ئه‌ڤرۆ نيوز:
كۆمپانيا فه‌يسبۆكى كو نوكه خودانا تۆڕا جڤاكيا “ئينستگرامى” يه، كۆمه‌كا فلته‌رێن نوو بۆ كاميرا ئينستگرامى زێده‌كرن.
دوهى رۆژا سێشه‌مبى 16ى گۆلانا 2017ێ كۆمپانيا فه‌يسبۆكى د راگه‌هاندنه‌كا فه‌رمى دا ئاشكه‌را كر كو كۆمه‌كا فلته‌رێن نوو بۆ كاميرا ئينستگرامى زێده كرينه كو ژ نوكه و پێڤه بكارئينه‌رێن ڤێ تۆڕا جڤاكى دشێن ل ده‌مێ وێنه‌گرتنا سێلڤى و ئاسايى دا ب كاربينن.
ئه‌ڤرۆ نيوز:
كچه‌كا 27 سالى پشتى ڤيايى ره‌گه‌زێ خوه ب گوهۆڕيت بۆ نێرينه د نشته‌رگه‌ريه‌كێ دا گيانێ خوه ژ ده‌ست دا.
به‌ره‌ن يه‌لدز يا 27 سالى خه‌لكا پارێزگه‌ها ده‌نيزلى يا توركيايه، يلدز ماوه‌كێ زۆر بوو بزاڤ دكر د رێيا نشته‌رگه‌ريه‌كێ دا ره‌گه‌زێ خوه ب گوهۆڕيت. ل دووماهيێ ل نه‌خۆشخانه‌كا تايبه‌ت يا باژێرێ سته‌مبۆل نشته‌رگه‌رى بۆ هاته ئه‌نجام دان. پشتى چه‌ند ده‌مژمێران د نشته‌رگه‌ريێ دا يلدز هاته سه‌ر هشێن خوه، به‌لێ ژ به‌ر ره‌وشا وێ يا ساخله‌ميێ يا خراب گيانێ خوه ژ ده‌ست دا.
نوشدارێن نه‌خۆشخانێ دبێژن: “به‌ره‌ن يه‌لدز چو كێشه د نشته‌رگه‌ريا خوه دا نه‌بوون، به‌لێ ژ ئه‌گه‌رێ ته‌نگه‌نه‌فه‌سێ گيانێ خوه ژ ده‌ست دايه”.
خێزانا وێ كچا 27 سالى سكالا ل دژى نوشدارێ ب وێ نشته‌رگه‌ريێ رابوويى تۆماركريه.
ل توركيا نشته‌رگه‌ريا گوهۆڕينا ره‌گه‌زى يا قه‌ده‌غه نينه و ل چه‌ند نه‌خۆشخانه‌كێن وى وه‌لاتى دهێته ئه‌نجام دان و بهايێ وێ 30 هزار ليرێن توركى نه.
ئه‌ڤرۆ نيوز:
ئەڤە ماوێ چەند سالانە خالا گۆرکا سەرزێری ل ناحیا کانی ماسێ ھاتیە ڤەکرن، لێ ھێشتا نەبوویە دەرگەھەکێ بازرگانی و ب تنێ خەلک بۆ سەرەدان و گەشتوگۆزارێ ھاتنوچوونێ د ڤی دەرگەھی را دکەن، لەورا خەلک دخوازن کو خالا گۆمرکا سەرزێری ببیتە دەرگەھەکێ بازرگانی د ناڤبەرا ھەرێما کوردستانێ و وەلاتێ تورکیا دا، چونکی دێ ڤەژاندنەکا ئابووری ل ڤێ دەڤەرێ پەیدا بیت و ئەو خەلکێ ل سەر گوندان دێ مفایەکێ باش گەھیتە وان.
