ئه‌ڤرۆ نيوز:
پشتى نه‌وروزێ ب فه‌رمى كومسيونا بلندا سه‌ربه‌خويا هه‌لبژارتنان و راپرسيێ ل هه‌رێما كوردستانێ دێ ناڤێن فه‌رمانبه‌رێن كۆمسيونێ راگه‌هينيت ئه‌وێن د ماوێ چوويى دا بۆ دامه‌زراندنێ فورم پێشكێش كرين.
برياره كومسيونا بلندا سه‌ربه‌خويا هه‌لبژارتنان و راپرسيێ ل هه‌رێما كوردستانێ 535 فه‌رمانبه‌ران وه‌ربگريت.
ئه‌ڤرۆ نيوز:
ئه‌ڤرو سپێدێ 9/3/2017 ب هه‌لكه‌فتا روژا جیهانی یا ئافره‌تان فه‌رهاد ئه‌مین ئه‌تروشی پارێزگه‌رێ دهوكێ سه‌ره‌دانا ئه‌نجومه‌نێ پارێزگه‌ها دهوك یێ ئێكه‌تیا ئافره‌تێن كوردستانێ كر و ژلایێ ئه‌ندامێن ئه‌نجومه‌نی ڤه هاته پێشوازی كرن ,
دهه‌ڤدیتنه‌كێ دا پارێزگه‌رێ دهوكێ روژا حیهانی یا ئافره‌تان ل هه‌می ئافره‌تین سنورێ ئه‌نجه‌مه‌نێ دهوك پیروز كرن و هیڤیا سه‌ركه‌فتنێ بو خواست ,, هه‌روه‌سا پارێزگه‌رێ دهوكێ رولێ ئافره‌تا كورد دهه‌می بوارێن ژیانێ دا ب به‌رزی سه‌نگاند و دیار كر كو شوین ده‌ستێن وێ ل هه‌می سه‌كته‌رێن ژیانا روژانه ددیارن و ل ده‌مین شوره‌شێن كوردی هه‌رده‌م پشته‌ڤان و هاریكارێ پێشمه‌رگه‌ی بویه.
دلایه‌كێ دیێ هه‌ڤدیتنێ دا به‌رهه‌ڤیا پارێزگه‌هێ بو كارێ وان دوپاتكر بێخه‌مه‌ت باشتر خزمه‌تكرنا ئافره‌تان .
ئه‌نجومه‌نێ دهوك یێ ئافره‌تان سوپاسیا پارێزگه‌رێ دهوكێ و كارگێریا پارێزگه‌هێ كر بو پشته‌ڤانیا به‌رده‌وام ل بزاڤ و چالاكیێن وان دكه‌ن .
ئه‌ڤرۆ نيوز:
ھونەرمەندێ ھێژا سەمیر زاخۆیی، دکورتە دیدارەکا تایبەت دا بۆ ئەڤرۆ دیارکر، بۆ دەمێ چەند ھەیڤانە مژوولی تۆمارکرنا سترانەکا نوویە، ل بەرە ل چەند رۆژێن بھێن بەلاڤ بکەت، و گۆت: پشتی ئەز دمرم بلا چو فیستەڤالان بۆ من نەکەن.
سەمیری گۆت: سترانا منا نوو ب ناڤێ (نازک و تەڕ و جوانە) ژ پەیڤ و ئاوازێن منە، ل ستودیۆیا دەنگ و رەنگ ل دھۆکێ ژلایێ عیماد عەلی ڤە ھاتیە تۆمارکرن، دەنگ و مۆزیک ب دووماھی ھاتیە، بتنێ ھندەک کارێن تەکنیکی یێن کێم ماینە، دچەند رۆژێن بھێن دا دێ ب دووماھی ھێت، ئەو ستران پتر بۆ گەنجانە، ھەروەسا وەک پرۆژە ئەز مژوولی کۆمکرنا وان ھەلبەستانم یێن من کرینە ستران، من ل بەرە بکەمە پرتووک و چاپ بکەم.
