ئەڤرۆ، محەمەد عەلی:
کچا پارێزگەھێ و یاریزانا تیما یانا دھۆک و ھەلبژارتیێ عیراقێ بۆ ژیێ ھەشت سالی ناسناڤێ قارەمانیا نێڤ دەولەتی یا ئەنتالیا بۆ یاریا تێنسا ئەردی ب دەستڤەئینا و ھەردو ھەڤالێن وێ زەلال سەعید بۆ ژیێ ١١ سالی رێزا دووێ بدەستڤەئینا پشتی دگەل یاریزانا قوبرسی د یاریا دوماھیێ دا خوسارەت بووی، دیسان خویشکا وێ لارا ئاڤدەل بۆ ژیێ ١٠ سالی دا رێزا سێیێ بدەستڤەئینا، ژ چوارچووڤێ ھەڤرکیێن قارەمانیا نێڤدەولەتی ئەوا ل ١٨ یاریگەھێن باژێرێ ئەنتالیا یێ تورکیا دھاتنە کرن.
سەعید خەلیل ئەندامێ ئێکەتیا تێنسا ئەردی یا عیراق و سەرک شاندێ ھەلبژارتیێ عیراقێ بۆ رۆژناما ئەڤرۆ گۆت: ب خووشحالی ڤە کچێن پارێزگەھا دھۆکێ شیان باشترین ئەنجام بۆ ھەلبژارتیێ عیراقێ تۆماربکەن و رێزێن ئێکێ و دوێ و سێیێ لسەر ئاستێ ژیێن خوە بدەستڤەبینن، ھانا ئاڤدەل بوو جھێ سەرنجراکێشا ھەموو پشکداران پشتی کو شیایی ئاستەکێ مەزن نیشان بدەت و ١٣ یاریان بکەت و ب سەرکەڤتیانە و ناسناڤێ قارەمانیێ لسەر ئاستێ ژیێ خوە بدەستڤەبیت، سەرەرایی یاریێن وێ دگەل کوران ھەڤرکی دکر تایبەتی دگەل یێن تورکی و جورجیا و قوبرس و ئوردن، ژلایێ خوەڤە زەلال سەعید ژی شیا بەردەوامیێ بدەتە سەرکەڤتنان ھەتا یاریا دوماھیێ بەلێ ژبەر ھەڤرکیەکا دژوار و شیانێن یاریزانا قوبرسی ناسناڤ ژ دەستدا و لارا ئاڤدەل ژی ب ھەمان شێوە ئاستەکێ باش نیشان دا بەلێ شارەزاھیا یاریزانێن تیمێن دی ل رێزا سێیێ راوەستیا.
ژلایەکێ دیڤە ناڤھاتی دیارکر کو پێشبینیا بدەستڤەئینانا ناسناڤی بۆ ھانا ئاڤدەل دھاتە کرن ژبەر شیان و بەھرەمەندیا وێ، بەلێ ھەردو یاریزانێن دی ژی یێن پارێزگەھێ رۆلەکێ مەزن ھەبوویە و گۆت: ئەڤ ھەرسێ یاریزانە دێ بنە شەنگستەک و پاشەرۆژەکا باش بۆ یاریا تێنسا ئەردی ل پارێزگەھا دھۆکێ و عیراقێ ئەگەر پشتەڤانی لێ بھێتە کرن، سەرەرایی بەری نوکە چو پشتەڤانی نەبوویە و حەز و ڤیانا وان و پشتەڤانیا دەیکوبابێن وان گەھشتینە ڤێ قۆناغێ، بەلێ ژبەرکو ژیێن وان بچووکن و پێدڤی ب بەردەوامی پشتەڤانیێ ھەنە و زێدەتر، ب ھیڤی نە بەرپرسێن وەرزشی و پارێزگەھا دھۆکێ چاڤدانەکا تایبەت بۆ بکەن و ژبەرکو ئەوبەھرەمەندیا ل دەڤ ڤان یاریزانان ھەیی دێ بنە باشترینێن سەر ئاستێ ئاسیا.
لدوماھیێ سەعید گۆت: لدەستپێکێ پشکداریا مە بتنێ بۆ ھندێ بوو ئەم مفایی ژ ئاست و شارەزاھیا یاریزانێن دی یێن وەلاتێن پشکدارب بکەین بەلێ پشتی کەڤتینە د ھەڤرکیان دا یاریزانان ھزرا مە گوھارت و ئارمانجا خوە بجھـ ئینانا ئەوژی ناسناڤ و رێزێن ئێکێ.
دھێـتە زانین زێدەتر ١٤ وەلاتان ژ کێشوەرێن ئۆرۆپا، ئاسیا و ئەفریکا پشکداری د قارەمانیا ئەنتالیا یا نێڤ دەولەتی دا کربوو ئەوا سالانە ژلایێ ئێکەتیا دەولەتی یا تێنسا ئەردی ب ھەڤکاری دگەل ئێکەتیا وەلاتێ تورکیا دھێتە ئەنجامدان.

