمانێ هونه‌رێ كوردى دا،ته‌حسین تاهاى 8 ئه‌لبۆمێن سترانا هه‌نه‌،ئه‌ڤه‌ ژبلى ب ده‌هان ستران ل ئاهه‌نگ و بیره‌وه‌ریان ژى گۆتینه‌.