دیدار ، نەوزاد ھلۆری:
پشکەکا زور یا دەڤەرێن ڤەقەتیایێن ھەرێما کوردستانێ لژێر کونترولا ھێزێن پێشمەرگەی دھێنە پاراستن ، بەلێ ھەتا نھا چوو رێکەفتنێن سیاسی نینن دناڤبەرا بەغدا و ھەرێمێ کو پێشمەرگە ل وان دەڤەرا ب مینن ، و سەروکێ دەستەیا گشتی یا دەڤەرێن ڤەقەتیایێن ھەرێما کوردستانێ ژی دیاردکەت کو ٤٥% ژ ئاخا ھەرێما کوردستانێ دکەڤیتە دەڤەرێن ڤەقەتیایی دا و ٩٠% ھاتیە کونترولکرن ژیێ پێشمەرگەی ڤە.
ئەڤرو نیوز : دەڤەرێن ڤەقەتیایی چەند ژ ئاخا ھەرێما کوردستانێ پێکدھێت و چەند ژی ھاتیە کونترولکرن ژلایێ ھێزێن پێشمەرگەی؟
نەسرەدین سندی : سەرۆکێ دەستەیا گشتی یا دەڤەرێن ڤەقەتیایێن ھەرێما کوردستانێ : دەڤەرێن ڤەقەتیایێن ھەرێما کوردستانێ نێزیکێ ٤٥ % ژ ئاخا ھەرێما کوردستانێ بخوڤە دگریت ، و ژ دەستپێکا شەرێ داعش ھەتا نھا نێزیکێ ٩٠% ژ وێ ھاتیە کونترولکرن و زڤرین ڤە بۆ سەر ھەرێما کوردستانێ و نوکە ژلایێ ھێزێن پێشمەرگەی ئەو دەڤەر دھێنە پاراستن و ئەمن و ئاسایشەکا باش ھەیە.
ئەڤرو نیوز :چوو رێکەفتن دناڤبەرا ھەرێما کوردستانێ و بەغدا ھەنە کو ئەو دەڤەر ھەر بمینن ژێر کونترولا پێشمەرگەی و دووبارە بزڤرن ڤە بۆ سەر ھەرێما کوردستانێ؟
نەسرەدین سندی : پێش دەست پێ کرنا ئوپەراسیزونا موسل ، سەرۆکێ ھەرێما کوردستانێ ل گەل حەیدەر عەبادی کۆمبوویە و بەحس ل چەوانیا کونترولکرنا موسل ھاتەکرن ، بەلێ جھێ داخێ یە ل وی دەمی چوو رێکەفتنێن سیاسی نەھاتنەکرن و بابەتێ دەڤەرێن ڤەقەتیایی بو پشتی کونترولکرنا موسل ھاتە پاشئێخستن ، گەلەک گرنگ و پێدڤی بو کو بەحس لسەر دەڤەرێن ڤەقەتیایی ژی ھاتبایەکرن و ھەرێما کوردستانێ ئەڤ یەک وەکو کارتا ڤەگەراندنا ئەوان دەڤەران بکارئینابایە ، بەلێ ژ بەرکو چوو رێکەفتن نەھاتەکرن ب ھزرا من پروسەیا ڤەگەراندنا ئەوان دەڤەرا ژی دێ یا ب زەحمەت بیت.
ئەڤرو نیوز : کەنگی ل دەڤەرێن ڤەقەتیایی دێ پروسەیا ئاڤەدانیێ دەست پێ کەت ؟
نەسرەدین سندی : ھەتاکو دەڤەرێن ڤەقەتیایی ب تەمامی نەھێنە کونترولکرن و زڤراندن ئەم نکارین چوو نەخشە و پلانان بۆ دووبارە ئاڤەدانکرنا ئەوان دەڤەران بدانین ، بەلێ کونترولکرنا ٩٠% ژ دەڤەرێن ڤەقەتیایی پێنگاڤەکا ئەرێنیی یە کو سنوورێن ھەرێمێ بھێنە دەستنیشانکرن ، نوکە ٦٠% ژ دەڤەرێن ڤەقەتیایی ژلایێ داعشێ ڤە ھاتیە وێرانکرن و قەیران ژی ل ھەرێما کوردستانێ بەردەوامە و شەر ژی ل ھندەک دەڤەران ھەیە ب تایبەتی ل شنگال و حەویجە د نھادا چوو بەرنامە نینن بو ئاڤەدانکرنا ئەوان دەڤەران ، بەلێ مە ژلایێ خوڤە پرۆژەیەک ئاراستەیێ سەروکاتیا ھەرێما کوردستانێ کریە داکو رەزامەندی لسەر بھێتەدان بەلی َھەتا نھا چوو بەرسڤ نەبوینە ، تشتێ کو نھا دھێتەکرن بو ئەوان دەڤەران ئەوە کو دەڤەر ژ روویێ ئەمن و ئاسایشێ ڤە ژلایێ پێشمەرگەی دھێتە پاراستن و ئەگەر پێشمەرگە نەبایە چوو ھێزان نەدشیا ئەوان دەڤەران بپارێزن.
ئەڤرو نیوز : ژبەرکو ئەو دەڤەرێن ڤەقەتیایێن ل بن کونترولا پێشمەرگەی ئەمن و ئاسایشەکا تەمام ھەیە ، ئەرێ خەلک دزڤرن وان دەڤەران ؟
نەسرەدین سندی : ل سایا ھێزێن پێشمەرگەی نوکە خەلکەکێ زور دچیتە سەر وار و جھێن خوە و دووبارە ھێدی ھێدی ژیان ل ھندەک دەڤەران دەست پێ دکەت ڤە ، گەلەک ژ وەلاتێن جیھانێ ژی رەزامەندیا خوە دەربریە بو ئاڤەدانکرنا ئەوان دەڤەران بەلێ ھەتاکو ئەو وەلات بگەھنە ھەولێر دڤێت ب رێیا عیراقێ بیت.
ئەڤرو نیوز : ئەرێ دەڤەرێن ڤەقەتیایی چوو گرنگی یا خوە بۆ ھەرێمێ ھەیە؟
نەسرەدین سندی : ژبەرکو ئاخ ئاخا ھەرێما کوردستانێ یە ، ئەگەر چوو تشت ژی نەبیت ھەر کوردستانە و دڤێت بو ھەرێمێ بزڤریت ڤە، بەلێ ل گەل ڤێ یەکێ ژی ھەموو ئاخا ھەرێما کوردستانێ خێر و بێرە و دەھان جورێن سامانێن سرۆشتی و دەشتێن مەزنێن چاندنێ ھەنە ئەگەر حکومەتێ بەرنامە و پرۆژە بو ھەبن دێ سالانە وەلاتی و حکومەت داھاتیەکێ باش دەستخوڤە ئینیت.
ئەڤرو نیوز :ھژمارا ئەو کەسانێن کو ل دەڤەرێن ڤەقەتیایی دژین چەندە ؟
نەسرەدین سندی : ژبەرکو پرانیا ئاکنجیێن ئەوان دەڤەران ئاوارە و پەنابەر بوینە و ھژمارەکا زور ژی کەفتینە دەستێ داعش و بێ سەر و شوون بوینە ، ئەم نکارین ژمارەکا دیارکری بێژین ، بەلێ بەری نھا نێزیکێ دوو ملیون کەسان ل دەڤەرێن ڤەقەتیای دژیان.
نيشاندان
