ئه‌ڤرۆ نیوز:
ب بلدنكرنا ده‌ستێن خوه و نیشاندانا روویه‌كێ ب هیڤی نێزیكی دو ملیۆن حه‌جی ژ سه‌رانسه‌ری جیهانێ ل چیایێ عه‌ره‌فێ خرڤه بوون، گه‌له‌كان ب چاڤێن رۆندك ڤه لاڤا ژبۆ ژێبرنا گونه‌هان دكرن و داخوازا لێبۆرینێ دكر ب مه‌ره‌ما ده‌ستپێكرنا به‌رپه‌ره‌كێ نوو.
پاشی حه‌جی به‌ر ب موزده‌لیفێ چوون بۆ به‌رهه‌ڤیێن ئه‌داكرنا داوی قۆناغێن حه‌جێ.
ئه‌ڤرۆ نیوز:
هنارتیێ سه‌رۆكێ ئه‌مریكا د هه‌ڤپه‌یمانیا دژی داعشێ دا راگه‌هاند: نها بتنێ 10% یا ئاخا ئیراقێ كو ده‌مه‌كی د بن كونترۆلا داعشێ دا بوو، د ده‌ستێ داعشێ دا مایه.
برێت مه‌كگۆرك گۆت: پشتی سه‌ركه‌فتنا هێزێن ئیراقێ ل تله‌عفه‌رێ، رێژه‌یا ده‌ڤه‌رێن داعشێ ل ئیراقێ ژده‌ست دای گه‌هشته 90%، نها بتنێ 10% مایه د بن كونترۆلا وێ رێكخستنێ دا، ل نێزیك دێ 100% ژده‌ست ده‌ت.”
ئه‌ڤرۆ نیوز:
جێگرێ سه‌رۆكێ پارتا داد و گه‌شه‌پێدانێ ئاكه‌پێ ل توركیا ژ خه‌لكێ وی وه‌لاتی خواست جه‌ژنا ئالیێن سه‌ر ب ته‌ڤگه‌را فه‌تحولا گیوله‌ن و پارتا كاركه‌رێن كوردستانێ په‌په‌كێ و رێكخستنا تیرۆرستییا داعشێ ڤه پیرۆز نه‌كه‌ن.
موسته‌فا ئه‌لیتاش جێگرێ پارتا ئه‌ردۆگانی ئاكه‌پێ ل قه‌یسه‌ریێ پشكداری رێوره‌سمه‌كێ گرێدایی جه‌ژنا قوربانی بوو و ژ ئالیگرێن ئاكه‌پێ خواست جه‌ژنا ئالیگرێن په‌كه‌كێ و گیوله‌ن و داعشێ پیرۆز نه‌كه‌ن.
ئه‌ڤرۆ نیۆز،ره‌مه‌زان هه‌رنى:
رێڤه‌به‌رێ پولیسێن قه‌زا و ناحیێن كه‌ركوكێ ئاشكرا كر :پشتى پێشمه‌رگێ كوردستانێ سنۆر گرتین یێدی هند ترومبێل ناپه‌قن و كریارێن تیرورستى ناهێنه ئه‌نجامدان 99% ره‌وش ئارام بوویه ل ناڤخویا كه‌ركوكێ.
عه‌مید سه‌رحه‌د قادر رێڤه‌به‌رێ پولیسێن قه‌زا و ناحیێن كه‌ركوكێ بۆ ئه‌ڤرۆ نیوز خویاكر: نوکە ل سنورێ كه‌ركوكێ قه‌زایه‌ك و چار ناحیه د ده‌ست داعش دانه و هه‌تاکو ئه‌و قه‌زا و ناحیه نه‌هێنه پاقژكرن ژ داعشا مه‌ترسیا تیرورێ ل سه‌ركه‌ركوكێ ب دوماهیك ناهێت و قه‌زایا حه‌ویجه و ناحیێن( ره‌شاد،ریاز،عه‌باسى،ساب) پتر ژ 500 گوندا ل سنورێ ڤان قه‌زا و ناحیا ب ده‌ست داعش دا مانه و دناڤبه‌را داعش و كه‌ركوكى َهند جهان نێزیكی 50 كێلو مەترایه،هه‌رده‌ما ئه‌ڤ جهه هاتن پاقژكرن ژ تیرورستێن داعش چو مه‌ترسی ل سه‌ر كه‌ركوكێ نامینیت.
