ئەڤرۆ نیۆز،زنار تۆڤی:

جێگرێ سۆپا سالارێ وەزارەتا پێشمەرگێ كوردستانێ رادگەهینیت،بۆ كۆنترۆلکرنا حەویجە پێدڤیە پلانەکا نوو بهێتە دانان.

لیوا قارەمان شێخ كەمال، جێگرێ سۆپا سالارێ وەزارەتا پێشمەرگێ كوردستانێ راگەهاندیە:بۆ كۆنترۆلکرنا حەویجە یان هەر جهەکێ دیتر هندەك هێز هەنە كو د ئامادە و جۆدانە ژ هێزێن دیتر،لەورا دهێنە دیارکرن بۆ بەشداری پێكرنێ د شەراندا،ئەو ژی سوپایێ عێراقێ و هێزێن پێشمەرگێ كوردستانێ و هێزێن هەڤپەیمانانە،پشکەک ژ وان ب رێیا زەمینی شەری دكەن و ئەوێن دیتر ژی ب رێیا ئەسمانی بەشدار دبن.

هەروەسا دبێژیت ژی:دەمێ پلانەک دهێتە دانان، پێدڤیە ئەرك تێدا بهێنە دیاركرن،ئەو ژی بهێتە روونکرن كو هێزا پێشمەرگێ كوردستانێ دێ چو رۆل د وێ ئۆپەراسیۆنێدا هەبیت، چونكی دەمێ مە دڤێت ئارمانجەکێ ب پێكین، پێدڤیە ماوەیەك بۆ هندێ بهێتە دانان، هەروەسا ئەو ژی بهێتە دیارکرن کو وێ هێزێ بۆ هەیە هەتاکو کیڤە بچیت؟،دێ ئەركێ وێ چاوا بیت؟.

پێشتر ل دەمێ ئۆپەراسیۆنا رزگاركرنا مۆسلێ دا چەند كۆمبوونەک هاتنەکرن، هەروەسا پلان بۆ رزگاركرنا دەڤەرێن دیتر یێن ل ژێر دەستهەلاتا داعشێ و ب تایبەت ل حەویجە هاتیە دانان،لیوا قارەمان شێخ كەمال، گۆت ژی:بۆ رزگاركرنا حەویجە پێدڤیە پلانەکا نوو بهێتە دانان،چونكی دۆخێ وی گوهۆرین ب سەر دا هاتیە،پشکەک ژ دەڤەرێن وێ ژ دەستێ داعش هاتینە رزگاركرن.

لیوا قارەمان شێخ كەمال دیارکریە ژی: بۆ كۆنترۆلکرنا حەویجە ئارامی دێ بۆ باژێرێ كەركوكێ و دەڤەرێن خورماتۆ و داقۆق ڤەگەریتە ڤە،هەروەسا ژ روویێ ئەمنی ڤە دێ زێدەتر هێنە پاراستن،ل گەل هندێ ژی هێزێن پێشمەرگێ كوردستانێ هەموو گاڤا جەخت ل گرنگییا رزگاركرنا حەویجە كریە.

جێگری سۆپا سالارێ پێشمەرگەی دبێژیت ژی: ل دووڤ ئاگەهداریێن مە نوکە سۆپایێ عێراقێ بۆ كۆنترۆلکرنا حەویجە هاتیە دیارکرن، هێزێن پێشمەرگەی ژی دێ ل چارچۆڤێ ڤێ ئۆپەراسیۆنێ دابن،ئەگەر هەیە کو هێزێن حەشدا شەعبی بەشداریێ د رزگاركرنا حەویجە دا نەكەن،چونكی ئەو هێزا نوکە ل بەشیر و داقوق هەی گەلەک د كێمن.