ئەڤرۆ، قەیس وەیس :
کچا باژێرێ دھۆکێ و یانا سەنحاریب ئاتا داود دوھی بەر ب باژێرێ سلێمانیێ ڤە چوو بۆ پشکداری کرنێ د کەمپا راھێنانی یا ھەلبژارتیێ عیراقێ یێ باسکت بولێ بۆ خوبەرھەڤکرن بۆ قارەمانیا عەرەبی ئەوا بریارە ل دەستپێکا مەھا بھێت ل وەلاتێ مسرێ بھێتەکرن.
دیدارەکا کورت دا یاریزانا باژێرێ دھۆکێ ئاتا داود بۆ رۆژناما ئەڤرۆ گوت: گەلەک یا کەیفخوشحالم ھاتیمە داخوازکرن بۆ پێکھاتیێ ھەلبژارتیێ عیراقێ کو ماندیبوونا من بێ بھا نە چوو پشکداری کرن د قارەمانیا عەرەبی دا دێ مفایەکێ باش گەھینتە من ژبەرکو دھێتە ھژمارتن ژ قارەمانیێن بەرنیاس ل سەر ئاستێ عەرەبی.
ئاتا ئاماژە ب وێ چەندێ ژی کر کەمپا ئەوان یا باژێرێ سلێمانیێ دێ یا بەردەوام بیت ھەتا چاری مەھا بھێت و پاش دێ بەر ب وەلاتێ مسرێ ڤە چن بۆ پشکداری کرنێ د قارەمانیا عەرەبی دا .
یاریزانا سەنحاریب کو بۆ جارا گەلەکێ یە ھاتیە داخوازکرن بۆ پێکھاتیێ عیراقێ زێدەتر گوت: بتنێ ئەز وەکو یاریزانا کچ ژ باژێرێ دھۆکێ ژی ھاتیمە ھەلبژارتن دێ ھەمی بزاڤا کەم ئاستەکێ بلند دڤێ قارەمانیێ دا ل گەل ھەلبژارتیێ عیراقێ پێشکێش بکەم ژبوو وێ چەندێ ناڤێ پارێزگەھا خوە بلند بکەم و ھەردیسان ئەڤ قارەمانی یە دێ بیتە پالدەرەکێ مەزن بۆ من بۆ پتر شارەزایێ وەربگرم و بۆ پێشخێستنا ئاستێ ڤێ یاریێ ل سەر ئاستێ کچان کو نوکە ل گەل ستاڤێ قوتابخانەیا سەنحاریب ژی کاردکەم باوەرم پشکداریا من دڤێ قارەمانیێ دا دێ شێم شارەزایەکا باش وەربگرم و بیتە مفا بۆ ئاستێ پێشخستنا وەرزشا پارێزگەھێ.

ئەڤرۆ، محەمەد عەلی:
ئێکەتیا تەپاپێ یا عیراقێ داھاتیێ ڤەگۆھاستنا یاریێن خولا پلا نایابا ئەوێن برێیا تلفزیونی بۆ ھندەک یانێن پشکدار د وەرزێ ٢٠١٤ -٢٠١٥ پارڤەکرن کو ئەڤ داھاتیە قستێ مایی بوو د دەمێ خولێ دا.
ئێک ژ رۆژنامێن عیراقێ دیارکریە کو ئێکەتیا تەپاپێی ١٣ ھزار دولار بۆ ژمارا حیسابی ل بەنگا رافیدەین یا یانا زەورا ھنارت بشێوەیێ دو قست، ھەروەسا لدویڤ ھەمان رۆژنامە کو یانا زاخۆ ١١ ھزار دۆلار ژ ئێکەتیا تەپاپێ وەرگرتینە، ژلایەکێ دیڤە دیارکریە کو ھندەک یانە حەتا نوکە داھاتیێ ڤەگۆھاستنێ بۆ نە ھاتیە پارڤەکرن ژ بەر ئەگەرێن جودا و دیسا یانە یێن ھەین حسابا بەنکێ نەبوویە و ھندەک یانێن دی داخازکرینە ھەموو داھاتیێن مایی وەربگرن و ئەگەر بشێوێ قست ژی بیت و دڤێت کۆژمە بھێتە زێدەکرن چنکو نە لدویڤ رێژا سەدێ یا داھاتیێ ڤەگۆھاستنێ.
رۆژنامێن بەغدایی ھوسا دازانین کو ئەڤ پێنگاڤە ھاتە ھاڤێتن پشتی یانێن مفادار ژ داھاتیێ ڤەگۆھاستنێ نەرازیبوونا خوە دیارکربوو لسەر نە وەرگرتنا داھاتیێ وەرزێن بۆری و گەڤێن نەکرنا یاریێن خولێ لسەر ئێکەتیێ دابوون یان ھەر یاریەکا بھێتە ڤەگۆھاستن دڤێت برێیا کارگێریێن یانێن نەرازبووی بن.

ئەڤرۆ:
پشتی رۆژناما مارکا بەلاڤەکری یانا ریال مەدرید ل سەر کرینا یاریزانێ یانا موناکو مپایی رێککەفتی بتنێ مایە ئەڤ دەنگوباسە ب فەرمی بھێتە بەلاڤەکرن ل چەند رۆژێن بھێت ژلایێ یانا ریال مەدرید ڤە و ب ھاتنا ئەڤی یاریزانی دبیت یانا ریال مەدرید نەچار بیت ستێرەکا خوە ژ دەست بدەت ژبەرکو ئەڤ یاریزانە ژی دخوازیت یاری وەکو یاریزانەکێ سەرەکی بکەت و دبیت کارتێکرن ل ستێرەکا یانێ بکەت.
ل دور گوتنا رادیویا ئوندا سیروی یا ئیسپانی ھەکە مپایی ب فەرمی پەیوەندی ب یانا ریال مەدرید کر دێ کارتێکرن ل سەر ئێک ژ ھەرسێ یاریزانان گارس بێل و رونالدو بن زیما کەت و ئێک ژ ئەوان یاریزانان پێدڤی یە ل سەر تەختێ یەدەگی بمینت ئەڤ چەندە ژی بۆ ئەوان ھەر سێ یاریزانان دێ یا ب زەحمەت بیت قەبوول ناکەن کو چاڤەرێ دھێـتەکرن ئەڤ یاریزانە ل جھێ گارس بێل یاریێ بکەت .
ئەوێ رادیو ئەو چەندە ژی دیارکر یە ژێدەرێن نێزیکی یانێ وەسا دیارکرینە گارس بێل نە ئارامیا خوە بەرامبەر ئەڤێ بریارێ دایە و دیارکریە ئەو دێ پەیوەندی ب یانەکا دی کەت ھەر دەمێ ئەو بوو یەدەگ یان مپایی بھێت.
ل دویڤ گوتنا ئەوێ رادیو گارس بێل دێ ھەڤبەستا مانچستەر یوناید ئیمزا کەت ھەکە مپایی بھێتە ریال مەدرید.