ئه‌ڤرۆ نیوز:
سه‌رۆكێ هه‌رێما كوردستانێ گه‌هشته سته‌نبولێ و ل فرۆكخانه‌یا ئه‌تاتۆركی ب بلندكرنا ئالایێن كوردستانێ و ئیراقێ پێشوازی لێ هاته كرن.
مه‌سعود بارزانی ژ نه‌مسا گه‌هشته سته‌نبۆلێ و بریاره ل توركیا د گه‌ل سه‌رۆكێ وی وه‌لاتی، ره‌جه‌ب ته‌ییب ئه‌ردۆگانی كۆم ببیت و چه‌ندین مژارێن گرێدایی هه‌رێما كوردستانێ و سووریێ و ده‌ڤه‌رێ باس بكه‌ن.
ئه‌ڤرۆ نيوز:
ژ بۆ پتر نێزیک بوون ژ رەوشا وەلاتیان و ئاگەھدار بوون ل سەر دەڤەرێ و زوو گەھاندنا گازندە و داخوازیێن خەلکێ دەڤەرێ، بەری دو سالان وەسا بریار بوو نڤیسینگەھەکا پەرلەمانێ کوردستانێ ل قەزا ئامێدیێ بھێتە ڤەکرن، لێ ھەتا نھا چو دیارنەبوویە. ئەندامەکێ پەرلەمانێ کوردستانێ ژی راگەھاند،بەری دو سالان کارێن دەستپێکی یێن ڤەکرنێ ب داوی ھات بوون و وەک یاداشتەکێ دابوویە سەرۆکاتیا پەرلەمانی و ئەم چاڤەرێ رازیبوونا سەرۆکێ پەرەلەمانی بووین، لێ ئەو بوو قەیران ب سەر دا ھات و ئەو ژی وەک گەلەک کارێن دیتر ب رێڤە مایە.
وەلاتی شیمال عەبدوللا وەک ئێک ژ وەلاتیێن دەڤەرا ئامێدیێ و ئاکنجیێ کۆمەلگەھا سیریێ دبێژیت: ڤەکرنا نڤیسینگەھەکا پەرلەمانی ل قەزا ئامێدیێ گەلەکا گرنگە ژ بەر کو وەلاتی دێ شێن رۆژانە گازندێن خوە گەھینێ و ئەو ژی دێ شێن پتر نێزیکی ئاریشێن خەلکی بن و دێ مفایەکێ باش ھەبیت بۆ دەڤەرێ.
وەلاتیەکی دی ب ناڤێ دلبرین دیار کر، وی چو جارا ھزر نەدکر، ئەندام پەرلەمانێن دەڤەرێ دێ مالێن خوە ل دەڤەرێ ڤەگوھێزن و دێ چنە دھۆکێ و ھەولێرێ، راستە دەواما وان یا ل ھەولێرێ، بەلێ ھەر چو نەبیت ل دەمێ بھێنە ڤەدانان دا قەستا دەڤەرێ کەن بۆ وێ یەکێ بزانن کو خەلکێ دەڤەرا ئامێدیێ ژی چو ئاریشە ھەنە.
ناڤبری داخاز ژی کر، ژ بۆ چارەسەرکرنا ئاریشەیێن خەلکی پێدڤیە نڤیسینگەھەکا پەرلەمانی ل دەڤەرا ئامێدیێ بھێتە ڤەکرن، ژ بەر کو ھەبوونا نڤیسینگەھەکێ ل دەڤەرا ئامێدیێ کارەکێ فەرە، دا کو وەلاتیێن دەڤەرێ بشێن گازندێن خوە ب ساناھی بگەھیننە پەرلەمانی.
ھەروەسا ئەڤە ئێک بوویە ژ داخوازیا پرانیا خەلکێ دەڤەرێ و ھژمارەکا زۆرا ھەلبژێر و کەساتیێن دەڤەرا ئامێدیێ و رێکخراوێن جڤاکێ سڤیل ڤێ چەندێ وەک ئێک ژ پێدڤیێن خەلکێ دەڤەرێ دزانن، ژ بەر وێ یەکێ چەندین جاران داخوازیا خوە گەھاندیە چەندین ئەندام پەرلەمانێن دەڤەرێ دەمێ سەرا دەڤەرا ئامێدیێ ددەن، لێ خوەستیە نڤیسینگەکا پەرلەمانی ل سەنتەرێ قەزا ئامێدیێ ژی بھێتە ڤەکرن.