عه‌مید سه‌رحه‌د قادر رێڤه‌به‌رێ پولیسێن قه‌زا و ناحیێن كه‌ركوكێ خویاكر ژی:خه‌لكێ كه‌ركوكێ ب درێژاهیا مێژوویێ نه‌خوشی دیتینه،له‌ورا هه‌موو پێكهاته‌یێن كه‌ركوكێ ب گشتى ل گه‌ل پرسا ریفراندوما هه‌رێما كوردستانى َدا نه.
ئەڤرۆ نیۆز،زنار تۆڤی:
کەشناسیا هەرێما کوردستانێ راگەهاند،کو پشتی نیڤرۆیا ئەڤرۆ بیڤەلەرزەکێ هەرێما کوردستانێ هەژاند.
ئەڤرۆ پێنجشەمبی 2017/8/31 رێڤەبەریا گشتی یا کەشناسی و بیڤەلەرزێ ل هەرێما کوردستانێ راگەهاند:ئەڤرۆ ل دەمژمێر 4:09 خولەک ب دەمێ هەولێرێ بیڤەلەرزەکێ ب دووریا 10 کم ل قەلادزێ و 36 کم ل کۆیە دا و ب کووراتیا 10 کم،هەروەسا هێزاوێ 3.4 پلەیان ل دووڤ پیڤەرێ ریختەرێ روودایە.
کەشناسیا هەرێما کوردستانێ ئەو ژی گۆتیە:کو وەلاتیان هەست ب وێ بیڤەلەرزێ کریە.
د چەند حەفتیێن بوری دا،بیڤەلەرزێ چەندین باژێرێن هەرێما کوردستانێ هەژاندیە و د وان بیڤەلەرزان دا وەلاتی برینداربووینە و زیانێن ماددی ژی گەهشتینێ.
ئەڤرۆ نیۆز،زنار تۆڤی:
ئه‌مریكا دێ ل هەیڤا ئیلۆنێ دا گۆژمێ 22 ملیۆن دۆلاران بۆ هه‌رێما كوردستانێ هنێریت.
گۆڤارا فۆرن پۆله‌سی یا ئه‌مریكی د راپۆرته‌كێ دا ئاماژه ب هندێ كریه كو د چارچۆڤێ وێ یاداشتا لێك تێگه‌هشتنێ یا دناڤبه‌را هه‌ولێر و واشنتۆنێ دا،ئه‌مریكا بریاردایه 22 ملیۆن دۆلارێن دی ل گه‌ل هژمارهكا چه‌ك و پێدڤیێن سه‌ربازی بگه‌هینیته ده‌ست هێزێن پێشمه‌رگه‌ی و ئه‌و هاریكاریه ژی دێ دبه‌رده‌وامبن هەتاكو رێككه‌فتنا هه‌ردو ئالیان ب دوماهێ دهێت.
هەروەسا دیارکریە:كو هنارتنا ڤان هاریكاریان د ده‌مه‌كێ دایه كو د هەیڤا ئیلۆنێ دا،دێ ریفراندۆما سه‌رخوه‌بوونا كوردستانێ هێته ئەنجامدان و ئه‌مریكا تێبینی ل سه‌ر ده‌مێ وێ هه‌نه،لێ ئه‌ڤه نابیته ئه‌گه‌ر كو ده‌ست ژ پشته‌ڤانیا كوردستانێ به‌رده‌ت.
ئه‌ڤرۆ نیۆز،زنار تۆڤى:
دكتۆر ئامانج ره‌حیم سكرتێرێ ئه‌نجۆمه‌نێ وه‌زیرێن هه‌رێما كوردستانێ سه‌باره‌ت ب وى گۆژمێ پاره‌ى یێ كو بریاره حوكمه‌تا هه‌رێمێ بده‌ته دانه‌گاز دبێژیت:پێشتر دانه‌گاز داخوازیا نێزیكى 26 ملیارو 500 ملیۆن دۆلارا دكر،به‌لێ ئه‌وا د رێككه‌فتنێ دا بریار ل سه‌ر هاتیه‌دان،بتنێ دێ 2 ملیار و 239 ملیۆن دۆلاران وه‌رگریت،كو پێكهاتیه ژ شایسته‌یێن دارایى یێن وێ كۆمپانیێ،كو هه‌ر ژ ده‌ستپێكا كاركرنا وێ ل هه‌رێما كوردستانێ هه‌تاكو نوكه.