د ڤی واری دا سەربەست سەبری رێڤەبەرێ ناحیا کانی ماسێ بۆ رۆژناما ئەڤرۆ دیارکر، ھەتا نوکە وان پێنگاڤێن باش ھاڤێتینە ل گەل لایەنێ تورکیا کو خالا گۆمرکا سەرزێری یا سەر ب ناحیا کانی ماسێ ڤە ل قەزا ئامێدیێ ببیتە دەرگەھەکێ بازرگانی و ب ھیڤینە کو د ئەڤ سالە دا ئەڤ دەرگەھە ببیتە دەرگەھەکێ بازرگانی و خەلک مفایەکێ باش ژ ڤەکرنا ڤی دەرگەھی بینیت.
رێڤەبەرێ ناحیا کانی ماسێ گۆت ژی: نوکە بەرپرسەک بۆ خالا گۆمرکا سەرزێری ھاتیە دانان و ھەروەسا مە ب ھەڤکاریا قائیمقامێ قەزا ئامێدیێ و رێڤەبەریا گۆمرکا زاخۆ بزاڤێن باش ل گەل لایەنێ تورکی کرینە و ل پائیزا ئەڤ سالە ئەڤ دەرگەھە دێ بیتە دەرگەھەکێ بازرگانی و لایەنێ تورکیا ژی سۆز دایە مە و ھەروەسا خەلکێ گوندێن لایێ تورکیا ژی گەلەک بزاڤ کرینە ل گەل وەلاتێ تورکیا، ژپێخەمەت خالا گۆمرکا سەرزێری بیتە بازرگانی، چونکی ھەردو لا دێ ب ڤەکرنا ڤی دەرگەھی شێن کەلوپەلان بۆ خوە ئینن و دێ ب ڤی دەرگەھی ژین.
ئه‌ڤرۆ نيوز:
بڕیارە ھژمارەکا رێڤەبەرێن پەروەردێن ھەرێما کوردستانێ بھێنە گھۆڕین و ھندەک ژ وان یێن پارێزگەھا دھۆکێ نە، ئەندامەکێ لیژنا گھۆرینا رێڤەبەرێن پەروەردان ل وەزارەتا پەروەردێ دیار کر کو کار یێ بۆ ڤێ مەرەمێ دھێتەکرن و گۆت: “بێی وەزیری و رێڤەبەرێ گشتیێ دیوانێ نەشێم چو پێزانینێن ھوور ل دۆر ڤێ چەندێ بێژم”.
ژێدەرەکی ل وەزارەتا پەروەردێ یا حوکمەتا ھەرێما کوردستانێ بۆ رۆژناما ئەڤرۆ ئاشکرا کر کو بڕیارە بەھرا پتریا رێڤەبەرێن پەروەردێن ھەرێمێ بھێنە گھۆڕین و گۆت: “ئەڤ پرۆژە یێ کەڤنە و بەری سالەکێ ب رێیا پێشکێشکرنا CV یان ھاتبوو دەستپێکرن”.
ھەمان ژێدەر ئاماژە دا وێ چەندێ کو نوکە لیژنەکا بلند یا کار بۆ تژیکرنا پۆستێن رێڤەبەرێن پەروەردێن ھەرێمێ دکەت و گۆت: “رێڤەبەرێن ب وەکالەت ژی دێ ھێنە ئێکلاکرن”.
رۆژناما ئەڤرۆ بۆ پێزانینێن زێدەتر پەیوەندی ب ئەحمەد گەل، ئەندامێ لیژنا گھۆڕینا رێڤەبەرێن پەروەردێن ھەرێمێ ل وەزارەتا پەروەردێ کر، بەلێ ناڤبری یێ بەرھەڤ نەبوو چو داخویانیان بدەت و گۆت: “راستە ئەز ئەندامێ لیژنێ مە و کار یێ دھێتەکرن بەلێ من دەستھەلاتێن دانا پێزانینان نینن و ھوون دشێن سەرەدانا وەزیرێ پەروەردێ بکەن”.
ژ لایێ خوە ڤە مامۆستا وەحیدا یاقو، ئەنداما لیژنا پەروەردێ ل پەرلەمانێ کوردستانێ بۆ رۆژناما ئەڤرۆ دیار کر کو لیژنا پەروەردێ ل پەرلەمانێ کوردستانێ ئاگەھداری ڤی بابەتی نینە و گۆت: “وەزارەتا پەروەردێ چو پێزانین نەداینە لیژنا پەروەردێ ل پەرلەمانێ کوردستانێ”.