د. عەبدوللا جاسم، ئەندامێ پەرلەمانێ کوردستانێ بۆ ئەڤرۆ دیارکر، وەک ئەرکەکێ ل سەر ملێن وانا بۆ نێزیک ئاگەھدار بوون ژ رەوشا وەلاتیێن دەڤەرا ئامێدیێ وان وەک ئەندام پەرلەمانێن کوردستانێ یێن فراکسیونێن جدا یێن دەڤەرا ئامێدیێ بزاڤێن زۆر کربوون ژ پێخمەت ڤەکرنا نڤیسینگەھەکا پەرلەمانی ل سەنتەرێ قەزا ئامێدیێ و گۆت: (بەری دو سالان کارێن دەستپێکی یێن ڤەکرنێ ب داوی ھات بوون و وەک یاداشتەکێ دابوویە سەرۆکاتیا پەرلەمانی و ئەم چاڤەرێ رازیبوونا سەرۆکێ پەرەلەمانی بووین، لێ ئەو بوو قەیران ب سەر دا ھات و ئەو ژی وەک گەلەک کارێن دیتر ب رێڤە ما).
ناڤبری ئاشکراژی کر، نھا بزاڤ یێن دھێنە کرن تەقلیێات بھێنە کرن، ژ بەر کو نڤیسینگەھا ئەندام پەرلەمانێن خانەنشین ژی ھاتە ڤەگوھستن بۆ گەل نڤیسینگەھا وان ل دھۆکی و گۆت: (ڤەکرنا نڤیسینگەھەکێ ل ئامێدیێ ژی پێدڤی ب ئاڤاھی ھەیە و پێدڤی ب فەرمانبەران ھەیە و ئەم ھەموو دزانین نوکە دامەزراندن ژی نینە و ئەڤ بوویە ئەگەرێ سەرەکی یێ نەڤەکرنا ڤێ نڤیسینگەھێ د ماوێ ڤان دو سالێن چوویی دا).
ئه‌ڤرۆ نيوز:
ھەڤپەیمانیا شیعە کار بۆ کێمکرنا ئەندامێن پەرلەمانێ عیراقێ دکەت و پەرلەمانتارەکا کورد ژی گۆت: “کێمکرنا ئەندامێن پەرلەمانی پێدڤی ب راستڤەکرنا دستوورێ عیراقێ ھەیە و دڤێ قووناغێ دا ناھێتەکرن، چونکی نەشێن مادەکا دستووری ب گھۆڕین”.
نەدا مێرگەسۆری، پەرلەمانتارا پارتی ل پەرلەمانێ عیراقێ بۆ رۆژناما ئەڤرۆ ئاشکرا کر کو کێمکرنا ئەندامێن پەرلەمانی پێشنیارا ھەڤپەیمانیا نیشتیمانی و کۆتلا مواتنە ل پەرلەمانێ عیراقێ بوو و گۆت: “وان پێشنیارکریە ئەندامێن پەرلەمانێ عیراقێ ژ 328 ئەندامان بۆ 200 ئەندامان بھێنە کێمکرن، بەلێ وەکو ھەموو لایەک یێ ئاگەھدار کێمکرنا ئەندامێن پەرلەمانی پێدڤی یا ب راستڤەکرنا دستوورێ عیراقێ ھەی، چونکی ل گۆرەی ماددەکێ دستووری ئەڤ چەندە ھاتیە رێکخستن و دڤێت لیژنەک بھێتە پێکئینان و دەنگ ل سەر بھێتەدان پاشی راپرسی لدۆر کێمکرنا ھژمارا پەرلەمانتاران بھێتەکرن”.
