ئەڤرۆ نیۆز،زنار تۆڤى:
گه‌له‌ك دایك و باب ژ هندێ دترسن كو ل قۆناغێن سنێله‌یێ دا كچێن وان توشى خه‌له‌تیه‌كێ ببن و ئه‌و چه‌ند ببیته ئه‌گه‌رێ هندێ كو هه‌تكا وان دناڤ جڤاكى دا بچیت،له‌ورا ئه‌و كچێن خوه زوو دده‌نه شوو و ناهێلن خواندنا خوه ژى ته‌ما بكه‌ن،هه‌ر چه‌نده دبیت گه‌له‌ك دایك و باب ژ ڤێ چه‌ندێ دلخۆش نه‌بن،لێ هه‌ر ڤى كارى ئه‌نجام ددهن.
یوسف ئۆسمان ئه‌و ده‌روونناس و شاره‌زایێ جڤاكیه بۆ ئه‌ڤرۆ نیۆز دبێژیت:ژلایێ جڤاكى و ده‌روونناسى ڤه،زوو شوودانا كچان ژلایێ دایك و بابان ڤه دو هوكارێن سه‌ره‌كى هه‌نه،هوكارێ ئێكێ ئه‌ڤ چه‌نده وه‌ك كه‌لتۆره‌كێ یه دناڤ جڤاكێ كورده‌وارى دا و هه‌روه‌سا وه‌ك ره‌وشت و تیتاله‌كێ جڤاكى لێهاتیه كو دڤێت زوو كچێ بده‌نه شوو،ئانكو ده‌مێ كچ دگه‌هیته د سه‌ر ژیێ چارده سالیێ دا دڤێت شوو بكه‌ت،هوكارێ دویێ بارێ ئابووریه،له‌ورا زۆر جاران بارێ ئابوورى بوویه هوكار كو دایك و باب زوو كچا خوه بده‌نه شوو،هه‌روه‌سا دایك و باب بووینه ئه‌گه‌ر ژى كو كچا وان نه خوینیت و خواندنا خوه ژى ته‌مام نه‌كه‌ت،هێشتا دبێژیت:نوكه گه‌له‌ك ده‌روونزان و شاره‌زایێن جڤاكى گوهشتینه وێ باوه‌ریێ كو ته‌كنۆلۆژیا نوو وه‌كى ته‌له‌فزیۆنێ و مۆبایلێ و تۆرێن جڤاكى و زنجیرێن دۆبلاژكرى كاریگه‌رى هه‌بوویه ل سه‌ر تێكچوونا هورمۆناتێن گه‌شه‌كرنێ،له‌ورا هورمۆناتێن ره‌گه‌زێ مێ زێده‌تر گه‌شه دكه‌ن،ب ئه‌گه‌رێ تێكه‌لبوونێ و وروژاندنێ(اپاره) كرنێ،هه‌روه‌سا دایك و باب ژ هندێ دترسن كو كچێن وان توشى خه‌له‌تیه‌كێ ببن،له‌ورا ئه‌و كچێن خوه زوو دده‌نه شوو،زۆربه‌یا وان كچێن زوو دده‌نه شوو ژى یێن وان خێزانا نه كو دایك و بابا كونترۆل ل سه‌ر نینه،یان ژى ئه‌و خێزانن یێن كو دناڤ دابونه‌ریتێن جڤاكى دا دژین.
