به‌رى هه‌یامه‌كێ هه‌ڤاله‌كێ ب رێز گۆته من: ((برا بۆ ته خرابه تو پۆسته‌یێن ره‌خنه‌یى د فه‌یسبووكێ خوه دا به‌لاڤدكى))! به‌رسڤا من داى: برا ئه‌و فه‌یسبووك ده‌وله‌ت سه‌رێ شۆڕشا ته‌كنولۆژى یا سینۆربه‌زین، په‌نجه‌را ئازادیخوازان یا سه‌ره‌كی یه كو ئه‌ز ژى هه‌ناسه‌یا ئازادیا خوه تێرا بهه‌لكێشم!
واته راسته ئه‌ز ژى مینا ب هزاران كه‌سانێن ڤى وه‌لاتى، ره‌خنه‌یێ ئاراسته‌ى ره‌فتارێن جڤاكى دكم، به‌رییا ئاراسته‌ى حزبان و ده‌ستهه‌لاتێ بكم. ب هه‌ر ره‌نگێ هه‌یى، وێ ره‌خنه‌یێ ژى سینۆرێن خوه هه‌نه، باوه‌ر ناكم، نه ئه‌ز و نه كه‌س، ل به‌هدینان وێ وێره‌كیێ بده‌ینه خوه كو ره‌خنه‌یا تایبه‌ت، ب ناڤونیشان ئاراسته‌ى هنده‌ك كه‌سان بكین؛ ژ به‌ر كو هه‌ر ره‌خنه‌یه‌كا تایبه‌ت بهێته كرن، بێى به‌لگه‌یین گومانبڕ، كه‌سێ ره‌خنه لێ هاتیه گرتن، هینگێ مافێ هه‌ى سكالایێ ب سووچا ناڤزڕاندن و شكاندنا كه‌سۆكیا وى ل سه‌ر ره‌خنه‌گرى تۆمار بكه‌ت، ژ به‌ر كو هه‌ر به‌رپرسه‌كى، مال و سامانه‌كێ نه‌شه‌رعى بده‌ستڤه هینابت، ب قانوونى ل سه‌ر ناڤێ خوه تۆمار كریه و نه ئه‌ز و نه (ده‌سته‌یا نه‌زاهێ) ئه‌و شیان نینن ل سه‌ر وى تشته‌كى نه‌قانوونى بگرن.
مه ل ڤێده‌رێ دمینته ل وێرێ ره‌خنه‌یا گشتى كو باسێ ره‌خنه‌یا ئه‌قل و ره‌فتارێن جڤاكێ كوردیه كو د درێژییا دیرۆكێ دا هه‌ڤگرتى نه‌بوویه و نه‌كاریه، جاره‌كێ كیانه‌ك سه‌ربه‌خوه مینا ترك و فارس و ئه‌ره‌بان بۆ خوه چێكه‌ت. ئه‌ڤ جۆرێ ره‌خنه‌یێ هه‌مى دكن. واته ل پێشیا هه‌میان سه‌رۆكێن حزبان و پایه بلندێن دبنداترێ رۆژانه دبێژن: خیانه‌ت، چه‌تىیى، گه‌نده‌لى، مرۆڤمرۆڤكانێ، دزى، خاپاندن، زێده‌گاڤى، ب هه‌دردانا سامانێ گشتى…. هتد، ل هه‌رێما كوردستانێ گه‌هشتینه گوپیتكێ، پێدڤیه بهێنه چاره‌كرن؛ لێ مخابن ئه‌ڤه پتره ژ 26 سالانه ده‌ستهه‌لات ل خه‌لكى ڤه‌د‌گێڕت و ڤێ زڕنایێ لێددت، لێ مخابن هه‌تا نها نه‌شیاینه جامێن ره‌شێن ترومبێلان قه‌ده‌غه بكن، هێشتا گه‌را شاشى و ره‌فتارێن دى نه‌هاتى.
راسته هندى مرۆڤ ره‌خنه‌یا گشتى بكت، مرۆڤ پتر زیانێ دگه‌هینته خوه ژ به‌ر كو ده‌ستهه‌لاتێ هندى پیچێببت دێ مرۆڤێ ره‌خنه‌گر پاشڤه‌بت و ناهێلت بگه‌هیته مافێن خوه، به‌رامبه‌ر ب وان په‌یڤێن ره‌خنه‌یێ مرۆڤ دبته شاهدحالێ چه‌رخێ خوه و ب كێمى به‌لكى ئه‌و قه‌له‌مێن ره‌خنه‌یا گشتى دكن، بێى كو مه‌ره‌مه‌ك خراب ل پشت هه‌بت، نه‌چنه د زبلدانكا دیرۆكێ دا، ئه‌ڤه‌یه گرنگه، ژ به‌ر كو هه‌كه مرۆڤێ ب وژدان ل دووڤ سیسته‌مێ مالى نه بۆ كوڕێ باش بكت و نه‌یێ خراب، ئه‌ركێ خوه یێ ئینسانى ژ سه‌ر خوه راكر، ب كێمى وژدانا وى دێ ته‌نابت.
ئه‌وا مایى من نه‌گۆتى: راسته ئه‌و هه‌ڤال و هه‌ر ئێك ژ مه یێ هه‌قه ژ واقعى بترست؛ ژ به‌ر كو هێشتا وه‌هما ترسا رژێما دكتاتۆرى یا ژناڤچۆیى د سه‌رێ مه دا مایه، ده‌مێ وه ل مه دكر كو مرۆڤ ژ سیتاڤكا خوه بترست! ژ به‌ر هندێ نوكه ژى ده‌مێ نڤیسه‌ره‌ك یان ره‌وشه‌نبیره‌ك ب كێمى ره‌خنه‌یه‌كا گشتى ژى دكت، ئه‌و بیر دهێنه بیرا مرۆڤى و وه‌سا هز دكت كو ئه‌ڤه ژى دێ وه‌ك رژێما دكتاتۆرى كن. راسته چو گره‌نتى نینه ره‌خنه‌گر همبه‌ر هه‌لوه‌ستێ خوه زیانبه‌خش نه‌بت، لێ هندى مرۆڤ به‌رژه‌وه‌ندیێن كه‌سۆكى یێن چو به‌رپرسان تێكنه‌دت و ناڤێ وان نه‌هینت، ئه‌ڤ گازنده‌یێن دى ب ناڤێ دیمۆكراسیه‌تێ و ئازادیا ده‌ربرینێ ئه‌و هه‌قوحسابا گران ل سه‌ر نابت، ژ به‌ر كو ئه‌ڤ جۆره قه‌له‌مه ده‌ستهه‌لات نابینت كو نها گه‌ف ل سه‌ر وێ هه‌بن؛ به‌ره‌ڤاژى بهتر قه‌زه‌نجا ده‌ستهه‌لاتێیه كو بۆ خه‌لكى دیار بكن، ئازادیا ده‌ربرینێ هه‌یه و باشترین گرۆڤه جیهانا تووڕێن جڤاكى و مه‌د‌یایێن هه‌رێمێ یێن راگه‌هاندنێنه.
نيشاندان