ئەڤرۆ نیوز ، نەوزاد ھلۆری:
ئێڤاریا ئەڤرۆ ل سنوورێ قەزا بەردەرەش یا سەر ب پارێزگەھا دھۆکێ ئافرەتەک ھات کوشتن.
دڤی واریدا ھێمن سلێمان بەرپرسێ راگەیاندنا رێڤەبەریا گشتی یا پولیسێن دھۆکێ بۆ ئەڤرۆ نیوز گۆت: ( ئێڤاریا ئەڤرۆ ل ناحیا رووڤیا یا سەر ب قەزا بەردەرەش ل پارێزگەھا دھۆکێ سەرا ئاریشەیەکا جڤاکی ئافرەتەک بناڤێ ” ھـ – ج – ح ” ھات کوشتن)
زێدەتر گۆت: ( ب بریارا دادوەری پەرێن ڤەکولینێ ل بنگەھێ پولیسێن روڤیا ھاتینە ڤەکرن بو دوڤچوون لسەر ئەگەرا روودانێ)
ئەڤرۆ نیۆز،زنار تۆڤی:
فەرماندێ پۆلیسێن فیدرالی یێن عێراقی رائید شاکر جەودەت دادیارکرن:کو ئەڤرۆ 4.7.2017 هێزێن پۆلیسێن فیدرالی شەرەکێ دژوار یێ ل گەل چەکدارێن داعش ل ناڤەراستا کۆلانێن تەنگ ل رەخ و روویێن دەڤەرا نجێفی ل مۆسلێ کرینە و دڤان شەر و روو ب رووبوونا دا 13 چەکدارێن داعش هاتینە کوشتن،هەروەسا هێزێن پۆلیسان دەست ب سەر چەندین چەک و جەبلخانەیێن جودا یێن داعشێ دا گرتینه و 120 سڤیل ژی رزگارکرینه و ڤەگۆهاستینە کەمپێن ئاوارەیان.
فەرماندێ پۆلیسێن فیدرالی گۆتیە ژی،ئەڤرۆ هێزێن پۆلیسێن فیدرالی ژسێ لایانڤە بەرەف دەڤەرا نجێفی ڤە چووینە،کو دوماهی دەڤەرە مایە ل ژێر دەستێ داعش دا ل باژێرێ کەڤن ل مۆسلێ،هەروەسا دیارکریە ژی،یەکینەیێن لیوا 9 و لیوا 10 چووینە ناڤ دەڤەرا نجێفی و مزگەفتا شێخ ئەبۆ عەلا ژلایێ رۆژئاڤای ڤە،دیسا هێزێن بژارە ژ لایێ باکۆری ڤە ب ئاراستەیێ جادا خالد بن وەلید ڤە چووینە،هەر ئەڤرۆ هێزەکا لیوا 19 ب هەڤکاریا فرقەیا ئالیاتان پێشرەوی کریە ژلایێ رووباریڤە بۆ جادا نجێفی.
ئه‌ڤرۆ نیوز:
حكومه‌تا هه‌رێما كوردستانێ تۆپبارانا سنووری یا ژ ئالیێ ئیرانێ ڤه هاتی كرن، شه‌رمزار كر و نه‌ڕازیبوونێ دێ گه‌هینته ته‌هرانێ.
د راگه‌هاندنه‌كێ دا حوكمه‌تا هه‌رێمێ داخواز ژ كۆمارا ئیسلامییا ئیرانێ كر، ده‌ست ژ هێرشێن سه‌ر خه‌لكێ سڤیل و ئاخا هه‌رێما كوردستانێ به‌رده‌ت و گۆت: د ده‌مه‌كی دا هه‌رێم پابه‌ندی بنه‌مایێ جیرانیێ یه، ئیران ڤی كاری دكه‌ت و پێدڤییه ئیران ژی رێزێ ل هه‌موو بنه‌ما و یاسایێن جیرانیێ بگریت.
حكومه‌تا هه‌رێمێ د په‌یاما خوه دا ئاماژه‌كریه كو دێ ده‌رباره‌ی بابه‌تی، پۆنسولێ گشتیێ ئیرانێ ل هه‌رێما كوردستانێ داخواز كه‌ن و نه‌رازیبوونێ گه‌هیننه وی و ب رێیا وی گه‌هیننه ته‌هرانێ.
ئەڤرۆ نیوز ، نەوزاد ھلوری:
ئێڤاریا ئەڤرو ل سنوورێ قەزا زاخۆ سنێلەک د رووبارێ باج خەندقی ، و تیمێن نقومڤانێن زاخۆ ژی شیان تەرمێ ئەوی سنێلەی ل رووباری دەربینن.