ناڤھاتیێ ئاماژە دا وێ چەندێ کو ب دیتنا وان د ڤێ قووناغێ دا رەوشا سیاسی و ئێمناھیا عیراقێ یا بەرھەڤ نینە بۆ گھۆڕین و کێمکرنا ئەندامێن پەرلەمانی و گۆت: “ئەم وەکو فڕاکسیۆنا پارتی ل پەرلەمانێ عیراقێ نوکە یێ پێداچوونێ بۆ ڤێ پێشنیارا کۆتلا مواتن دکەین و ھەر دەمێ گەھشتینە قووناغا دووماھیێ دێ مە وەکو فڕاکسیۆنا پارتی دیموکراتی کوردستان ل پەرلەمانێ عیراقێ ھەلویستێ خوە ھەبیت، چونکی ئەڤە ب تنێ پێشنیارە و ھێشتا نەبوویە پڕۆژە ژ بەر ڤێ چەندێ ھەتا نوکە مە ھەلویستێ خوە دیارنەکریە”.
ئه‌ڤرۆ نيوز:
بریارە ئەڤرۆکە سەرۆکێ ھەرێما کوردستانێ مەسعود بارزانی سەرەدانا تورکیا بکەت و دەزگەھێن راگەھاندنا تورکیا ژی دیار دکەن کو سەرۆکێ ھەرێمێ دێ ل گەل سەرۆک کۆمار و سەرۆک وەزیرێن تورکیا کۆم بیت و دێ سەبارەت رەوشا عیراقێ و شەرێ ل دژی داعشێ و پەیوەندیێن ھەر دو ئالیان دانوستاندنان کەن و بارزانی دێ داخواز ژ بەرپرسێن تورکیا کەت کو دەمیرتاشی و ھەڤالێن وی ئازاد بکەن.
ئەڤرۆ:
رۆژناما حوریەت یا تورکیا دیار کریە کو سەرەدانا ڤێجارێ یا سەرۆکێ ھەرێما کوردستانێ مەسعود بارزانی بۆ تورکیا د رەوشەکا گەلەکا جودا دا دھێتە کرن، چونکو شەرێ مووسلێ و ھەروەسا گوھۆرینێن ل عیراقێ و سووریێ دێ تەوەرێن سەرەکی یێن کۆمبوونێن ڤێجارێ یێن بارزانی ل گەل بەرپرسێن تورکیا بن و ژ بەر ھندێ ژی دھێتە چاڤەرێن کرن کو مەسعود بارزانی ئەڤرۆکە ل گەل سەرۆک کۆمار و سەرۆک وەزیرێن تورکیا کۆم ببیت.
د بەردەوامیا راپۆرتێ دا ئەو یەک ژی ھاتیە دیار کرن کو ئێک ژ تەوەرێن دی یێن سەرەکی یێ کۆمبوونا بارزانی و ئەردۆگانی دێ ل دۆر پرسا ئاشتیێ ل تورکیا بیت و دھێتە چاڤەرێ کرن کو سەرۆکێ ھەرێما کوردستانێ داخواز ژ بەرپرسێن تورکیا بکەت کو دەمیرتاشی و ھەڤالێن وی ئازاد بکەن دا کو دەلیڤا سیاسی و چارەسەریا ئاشتیانە ل تورکیا ژناڤ نەچیت و شەر بھێتە راگرتن.
رۆژنامێن وەکو مللیەت و وەتەن و بیرگون و گەلەک رۆژنامێن دی ژی بەحسێ سەرەدانا سەرۆکێ ھەرێما کوردستانێ بۆ تورکیا کرینە و دیار کرینە کو بارزانی مرۆڤەک ئاشتیخوازە و بەری نھا ژی چەندین جاران بزاڤ کریە کو شەرێ د ناڤبەرا پەکەکێ و دەولەتا تورکیا بھێتە راگرتن و ڤێجارێ ژی دێ بارزانی بزاڤێ کەت کو دەمیرتاش و ھەڤالێن وی بھێنە ئازادکرن دا کو دەلیڤا خەباتا سیاسی بۆ چارەکرنا پرسا کوردی ل تورکیا ڤەبیت و بەرپرسێن تورکیا ژی باش دزانن کو بارزانی خوەدان سەنگەک مەزنە و دشێت کارتێکرنێ ل رەوشا نھا ل تورکیا و دەستپێ کرنا پرۆسا ئاشتیێ ل تورکیا بکەت.