ئەڤرو نیوز ، نەوزاد زادە ھلۆری:
بالیوزێ ئاشتی و نیازپاکیێ ل جیھانێ کو خەلکێ ھەرێما کوردستانێ یە دیارکر کو چوار ملیون کوردێن رەسەن ب درێژاھیا دیروکێ ل مسرێ ھەبووینە ، ئەڤە ژبلی وان کوردان کو بو مەرەمێن بازرگانی و گەشتیاری کو سەرەدانا مسرێ و ئاکنجی ببون.
کوڤان عەبدوللەتیف بالیوزێ ئاشتی و نیازپاکیێ ل جیھانێ بۆ ئەڤرو نیوز گۆت: (پشتی کو د دوو مەھێن بوری دا باوەرنامەیا بالیوزێ ئاشتی و نیازپاکیێ ل جیھانێ ل وەلاتێ مسرێ ب من ھاتیەدان ، دوڤدا من پەیوەندی ب ” سلێمان عوسمان ” کر کو بالیوزێ مسرێ یە ل ھەرێما کوردستانێ ل بارا ھژمار و شێوازێ ژیانا کوردان ل مسرێ دیار بوو کو زێدەتری چوار ملیون کوردێن رەسەن ل مسرێ ھەبووینە و ژیانە و رەسەناتیا وان ژی دڤریت بو سەردەمێ پاشاتیا فیرعەونان ھەر بوو نموونە ھەڤژینا پاشایێ فیرعەونان ” نەفەر تیتی ” کوردە و کچەکا جوان و سەرنجراکێش بوویە ، دوڤدا لسەر دەمێ ” سەلاحەدین ئەیوبی ” و دەولەتا ئەیوبیان کورد ل مسرێ زێدەتر بوون ، ئەڤە ژبلی وان کوردان یێن پشتی و دوڤ وان دا ب مەرەمێن جوداجودا ل مسرێ ئاکنجیببوون)
زێدەتر گۆت: (چەندین کولان ل مسرێ ھەنە کو بناڤێ کوردان ھاتینە بناڤکرن ھەر بوو نموونە کولانەک بناڤێ ” کوردوفان ” ھاتیە بناڤکرن کو پرانیا خەلکێ ئەوێ کولانێ کوردن ، دیسان ل زانکویا ئەزھەر ژی جھەک ب ناڤێ ” رواق السیادە الاکراد ” ھەیە ، ئەڤە ژبلی وێ یەکێ کو دەنگبێژێ بناڤ و دەنگێ جیھانا ئیسلامی بو خواندنا قورئانێ ” عەبدولباست عەبدولسەمەد ” بخوە کوردەکێ رەسەن بووە ، ھەروەسا ” محەمەد عەلی پاشایێ مەزن ” ئێک بوویە ژ وەزیرێن دەولەتا مسرێ ل وی دەمی ھژمارەکا زورا کوردان دەرکەفتن و پەیوندی پێڤەکر و کوردان ل وی دەمی پێشکەفتنێن باش دەستخوڤەئینان ھەر بوو نموونە ناڤبری بویە ئێک ژ دامەزرێنەرێن رابوونا مسرێ و کەنالەک بناڤێ کەنالێ ” سوێس ” ڤەکر کو رولەکێ کارتێکەر ھەبوو لسەر رەوتا مسرێ و کوردان ژی)
بالیوزێ ئاشتی و نیازپاکیێ کو کورێ باژێرێ زاخویە د درێژاھیا ئاخفتنێن خودا دیارکر ژی کو زێدەباری سیاسەتێ دھەمان دەم دا ژ روویێ ھونەری ژی ڤە کوردان رولەکێ بەرچاڤ ل مسرێ ھەبوویە و گۆت ژی: (بناڤ و دەنگترین ئەو ھونەرمەندێن کورد ل مسرێ رولەکێ بەرچاڤ ھەبوویە ھونەرمەندان ” ئەحمەد شەوقی ، محەمەد ئەمین و خێزانا تەیموور ” بوون کو ب ” محرر المرە العربیە و لعقاد ” دھاتە نیاسین ، دوڤدا چەند ھونەرمەندەکێن دن ژی دەرکەفتن ژ وانان ” عەلی بەدرخان ، سعاد حوسنی ، نەخاتیا بچووک و دوو کچێن رەسام حوسنی ئەلبابا ” کو ئەڤە ھەموو کوردبوون)
ل مسرێ پێنج جاددە بناڤێ کوردان ھاتینە بناڤکرن و یا ژ ھەمووان بناڤ و دەنگتر بناڤێ ” المعادی فی القاھیرە ” کو پرانیا ئاکنجیێن وێ کوردن و کتەکا کێم یا خەلکێ دن ل وێ کولانێ ھەیە ، کوڤانی ھوسا گوت.
