ئەڤرۆ نيوز:
پەیڤدارێ رێکخەری کاروبارێن مروڤاتی ل نەتەوەیێن ئێکگرتی راگەھاند, کو ژ رۆژا خەندقینا ئالانێ کوردی د دەریایا ئیجە دا و ھەتا نوکە ھزار زارۆ د دەریایێن ناڤەراست و ئیجە دا خەندقینە، وەختێ خیزانین وان بزاڤ دکرن وان دەربازی ئەورۆپا بکەن.
ولیەم سپیندلەر، د پریس کونفرانسەکێ دا ل ئۆفیسا نەتەوەیێن ئێکگرتی ل جنیڤی، ب ھەلکەفتا دەربازبوونا سالەکێ ل سەر خەندقینا ئالانێ کوردی و دەیکا وی د دەر‌یایا ئیجە دا، دیار کر کو چار ھزار و سەد و حەفتی و شەش کەسێن بزاڤکرین بگەھنە ئەورۆپا د سالەکێ دا خەندقینە.
سپیندلەر ئاشکرا کر ژی کو ژ سەرجەمێ یازدە کەسان، ژ وانان سی زارۆ بوون، رۆژانە د دەریایا ناڤەراست دا دخەندقن، ب وی یەکێ ھەژمارا وان زارۆیێن د سالەکێ دا خەندقین، گەھشتیە ھزار زارۆیان.
رۆژا دویێ ئەیلولا سالا ٢٠١٥ی، پاسەوانین دەریایی یێن تورکی، تەرمێ ئالانێ کوردی و دەیکا وی و برایی وی، ل بەراڤێن باژێرێ بودرۆم یی تورکی دیتبوون.

ئەڤرۆ نیوز:
سەرۆکێ روسیا راگەھاند کو وان ل گەل ئەمریکا شیاینە سەبارەت ب چارەکرنا قەیرانا سووریێ پێنگاڤێن بەرچاڤ ب ئاڤێژن و دیار کر کو تێگەھشتنەکا باش د ناڤبەرا ھەر دو ئالیان دا یا ھەی و مەرج نینە بەشار ئەسەد ل سەر دەستھەلاتێ بمینیت.
ڤیلادەمیر پۆتین سەرۆکێ روسیا د داخۆیانیەکێ دا بۆ دەزگەھێن راگەھاندنێ دیار کر کو ئەم ل گەل ئەمریکا بزاڤەکا مەزن دکەین کو چارەسەریەکا گونجای بۆ رەوشا سووریێ پەیدا بکەین و ئەز دشێم بێژم کو نھا تێگەھشتنەکا گەلەکا باش د ناڤبەرا مە دا ھەیە و گۆت: (بۆ ھەر کەسەکێ ئاشکرایە کو ھەکە ئەمریکا گوھۆرینێ د سیاسەتا خوە دا ل سووریێ بکەت دێ پێنگاڤێن باش ھێنە ئاڤێتن و ژ بەر ھندێ ژی ئەم نھا پتر ژ ھەر دەمەکێ ل گەل ئەمریکا سەبارەت ب چارەکرنا قەیرانا سووریێ نێزیکی ھەڤدو بووینە و ل گەل تورکیا ژی سەبارەت ب سووریا نوو مە گەلەک ئاریشە چارە کرینە).
