ئه‌ڤرۆ نیۆز،ره‌مه‌زان هه‌رنى:

كچا هه‌لبه‌ستڤانێ كورد جگه‌ر خوینی دیاركر: بابێ وێ پترى سه‌د به‌رهه‌مێن نڤیسى هه‌نه‌ و هه‌تا 30 به‌رهه‌مان هاتینه‌ چاپكرن و یێن دى نه‌هاتینه‌ چاپكرن،گه‌له‌ك جاران داخواز دهێنه‌ كرن كو چاپ بكه‌ین به‌لێ هێشتا ئه‌و ده‌لیڤه‌ نه‌چێبوویه‌ ئه‌م وان به‌رهه‌مێن مایى چاپ بكه‌ین،هه‌ر سال ل بیرهاتنا وه‌غه‌كرنا جگه‌رخوینی دا به‌رهه‌ڤیێن باش دهێنه‌ كرن و هه‌لبه‌ستڤانێن هه‌ر چار پارچێن كوردستانێ قه‌ستا سه‌ر گورێ وى دكه‌ن هه‌رئێك ب گوتنه‌كێ وه‌سفا وى دكه‌ن و رۆلێ وى د بیاڤێ ئه‌ده‌بێ كوردا دا بلند دبینن و نه‌بوونا وى ب بوشایه‌كا مه‌زن دزانن و هه‌رگاڤ دبێژن جه‌گه‌رخوین به‌شه‌كه‌ ژ فه‌رهه‌نگا ئه‌ده‌بێ كوردى و ئه‌م ژى شانازیى ب وى ئه‌ده‌بیاتى َڤه‌دكه‌ین.

رۆژین كچا هه‌لبه‌سڤان جه‌گه‌رخوین بۆ ئه‌ڤرۆ نیۆز دیاركر:گه‌له‌ك جاران بابێ من دگۆت خه‌ونا من ئه‌وه‌ ئه‌ز ده‌وله‌تا كوردستانێ ببینم و ئالایێ كوردستانێ یێ بلند بیت ل سه‌ر ئاڤاهیێن ده‌وله‌تا كوردستانێ،به‌لى َمخابن نه‌گەهشت خه‌ونا خوه‌ و گه‌له‌ك ئاشتى خوازبوو،هەروەسا وه‌ك باب ل گه‌ل مه‌زن نه‌بۆ پتر وه‌ك هه‌ڤال بو ل گه‌ل مه‌ گه‌له‌ك مرۆڤه‌ك هه‌ست نازك و دلسوز بوومرۆڤه‌ك جڤاكى و هەردەم خوە نێزیكی خه‌لكى دکر.

ل دوماهیێ كچا هه‌لبه‌ستڤان جه‌گه‌رخوین ئاشكراكر: دیوانێن وى یێن چاپكرى ئه‌ڤه‌بوون،(بریسك و پێتى)سالا1945دیمه‌شق،دویوانا دویێ(سه‌ورائازادى)1954دیمه‌شق،دیوانا سیێ(كیمه‌ئه‌ز)1973دیمه‌ش،دیوانا چارێ(روناك)1980ستوكهولم،دیوانا پێنجێ(زه‌ندئاڤێستا)1981ستوكهولم،دیوانا شه‌شێ(شه‌فه‌ق)1982ستوكهولم،دیوانا حه‌فتێ(هێڤى)1983 ستوكهولم ،دیوانا هه‌شتێ(ئاستى)1985 ستوكهولم،ده‌ستورێ زمانێ كوردى 1961 به‌غدا ،فه‌رهه‌نگ به‌رچێ ئێكێ 1962 به‌غدا ،فه‌رهه‌نگ به‌رچێ دویێ 1962 به‌غدا،ل گه‌ل چه‌ندین دیوان و به‌رهه‌مێن دى كو هاتینه‌ چاپكرن و هژماره‌كا به‌رچاڤ ژى مایه‌ كو جگه‌رخوین نڤیسانه‌ و نه‌هاتینه‌ چاپكرن.

هه‌لبه‌ستڤانێ كورد شێخ موس حه‌سه‌ن محه‌مه‌د یێ به‌رنیاس ب جگه‌رخوین سالا 1903 ل گوندێ حه‌سارا مێردینێ ل باكۆرێ کوردستانێ هاتیه‌ سەر دونیایێ،ل سالا 1925 ب ته‌مامى دبیته‌ نڤیسه‌ر و هه‌لبه‌ستێن وى ده‌نگ ڤه‌دانى دروست دكه‌ن به‌لێ 22/10/1984 ل وه‌لاتێ سوید وه‌غه‌را دوماهیێ دكه‌ت و به‌ریا مرنێ وه‌سیه‌ت دكه‌ت وى ل قامیشلۆ ڤه‌شێرین.