ئه‌ڤرۆ نیوز، هه‌رهین محه‌مه‌د:
سترانبێژا گه‌نجا رۆژهه‌لاتێ كوردستانێ دوتمیر ناز بۆ ئه‌ڤرۆ نیوز دیاركر كو نوكه ئه‌و مژوولى سترانه‌كێ یه ب ناڤێ “كوردستان” كو ژپه‌یڤێن ره‌شو عه‌یشانى نه و ئاوازێن دوتمیر ناز ئه‌ندازیار یا ده‌نگى یه‌شار یه‌پاشتیمان و ژ ده‌رهێنانا هه‌ژار دهوكى و ژڤانه ل ده‌مه‌كێ نێزیك بهێته به‌لاڤكرن گۆتژى ناڤه‌رۆكا ڤێ سترانێ دبێژیت به‌لێ سه‌د جار بۆ ده‌وله‌ت بوونێ.
ئه‌ڤرۆ نیوز ، نه‌وزاد هلۆرى:
ئه‌ڤرۆ ب به‌رهه‌ڤبوونا وه‌زیرێ چاندن و ژێده‌رێن ئاڤى و پارێزگارێ دهۆكێ پێشانگه‌ها 12ێ یا ترى و هنگڤینێ خومالى ل فاملى مولا دهۆكێ هاته‌ڤه‌كرن و تێدا چه‌ندین جورێن ترى و هنگڤینى هاتنه نیشاندان ، و ژلایه‌كێ دنڤه پارێزگارێ دهۆكێ هیڤیىخوارست كو خه‌لكێ كوردستانێ ل روژا 25 ئیلونێ بچنه سه‌ر سندوقێن ده‌نگدانێ و ب به‌لێ ده‌نگ بو ریفراندۆمێ بده‌ن.
فه‌رهاد ئه‌تروشی پارێزگه‌رێ دهوكێ‌د رێورسمێن ڤه‌كرنا پێشانگه‌هێ دا زێده‌بارى ده‌ست خوشی ل رێڤه‌به‌ریا گشتی یا چاندنێ و جوتیارێن پشكدار د په‌یڤه‌كێ دا گۆت: ( ئاسایشا خارنێ زور یا گرنگه كو پوته پێ بهێته دان ، و هه‌ر ژ كه‌ڤن دا باب و باپیرا گرنگی دایه چاندنێ و هه‌رده‌م نانی خوه ب ده‌ستێن خوه په‌یدا كریه ، و بو پێشڤه‌برنا كه‌رتێ چاندنێ و دابینكرنا پێدڤیێن گرنگ پارێزگه‌ها دهوك بو یا پێدڤى به‌رهه‌ڤه)
زێده‌تر گۆت: (هه‌می شوره‌ش و خوراگریا ملله‌تی كورد و قوربانیێن وی بو ئازادی و سه‌خوبونی بویه و تنێ شه‌رێ دژی تیرورستێن داعش زێده‌تر ژ هزار و 800 شه‌هیدا هاتیه‌دان پێخه‌مه‌ت پاراستنا ئاخا كوردستانێ و كه‌رامه‌تا كوردستانیان ،و ریفراندوم ملكێ هه‌می خه‌لكێ كوردستانێ یه نه مولكێ چ حزب و كه‌سا یه دڤێت هه‌می پێكڤه هاریكار بن پێخه‌مه‌ت سه‌ركه‌فتنا وێ و ده‌نگ دان ب به‌لێ(
ژلایه‌كێ دن ڤه عه‌بدولستار مه‌جید وه‌زیرێ چاندن و ژێده‌رێن دپه‌یڤه‌كێ دا ده‌ست خوشی ل پارێزگه‌ها دهوكێ و رێڤه‌به‌ریا چاندنێ و جوتیارێن پشكدار كر و هیڤیا سه‌ركه‌فتنێ بو خواست و ئاماژه كره به‌رنامێن وه‌زاره‌تا چاندنێ بو خزمه‌تكرنا جوتیارا و پێشڤه‌برنا كه‌رتێ كشت و كالی ل هه‌رێما كوردستانێ دبه‌رده‌وامن.
دهێته زانین كو دپێشانگه‌هێ دا 25 ره‌زڤانێن ترى و 15 مێشه‌ڤان پشكداری پێشانگه‌هێ ببوون و تێدا زێده‌ترى50 جورێن تری هاتینه نیشاندان ، و سالانه ل دهۆكێ 13 هزار ته‌نێن تری و 136 ته‌نێن هنگڤینی دهێنه به‌رهه‌م ئینان .