سەرۆکێ روسیا ئەو یەک ژی ئاشکرا کر کو ئەم د رژدین دڤێت قەیرانا سووریێ ئێدی چارەسەر بیت، گەلەک پێشنیاز بۆ چارەسەریا سووریێ ھاتنە کرن و ئاشکرایە کو شەرێ ل سووریێ دڤێت ب دووماھی بھێت، چونکو ھەکە شەر بەردەوام بیت ئەم نەشێین بەحسێ چارەسەریێ بکەین و گۆت: (ژ بۆ چارەسەرکرنا قەیرانا سووریێ مە ھەتا نھا گەلەک بزاڤ کرینە و دێ گوھۆرینێن نوو ژی کەین، ژ بەر ھندێ ژی مەرج نینە بەشار ئێدی ل سەر دەستھەلاتێ بمینیت. یا گرنگ ئەڤە کو قەیرانا سووریێ چارە بیت و ژ بەر ھندێ ژی مە ژی گوھۆرین د ھەلویستێ خوە دا کریە و ئەمریکا ژی وەکو جاران سەرەدەریێ ل گەل رەوشا سووریێ ناکەت و ژ بەر ھندێ ژی ئەز وەسا دبینم کو ئەم دێ شێین د دەمەکێ نێزیک دا چارەیەکا گونجای بۆ سووریێ پەیدا کەین).
چاڤدێرێن سیاسی دیار دکەن کو روسیا دەمێ ل گەل تورکیا سەبارەت ب سووریێ گەھشتیە ھندەک رێککەفتنان ئێک ژ وان ژی ئەو بوویە کو پشتی ئارامبوونا رەوشا سووریێ بەشار ژ دەستھەلاتێ بھێتە دوورخستن و روسیا ب وی مەرجی رازی بوویە، لێ داخوازا سەرەکی یا روسیا ژی پاراستنا بەرژەوەندیێن وێ ل سووریێ بوویە کو ئەو یەک ژ ئالیێ ئەمریکا و تورکیا ڤە ھاتیە قەبوول کرن، ژ بەر ھندێ ژی نھا پۆتین ب رەنگەکێ ئاشکرا دبێژیت کو ئەو وەک جاران پشتەڤانیێ ل بەشاری ناکەن و ئەو یەک دێ بیتە ئەگەرێ گوھۆرینێن مەزن ل سووریێ.

ئەڤرۆ نيوز:
وەزیرێ دەرڤە یێ سعوودیێ عادل جوبەیر د داخۆیانیەکێ دا بۆ ئاژانسا رویتەرز یا نووچەیان راگەھاند کو مە گەلەک بەلگە سەبارەت ب پشتەڤانیا ئیرانێ بۆ گرۆپێن تیرۆرستی ل دەڤەرێ کۆم کرینە و رادەستی نەتەوێن ھەڤگرتی و جڤاتا ئاسایشێ کرینە و مە دڤێت کو ئیران بھێتە سزادان، چونکو ئیران ب رەنگەکێ ئاشکرا قانوونێن نێڤدەولەتی بنپێ دکەت و ب رێیا فرۆکێن مەدەنی چەکی بۆ حوسیان ل یەمەنێ و ھەروەسا بۆ بەشاری ئەسەدی فرێ دکەت و ب سەدان چەکدارێن ئیرانێ ل سووریێ شەرێ خەلکێ وی وەلاتی دکەن و بووینە ئەگەرێ مرنا ب ھزاران وەلاتێن مەدەنی و گۆت: (نابیت کو جڤاکا نێڤدەولەتی ل ھەمبەر کریارێن ئیرانێ بێدەنگ بمینیت و دڤێت سنۆرەک بۆ ئیرانێ بھێتە دانان، چونکو مە بەری نھا ژی دیار کریە کو ھەتا دەستێوەردانێن ئیرانێ ل دەڤەرێ بەردەوام بن پرسێن رۆژھەلاتا ناڤین ژی چارەسەر نابن).
ل ئالیێ دی بەھرام قاسمی پەیڤدارێ وەزارەتا دەرڤە یا ئیرانێ راگەھاند کو بیست سالن بەرپرسێن سعوودیێ ڤان گۆتنان دوبارە دکەن و ھەتا نھا ژی نەشیاینە چو بەلگەکێ رادەستی چو سازیەکێ بکەن، چونکو چو راستی بۆ وێ چەندێ نینن و بۆ ھەموو ئالیەکێ ئاشکرایە کا کێ دڤێت رەوشا رۆژھەلاتا ناڤین ئالۆز کەت).