ئه‌ڤرۆ نيوز:

ئێک ژ وان کچێن قوربانیێن ل دەستێ داعش رزگار بووی بۆ ئەڤرۆ دبیژێت:” ل رۆژا 4ى ته‌باخا 2014 ل کارەساتا شنگالێ ئەم ئەم ھاتینە دەستەسەر کرن و باب و برا و مامێن مە ل رۆژا ئێکێ ژ مە دوور کرن و برن، ئەم 35 کچ ڤەگوھاستینە مووسل د ناڤ ئاڤاھیەکێ دا ل رۆژا 6ى ته‌باخێ تیرۆستێن داعش ئەم برینە شەدادیە ل وەلاتێ سوریێ و ل وێرە تیرۆرستێن داعش دەست ب ناڤ نڤیسنا کچ و ژن و زارۆیان کر و داعشا جۆرەکێ حەبکا ددا کچان و ب زۆری ددانە شوو.
( س، خ) ئەو کچەیە دبێژیت:” تیرۆرستەکێ ب ناڤێ (ئەبو عومەر تونسی) ئەز بخو برم و بۆ ماوێ سێ رۆژان ل گەل بووم، لێ د توپ بارانکرنا فرۆکێن ئەمریکی دا ئەو تیرۆرست ل شەدادیە ھاتە کوشتن دەمێ بوویە ئێڤار تیرۆرستەکێ عێراقی ئەز ل گەل خوە برم و بۆ ماوێ 15 رۆژان ل گەل بووم گەلەک یێ توند و پیس بوو، نە شەڤ ل من شەڤ بوون نە رۆژ ل من رۆژ بوون و گەلەک جاران من داخواز ژێ دکر کو دووماھیێ ب ژیانا من بینت یان چەکێ خوە ب دەتە من دا ئەز خوە پێ بکوژم، لێ چەکێ خوە چ جاران ل مال نە د ھێلا و دەمێ د نڤست ژی ددانا لبن بالیفکا خوە.”
ڤێ کچا رزگار بوویی زێدەتر گۆت:” شەڤەکێ ئەو داعش د خەو چبوو من ھێدی دەستێ خوە درێژ کرە چەکێ وی دەمل دەست ھشیار بوو ئەز گەلەک ئێشاندم و سەر و چاڤێن من رەش و شین کرن ب بوکسا و لێدانێ و ئەز ب تنێ کرمە د خانیەکێ ڤە و دەرگەە قفل کر و تشتەک نەھێلا د خانیڤە و ل رۆژا دووڤدا دەمێ ژ خەو رابووی ئەز برمە بارەگایێ تیرۆرستان و گوتە وان ئەڤێ کچێ دڤیا من بکوژیت، ژبەرھندێ تیرۆرستان ئەز ھێلامە دناڤ بارەگایێ خوە دا بۆ ماوێ چەند رۆژان دەرگەە و پەنجەرێن وان ئاسن بوون و ژبلی وان کەس نەدشیا ڤەکەت.”
ھەروەسا (س ، خ ) دبێژیت:” تیرۆرستەکێ لیبی کو ژیێ وی 25 سال بۆن ئەز بۆ ماوێ 14 رۆژان ل گەل بووم وی تیرۆرستی ئەز فروتمە ئەمیرەکێ داعشا ب ناڤێ ئەبو عەبدولا کو ئەو ژی لیبی بو، و بۆ ماوێ چار ھەیڤان ل گەل وی ژیام دەمێ دچوو شەری چەکدارەکێ خوە د ھێلا ل بەر من، چونکی دەمێ رەڤاندیەکا ئێزدی ژ دەستێ وان رەڤی با یان ھەولێن خوە کوشتنێ کربان تیرۆرستان چاڤدێریەکا گەلەک چر ل سەر وێ کچێ دکر.”
ڤێ کچێ گۆتژی:” ڤی ئەمیری ئەز فروتمە چەکدارەکێ دی یێ داعشا کو نە خەلکێ عێراقێ بوو و ژیێ وی 15 سال بوون ئەو ژی زۆر یێ توند بوو دەمێ من د گوتێ ئەز ئێزدی مە وی گەلەک ب توندی سەرەدەری ل گەل من دکر و ھەموو تشت ل بەر چاڤێن وی تاری دبوون و دگوت، ئێزدی کافرن و نابیت ناڤێ وان ل نک من بھێتە گۆتن، پاشان ئەوژی ھاتە کوشتن ژ ئەنجامێ تۆپ بارانکرنا فرۆکەیێن ھەڤپەیمانا ل سوریێ، پشتی نەمانا وێ رێکخراوێ داعشا ئەز فروتمە تیرورستەکێ دی بناڤێ (فەرەج بەدەل) بۆ ماوێ سال و نیڤا ئەز ل گەل وی ژیام و ژیێ وی 40 سال بوون و گەلەک رۆژان وی داعشی دەستێن من گرێ ددان و ئەز د قوتام.”
ل دووماھیێ ڤێ کچا رزگار بوویی گۆت:”ھەکە ئەم بەحسێ ھەموو چیرۆک و زۆرداریا خوە بکەین لژێر دەستێن داعشا ب سالان دێ ڤەکێشت، لێ چ دادگەھێن داپەروەر نینن بەرەڤانیێ ژ مافێن مرۆڤی بکەن ل عێراقێ د ڤی وەختی دا، سالەک و نیڤا ئەم لژێر زولما داعشا بووین ب دەردو نەخوشیاڤە وان بێ ووژدانێن نە مرۆڤ ئەم د فروتین، پاشان نڤیسینگەھا کاروبارێن رەڤاندیان ل کوردستانێ ئەم ژ داعش کرین ب ھاریکاریا کەسەکێ ئێزدی ب ناڤێ ( ع، ع) ئەم ل رۆژا 29ى چريا دويێ2016 ھاتێنە رزگار کرن جارەکا دی ب دیتنا کەس و کارین خوە شاد بووین و ب راستی ئەم مری بووین لێ خودێ روحا مە نە بر بوو.”