ئەڤرۆ نیوز:
سەرۆکوەزیرێن ئیراقێ، حەیدەر عەبادی د پرێسکۆنفراسێ خوە یێ حەفتیانە دا رستەیا خوە یا بەرنیاس بۆ جارا پێنجێ گۆتەڤە و خویا کر: رێفراندۆما کوردستانێ نەدەستوورییە.”
عەبادی گۆت کو رێفراندۆما سەرخوەبوونا کوردستانێ نەدەستووری و تاکئالییە و حکومەتا ھەرێمێ ب وێ یەکێ سووچبار کر کو پەترۆلا کەرکووکێ بێ بەغدا و ب رەنگەکێ نەقانوونی و نەدەستووری ھەناردە دکەت.
سەرۆکوەزیرێن ئیراقێ ژ سەرکردەیێن کوردستانێ خواست سەرەدانا بەغدا بکەن و دەرگەھێ دیالۆگێ ڤەکەن بۆ دیتنا چارەسەرییان.
ناڤھاتی گۆت ژی: ئەم رێ ب پارچەکرنا ئیراقێ نادەین ژبەرکو ئەم ل ڤی وەلاتی ھەڤپشکین و ژ وەلاتیێن ھەرێما کوردستانێ دخوازم پرۆسەیا رێفراندۆمێ رەت بکەن.”
ئه‌ڤرۆ نیوز ، هلۆرى:
ئه‌ڤرۆ سه‌رۆكێ هه‌رێما كوردستانێ ل گه‌ل پێكهاته‌یێن ئاینى و نه‌ته‌وه‌یى ل كه‌ركوك كومبوو و دیاركر كو مه زور بزاڤكرن كو ل گه‌ل عیراقێ هه‌ڤپشك بین به‌لێ چوو پێڤه‌نه‌هات ، و ئه‌م رێ ب چوو كه‌س و لایه‌یان ناده‌ین كو برایه‌تیا كه‌ركوك تێكبده‌ت.
مه‌سعود بارزانى سه‌رۆكێ هه‌رێما كوردستانێ ئه‌ڤرۆ سه‌ره‌دانا پارێزگه‌ها كه‌ركوك كر و د كومبوونه‌كێ ل گه‌ل پێكهاته‌ییێن وى باژێرى دیاركر كو ئه‌و یێ هاتى داكو گوهداریا گل و گازنده و داخوازیێن خه‌لكێ كه‌ركوكێ بگریت و گۆت: ( نها ده‌م هات كه‌ركوك ب ده‌ڤه‌رێن ڤه‌قه‌تیایى ڤه ڤه‌گه‌رنه باوه‌شا هه‌رێما كوردستانێ ، و ئه‌ڤ یه‌ك ژى دێ ب بریارا خه‌لكێ كه‌ركوكێ و ئه‌وان ده‌ڤه‌ران ب خوه بیت ، ره‌نگه چه‌ند لێدوان و ئاخفتن بهێنه گوتن كو ده‌ربرینێ ژ بوو شه‌رى بكه‌ن ، به‌لێ ئه‌م گوهداریا چوو ژ وان ئاخفتنان ناكه‌ین ، گه‌لێ كوردستانێ دێ ب ریفراندۆمێ به‌رسڤا وان ده‌تن و به‌ر ب سه‌ربه‌خوه‌یێ چیت)
زێده‌تر گۆت: (ب درێژاهیا سالێن بورى كه‌ركوك باژێرێ پێكڤه‌ژیان و براتیێ بوویه و رێ ب چوو كه‌س و لایه‌یان ناده‌ین كو برایه‌تیا كه‌ركوكێ تێك بده‌ت ، ئه‌م وه‌كو گه‌لێ كوردستانێ ناخوازین ل وه‌لاته‌كێ بژین كو تایفه‌گه‌رى تێدا یا زال بیت و لسه‌ر خوه قبول نه‌كرى هه‌ڤپشكێ وان بین ، و بو به‌رسینگرتنا هه‌ر نه‌رازیته‌كێ ژى به‌رهه‌ڤین به‌ره‌ڤانیێ ژ خوه بكه‌ین )
سه‌رۆكێ هه‌رێما كوردستانێ د درێژاهیا كومبوونا خوه دا ل گه‌ل پێكهاته‌یێن كه‌ركوكێ دیاركر ژى كو رێیا ده‌نگدان لسه‌ر ریفراندۆمێ ل به‌ر خه‌لكێ كه‌ركوكێ لرۆژا 25 ئیلونێ یا ڤه‌كریه و ناهێلین كه‌س ببیته رێگر و گۆت ژى: (ریفراندۆم دێ ده‌وله‌ته‌كا سه‌رخوه و ئارام ژ بوو كوردستانێ هه‌موویێ درۆست كه‌ت )
ئه‌ڤرۆ نيوز:
ب گۆره‌ى ئه‌و پێزانينێن ل به‌ر ده‌ست بڕياره ئه‌ڤرۆ ئێڤارى 12ى ئيلۆنا 2017ێ شانده‌كێ بلندێ پارتى ديموكراتى كوردستان ل گه‌ل ئێكگرتوو ئيسلامى كوردستان كۆم بيت.
