ئه‌ڤرۆ نيوز، زنار تۆڤى:

ئەنجۆمەنێ پارێزگەھا ھەولێرێ مژۆلی گفتوگۆکرنا تێبینیێن ئەنجۆمەنێ وەزیرانە ل سەر پرۆژێ سیستەمێ پاشکەفتنا مووچەیی و دێ گوھۆرینا د وی پرۆژەی دا کەت،ھەتاکو دوبارە رەوانەی ئەنجۆمەنێ وەزیران بکەت
ئەڤرۆ نیوز،زنار تۆڤی:
دوماھیا سالا بوری ئەنجۆمەنێ پارێزگەھا ھەولێرێ پرۆژەیەک دەربارەی سیستەمێ پاشکەفتنا مووچەی پەسەندکربوو،ل دووڤدا ژلایێ ئەنجۆمەنێ ھەردو پارێزگەھێن دھوک و سلێمانیێ ھاتبوو پەسەندکرن،پاشی ئەو پرۆژە بۆ ئەنجۆمەنێ وەزیران ھاتە ئاراستەکرن،بەلێ ل دوماھیا ھەیڤا شواتا ئەڤسالە حکومەتێ ئەو پرۆژە رەتکر.
ل دووڤ وی پرۆژەی پاشکەفتا مووچەی بۆ ھەر فەرمانبەرەکێ دێ ئێخنە سەر حسێبا بانکێ و فەرمانبەر دشێن ڤەرێن حوکمەتێ پێ بدەن،بەلێ پشتی ھنارتنا وی پرۆژەی د ھەیڤا شواتێ دا حوکمەتێ رەتکر.
ئازاد کوچی جێگرێ ئەنجۆمەنێ پارێزگەھا دھوکێ دیارکریە،لیژنا دارایی و چەند کەسێن بسپۆر دیراسەیا وێ بەرسڤێ دکەن، یا کو ب ئەگەرا وێ ئەنجۆمەنێ وەزیران ئەو پرۆژە رەتکری،پشتی تمامبوونا و چارەکرنا وی پرۆژەی جارەکادی دی رەوانەکەن بۆ حوکمەتێ.
گۆتیە ژی، تێبینیێن حوکمەتێ ل سەر وی پرۆژەی ل ژێر دیراسەکرنێنە،حوکمەتێ ژی ھێجەت ھەیە کو ژبەر ڤێ رەوشێ نەشێت وی پرۆژەی بجھبینیت،چونکی دێ بیتە ئەگەرێ کێمبوونا داھاتێ حوکمەتێ،ل دووڤ ناڤەرۆکا وی پرۆژەی ھەر فەرمانبەرەکێ مووچێ وی ھاتبیتە پاخشستن،دێ ھەژمارەکا بانکی بۆ ھێتە ڤەکرن،دێ برا پاشکەفتا مووچەی ئێخنە سەر ھەژمارا بانکێ،بەلێ فەرمانبەر دشێن بتنێ بۆ پێدانا قەرزێن حوکمەتێ بکار بینن،وەک قەرێن ئاڤێ و کارەبێ و باجەیان.
ھەروەسا ئەنجۆمەنێ وەزیران سێ تێبینیێن سەرەکی و سێ تێبینیێن لاوەکی ل سەر وی پرۆژەی نڤێسینە،دبێژن بانکێن پێشکەفتی ل ھەرێمێ نینن کو بشێن وی پرۆژەی بجھبینن،ھەروەسا 90% یا مووچەخۆران چەکێن بانکێ نینن،ھێشتا یا دیار نینە کو رێژەیا قەرێن مووچەخۆران ل سەر حوکمەتێ چەندە.
تێبینیێن لاوەکی ژی پێکھاتینە ژ ھندێ کو ھەکە ھات و خەلک قەرێن حوکمەتێ نەدەتێ دێ داھاتێ حوکمەتێ کێمبیت،ھەروەسا ھەکە ھات و قەرز ب ڤی شێوەی بھێنە برین خەلک ئێدی قەرێن حوکمەتێ نادەن،سەرباری ھندێ کو دێ نە عەدالەتی دروست بیت،کو دناڤ خێزانێدا بتنێ ئێک کەس دشێت ب کار بینیت،ھەروەسا دشێت وی چەکی بفرۆشیت.
بریارا حوکمەتا ھەرێمێ بۆ پاشخستنا بەشەکێ مووچێ فەرمانبەران ل دەستپێکا سالا 2015 ھاتە بجھئینان،ل دووڤ وی سیستەمی ھەیڤانە برەک ژ مووچەی دناڤبەرا 20% هه‌تا کو 75% ھاتە پاشکەفتکرن،ھەتاکو نوکە حوکمەتێ میکانزما دانا وێ پاشکەفتێ دیارنەکریە.