سەمیر زاخۆیی گۆت: حەزژێکرنا من بۆ سترانگۆتنێ ھەر ئەو حەزژێکرنە ئەوا ل سالێن حەفتیان من بۆ سترانگۆتنێ ھەی، چونکو دەمێ ئەم ل جھەکی دروینین حەزژێکەرێن دەنگێ من داخوازا سترانێن بەرێ ژمن دکەن، ھەروەسا دەمێ دچمە ھەر جھەکی دەرگەە بۆ من د ڤەکرینە و گەلەک رێزێ ل من دگرن، و ئەڤە وێ چەندێ دگەھینیت کو بەری نوکە مە تشتەکێ کری، و من ھان ددەت کو ل سەر سترانگۆتنێ یێ بەردەوام بم.
ھەروەسا گۆت: ئەڤە نێزیکی پێنجی سالانە ئەزخزمەتا ستران و مۆزیکا کوردی دکەم، لێ باوەربکەن چو جاران من ھزر دوێ چەندێ دا نەکریە کو داھاتەک بۆ من پێڤە بھێت، ئانکو من بۆ پارەی نەکریە، و ئەڤە حەز و مەرەقا منە بۆ ھونەری، چونکو مۆزیک و ستران دناڤ خوینا من دایە. و نەشێم دەستان ژێ بەردەم،.
ھەروەسا گۆت: دەمێ کاک عادل حەسەن رێڤەبەرێ گشتی یێ رەوشەنبیری و ھونەری ل دھۆکێ، گۆتبوونە من دێ پەیکەرەکی بووتە چێکەین، ھندەک وێنە ژی بۆ من ھاتنە گرتن، لێ قەیرانا دارایی ب سەر دا ھات، لەورا ئەز ل وان ناگرم، لێ ئەز حەز ناکەم پشتی مرنا من حکومەت چو فیستەڤالان بۆ من بکەت، چونکو یا ل دەف من بوویە نەریتەک دەمێ ھونەرمەندەک دمریت ژنوو بیرا وان دھێت و فیستەڤالەکێ بۆ دکەن، من ئەڤ ژحکومەتێ نەڤێت، لێ ھەکە مللەتی تشتەکێ وەسا کر ئەو باشە، چونکو ئەز مۆلکێ مللەتی مە، نە یێ حکومەتێ، و چو جاران وێ چەندێ ژ بیرناکەم دەمێ ھونەرمەند مەزھەرێ خالقی ل سالا (٢٠١٠) ژ سلێمانیێ ھاتی و فیستەڤالەکا رێزگرتنێ بۆ من ل دھۆکێ کری.
ل دووماھیێ ل دۆر رەوشا خوە یا ساخلەمیێ، کو بەری نوکە وەسا بریار بوو نشتەرگەریەک بۆ بھێتە کرن، گۆت: راستە ھندەک ئێش ل من دیار ببوون، لێ سوپاس بۆ خودێ نەدگران بوون، بەلکو دناڤنجی بوون، لەورا ئەز چوومە ھەولێرێ و ھندەک پشکنین بۆ من ھاتنە کرن، ل ڤیرَە ژی، فەرھاد ئەمین پارێزگەرێ دھۆکێ ئەز ھنارتمە سەنتەرێ رۆژ، ھندەک دەرمان داینە من ھەتا دخۆم ھەکە باشتر لێ ھاتم ئەو باشە، ھەکە ھەر وەک خوە مام دێ ل وی دەمی پێدڤی ب نشتەرگەریەکێ بم، بەلێ نوکە ئەز ھەست پێ دکەم کو باشترم، لێ ھندەک نەخۆشی یێن ھەین دێ بەردەوام ل گەل مرۆڤی مینن.
ئه‌ڤرۆ نيوز:
یا زانایە کو سروشتی ژنێ ژ ھەموو ئالیەکی ڤە ژ یێ زەلامی جودایە، پێکھاتەیا زەلامی یا بیۆلۆژی و دەروونی و مێشکی ژ یا ژنێ جودایە.
ھندەک زانیاریێن سەیر ل سەر ژنێ ھەنە کو بەری نھا مە نەدزانی:
١- ژن رۆژێ ٢٠ ھزار پەیڤان دئاخڤیت، لەورا دبێژن ژن گەلەک دئاخڤن، بەرانبەر تێکرایا پەیڤێن زەلام د رۆژێ دا د ئاخڤیت ژ ١٣ ھزار پەیڤان نابۆریت.
٢- ژن د ژیانا خوە دا سالەکا تەمام ژ ژیێ خوە ب وان ھزران ڤە دبەت کا دێ چ جلکان کەتە بەرخوە، ژبەر وێ چەندێ زەلام تۆرە دبن ھندی دمیننە ل ھیڤیا ژنان ھەتا کارێ خوە بۆ دەرکەفتنێ دکەن.