دڤی واریدا بێوار عەبدولعەزیز بەرپرسێ راگەھاندنا رێڤەبەریا گشتی یا بەرەڤانیا باژێری ل دھۆکێ بو ئەڤرۆ نیوز گۆت: ( ئێڤاریا ئەڤرۆ ل سنوورێ قەزا زاخۆ سنێلەک بناڤێ محەمەد خەلەف محەمەد دژیێ ١٥ سالیێ دا کەفتە د رووبارێ باج دا و خەندقی)
زێدەتر گۆت: ( تیمێن نقومڤانێن زاخۆ شیان تەرمێ ئەوی سنێلەی ل روباری دەربینن و رەوانەی نەخۆشخانا داد ل زاخۆ بکەن بو زانینا ئەگەرا خەندقینا وی)
ئه‌ڤرۆ نيوز:
سه‌رۆكێ هه‌رێما كوردستانێ د هه‌ڤدیتنه‌كێ دا دگه‌ل كۆنسۆلێن وه‌لاتێن عه‌ره‌بی ل هه‌رێمێ راگه‌هاند؛ ریفراندۆم مافه‌كێ شه‌رعی و خوه‌زایێ خه‌لكێ كوردستانێ و پێدڤییه هه‌موو ئالییه‌ك رێزێ ل خواست و مافێن خه‌لكێ كوردستانێ بگریت.
مه‌سعوود بارزانی سه‌رۆكێ هه‌رێما كوردستانێ ئه‌ڤرۆ پێشوازی ل كۆنسۆلێن وه‌لاتێن فله‌ستین، ئیمارات، كوێت، سودان، ئوردن، میسر و عه‌ره‌بستانا سعوودیێ كر.
شاندا كۆنسۆلێن وه‌لاتێن عه‌ره‌بی رۆلێ هێزێن پێشمه‌رگه‌ی د شكاندنا تیرۆرستان و ئۆپه‌رسیۆنا رزگاركرۆنا مووسلێ دا بلند نرخاند و ده‌ستخوه‌شی ل حكومه‌ت و گه‌لێ كوردستانێ ل هه‌مبه‌ر وێ پێشوازییا ل ئاواره و په‌نابه‌رێن ل هه‌رێمێ هاتینه ڤه‌حواندن كر.
ژ ئالیێ خوه‌ڤه سه‌رۆكێ هه‌رێما كوردستانێ به‌حسا پاشه‌رۆژا مووسل پشتی داعشێ و ئه‌گه‌رێن سه‌رهلدانا داعشێ كرن و گۆت: ژبه‌رنه‌بوونا پلانه‌كا هه‌ڤپشك یا ئیداری و سیاسی دگه‌ل پلانا سه‌ربازی، هه‌ر ژ نها كێشه ده‌ركه‌فتینه و گۆت ژی: گه‌ر چاره‌سه‌ركری بۆ ئه‌گه‌رێن ده‌ركه‌فتنا داعشێ نه‌هێن كرن، دوور نینه ب شێوازه‌كێ دی و ل ژێر ناڤه‌كێ دی سه‌رهلبده‌ت.
سه‌باره‌ت ریفراندۆما كوردستانێ ژی بارزانی گۆت: گه‌لێ كوردستانێ ب رێیا دانوستاندن و ئالاڤێن ئاشتیانه و رێیێن سه‌رخوبه‌وونێ و مسۆگه‌ركرنا مافێن خوه رێ گرتییه به‌ر، كو تاكه رێیا گه‌ره‌نتی كاره بۆ دوباره‌نه‌بوونا كێشه و هه‌ڤركیێن خویناوی.
ئەڤرۆ نیوز ، بیوار حسێن:
پشتی کو بو ماوەیێ دوو روژان گەنجەک ل گوندی دڤری یا سەر ب ناحیا دینارتە بەرزە بووی ، ئەڤرو ژلایێ شوفیرەکێ تەکسیێ ل هەولێر هاتە دیتن.
دڤی واریدا ردوان زێباری پسمامێ ئەوی گەنجی بو ئەڤرۆ نیوز گۆت: ( نێزیکێ دوو روژانیە گەنجەکێ گوندێ دڤریێ یا سەر ب ناحیا دینارتە بناڤێ بوخاری برقی ل مال دەرکەفت بو ، هەتا نها دیار نەبوو ، پشتی کو ژلایێ ئەڤرو نیوز و چەند جهەکێن دن بەلاڤبوی ، ئەڤرو ژلایێ شوفێرەکێ تەکسیێ ل هەولێر هاتە دیتن)
ئەڤرۆ نیۆز،زنار تۆڤی:
ئێڤاریا ئەڤرۆ بهایێ نەفتێ د بازارێن جیهانێدا بلندبوویە و ب بەراورد ل گەل بهایێن سپێدێ.
