ئه‌ڤرۆ نيوز:
قەیرانا دارایی کاریگەری کریە سەر قوتابخانێن ئەھلی و ب تنێ د ئەڤ سالە دا چار ھزار قوتابیێن خواندنا ئەھلی ڤەگەڕیاینە قوتابخانێن حوکمەتێ، لیژنا پەروەردێ ژی ئیماژە ب وێ چەندێ دکەت ئەگەر قەیران یا بەردەوام بیت دێ ھژمارەکا پترا قوتابیان دەست ژ خواندنا ئەھلی بەردەن.
شوکریە شێخانی، ئەنداما لیژنا پەروەردێ و خواندنا بلند ل پەرلەمانێ کوردستانێ بۆ رۆژناما ئەڤرۆ گۆت “پشتی ھاتنا قەیرانا دارایی کاریگەریەکا زۆر کریە سەر رەوشا خواندنا ئەھلی و سالا بۆری ئەم شیاین ب ھەڤکاریا وەزارەتا پەروەردێ بھایێ کریا خواندنێ ھەتا 20%ێ داشکاندنێ بۆ بکەین ئەڤە ژی د بەروەژەندیا تەخا قوتابیان دا بوو، لێ مخابن ئەڤ داشکاندنە ب تنێ بۆ سالەکێ بوویە و ئەڤ سالە نەھاتیە بجھئینان، بەلێ بزاڤێن مە ھەر دبەردەوام بوون و رۆژێن بۆری ژی بۆ ڤێ مەرەمێ لیژنا پەروەردێ سەرەدانا وەزیرێ پەروەردێ کر و ئەڤ داخوازیە ژێ کر، چونکە قەیران ھەر یا بەردەوامە”.
شێخانی گۆت ژی “دیارە ئەڤ سالە چ نیەت نینە بۆ ئەرزانکرنا کریا خواندنێ، ل قوتابخانە و پەیمانگەھێن ئەھلی، لەوڕا کاریگەریێن زۆر کریە سەر خواندنا ئەھلی و ب تنێ د ئەڤ سالە دا چار ھزار قوتابی ل قوتابخانێن ئەھلی دەست ژ خواندنا ب پارە بەردایە و ڤەگەڕیاینە قوتابخانێن حوکمەتێ، ئەگەر قەیران ھوسا یا بەردەوام بیت و داشکاندن بۆ نەھێتەکرن ھژمارەکا پتر قوتابی دێ دەست ژ قوتابخانێن ئەھلی بەردەن”.

ئه‌ڤرۆ نيوز:
بڕیارە گەڕەکادیا دانوستانان دناڤبەرا لایەنێن سیاسی یێن ھەرێما کوردستانێ دا بھێنە ئەنجامدان و پەرلەمانتارەکێ پارتی ژی دبێژیت، حەفتیا بھێت دێ پارتی و ئێکەتی کۆمبوون، ئەندامەکێ بەرێ یێ سەرکردایەتیا یەکگرتوویا ئیسلامی ژی ئاماژە بوێ چەندێ دکەت، لایەنێن سیاسی تنێ دەمی دکوژن و دەمەکێ زوی ناگەھنە رێککەفتنێ.