ب گۆره‌ى پێزانينان نوكه جڤاتا سياسى يا ئێكگرتوو ئيسلامى كوردستان د كۆمبوونێ دايه، به‌لێ ل گه‌ل شاندێ مه‌كته‌با سياسى يا پارتى كۆم ببيت.
ئه‌ڤرۆ نیۆز،ره‌مه‌زان هه‌رنى :
ب مه‌به‌ستا پشته‌ڤانیكرنا رێفراندومێ و سه‌ربه‌خۆیا کوردستانێ ئه‌ڤرۆ 2017/9/12 رێڤه‌به‌ریا شه‌هیدان و ئه‌نفالكریان ل سۆران مه‌راسیمه‌ك رێكخست بۆ زارۆیێن شه‌هیدان ل هولا پاركا گولان و تێدا چه‌ندین ستران و پارچه‌موزیك هاتنه پێشكه‌شكرن و پاشان پێدڤیێن خواندنێ ل سه‌ر 130 زارۆیێن شه‌هیدان دابه‌شكرن وه‌ك وه‌فایه‌ك به‌رامبه‌ر خوینا شه‌هیدان.
ئه‌ڤرۆ نیوز ، هلۆرى:
كومبوونا دناڤبه‌را پارتى و ئێكه‌تى و گۆڕان ل هه‌ولێر ل مه‌كته‌با سیاسیا ئێكه‌تیا نیشتمانیا كوردستانێ ده‌ستپێكریه و دهێته چاڤه‌رێكرن كو كومبوونه‌كا ئێكلاكه‌ر بیت ل بارا كاراكرنا په‌رله‌مانى و ئه‌نجامدانا ریفراندۆمێ ل هه‌رێما كوردستانێ.
پێشتر ئێكه‌تى و پارتى بریاردایه كو لرۆژا 14 ئیلونێ په‌رله‌مانێ كوردستانێ كارا بكه‌ن و ئه‌گه‌ر گۆران به‌رهه‌ڤى رونشتنا په‌رله‌مانى نه‌بیت دێ ب ته‌مه‌نترین ئه‌ندامێ په‌رله‌مانێ كوردستانێ سه‌روكاتیا رونشتنا په‌رله‌مانى كه‌ت.
ل گوره‌ى زانیاریێن ئه‌ڤرۆ نیوز كومبوونا ئه‌ڤرۆ یا هه‌رسێ ئالیێن سیاسى دێ كومبوونه‌كا ئێكلاكه‌ر بیت ب تایبه‌تى ژ ئالیێ گۆرانێ ڤ بو كاراكرنا په‌رله‌مانى و ئه‌نجامدانا ریفراندۆما هه‌رێما كوردستانێ و گۆران دخوازه گه‌رنتیه‌كێ وه‌ربگریت.
زێده‌بارى كاراكرنا په‌رله‌مانێ كوردستانێ و پرسا ریفراندۆمێ دهێته چاڤه‌رێكرن كو به‌حس ل باشتركرنا ره‌وشا ژین و ژیانا خه‌لكێ كوردستانێ و راكرنا پاشكه‌فتا موچه‌ى و هاتنا موچه‌یان ژى بهێته‌كرن.
ئەڤرۆ نیۆز،زنار تۆڤی:
ئەڤرۆ سیشەمبی 12.9.2017 سەرۆکێ هەرێما کوردستانێ پێشوازی ل جێگرێ سەرۆک کۆمارێ عێراقێ ئەیاد عەلاوی کر و د وێ هەڤدیتنێدا قۆناغا پشتی داعشێ و ریفراندۆما سەرخوەبوونا کوردستانێ هاتە بەحسکرن.
ئەڤرۆ مەسعود بارزانی سەرۆکێ هەرێما کوردستانێ ل پیرمام ل گەل ئەیاد عەلاوی جێگرێ سەرۆک کۆمارێ عێراقێ و شاندەکێ ل گەل دا کۆمبوویە و د وێ کۆمبوونێ دا رەوشا سیاسی و ئەمنی یا دەڤەرێ و هەڤرکیێن هەمبەری داعشێ پشتی رزگارکرنا مۆسلێ هاتینە بەحسکرن.