ل ئالیێ دی لەزگین بۆتان ئەندامێ پەرلەمانێ تورکیا یێ سەر ب پارتیا دیموکراتیک یا گەلان ژی راگەھاند کو ئەو پێشوازیێ ل بزاڤێن بارزانی بۆ ئاشتیێ دکەن و گۆت: (بەرێز بارزانی د ناڤ کوردێن ھەر چار پارچێن کوردستانێ دا خوەدان رێزەک مەزنە و کورد گوھداریا وی دکەن، داخۆیانیێن وی یێن ل دۆر ئازادکرنا دەمیرتاشی و ھەڤالێن وی ژی گەلەکێ گرنگ بوون و ئەم وەکو پارتیا دیموکراتیک یا گەلان پێشوازیێ ل وی ھەلویستێ گرنگ یێ بارزانی دکەین و ھێڤیدارین ل ڤێ سەرەدانێ بارزانی بشێت رۆلەکێ مەزن بۆ ژ نوو ڤە دەستپێکرنا پرۆسا ئاشتیێ بگێریت).
ناڤھاتی ئەو یەک ژی دیار کریە کو بەری نھا ژی سەرۆکێ ھەرێما کوردستانێ گەلەک بزاڤ بۆ ئاشتیێ ل تورکیا کرینە و ئەم ھێڤیدارین ڤێجارێ بەرپرسێن تورکیا ژی گوھداریا بارزانی بکەن، چونکو بۆ ھەموو ئالیەکێ ئاشکرایە کو پرسا کوردی ل تورکیا ب شەری و ئۆپەراسیۆنێن سەربازی و گرتنا پەرلەمانتارێن کورد چارەسەر نابیت، تنێ رێیا چارەکرنا پرسا کوردی ل تورکیا ئاشتی و راگرتنا شەری یە و ئەم باوەر دکەین سەرەدانا ڤێجارێ یا بەرێز بارزانی ببیتە ئەگەرێ دەستپێکرنا قۆناغەکا نوو.
ئه‌ڤرۆ نیوز:
حكومه‌تا به‌لژیكا كچه‌كا كورد وه‌ك وه‌زیرا ده‌وله‌تێ بۆ كێمكرنا هه‌ژاریێ دامه‌زراند.
زوهه‌ل ده‌میر، كوردا عه‌له‌وی خه‌لكا دێرسما باكۆرێ كوردستانێ یه و حكوومه‌تا به‌لژیكا بۆ پۆستێ وه‌زیرا ده‌وله‌تێ بۆ كێمكرنا هه‌ژاریێ ده‌ستنیشان كر و سووندا یاسایی خوار.
ده‌میر ژدایكبوویا 1980ێ یه و وه‌ك پارێزه‌ر بۆ كۆمپانییه‌كا نێڤده‌وله‌تی كاردكر، دایبابێن وێ ژ ده‌وله‌تا تورك ره‌ڤی بوون و ل به‌لژیكا خوه‌جهبووینه.
ئه‌ڤرۆ نیوز:
سه‌رۆك بارزانى د په‌یامه‌كا هه‌ڤخه‌میێ دا، كو ئاراسته‌ى بنه‌مال و كه‌س و كارێن رۆژنامه‌ڤانا شه‌هید شیفا گه‌ردى كر ئاماژه ب وێ یه‌كێ كریه كو شه‌هیدبوونا شیفایێ دووپاتكرنا رۆل و پێگه‌ه و قوربانیدانا ئافره‌ت و گه‌نجێن سه‌ربلێن وه‌لاتێ مه‌یه د كاروانێ خه‌بات و خوه‌راگریا گه‌لێ كوردستانێ دا، ب ڤێ هه‌لكه‌فتێ پرسه و سه‌ره‌خوه‌شیێن خوه ئاراسته‌ى بنه‌مال و كه‌س و كه‌س و كار و هه‌ڤكارێن وێ ل تورا میدیاییا رووداو و هه‌موو رۆژنامه‌نڤیسێن كوردستانێ دكه‌م، ژ خودێ مه‌زن دخوازین گیانێ پاكێ شه‌هید شیفا ب به‌هه‌شتا به‌رین شاد ببیت و سه‌بر و ئارامیێ بده‌ته هه‌موو لایه‌كێ.