هه‌روه‌سا دبێژیت:داخوازیێن دانه‌گاز دو به‌شبوون،به‌شێ ئێكێ شایستێن دارایى بوون،كو 2 ملیار و 239 ملیۆن دۆلارن،هه‌روه‌سا داخوازا قه‌ره‌بووكرنا هه‌موو وان زیان دكر یێن كو ب ئه‌گه‌رێ كارنه‌كرنێ د ماوێ چه‌ند سالێن بورى دا ل گێلگه‌هێن كورمۆرو چه‌مچه‌مال ل سه‌ر رێككه‌فتین،كو وان دگۆت 26 ملیار و 500 ملیۆن دۆلارن.
د.ئامانج دبێژیت ژى:ل دووڤ ڤێ رێككه‌فتنێ دانه‌گاز سازش ل سه‌ر داخوازا 26 ملیار دۆلاران كریه و بتنێ دێ شایستێن دارایى وه‌رگریت،حوكمه‌تا هه‌رێمێ ژى دێ پابه‌ندى سێ بریارێن به‌شێ ئێكێ یێ دادگه‌ها له‌نده‌نێ بیت،ئه‌ڤه ژى گرنتیه‌كه بۆ كۆمپانیا و وه‌به‌رهێنه‌رێن بیانى و هه‌روه‌سا هه‌رێما كوردستانێ ژى یا ئاماده‌یه بریارێن دادگه‌هان جێبه‌جێ بكه‌ت،شایسته‌یێن دارایى یێن كۆمپانیان بده‌تێ،هێشتا دبێژیت:ژبلى راگه‌هاندنا هه‌ڤبه‌ش كو بۆ میدیایان ئاشكراكریه،رێككه‌فتنه‌كا مه‌زن ل گه لگرۆپێ كۆمپانیا پیرل كریه،كو دانه‌گاز ژى ل خوه دگریت.
ده‌رباره‌ى شێوازێ پێدانا وان 2 ملیار و 239 ملیۆن دۆلاران،ئامانج ره‌حیم دبێژیت:ل گوره‌ى ڤێ رێككه‌فتنێ حوكمه‌تا هه‌رێما كوردستانێ دێ 600 ملیۆن دۆلاران ده‌ته دانه‌گاز،هه‌روه‌سا دێ 400 ملیۆن دۆلارێن ده‌تێ،به‌لێ دێ بۆ گه‌شه‌پێدانا كێلگه‌هێن كورمۆرو چه‌مچه‌مال بن،ل گه‌ل دو بلۆكێن نوو ب ناڤێ بلۆكێ 19 و 20،بۆ هندێ كو بشێن به‌رهه‌مئینانا گازێ ل وان گێلگه‌هان زێده بكه‌ن،هه‌كه ئه‌ڤه ژى یا سه‌ركه‌فتى بیت،دێ كێشا كاره‌بێ هێته چاره‌سه‌ركرن.
سه‌باره‌ت ب ملیاره‌ك و 239 ملیۆن دۆلارێن دى سكرتێرێ ئه‌نجۆمه‌نێ وه‌زیران دبێژیت:ئه‌و گۆژمێ پاره‌ى یێ كو دادگه‌هێ بریار ل سه‌ر داى،شایستێن دارایى یێن دانه‌گازن و دێ وه‌رگریت،به‌لێ ئێدى ب هیچ ره‌نگه‌كێ قه‌ر ل سه‌ر حوكمه‌تێ نامینن،له‌ورا دشێین بێژین ل گه‌ل جێبه‌جێكرنا ڤێ رێككه‌فتنێ ئێدى قه‌رێن دانه‌گاز ل سه‌ر حوكمه‌تێ نامینن.
هەروەسا دیاركر ژى:ئه‌ڤ رێككه‌فتنا نوو ل دووڤ یاسا نه‌فت و گازێ یا په‌رله‌مانێ كوردستانێ هاتیه‌كرن،كو دانه‌گازێ پابه‌ند دكه‌ت ب ناڤه‌رۆكا وێ یاسایێ،چونكى رێكه‌فتنا به‌راهى ل سالا 2007 ل گه‌ل دانه‌گاز و به‌رى ده‌رچوونا وێ یاسایێ هاتبووكرن،ئه‌ڤه ژى د به‌رژه‌وه‌ندا خه‌لكێ كوردستانێ دایه.