٣- ژن د سالێ دا ژ ٣٦ – ٦٤ جاران دکەتە گری، لێ زەلام ژ ٦ – ١٧ جاران د سالێ دا دکەتە گری، ئەو ژی نیشانا وێ چەندێ یە کو ژن یا ھەستپەرست و دلدارە.
٤- ژن نێزیکی ٣ جاران د رۆژێ دا درەوان دکەت، یا ژ وێ سەیرتر زەلام دو جاران ھندی وێ درەوان دکەت.
٥- ڤەکۆلینێن دەروونی ئاشکرا کریە، دەمێ ژن رەخنێ ل جلکێن زەلامی دگریت، پەیوەندیەکا گەرم بۆ دابین دکەت.
٦- ب رێژەیا ٩٧% ژ ژنان روودانەکا ھاتن و چوونێ ب تنێ ژ یانا خوە کریە.
٧- ژن باوەریێ ب وێ زەلامی دئینیت یێ نە کێمتر ژ ١٥ چرکان وێ ھەمبێز دکەت.
٨- ڤەکۆلین دوپات دکەن، پشکوژێن گێولی ل نک ژنان پترن ژ نک زەلامان.
ئه‌ڤرۆ نيوز:
پارێزەرەکێ دادگەھا زاخۆ بو روژناما ئەڤرۆ راگەھاند کو، سکالایەکا بڤی رەنگی ل دادگەھا زاخۆ ھاتیە تومار کرن، کوڕەک ژنەکێ بو خوە دخوازیت و دەواتا خوە دکەن، لێ پشتی دەواتێ بووک بتنێ ١٥ روژا د مینتە ل گەل ھەڤژینێ خوە، ژبەرکو زەلام بێ ئاگەھداریا وێ زێرێن وێ دبەت و لێ د فرۆشیت و ئێدی وان زیرا بۆ نا زڤرینیت، ژبەرھندێ ژن سل دبیت و دچیتە مالبابێ و داخوازا بەردانێ دکەت.
پارێزەر حسێن زێوکی دیار کر کو، کوڕەک خێزانێ ل گەل کچەکێ پێک دئینیت و دەواتا خوە دکەن، لێ پشتی ١٥ رۆژ ژ شەھیانا وان بورین ئەو بێ ئاگەھداریا ھەڤژینا خوە دچیت زێرێن وێ دبەت و لێ د فرۆشیت و ب چ رێیا بۆ نا زڤرینیت.
پارێزەری ئەو چەندە ژی دا زانین کو، پشتی زەلامی زێرێن ھەڤژینا خوە لێ فروتین و پارێن زێرا ھەموو پیچ کرین و ب رێیێن نەباش مەزاختین، دەمێ ژنێ زانی داخوازا زڤراندنا زێرێن خوە ژ ھەڤژینێ خوە کر.
پارێزەری د بەردەوامیا ئاخفتنێن خوە دا گۆت: ژبەرکو زەلامێ وێ نەدشیا زێرێن وێ بۆ بزڤرینیت، لەوا ھەڤژینا وی نەچار دبیت قەستا مالا بابێ خوە دکەت و زیز دبیت، ژن پتر ژ سالەکێ د مینیتە ل ھیڤیا ھندێ کو زەلامێ وێ بچیتە دووڤڕا، چونکی زێرێن وێ فروتبوون و د شیان دا نەبو بو بکریتەڤە، ژ بەر ھندێ سکالایێ ل دادگەھێ تومار دکەت و داخوازا ژێکڤە بوونێ کر و ل دادگەھێ ھاتە بەردان.
ئه‌ڤرۆ نيوز:
وەک دیار بەریا چەند رۆژان ب بریارا پارێزگارێ دھۆکێ رێڤەبەرێ ناحیا چەمانکێ ھاتە ڤەگۆھاستن بۆ ناحیا (کانی ماسێ)، لێ دەرکرنا ڤێ بریارا پارێزگارێ کارڤەدانێن جودا ب خوە ڤە دیتن و خەلکێ چەمانکێ ھاتە سەر خەت و ب چو رەنگان دگەل بریارا پارێزگاری نینن.ژ ژلایەکێ دیتر ڤە رێڤەبەرێ ناحیا چەمانکێ بو رۆژناما ئەڤرۆ ئاشکرا کر، ئەز ژ بەر کەیسێن گەندەلیێ ھاتمە ڤەگوھاستن و ھەموو رێڤەبەرێن مە حەز دکەن گەندەلی بھێتە کرن.