ئه‌ڤرۆ نيوز:
پەیوەندیێن تورکیا پشتی ئورۆپا نھا ژی ل ئەمریکا د ئاستەکی گەلەک خراب دانە و ل دووڤ میدیایێن جیھانێ سەرەدانا ڤێجارێ یا ئەردۆگانی دێ گەلەکێ لاواز بیت و وەکو جاران ئەمریکا گرنگیێ نادەتە تورکیا و ژ بەر ھندێ ژی پشتی سەرەدانا خوە یا بۆ ئەمریکا سەرۆک کۆمارێ تورکیا دێ نەچار بیت جارەکا دی کار بۆ چارەکرنا پرسا کوردی بکەت.
یاڤوز بایدار رۆژنامەڤان و نڤیسەرێ ناڤدار یێ تورکیا نرخاندنەکا گەلەک بەرفرەە و سەرنجراکێش ل سەر سەرەدانا ئردۆگانێ سەرۆک کۆمارێ تورکیا یا بۆ ئەمریکا دکەت و دیار دکەت کو ئەردۆگان و تورکیا د دیرۆکا خوە دا جارا یەکێیە ئەو ھندە لاواز و بێ ھێز ل گەل سەرۆکێ ئەمریکا ھەڤدیتنێ دکەت و گۆت: (راستە دێ دو سەرۆکێن وەلاتێن ئەمریکا و تورکیا ھەڤدیتنێ بکەن و ل سەر گەلەک بابەتان گەنگەشە بکەن لێ جوداھیەکا د ناڤبەرا ھەردو ئالیان دا ھەیە کۆ ئەو ژی ترامپێ سەرۆکێ ئەمریکا سەرۆکێ جیھانێیە و ئەردۆگان ژی سەرۆکێ وەلاتەکی ب تنێ یە و ئەڤ وەلات د پرانیا قادێن جیھانێ دا راستی شکستنێ ھاتیە و ئاخڤتن و نێرینێن وی گرنگیا خوە ژ دەست دایە، بۆ ڤێ یەکێ ژی ترامپ دێ بابەتێن گەنگەشێ دیار بکەت و یەک دەلیڤا ئەردۆگان ھەیە بێی کو قەرەبالغێ بکەت داخوازیێن ئەمریکا قەبوول بکەت).
رۆژنامەڤانێ تورک ھەروەسا راگەھاند ژی کو ئەمریکا ئاستەنگیێن تورکیا د شەرێ ل دژی داعشێ و کۆمێن دی یێن تیرۆرستی دا ب تەمامی رەت دکەت و ژ بەر رۆلا خراب یا تورکیا د شەرێ ل دژی تیرۆرێ دا گەلەک توورەیە و گۆت: (ئەم بنێرین ئەمریکا ب ئاشکرا راگەھاند کو ئەو دێ ھێزێن سووریا دیمۆکراتیک و یەپەگێ پرچەک بکەت و ئەڤ چەک نە بۆ دەمەکی دیارکری دھێتە دان بەلکو ئەو چەکێن کو بۆ کوردێن رۆژئاڤا دھێنە شاندن بۆ ئاڤاکرنا لەشکرەکێ یە ل رۆژئاڤا و سووریێ و تورکیا، ئانکۆ ئەردۆگان نەچارە د بابەتا رۆژئاڤا و یەپەگێ دا خوە نەرم بکەت و داخوازیێن ئەمریکا قەبوول بکەت).
