ئەڤرۆ نیوز:
ئەندامەکێ جڤاتا سەرکردایەتیا پارتی ئاماژە بڤێ چەندێ دکەت، مانا چەکدارێن پارتا کرێکارێن کوردستانێ پەکەکێ ل شنگالێ دێ شەڕ کەڤیتە ناڤبەرا دو دەولەتان و زیانێن مەزن دێ گەھنە خەباتا گەلێ کورد، ھەروەسا دیارکر، پارتی یا بەرھەڤە دانوستانا دگەل پەکەکێ بکەت ئەگەر ئەف دانوستان بۆ بەرژەوەندیا مللەتێ کوردبن.
نووری حەمە عەلی، ئەندامێ جڤاتا سەرکردایەتیا پارتی دیموکراتی کوردستان بۆ رۆژناما ئەڤرۆ گۆت” جھێ خەباتا پەکەکێ ل شنگالێ نینە، بەلکۆ گوڕەپانا خەباتا پەکەکێ خویایە ل کوردستانا باکورە و ئەمژی وەک ھەرێما کوردستانێ و پارتیژی پشتەڤان و ھاریکارن بۆ کوردێن باکور و بدەستڤە ئیانانا مافێن وان د چوارچوڤێ تورکیادا بشێوەیەکێ مەدەنی، ئەگەر پەکەکەژی داخوازا مافێن کوردا ل تورکیا بکەت بشێوەیەکی سەردەمیانە پشتەڤانیا پەکەکێ ژی دکەین، بەلێ مانا پەکەکێ ل شنگالێ چو بەھانەیەک بۆنینە ژبلی ڤێ چەندێ دێ بەھانەیا دەتە دەست وەلاتێ تورکیا دەستێ خوە بینیت ناف کاروبارێن ھەرێما کوردستانێ، دو حزبێن دیموکرات و دو حزبێن کۆمەلە یێن کوردستانا رۆژھەلات پشتی سەرھەلدانێ ل ھەرێما کوردستانێ دژین و رۆژەکێ ل رۆژا تشتەکێ وەسا نەکریە ئەم بکەڤینە بەر ھێرشێن وەلاتێ ئیرانێ و ئەڤان حزبێن رۆژھەلات رەوشا ھەرێما کوردستانێ بەرچاڤ گرتیە و چو رۆژەکێ چالاکیەکا سەربازی ناف خاکا ھەرێما کوردستانێ ئەنجامدایە ببیتە ئەگەرێ ڤێ چەندێ کاریگەری لسەر رەوشا ھەرێمێ ھەبیت، چونکە ئەف دزانن دێ زیان ب وەلاتیێن ھەرێما کوردستانێ کەڤن، بەلێ ئەگەر پەکەکە ھەر یا رژدبیت لسەر مانا خوە شنگالێ دێ شەڕ کەڤیتە ناڤبەرا دو دەولەتان و زیانڤێکەفتیێن ئێکێ ژی دێ ھەر ھەرێما کوردستانێ و گەلێ کوردبیت.
نووری حەمە عەلی دیارکر” ئەم وەکی پارتی دیموکراتی کوردستان بەرھەڤین بۆچارەسەرکرنا ھەر پرسەکێ دانوستانا دگەل پارتا کرێکارێن کوردستانێ پەکەکێ بکەین، ئەگەر بھێت و ئەف دانوستان د بەرژەوەندیا مللەتێ کوردا بن و پارتی چو جارەکێ دانوستان رەتنەکرینە، بەلێ بەرۆڤاژی پارتی زۆرداری و خۆ سەپاندنێ ل چو حزبە و لایەنەکی قەبوولناکەت، ئەگەر پەکەکێ بڤێت ب زۆری خۆ بسەپینیت ئەڤە پارتی ئەڤێ خۆ سەپاندنا پەکەکێ قەبولناکەت، ھەتا ئەم خۆ سەپاندنێ ل دەولەتێن زلھێزێن جیھانێ قەبولناکەین ھەتا بگەھیتە ڤێ چەندێ حزبەک ئاریشەیان بۆ ھەرێما کوردستانێ پەیدا بکەت و بڤێت خۆ سەپینیت ئەڤە جھێ قەبولکرنێ نینە.
سەرکردایەتیا پارتی: خوه سەپاندنا پەکەکێ قەبوول ناکەين
نيشاندان