رێڤەبەرێ ناحیا چەمانکێ ل دور بابەتی بۆ ئەڤرۆ دیاردکەت: ل رێکەفتی ١/٦/٢٠١٤ ئەز وەک رێڤەبەرێ ناحیا گردەسین ل سنورێ قەزا ئاکرێ دەستبکار بوویمە کو پشتی دەستبکار بوونا من ب حەفتیەکێ چەکدارێن داعش روو ب روو سنورێن ھەرێما کوردستانێ بووینە، لەورا د وی ماوێ نەخۆش و بێ دەراڤ دا ل ناحیا (گردەسین) من ب ھەموو شیان ڤە کارێ خوە یێ رۆژانە ئەنجامدایە، چونکو ل وی دەمی ئەز ئاکجیێ باژێرێ دھۆکێ بوم و ھەموو سپێدەھیان ب درێژاھیا پتر ژ (١) دەمژمێر و نیڤان من قەستا وێ ناحیێ کریە و زێدەباری وێ چەندێ د وی ماوەی دا جھێن شولەژێ وەک پێدڤی خزمەتا من نەکر و چو ترۆمبێلێن میری بۆ من نە راسپاردن، بەلکو ئەز ب ترۆمبێلا خوە یا تایبەت د چوومە دەواما خوە و رۆژەکا ب تنێ ژی جھێن شولەژێ (١) لیترا پەنزینێ بۆ من نە مەزاختیە.
زێدەتر گۆت: زێدەباری وێ چەندێ من ھەر یا خوە بێ دەنگ کری، چونکو رەوشا ھەرێمێ یا باش نەبوو و من نەخواستیە ھاریکاریا من بھێتە کرن، ژبەر دەستکورتیا دارایی و ئەو د دەمەکی دا بۆ کو ھەر رێڤەبەرەکێ ناحیێ ترۆمبێلەکا حکوومی و (٢) زێرەڤان ل گەل دا بوون، لێ چاڤێ من ل وێ یەکێ نەبوویە و گوت: لێ پشتی چەند گوھۆرین د پوستێن رێڤەبەرێن ناحیان دا ھاتینە کرن ل سەرانسەری پارێزگەھا دھوکێ ئەز ژی ل ناحیا گردەسین ھاتمە ڤەگوھاستن و ٢٣/١٠/٢٠١٦ وەک رێڤەبەرێ ناحیا (چەمانکێ) ل سنورێ قەزا ئامێدیێ دەستبکار بوویمە و ھەر ل دەمێ خەلکێ ناحیا چەمانکێ سەرەدانا من دکر و پیرۆزباھی ل من دکر من دزانی دلێ وان یێ تژی ژان و گازندەیە و من دزانی ھندەک کەسێن (مافیا) ل سنورێ ناحیا چەمانکێ ھەنە.
ھەر رێڤەبەرەکی ل دووڤ دلێ مافیێن وێ ناحیێ بیت دێ ژیانا وان خوەش بیت، لێ ھەر رێڤەبەرەکێ خودان ھەمان ھەلویستێ من بیت، دێ وەک من ھێتە ڤەگوھاستن و گەلەک جاران داخواز ژ من ھاتیە کرن ئەز گەندەلیێ ل ناحیا چەمانکێ بکەم، لێ ب چو رەنگان ئەو چەندە قەبیل نەکریە و بۆ رازیبوونا من کەسێن شولەژێ و ئەوێن وەک مافیان کاردکەن کۆژمێن پارەی دگەل من گۆتنە ب تنێ دا کو ئەز رازی بم و وەک وان کاربکەم، لێ من ھەموو جاران رەتکریە، لەورا نھا دا ئەڤە بوویە چارەنڤیسێ من و ئەو چەندە دگەل من ھاتیە کرن.