یاڤوز بایدار د پشکەکا دی یا ئاخڤتنا خوە دا ژی راگەھاند کو د رەوشا نھا دا روسیا ژ تورکیا نەرازیە و بۆ بجە کرنا ئارمانجێن خوە ل سووریێ تورکیا بکار دھینیت و ئەمریکا ژی ل بەر دۆسیایێن د دەستێ خوە دا ب تایبەتی دۆسیا رزا زەراب یێ ئیرانی و پەیوەندیێن وی ل گەل دەستھەلاتداریا تورکیا یێ بزاڤێ بکەت تورکیا د سێ واران دا تەسلیم بگریت و گۆت: (گەلەک رون و ئاشکرایە کو دۆنالد ترامپ سەرۆکێ ئەمریکا دەستھەلاتداریا نھا ل تورکیا قەبوول ناکەت و دخوازیت تورکیا د چارچۆڤێ کار و چالاکیێن ناتۆ (ھەڤپەیمانیا ئەتلانتیک) دا بزاڤێ بکەت و بۆ ڤێ یەکێ ژی ب رەنگەکی ئەکتیڤ د شەرێ ل دژی داعشێ و کۆمێن دی یێن تیرۆرستی دا جە بگریت لێ دڤێت دەست ژ گەفکرن و ھێرشکرنا سەر رۆژئاڤا ئانکۆ یەپەگێ بەردەت و خوە ژ دروستکرنا ئالۆزیان ل سووریێ دوور بکەت، ترامپ دخوازیت رزا زەراب بازرگانێ ب ئەسلێ خوە ئیرانی وەکو کارتەکا سیاسی و فشارێ ل دژی ئەردۆگانی بکار بینیت و میدیا ئەمریکا و یا ئورۆپا بەردەوام ل سەر وێ یەکێ رادوەستن کو ئەردۆگان نە ب پلانەکا بەرفرەە دێ ل گەل ترامپ ھەڤدیتنێ بکەت بەلکو نەخشێ ئەمریکا دوورخستنا تورکیایە ژ ھێلا رۆژئاڤا و سووریێیە و بۆ ڤێ یەکێ ژی دێ رزا زەراب وەکو کارتەکێ ل دژی ئەردۆگانی و دەستھەلاتداریا تورکیا بھێتە بکار ئینان، ژ بەر کو ھەکە رزا زەراب ب ئاخڤیت دێ دەستھەلاتداریا تورکیا ب تەمامی بکەڤیتە رەوشەکا گەلەک خراب دا).
رۆژناڤانێ تورک د داویا ئاخڤتنا خوە دا ئەو یەک ژی دیار کریە کو تورکیا نە دەمدرێژ لێ د دەمەکێ کورت دا دێ داخوازیێن ئەمریکا بجە ئینیت و گۆت: (ئەمریکا ناخوازیت تورکیا جارەکا دی ھێرشێ ببیتە سەر ھەڤپەیمانێ وێ یێ ل رۆژئاڤا و سووریێ و دخوازیت کو ئەردۆگان گاڤ ب گاڤ پەیوەندیێن خوە ل گەل کوردێن رۆژئاڤا باش بکەت و نەبیتە گەف ل سەر رۆژئاڤا و دیسا وەسا دیارە پشتی ھەڤدیتنا ل گەل دۆنالد ترامپ دێ سەرۆک کۆمارێ تورکیا دەست ب قۆناغەکا ئاشتیێ ل وەلاتێ خوە و باکورێ کوردستانێ بکەت و ھەکە ئەو یەک نەھێتە کرن دێ تورکیا د ھەموو واران دا سەنگێ خوە ژ دەست بدەت و وی دەمی چو ھەڤال ل رۆژھەلاتا ناڤین و رۆژئاڤا نامینن).