ئه‌ڤرۆ نیوز:
پێشكێشكار و په‌یامنێرا ناسيار یا تۆرا مه‌دیا رووداوێ، شیفا گه‌ردی ئه‌ڤرۆ ل ده‌مێ رۆمالكرنا روودانێن شه‌رێ مووسلێ ژ سه‌ده‌مێ په‌قینا بۆمبه‌كا چاندی شه‌هید بوو.
ئه‌ڤرۆ نیوز كو مالپه‌رێ فه‌رمى یێ رۆژناما ئه‌ڤرۆ یه ب ناڤێ خوه و ستافێ خوه یێ كاری سه‌ره‌خوه‌شیێ ل مالباتا شیفا گه‌ردیێ و تۆرا میدیا رووداوێ ته‌ڤایا هه‌ڤكارێن وێ دكه‌ت و هه‌ڤخه‌مییا خوه ده‌ردبریت و داخواز سلامه‌تیێ بۆ كامیره‌مانێ رووداوێ دكه‌ت كو د روودانێ دا بریندار بوویه، هیڤیدارین ئه‌ڤ خه‌مه داوی خه‌ما مه‌دیایا كوردی بیت.
ئه‌ڤرۆ نیوز:
كۆچكا سپی یا ئه‌مریكا بریار دا ئێدی رێ ب هه‌ژماره‌كا ده‌زگه‌هـ و كه‌نالێن راگه‌هاندنێ نه‌هێـه دان به‌رهه‌ڤی كۆنگره‌یێن رۆژنامه‌ڤانی یێن شۆن سپایسه‌ر په‌یڤداری كۆچكا سپی ببن.
ئه‌و كه‌نالێن ژ كۆنگره‌یێن رۆژنامه‌ڤانی یێن په‌یڤداری كۆچكا سپی هاتییه قه‌ده‌غه‌كرن ئه‌ڤێن خارێ نه:
– CNN
– NY Times
– LA Times
– Politico
– The Hill
– Buzzfeed
– Daily Mail
– BBC
دۆتالد ترامپی، سه‌رۆكێ ئه‌مریكا چه‌ندین جاران چه‌ندین كه‌نال ب به‌لاڤكرنا نووچه‌یێن ساخته سووچبار كرینه و سۆزا رێكارێن توند دژی كه‌نالێن “دره‌وان” “نووچه‌یێن ساخته” به‌لاڤ دكه‌ن دایه، د كۆنگره‌یه‌كێ رۆژنامه‌ڤانی یێ راسته‌راست ره‌تكربوو په‌یامنێری CNN پرسیارا خوه بكه‌ت. پشتی ڤێ بریارێ په‌یامنێرێن ئاژانسا ئه‌سوشیه‌تد پرێس و تایم و هه‌ژماره‌كا دی وه‌ك نه‌رازیبوون كۆنگره بایكۆت كر.
ئه‌ڤرۆ نيوز:
بەرپرسەکێ وەزارەتا بازرگانی و پیشەسازی یا حوکمەتا ھەرێما کوردستانێ ئاشکرا کر کو حوکمەتێ بڕیارا بڕینا ئاھێن خوارنێ یێن ھەیڤانە یێن پلێن تایبەت ھەلوەشاندیە و گۆت: “ئەو ماددەیێن خوارنا ھەیڤانە یێن ل سەر وەلاتیان نەھاتینە بەلاڤکرن دێ ب پارەی ژ لایێ بازرگانیا عیراقێ ڤە ھێنە قەرەبووکرن”.