سەربەست خالد بانی رێڤەبەرێ ناحیا چەمانکێ تایبەت بۆ ئەڤرۆ دا دیارکرن ژی: ل سنورێ ناحیا چەمانکێ و ل (٤) گوندان گەلەک (گاز ) ھەیە و دەرکەفتیە ل دەڤەرێ و ھندەک کەساتیان ل دەڤەرێ دگەل نوونەرێن وان کومپانیێن ل سەر بیرێن گازێ کار دکەن رێکەفتینە کو ھەر مفایەکێ ل سەر وان بیرێن گازێ دەربکەڤیت رێژەکا بەرچاڤ یا وی مفای بو وی گرۆپی بیت و داخواز ژ من کر ئەز ژی دگەل وێ گەندەلیێ یێ پشکدار بم، لێ من ب ھەموو مرۆڤایەتیا خوە ڤە رەتکریە و دگەل کارنەکریە و بۆ مە رێگر ل ھەمبەری وی مفای ئەوێ ژ بیرێن گازی کو دگەھتە وان کەسان و من خواستیە مافێ خەلکێ دەڤەرێ و مافێ خودان وان ئەردان نەھێتە خوارن ئەوێن بیرێن گازێ لێ دەرکەفتین، لێ ژبەر نەرازیبونا مە و دیارکرنا وان کەیسێن گەندەلیێ ئەو نەچار بوون بۆ من نەخوەش بکەن و گازندێ ژ جەنابێ پارێزگارێ دھۆکێ بکەن و پارێزگارێ دھۆکێ بێ ڤەکۆلینا کەیسی رابوویە ب ڤەگوھاستنا من بۆ ناحیا (کانی ماسێ). لێ ئەز ب چو رەنگان یێ بەرھەڤ نینم ل سنورێ ناحیا کانی ماسێ دەستبکار بم و ئەز ژ ئاشکراکرنا وان کەیسێن گەندەلیێ یێ پەشیمان نینم.
رێڤەبەرێ ناحیا چەمانکێ خواست دیار بکەت ژی: ئەگەر ب تنێ کێماسیەک ژلایێ من ڤە ھەبیت، ئەز ب ھەموو شیانێن خوە ڤە داخوازێ ژ دادگەھا دھۆکێ و نەزاھێ دکەم پێرابوونێن یاسایی ل بەرامبەری من ب گرنە بەر و یێ بەرھەڤم ل بەرسینگێ دادوەری یێ ئامادەبم، لێ ب تنێ ئەگەر خەلەتی و کێماسیەک د من و کارێ من دا ھەبیت، لێ ژبەر کو ئەز کەسەکێ بێ گونەھم و وان خواستیە ئەز خوە بێ دەنگ بکەم، لێ خوە بێ دەنگ ناکەم و من نەرازیبونا خوە وەک رێڤەبەرێ ناحیا چەمانکێ من گازندە و نەرازیبونا خوە گەھاندیە ئەنجوومەنێ پارێزگەھا دھۆکێ کو دووڤچوونا ڤی کەیسی بکەن و ئەگەر بزانم چو پێڤە ناھێت، ئەز یێ بەرھەڤم سکالایێ تۆمار بکەم.
سەربەست خالد بانی نەڤەشارت ژی: ناحیا چەمانکێ ب ھەموو رەنگەکی ڤە یا دوورە ژ خزمەتگوزاریان، مینا ھێلا ئەنترنێتێ و نەبوونا چو پارکان و نە جادەکا پێدڤی و یا مرۆڤ شەرم ژێ دکەت بێژیت بەریا چەند رۆژان ئافرەتەکا وێ دەڤەرێ چو بەردلوڤانیا خودێ و باژێرڤانیا چەمانکێ ژ سالا (٢٠٠٥) ھاتیە دامەزراندن و ھەتا نھا دا (حەفارەک) نینە بشێت گۆرا بکۆلیت و مە ب (مەربێلا و قەزمان) گۆر کولایە، لەورا من خوە ل گەلەک ئاریشێن دەڤەرێ کرە خوەدان، لێ ل شوونا دەستخوشی ل من بھێتە کرن، ئەو رابووینە ب ڤەگوھاستنا جھێ من یێ کاری و ئەو د وی دەمی دایە ئەز خودان مالباتەکا خودان شەھیدم و شورەشگێرم و گەندەلیێ قەبوول ناکەم، لەوا بەریا دو رۆژان خەلکێ ناحیا چەمانکێ خواست خوپیشاندانەک ئەنجام دا دژی وێ چەندێ ئەز ل وێ دەڤەرێ ب مینم دا کو بەردەوام خوە ل گازندێن وان بکەمە خوەدان و گەلەک جاران گەفێن کوشتنێ لمن ھاتینە کرن و گۆتیە ئێدی بەسە ژ ڤان کاران ڤەبە، لێ ئەز ھەر بەردەوام بوویمە ل سەر کارێ خوە کو من نەھێلا یە مافێ خەلکێ دەڤەرێ بھێتە خارن.