ئەڤرو نیوز:
ئەڤ دیمەنێن ل خوارێ دیمەنێن دەڤەرا بالەکایەتی نە ل سنوورێ پارێزگەھا ھەولێر و ژلایێ سەنتەرێ بارزان بو ژینگە پارێزی و شاخەوانی ھاتینە گرتن.
فوتو : ئەنوەر دولەمەری.
ئه‌ڤرۆ نیوز:
مه‌سرور بارزانى راوێژكارێ ئه‌نجوومه‌نێ ئاسایشا هه‌رێما كوردستانێ د سمیناره‌كێ دا ل سازیا هێرتێج ل واشنتونا پایته‌ختێ ئه‌مریكا نێرینێن خوه بۆ كوردستانێ و عیراقا پشتى داعش به‌رچاڤ كرن و گۆت” شكه‌ستنا داعش ل عیراقێ و ده‌ڤه‌رێ، دووماهیا تیرورێ نینه”.
مه‌سرور بارزانى سه‌باره‌ت دورستبوونا داعش، دیاركر: ئه‌م هه‌موو وێ یه‌كێ تێدگه‌هین كو داعش به‌ردوامیا رێكخراوا قاعیده‌یه و پشتى داعش ژى رێكخراوێن هه‌ڤشێوێ وێ دێ دروست بن و دێ به‌رده‌وامیێ ب هزرا توندره‌وییا خوه ده‌ن”.
ئەڤرو نیوز :
مەسرور بارزانی سەرۆکێ ئەنجومەنێ ئاسایشا ھەرێما کوردستانێ ب ھەڤالینیا فوئاد حسێن سەرۆکێ دیوانا سەروکاتیا ھەرێما کوردستانێ و بەیان سامی عەبدولرەحمان نونەرا حکومەتا ھەرێما کوردستانێ ل ئەمریکا ، دەمەک بەریا نھا پشکداری د سمینارا سازيا “ھێریتچ ” ل باژێرێ واشنتون کر و د وێ سمینارێ دا مەسرور بارزانی وتارەکا تایبەت لسەر بارودوخێ ھەرێما کوردستانێ پشتی شەرێ ل گەل داعش پێشکشکر .
دوتارا خودا رێزدار مەسرور بارزانی دەستپێکێ بەحسێ شەرێ داعشێ کر و راگەھاند کو نھا داعش ل ناڤچونە و شەرێ ل گەل وان ژی شەرەکێ گران بو و ئەم ل گەل شەرێ داعش دوماھی نەھایتە و پێدڤی یە دەست ب شەرەکێ ئایدولوجی ل گەل وان بکەین و گۆت: (چەوا داعش رێکخراوەکا تیرورستی یە و درێژەپێدەرا رێکخراوا تیرورستیا یا قاعیدەبو وەسا دێ ھەند رێکخراوێن دن ژی یێن تیرورستی درۆست بن و رەنگە تەڤایا جیھانێ ژی بخوڤە بگریت ، و ب ھزرا من شەرێ ئایندە شەرێ چەکی نابیت بەلکو دێ شەرەکێ ھەولگیری بیت و پێدڤی یە ئەم ھەموو دژی ئەڤان شەران ب راوەستین ، ئەم وەکو ھەرێما کوردستانێ ب سایا ھێزێن پێشمەرگەی روو ب روویێ داعشێ بوین و سەرکەفتن ژی ب دەستڤەئینان و ھەتاکو مە شیایی ب سەرکەڤین مە زێدەتر ھزار و ٧٠٧ شەھید داینە )
زێدەتر گۆت: (ژبەر سەدەما ھەبوونا ھندەک ھێزێن دن ل شەنگالێ ب تایبەتی پەکەکە کو ھەڤکارنینن بو ئاڤەدانکرنا شنگالێ و ئەم دخوازین کو ئەو رێزێ ل یاسایێ و خەلکێ شنگالێ بگرن ، و پەکەکەیێ ئاریشەیێن خوە ئیناینە ھەرێما کوردستانێ ، بو ئاسایی کرنا رەوشا شنگال دڤێت ئەم بزڤرین بو خەلکێ شنگال و نھا تەڤایا دامەزراوەیێن شنگالێ ل گەل ھندێ نە کو پەکەکە دەڤەرێ نەمینیت)