یوسف ئۆسمان زێده‌تر دبێژیت:ل دووڤ دۆخێ پزیشكى نابیت كچ ل ژێر ژیێ 18 سالیێ دا شوو بكه‌ت،هه‌روه‌سا ل دووڤ دۆخێ ده‌روونناسى و جڤاكى و گه‌شه‌كرنا ئاقلى و مه‌عریفى و گه‌شه‌كرنا بارێ ده‌روونى دڤێت كچ ل ژیێ 18 سالیێ دا شوو بكه‌ت،هه‌روه‌سا هه‌كه كچ زوو شوو بكه‌ت و دبن ژیێ 18 سالیێ دا بیت،ئه‌ڤ چه‌نده دێ بیته كاره‌سات،چونكى هه‌كه وێ زاۆك بوون و بۆ دایك،نه‌شێت وه‌كى دایكه‌كێ بیت بۆ وى زارۆكى،چونكى ژلایێ بایلۆژى ڤه ته‌مام گه‌شه نه‌كریه،دیسا د قۆناغا هه‌ست ب به‌رپرسیاره‌تیێ دا دروست نه‌بوویه،له‌ورا ئه‌ڤه هه‌موو دێ ب خرابى ل سه‌ر شووكرنا وێ دا دیار بن و زۆر جاران دێ توشى ئاریشێن مه‌زن بیت و هه‌كه ژێكجۆدا بوون ژى روو نه‌ده‌ت،لێ دێ هه‌ر دناڤ گرفتێن مه‌زن دا ژیت،ئه‌و چه‌ند ژى گۆت:دڤێت ئه‌م هه‌موو هزر ل هندێ بكه‌ین كو ڤى دابونه‌ریتێ كه‌ڤن ب گوهۆرین،كو دایك و باب زوو كچێن خوه نه‌ده‌نه شوو،هه‌روه‌سا پێدڤیه ئه‌م هه‌ولا هندێ ژى بده‌ین كو ئه‌ڤ چه‌نده نه بیته دیارده دناڤ جڤاكى دا،چونكى ئه‌ڤ هه‌ڤژینیه یا سه‌ركه‌فتى نابیت،له‌ورا دڤێت قانوون ڤێ چه‌ندێ كێم بكه‌ت و هه‌روه‌سا هشیاریا دایك و بابان ژى زۆر یا پێدڤیه و دڤێت ئه‌و بهێنه هایداركرن كو زوو شوودانا كچان د ژیه‌كێ بچووك دا دروست نینه،هه‌روه‌سا دڤێت كور و كچ بهێنه هشیاركرن كو هه‌تاكو خواندنا خوه ته‌ما نه‌كه‌ن،هزر ل پێكئینانا خێزانێ نه‌كه‌ن و دڤێت ئه‌و ل سه‌ر بنه‌مایه‌كێ دروست بهێنه په‌روه‌رده‌كرن،دیسا دڤێن نۆژدارێن ژن ژى ل سه‌ر ڤى بابه‌تى باخڤن كو نابیت كچ زوو شوو بكه‌ن،چونكى ژلایێ بایلۆژى ڤه د ته‌مام نینن و دێ ژلایێ هورمۆنات و زارۆیان ڤه زیان گه‌هنێ.
یوسف ئۆسمان زێده‌تر دبێژیت:دڤێت هاندانا كچێ بهێته‌كرن كو ژ خواندنێ نه‌هێنه ڤه‌قه‌تاندن،هه‌روه‌سا یاسه‌یه‌ك بهێته دانان بۆ وان كچێن شوو دكه‌ن و هێشتا خواندنا خوه ته‌مام نه‌كرى،هه‌ولبده‌ن ب رێیا ڤه‌كۆله‌رێن جڤاكى كو ئه‌و كچ خواندنا خوه ته‌ما بكه‌ن پاشى شوو بكه‌ن،هه‌روه‌سا پێدڤیه ده‌زگه‌هێن راگه‌هاندنێ و ماموستایێن ئایینى و ڤه‌كۆله‌رێن جڤاكى ژى رۆله‌كێ باش دڤى بابه‌تى دا ببینن و هشیاریه‌كێ ل ده‌ف كچان و دایك و بابان دروست بكه‌ن ل سه‌ر ڤى بابه‌تى.
گه‌له‌ك دایك و باب حه‌ز دكه‌ن كچێن خوه زوو بده‌نه شوو
نيشاندان