ئەو گرۆپێ مینا (مافیان) ل سنورێ ناحیا چەمانکێ ھەردەم ب وی رەنگی بووینە کو ھەردەما پرۆژەیەک یان ھەر کارەکێ ل سنورێ ئەوێ ناحیێ ھاتبا کرن ئەوی گرۆپی کو ژ چەند کەسێن شولەژێ پێک ھاتبوون خواستیە دەستێ خوە داننە سەر وی پرۆژەی یان ژی بەھرا خوە بکەنە تێدا و ب ڤێ چەندێ مافێ ھەژار و دەستکورتێن دەڤەرێ دھاتە خوارن و مە وەک رێڤەبەرێ ناحیا چەمانکێ نەخواستیە ئەو مافێن خەلکی بھێنە خارن و چو دەمان مە خەلەتی ل سەر خوە قەبیل نەکریە، چونکە ل وی دەمێ ئەز ل رێڤەبەرێ ناحیا (گردەسین) ل سنورێ قەزا ئاکرێ مە پتر ژ (٩٠) کەسان رەوانەی دادگەھێ کرینە، چونکە وان کەسان زێدەگاڤی کربوون و مە خوە ل سەر خەلەتیا وان بێ دەنگ نەکر و ل ھەر جھێ کاربکەم قەبوول ناکەم گەندەلی لێ پەیدا ببیت.
ئەم وەک رێڤەبەرێ ناحیێ خوەدان چەند دەستھەلاتەکا کارگێری نە ل دەڤەرێ لێ ھەر جارەکا ئەز بوویمە رێگر ل ھەمبەری وی گرۆپی، گەفێن کۆشتنێ ل من ھاتینە کرن.
ل دووماھیێ سەربەست خالد بانی رێڤەبەرێ ناحیا چەمانکێ بۆ ئەڤرۆ نەڤەشارت ژی: ئەز ب چو رەنگان پابەندی بریارا پارێزگارێ دھۆکێ نابم و ب ئێک رۆژا ب تنێ ژی ل ناحیا کانی ماسێ دەستبکار نابم و یێ بەرھەڤم ب ھەموو خزمەت و کارێن خوە ڤە ل مالا خوە ب روونم خار، ب تنێ پابەندی بریارا ناڤبری نابم، چونکو ئەو بریارە بێ ڤەکولین ھاتیە دان و مافێ من وەک رێڤەبەرەکێ ناحیەکێ ھاتیە خوارن و ل ھەر جھێ کارێ خوە لێ بکەم دێ یێ بەردەوام بم ل سەر وێ چەندێ راستیا ھەر بابەتەکێ بۆ رایا گشتی دیاربکەم و خەلک بزانیت مافێن وان ب چو ئاوایی نە.
ناحیا چەمانکێ دھێتە ھژمارتن ژ ئێک ناحیێن قەزا ئامێدیێ و کەسێن لێ دئاکنجی ٤٠٠٠ کەسان بخوە ڤە دگریت و نێزیکی (٦٤) گوندان ل سنورێ ناحیا چەمانکێ ھەنە و پتریا گوندێن وێ دەڤەرێ د چوولکرینە، چونکو پارتا کارکەرێن کوردستانێ (پەکەکە) ل وان گوندان د نیشتەجێکرینە و پتر (١٠) ھوبێن کارگێری لێ ھەنە کو ھندەک ب سەرسنک و ئامێدی و دھۆک ڤە د گرێدای نە.
ئەڤرۆ نیوز:
رێڤەبەرێ کۆچ و کۆچبەران ل پارێزگەھا دھۆکێ ئیماژە ب وێ چەندێ کر، وەزارەتا کۆچ و کۆچبەرێن عیراقێ دانوستانان دگەل وەزارەتا ناڤخۆیا ھەرێمێ دکەت بۆ ڤەگوھاستنا ئاوارەیێن مووسل بۆ سنوورێ پارێزگەھا دھۆکێ دیار کر، کو رۆژانە ب تنێ ژبەر نەبوونا خوارنێ بیست خێزانێن دەشتا نەینەوا دگەھنە دھۆکێ.