مەسرور بارزانی د درێژاھیا وتارا خودا تیشک ئێخستە سەر پرسا سەربخویا ھەرێما کوردستانێ و ئەنجامدانا ریفراندومێ و گۆت: (مە بریاردایە کو ریفراندومەکا دیموکراسی ئەنجام بدەین و دوماھیا ئەڤ سال ژی مە ژڤانە ئەنجام بدەین ، خەلکی َھەرێما کوردستانێ بخوە دڤێت بریارێ لسەر چارەنڤیسێ خوە بدەن ، و ب ھزرا مە رێیا چارەسەرکرنا ئاریشێن دناڤبەرا ھەرێما کوردستان و عیراقێ بتنێ دانوستاندنن ب رێیەکا ئاشتیانە )
راوێژکارێ ئەنجومەنێ ئاسایشا ھەرێما کوردستانێ ل بارا ئەمریکا و دیتنێن وان بو ھەرێما کوردستانێ و دیارکر کو ئەو وەکو ھەرێما کوردستانێ زور دلخوشن کو ھەڤکاریێن باش ل گەل کارگێری یا نویا ئەمریکا ھەنە و ل بارا رۆژئاڤایێ کوردستانێ ژی گۆت: (ژبلی لایەنێن نێزیک پەکەکێ ھەموو لایەنێن دن رازینە کو بو چارەسەرکرنا پرسێن رۆژئاڤایێ کوردستانێ و سەروکێ ھەرێما کوردستانێ ژی دڤی واریدا چەند کومبوون ل گەل لایەنێن رۆژئاڤایی ئەنجامداینە ، بەلێ یەپەگە دخوازیت پێگیریێ ب خالێن رێکەفتنێ نەکەت و ئەم دانوستاندنێ ل گەل یەپەگی َو لایەنێن دن رەت ناکەین و بەرھەڤین بو ھەر ھەڤکاریەکێ)
ل بارا حەشد شەعبی ناڤبری گۆت: (مە چوو ئاریشە ل گەل حەشد شەعبی بینن و تنێ دلگرانین ب ھندەک لێدوانان کو ئەو ھەڤکارنینن بو درۆستبوونا پەیوەندیان دناڤبەرا مە و وان دا ، ژبەرڤێ گرنگە ئەو رێزێ ل سنوور و قوربانیێن پێشمرگەیان بگرن)
ئەڤرو نیوز ، ھلوری:
بریارا چێکرنا جوتسایدێ رۆژئاڤایێ ئاکرێ ژ مێژە دەرچوویە ، بەلێ ژبەر سەدەما قەیرانا دارایی ھاتبویە راگرتن ، و نھا سەروکاتیا باژێرڤانیا ئاکرێ دەست ب ب تەمامکرناوێ کريه و دێ ھێتە قێکرن.
دڤی واریدا بلند رزا زێباری سەرۆکێ باژێرڤانیا ئاکرێ بۆ ئەڤرو نیوز گۆت: (ب مەرەما خزمەتکرنا خەلکێ دەڤەرێ مە دەست ب تەمامکرنا جوتسایدێ رۆژئاڤایێ ئاکرێ کريه ، و پرۆژە لسەر بودجا گەشەپێدانا پارێزگەھا دھۆک دھێتە درۆستکرن و کومپانیا ئەرزان دێ ب ئەرکێ بجھکرنێ رابیت)
زێدەتر گۆت: (ئەڤ جوتسایدە ب درێژاھیا دوو ھزار و ١٥٠م ھێتە قێرکرن کو ژ دەرگەھێ سەرەکیێ رۆژئاڤایێ ئاکرێ دەست پێ دکەت ھەتاکو پەیمانگەە و کولیژا ئاکرێ)
نيشاندان