ئەڤرۆ،ھەژار مەعروف:
پشتی یانا بەرشەلۆنا شیای ل شەڤا ئێک شەمبیا بوری سەرکەفتنەکا گرنگ د یاریا کلاسیکو دا ل سەر ھەڤرکا خوە یانا ریال مەدرید توماربکەت ب سێ گولان بەرامبەر دو گولان کو ئەڤ یاریە دھێتە ھژمارتن ب یاریا چەنگێ ھەرێما کەتەلونیا ل گەل مەدریدیا ژبەرکو ڤێ ھەرێمێ مێژویەکا نەخوش ھەیە ژلایێ سیاسی ڤە ل گەل مەلکێن بەرێ یێن مەدریدیا و ئیسپانیا ڤە لەورا ھەردو دەمێ ھەمبەری ئێک کەن ھەڤرکیەکا دژوار دھێتەکرن دناڤبەرا ھەردو یانە ڤە ژلایێ پشتەڤان و ھەتا یایزانێن وی و ھەڤرکی ھەر ژ رۆژا ئێکێ یاریا وێ یا ئێکێ یا ل سالا ١٩٠٢ ھەتا نھا یا بەردەوامە .

مێسی چوبوینە سانتیاگو برنابیو بۆ شەری
دووماھی کلاسیکو دا ل شەڤا ئێک شەمبیا بوری یانا بەرشەلۆنا شیا سەرکەفتنێ ل سەر مەدرید ل یاریگەھا وێ سانتیاگو برنابیو توماربکەت ب سێ گولان بەرامبەر دو گولان و گولا سیێ یا بەرشەلۆنا ژلایێ ستێرا وێ مێسی ڤە ھاتبوو تومارکرن کو ئەو شەش کلاسیکو بوو نەشیابوو گولەکێ توماربکەت لێ دووماھی کلاسیکو دا شیا سەرکێشیا نوونەرا کەتەلونیا کر، پشتی یاریێ مێسی پەیامەک ل سەر مالپەرێ خوە یێ فەرەمی پەیامەک بەلاڤەکر بوو تێدا دیارکربوو چوو بوینە یاریگەھا سانتیاگو برنابیو بۆ سەرکەفتنێ بو وێ چەندێ بشێن بەردەوامی ب دەنە شەرێ دەستڤە ئینانا خولا لالیگا و ئەو شیان ھەڤرکیێ دژوارتر لێ بکەن ل گەل ھەڤرکا خوە و رێیا خولێ ھێشتا مایە و یا درێژە پێدڤی ھزر ل یاریێن بھێت بکەین.

دەست قوتانا راموس ئاشکرا بوو
کابتنێ یانا ریال مەدرید سێرجیو راموس پشتی ژلایێ دادڤانێ یاریێ ل دقیقا ٧٨ ب کارتا سور ھاتیە دورخستن و ئێکسەر سێرجیو راموس دەست قوتان و گوتنەک ژ دورڤە دیارکر کو زوربەیا پشتەڤان و تەماشەڤانێن وێ یاریێ وەسا دیارکر راموس ئەو دەست قوتان بو دادڤانێ یاریێ بوون لێ پشتی یاریێ ئەوی بۆ راگەھاندنا ئیسپانیا دیارکر ئەو دەست قوتانا وی ب چو شێوە گرێدای دادڤانێ یاریێ نەبوو بتنێ ئەوی بۆ یاریزانێ بەرشەلۆنا پیکی قوتان کو ئەو ھەردەم بەرەڤانیا تیما خوە کەت و گازندا ژ دادڤان دکەت و چو کێشەیێن کەساتی ژی من ل گەل پیکی نین بتنێ ئەڤە ئەز دکەم ھەڤرکیە ژ تیما خوە کەم و ھەمان شێوە ئەوژی بەرەڤانیێ ژ تیما خوە کەت .