مەجید شوکری، رێڤەبەرێ کۆچ و کۆچبەرێن دھۆکێ بۆ رۆژناما ئەڤرۆ گۆت “ھێشتا پێلا ئاوارەیێن مووسل بەرەف سنوورێ پارێزگەھا دھۆکێ نەھاتیە و نوکە وەزارەتا کۆچ و کۆچبەرێن عیراقێ یا دانوستانان دگەل وەزارەتا ناڤخۆیا ھەرێما کوردستانێ دکەت، ھەتا رێکێ بدەنێ ھژمارەکا ئاوارەیێن بەرێ راستێ یێ مووسل بھێنە ڤەگوھاستن بۆ دھۆکێ و مە جھێ حەواندنا پێنج ھزار خێزانێن ئاوارە ھەیە و دشێین پتری پێنج ھزار خێزانا پێشوازیێ لێ بکەین، ئەڤە ژی دێ ژ رۆژئاڤایێ مووسل ھێنە ڤەگوھاستن بۆ خازری و د دووڤ دا دێ ھێنە ڤەگوھاستن بۆ کەمپا نێرگزلیێ ل سنوورێ قەزا شێخان، ئەم پێشبینی دکەین پتری ڤی جھێ مە بەرھەڤکری ئاوارەیێن مووسل بھێنە ڤەگوھستن بۆ دھۆکێ”.
مەجید شوکری گۆت ژی “مە جۆرەکێ دی یێ ئاوارەیێن مووسل ھەنە، ئەو ژی ئاوارەیێن دەشتا مووسلن کو رۆژانە ھەتا بیست خێزانێن دەشتا نەینەوا خوە دگەھینە پارێزگەھا دھۆکێ، بەلێ ئەگەرێ ھاتنا ئەڤان ئاوارەیان ژبەر شەڕی نینە، بەلکو ژ برسادا ئاوارە دبن، پێدڤیە حوکمەتا عیراقێ خزمەتگوزاریێن ژیانێ یێن بلەز بۆ خەلکێ دەڤەرێ دابین بکەت ھەتا ئاوارە نەبن، ھەتا مە پێشنیار کریە پشکا خوارنا ھەیڤانەیا ئەڤان دەڤەرا ببیتە دو بەرامبەر”.
ئەڤرۆ نيوز:
بەرپرسێ پەیوەندی و راگەھاندنا رێڤەبەریا پۆلیسێن پارێزگەھا دھۆکێ بۆ رۆژناما ئەڤرۆ دیار کر کو ل شەڤا سێشەمبی ل سەر شەڤا چارشەمبیێ ئەفسەرەکێ پێشمەرگەی ب پلا ملازم ژ لایێ چەند کەسان ڤە ل بەر دەرگەھێ مالا خو ب چەکێ کلانشیکوفێ ھاتیە کوشتن.
رائیدێ مافپەروەر ھێمن سلێمان، بەرپرسێ پەیوەندی و راگەھاندنا رێڤەبەریا پۆلیسێن پارێزگەھا دھۆکێ خویا کر، ناڤێ وی ئەفسەری “سیروان محەمەد” ژیێ وی ٣٠ سالە و ژیانا ھەڤژینیێ پێک نە ئینایە و گۆت “تەرمێ وی بۆ نەخۆشخانا شێخان ھاتە ڤەگوھاستن و د دووڤ دا بۆ پزیشکی یا داد ل پارێزگەھا دھۆک ھاتە ڤەگوھاستن و دوھی ٨ى ئادارا ٢٠١٧ێ ل ناحیا کەلەکچی ھاتە ڤەشارتن.
رائیدێ مافپەروەر ھێمن سلێمان گۆت “ل دووڤ پێزانینێن دەستپێکێ، وەسا دیارە بەری دو سالان کێشەیەکا جڤاکی د ناڤبەرا دو مالان دروست بوویە و چەندین جاران بزاڤێن پێکئینانێ ھاتینە کرن ژلایێ کەسایەتیێن جڤاکی ڤە، لێ ھەر پێک نەھاتینە”.
ناڤبری زێدەتر گۆت “سیروان دەرچوویێ کۆلیژا ئادابێ پشکا راگەھاندنێ بوو و نھا ئەفسەر بوو سەر ب وەزارەتا پێشمەرگەی ڤە”.
نيشاندان