ئه‌ڤرۆ نیۆز،ره‌مه‌زان هه‌رنى :
ماجد حه‌مید مزورى سه‌روكێ كومه‌له‌یا دوستایه‌تیا كوردستانێ و بولگاریا بۆ ئه‌ڤرۆ نیۆز دیاركر:ب گشتى په‌یوه‌ندیێن ناڤبه‌را كوردستانێ و بولگاریا دا گه‌له‌ك د ئاسته‌ك باش دانه و پشتى سالا 2012 سه‌رۆك بارزانى سه‌ره‌دانا بولگاریا كرى هه‌تا ده‌مێ دروستبوونا شه‌رێ تیرورستێن داعش هژمارهكا مه‌زنا كومپانیایێن بولگاریا ل كوردستانێ كاردكر.
هه‌روەسا ل سالا 2017 بۆ جارا دویێ ژی سه‌رۆك بارزانى سه‌ره‌دانا وه‌لاتێ بولگاریا كریە و ئەڤ چەندە بوویە ئه‌گه‌ر کو په‌یوه‌ندیێن دناڤبه‌را كوردستانێ و بولگاریا دا پتر بهێنە خورتکرن،ب تایبەتی ل سێكته‌رێن رەوشەنبیرى و هونه‌رى و ئابوورى و بازرگانى.
ماجد حه‌مید مزورى خویاكر ژى:كوردێن باشۆر ل بولگاریا دكێمن به‌لێ ب گشتى هه‌تا 600 كوردان ل بولگاریا دژین و هەکە كورده‌كى داخوازا مافێ په‌نابه‌رایه‌تیێ كربیت وه‌رگرتیه ل وى وه‌لاتى.
سه‌روكێ كومه‌له‌یا دوستایه‌تیا كوردستانێ و بولگاریا ئاشكرا دكه‌ت ژی: وه‌لاتێ بۆلگاریا ب ئاشكرایى پشته‌ڤانیا رێفراندوما كوردستانێ دكه‌ت و ئه‌ڤه‌ژى ڤەدگەریت بۆ وان په‌یوه‌ندیێن ب هێز یێن دناڤبه‌را كوردستانێ و بولگاریا دا هەین.
ئه‌ڤرۆ نیۆز،ره‌مه‌زان هه‌رنى:
به‌ره‌ڤان حه‌مدى رێڤه‌به‌رێ گشتى ل وه‌زاره‌تا شه‌هیدان و ئه‌نفالكریان خویاكر:کو وه‌زاره‌تا شه‌هید و ئه‌نفالكریان بزاڤێن به‌رده‌وام دكه‌ت بۆ دابینكرنا ئێكه‌یێن ئاكنجیبوونێ و پارچه زه‌ڤیان بۆ وارس و كه‌س و كارێن شه‌هیدێن شه‌رێ داعش و لێژنه‌یه‌كا بلند یا كار ل سه‌ر دكه‌ت ل سه‌نته‌رێ پارێزگه‌هان و باژێرڤانیان دا ل قوناغا دوماهیێ دایه.
به‌ره‌ڤان حه‌مدى رێڤه‌به‌رێ گشتی یێ وه‌زاره‌تا شه‌هید،و ئه‌نفالكریان ل حوکمه‌تا هه‌رێما كوردستانێ بۆ ئه‌ڤرۆ نیوز دیار كریە:کو وه‌زاره‌تا شه‌هیدان و ئه‌نفالكریان ب هه‌ڤكارى ل گه‌ل جڤاتا وه‌زاره‌تا دارایى كاردكه‌ت بۆ وه‌رگرتنا كچ و كورێن شه‌هیدان ل كه‌رتێ په‌روه‌ردێ،ژ پێخەمەت درێژێى ب خواندنا خۆ بده‌ن بێی به‌رامبه‌ر.
هه‌روه‌سا دیارکر ژی: ب هه‌ڤكاریا وه‌زاره‌تا ساخله‌میێ دڤێت كه‌س و كارێن شه‌هیدێن پله ئێك چاره‌سه‌ریا وان بهێته كرن بێی به‌رامبه‌ر و دیسا 20% دێ بۆ كه‌س و كارێن شه‌هیدا هێته ته‌رخانكرن ده‌مێ نه‌شته‌ر گه‌رى بۆ بهێته كرن،هەروەسا پشتى باشبوونا ره‌وشا دارایى یا حوکمه‌تا هه‌رێما كوردستانێ جاره‌كا دى دێ حوکمه‌ت سلفێن خانوبه‌ران و هه‌ڤژینیێ بۆ وارس و كه‌س و كارێن شه‌هیدان دەستپێکەتە ڤە.
نيشاندان