فەرحان جەوھەر پەرلەمانتارێ پارتی دیموکراتی کوردستان بۆ رۆژناما ئەڤرۆ گۆت” بڕیارە حەفتیا داھاتی جارەکادی ھەردو شاندێن دانوستنکارێن پارتی دیموکراتی کوردستان و یەکێتی نیشتیمانی کوردستان کۆمبوونەکا ئەنجامبدەن و تێدا میکانزمەکێ بۆ چارەسەرکرنا ئاریشەیێن نافخۆ بھێتە دانان، دھێتە چاڤەڕێکرن خۆلەکادیا دانوستانان دناڤبەرا لایەنێن سیاسی یێن ھەرێما کوردستانێ بھێتە رێڤەبرن و بڕیار لسەر نەخشە رێیەکێ بھێتەدان بۆ چارەسەرکرنا پرسێن ھەلاویستی دناڤبەرا لایەنێن سیاسی، بێگومان جارەکادی سەرۆکێ پەرلەمانی بۆ بزاڤا گۆڕان نابیت و ھەکە پۆستێ سەرۆکێ پەرلەمانی ل ئێکەتیێ بھێتە وەرگرتن، ئەڤە دێ پۆستێ رێڤەبەرێ گشتیێ دیوانا پەرلەمانی ژی ل گۆڕان ھێتە وەرگرتن، ژ بەرکو سەرۆکێ پەرلەمانی بۆ کیش لایەنێ سیاسی بیت ئەڤە دێ پۆستێ رێڤەبەرێ گشتیێ پەرلەمانی ژی بۆ ھەمان لایەنبیت، ئەم وەک پارتی رژدین لسەر چارەسەرکرن و گەھشتن ب رێککەفتنێ بۆ چارەسەرکرنا ئالۆزیێن نوکە ل ھەرێما کوردستانێ ھەی.
بەھزاد زێباری، ئەندامێ بەرێ یێ سەرکردایەتیا یەکگرتوویا ئیسلامی بۆ رۆژناما ئەڤرۆ گۆت” پتری ھەیڤەکێ یە خەلکێ ھەرێما کوردستانێ چاڤەڕێی لایەنێن سیاسی بوون، کو د ئەنجامدانا یەکدو کۆمبوونا لایەنێن سیاسی بگەھنە ئەنجامەکی و بڕیارا دوماھیێ بدەن، بەلێ دیارە دێ کۆمبوون و دانوستانێن ناڤبەرا لایەنێن سیاسی ڤەکێشن و نوکە یێ کۆمیتەیا بۆ کارکرنێ لدۆر چارەسەرکرنا ئاریشەیێن ناڤبەرا خوە پێک دئینن، ب دیتنا من ھێشتا دێ دانوستانا بەردەوامی ھەبیت پتر دەم پێدڤیە ھەتا دگەھنە رێککەفتنێ بڤێ چەندێ ژی خەلکێ ھەرێما کوردستانێ دێ یێ دلگرانبیت ژڤان لایەنا، یا فەرە دانوستان دانوستان ھەر بەردەوامبن، بەلێ پشتی رێڤەچوونا کۆمبوونا مەکتەبێن سیاسیێن پارتی و ئێکەتیێ و بڕیاردان لسەر پێکئینانا لیژنەیەکا ھەڤبەش دیاربو دێ پتر ڤەکێشیت، چونکو ھەرژنوڤە ئەف کۆمیتا ھەڤبەش دێ سەرەدانا لایەنێن دیژی کەت و دێ دەمی ھێشتا بەت.
زێباری دیارکر” ئەز وەسا دبینم لایەنێن سیاسی پتر دخوازن دەمی بۆرینن، بەلێ ئەزێ گەشبینم دێ دوماھیێ ھەر گەھنە رێکەفتنەکێ بۆ دوماھی ئینان بڤێ رەوشا نکە ھەرێما کوردستانێ تێدا دەربازدبیت، بۆ چارەسەرکرنا ھەموو کێشەو ئالۆزیێن سیاسی و ھەتا ئابوریژی دڤێت پەرلەمان بھێتە کاراکرن، بێی پەرلەمانی ئاریشەیێن سەرۆکایەتیا ھەرێمێ و قەیرانا ئابوری و چو ئاریشە ناھێنە ئێکلاکرن، ژیانا خەلکی ژی زۆر یا دژوارە و دخوازن ئەف ئاریشەیێن سیاسی چارەسەرببن، ھەتا بشێن ژیانا وەلاتیانژی باشتر بکەن و ئەف قەیرانە سستبیت لسەر وەلاتیان.