فەتحی محەمەد، شیرەتکارێ وەزارەتا بازرگانی و پیشەسازی ل حوکمەتا ھەرێما کوردستانێ بۆ رۆژناما ئەڤرۆ دیار کر کو بەری ھاتنا قەیرانا دارایی ل گۆرەی بڕیارا وەزارەتا بازرگانیا عیراقێ پشکا ئاھێن خوارنێ ژ وان کەسێن مووچێ وان زێدەتری ملیۆنەک و 500 ھزار دیناران ل ھەرێما کوردستانێ ھاتبوو بڕین، بەلێ پشتی ھاتنا قەیرانا دارایی و کێمکرنا مووچێ فەرمانبەران ئەڤ بڕیارە ژ لایێ جڤاتا وەزارەتێ ڤە ھاتە ھەلوەشاندن و نوکە ھەموو کەس ژ وەرگرتنا ئاھێن خوارنێ د مفادارن.
ناڤھاتی ئاماژە دا وێ چەندێ کو ل ھەیڤێن بۆری ھژمارەکا ماددێن ھەیڤانە یێن ئاھێن خوارنێ ل سەر وەلاتیان نەھاتینە بەلاڤکرن و ژ بەر ڤێ چەندێ بازرگانیا عیراقێ بڕیار دا وەلاتیێن ھەرێما کوردستانێ بھێنە قەرەبووکرن و گۆت: “نوکە لیژنەک ژ وەزارەتا بازرگانی و پیشەسازیا حوکمەتا ھەرێما کوردستانێ ب ھەماھەنگی دگەل بەغدا یێ پێداچوونێ بۆ دیارکرنا کۆژمێ پارەی بۆ قەرەبووکرنا وەلاتیان دکەن و ل دەمەکێ نێزیک دێ دەست ب بەلاڤکرنا پارەی ل شوونا ئاھێن خوارنێ یێن نەھاتینە بەلاڤکرن ھێتەکرن”.
ئه‌ڤرۆ نيوز:
ئەندامەکێ لیژنا قانوونی ل پەرلەمانێ عیراقێ ئاشکرا کر کو قانوونا لێبۆرینا گشتی دێ ھێتە راستڤەکرن، چونکی بەری نوکە وەلاتیان گازندە ل سەر قانوونا ناڤھاتی ھەبوون و گۆت: “لیژنەک بۆ راستڤەکرنا ڤێ قانوونێ یا ھاتیە پێکئینان و ل دەمەکێ نێزیک دێ پێداچوون بۆ ھێتەکرن”.
زانا رۆستایی، ئەندامێ لیژنا قانوونی ل پەرلەمانێ عیراقێ بۆ رۆژناما ئەڤرۆ دیار کر کو گەلەک وەلاتیان گازندێن خوە ل دۆر قانوونا لێبۆرینا گشتی ل عیراقێ گەھاندینە وان ژ بەر ڤێ چەندێ دوھی رۆژا 22ى شوباتا2017ێ لیژنا قانوونی ل پەرلەمانێ عیراقێ کۆمبوونەک دگەل سەرۆکێن لیژنێن بجھئینانێ ل دۆر ڤێ چەندێ ئەنجامدا و بڕیار ھاتەدان کو قانوونا لێبۆرینا گشتی ل عیراقێ بھێتە راستڤەکرن ب شێوەیەکی کو ئەو ئاریشە و کێماسیێن بەری نوکە د ناڤ قانوونێ دا بھێنە چارەسەرکرن، چونکی وەلاتیان گازندە ل سەر چەوانیا بجھئینانا قانوونا لێبۆرینا گشتی ھەنە و دبێژن وەکو خوە ناھێنە بجھئینان.
ناڤھاتی ئاماژە دا وێ چەندێ کو وان سۆزدایە بەرەڤانیێ ژ مافێ وەلاتیێن ھەژار و بێ دەستھەلات بکەن و گۆت: “قانوونا لێبۆرینا گشتی دێ د بەرژەوەندیا وەلاتیێن ھەژار دا ھێتە راستەڤەکرن و بۆ ڤێ مەرەمێ ژی لیژنەک ھاتیە پێکئینان و ل دەمەکێ نێزیک دێ دەست ب کارێ خوە کەت”.
نيشاندان