پێگەهێ (oilprice) یێ جیهانی بەلاڤەکریە کو ئەڤرۆ سێشەمبیێ (2017/7/4) ل دەمژمێر (6:25) خۆلەک ل ئێڤاریا ئەڤرۆ ب دەمێ کوردستانێ بهایێ ئێک بەرمیلێ نەفتا برێنت ب (49) دۆلار (76) سەنتان مامەلە پێ هاتیەکرن و بهایێ ئێک بەرمیلێ نەفتا خاڤ یا ئەمریکی ژی ب (47) دۆلار و (18) سەنتان مامەلە پێ هاتیەکرن.
ئەڤە د دەمەکێ دایە کو ئەڤرۆ سپێدێ ل دەمێ ڤەکرنا بازارێن وزێ د جیهانێدا،بهایێ بەرمیلەکا نەفتا برێنت ب (49) دۆلار و (63) سەنتان بوو،بهایێ بەرمیلەکا نەفتا خاڤا ئەمریکی ژی ب (46) دۆلار و (84) سەنتان مامەلە پێ هاتبووکرن.
ئەڤرۆ نیوز ، ھلوری:
دەمەک بەری نوکە ژبەر سەدەما ئاگرەکێ ژ کوگەھەکا بەنزینێ ل سلێمانی 35 کەس برینداربوون ژ وانا ھندەک فەرمانبەرێن بەرەڤانیا باژێری و پولیسن.
دڤی واریدا محەمەد حەسیب رێڤەبەرێ پەترول و کانزایانل سلێمانی بو دەزگەھێن راگەھاندنێ گوت: ( ل دەما ڤەگوھاستنا بەنزینێ ژ تانکەران بو کوگەھێن بەنزینێ ژبەر بلندبوونا پلەیێن گەرمایێ ئاگر ل کوگەھا بەنزینێ بەردبیت)
زێدەتر گۆت: ( ھەتاکو نھا زیانێن ئاگری ناھێتە زانین ژبەرکو ئاگر نەھاتیە کونترولکرن ، بەلێ دئەنجامێ ئەوی ئاگری دا ٣٥ کەس ھاتینە سووتن ژ وانان دوو کارمەندێن بەرەڤانیا باژێری و چوار پولیسن ، ھەموو ھاتینە رەوانەکرن بو نەخۆشخانێ)
ئەڤرۆ نیۆز،زنار تۆڤی:
پشتی پارێزبه‌ندی ل سه‌ر زێدەتر ژ 40 ئه‌ندام په‌رله‌مانێن هه‌ده‌پێ هاتیە راکرن،هەڤسه‌رۆكێن هه‌ده‌پێ و 9 ئه‌ندام په‌رله‌مانێن دیتر هاتینە دەستگیرکرن،ئەڤرۆ ب بریارا دادوه‌ری فه‌رمانا ده‌ستگیركرنێ بۆ مزگین ئیرگات ئه‌ندام په‌رله‌مانا هه‌ده‌پێ ده‌رچوویە.
مزگین ئیرگات ئه‌نداما په‌رله‌مانی تورکیا ل سەر لیستا هه‌ده‌پێ له سه‌ر بازنه‌یێ باژێرێ ئزمیرێ ل سالا 2015 دا دکومبوونەکێدا عه‌بدولا ئۆجه‌لان وه‌كو كه‌سایه‌تییه‌كێ كارێزما ب نڵڤکریە، هه‌روه‌سا دناڤا جه‌ماوه‌ری دا پەسنا ئۆجه‌لانی کریه.
ل سه‌ر گۆتنێن وێ داخوازكارێ گشتی یێ ئزمیرێ دۆسیه‌کا تایبه‌ت بۆ ڤەکریە،ئەڤرۆ ئێکەم رۆژا دانیشتنا وێ بوو،ئیرگات ب خوە ئاماده‌ی دانیشتنا دادگەهێ نه‌بوویه و بتنێ ب رێیا پارێزه‌رێ خوە به‌رگری ژ خوە كریە، به‌لێ دادوه‌ری فه‌رمانا ده‌ستگیركرنێ بۆ ده‌ركریە.
پارێزه‌رێن وێ داخوازکریە کو دۆسیا وێ بهێتە پاشخستن،چونكی ئه‌و تۆمه‌تا به سه‌ر وێدا هاتیە ساخکرن، شایەنی هندێ نینە كو ئەو ل سه‌ر بهێتە زیندانکرن،بەلێ دادوه‌ری گۆتیە،چونكی ئەو ب خوە ل ڤێرێ نینە،دڤێت بهێتە ده‌ستگیرکرن و پاشی بریار ل سه‌ر دۆسیا وێ بهێتەدان.
نيشاندان