هەروەسا بارزانی و عەلاوی د کۆمبوونێ دا دانوستاندن ل سەر بابەتێن گرێدای ریفراندۆما سەرخوەبوونا کوردستانێ و پاشەرۆژا پەیوەندیێن د ناڤبەرا هەولێر و بەغدا دا بەحسکرینە.
ئه‌ڤرۆ نیوز ، نه‌وزاد هلۆرى:
ئه‌ڤرۆ په‌رله‌مانێ عیراقێ د رونشتنه‌كا تایبه‌ت دا بریارا ئه‌نجام دانا ریفراندۆما هه‌رێما كوردستانێ ره‌تكر ، و ئه‌ندامه‌كێ په‌رله‌مانێ عیراقێ ژ فراكسوونا زه‌ر دیاركر كو ره‌تكرنا ریفراندۆما هه‌رێما كوردستانێ ژلایێ په‌رله‌مانێ عیراقێ ڤه چوو كارتێكرن نینه و ژ مێژه ئه‌ڤ یه‌ك ل په‌رله‌مانێ عیراقێ دهاته چاڤه‌رێكرن ، و سه‌لیم جبوورى سه‌رۆكێ په‌رله‌مانێ عیراقێ رێكه‌فتنه‌كا نهێنى ل گه‌ل نورى مالیكى و هادى عامرى بو ره‌تكرنا ریفراندۆما هه‌رێما كوردستانێ ئیمزا كریه.
رێناس جانو په‌یڤدارێ فراكسوونا زه‌ر ل په‌رله‌مانێ عیراقێ بو ئه‌ڤرۆ نیوز گۆت: ( رونشتنا ئه‌ڤرۆ یا په‌رله‌مانێ عیراقێ و ره‌تكرنا ریفراندۆما هه‌رێما كوردستانێ ژلایێ وان ڤه چوو كارتێكرنێ لسه‌ر ریفراندۆما هه‌رێما كوردستانێ و پاشئێخستنا وێ ناكه‌ت و گه‌لێ كوردستانێ و سه‌ركرداتیا سیاسیا كوردستانێ بریارا خوه دایه و لێڤه‌بوون نینه)
زێده‌تر گۆت: ( هه‌موو فراكسوونێن كوردستانێ بایكوتا روونشتنا ریفراندۆما سه‌ربخوه‌ى یا كوردستانێ كریه ، و فراكسوونێن توركمان ژى نكارن چوو كارتێكرنان ل په‌رله‌مانێ عیراقێ بكه‌ن كو ریفراندۆما هه‌رێما كوردستانێ ره‌ت بكه‌ن)
جانوى د درێژاهیا ئاخفتنێن خودا دیاركر ژى كو ئێدى ده‌م هات گه‌لێ كوردستانێ و لایه‌نێن سیاسى تێگه‌هن كو عیراقێ چوو خێر و بێر بوو گه‌لێ كوردستانێ نه‌مایه و ب هه‌موو شیانان رێگرن ل به‌رامبه‌ر مافێن گه‌لێ كوردستانێ و دژاتیا كوردان دكه‌ن و گۆت ژى: (پێدڤى یه كورد ناڤمالیا خوه بپارێزن و ئێكگرتى و ئێكرێز بن به‌رامبه‌ر عیراقێ ، و رونشتنا ئه‌ڤرۆ یا په‌رله‌مانێ عیراقێ رونشته‌كا نه‌یا قانونى بوویه به‌لكو رێكه‌فتنه‌كا سیاسى بوویه دناڤبه‌را سه‌لیم جبورى سه‌رۆكێ په‌رله‌مانى و هادى عامرى و نورى مالیكى داكو ب دژى گه‌لێ كورد بریارێ بده‌ن ژبه‌ركو سه‌لیم جبورى شڤێدى ل گه‌ل نورى مالیكى و عادى عامرى دویر ژ هه‌موو راگه‌هاندنان و ب نهێنى كوم بوینه و رێكه‌فتنه‌ك بو پاشێخستنا ریفراندۆما هه‌رێما كوردستانێ ژى ئیمزا كریه)
سه‌ركرداتیا كوردستانێ دخوازه پرسیاره‌كێ ل هه‌موو گه‌لێ كوردستانێ بكه‌ت كا ئه‌رێ ل گه‌ل سه‌ربخوه‌ى یا كوردستانێ نه یان ل گه‌ل عیراقێ نه ، و ئه‌ڤ بریار بو گه‌لێ كوردستانێ یه و هه‌ر ده‌نگدانه‌كا دژى ئه‌ڤێ پرسیارێ بهێته ئه‌نجامدان ، ده‌نگدانه‌كه دژى خواستێن گه‌لێ كوردستانێ و ژبلى دژاتیێ چوو تشته‌كێ دن نینه ، رێناس جانوى هوسا گۆت.
نيشاندان