زێدان و مارسێلو خوە دەکەنە ئەگەر
پشتی یاریا کلاسیکو ب دووماھی ھاتی راھێنەرێ فەرەنسی یێ یانا ریال مەدرید زێدان د گونگرێ رۆژنامەڤانی دا دیارکر یا گرنگ ئەوە ھزرێ ل یاریێن بھێت بکەن ژبەرکو ھێشتا رێیا خولێ یا درێژە و ئارمانجا وان نوکە برنا لالیگا و چامپیونیز لیگ و کەسێ ژی ناکەمە ئەگەرێ خوسارەتیێ و خوە بەرپرسیارێ ئێکێ خوسارەتیێ دانا، ژلایێ خوڤە ستێرا بەرەڤانیا بەرازیلی مارسیلو ئاشکرا کر ئەو خوە دبینت ئەگەرێ دەستدانا دو خالان و خوسارەتیا کلاسیکو ژبەرکو ئەو دەمێ ل خولەکا دووماھیێ ھەکە ئەوی سێرجیو ربێرتو تەپا ل نیڤا یاریگەھێ بری پێدڤی بوو ئەو فاولەکا ھونەری دروست بکەت .

رۆژنامەیێن ئیسپانی گرنگیا کلاسیکو پتر دایە مێسی
رۆژنامەیێن مەزن ل ئیسپانیا پشتی یاریا کلاسیکو پتر رولێ ڤێ کلاسیکویێ دایە مێسی و ب مانشێت مەزن وێنەیێن وی ل بەرگەیێ ئێکێ رۆژنامەیێن خوە دایە رۆژناما مارکا ب مانشێتەکێ مەزن دیارکریە مێسی ناسناڤێ لالیگا پائێخستن، ھەردیسان وێ رۆژنامێ دیارکریە ژی ب گولا مێسی یا سێ گیانەکێ دی دا یانا بەرشەلۆنا بۆ ھەڤرکیا ناسناڤێ لالیگا ، ژلایەکێ دووڤە رۆژناما دیپورتیپو ماندو وێنەکێ مێسی مەزن ل گەل گولا ھژمارا ٥٠٠ دانایە سەر بەرگێ ئێکێ و دیارکریە ژی ریال و بەرشا دێ ھەتا چرکێن دووماھیێ ژ خولا لالیگا ھەڤرکیا ئێک کەن و ھەردیسان ئاماژە ب وێ چەندێ ژی کریە چیڤانوکا ئەرژەنتینی مێسی سەرکێشیا بەرشەلۆنا کر ل شەرێ سانتیاگو برنابیو ، ھەردیسان رۆژناما ئەلباییس ب مانشێتەکێ مەزن دیارکریە مێسی شیا مەدرید ل سانتیاگو، رۆژناما بانگواردیا دیارکریە مێسی ئومێدەک دا بەرشەلۆنا بۆ برنا ناسناڤێ لالیگا.

ئەرکێ مەدرید یێ ب زحمەتە و بەرشەلۆنا ب سانەھی یە
ھەردو یانە نوکە ٧٥ خال ھەنە لێ ل دویڤ راپورتێن رۆژنامەڤانی یێن ئیسپانیا وەسا داینە دیارکرن ئەرکێ ریال مەدرید ل ماوێ بھێت دێ ب زحمەتر بیت ژ یێ بەرشەلۆنا تایبەت یاریا حەفتیا بھێت کو ریال مەدرید دێ بەر ب دیپورتیڤو لەکورونیا چیت بتنێ ب بەرەڤانەکێ ھێلا ناڤینا بەرەڤانیێ یێن سەرەکی و زێدان نەچار بیت یاریزانێن تیما دوێ یا ریال مەدرید بۆ ڤێ یاریێ داخواز بکەت بەرامبەر ئەرکێ بەرشەلۆنا دێ ب سانەھی بیت دەمێ یاریێ لگەل ئوساسونا دووماھیا خولێ ل یاریگەھا خوە کەت، ھەردیسان یاریێن بھێت یێن بەرشەلۆنا ھەتا رادەیەکی ژ یێن ریال مەدرید ب سانەھی ترن کو ژ سەرجەمێ پێنج یاریێن بھێت دێ سێ یاریان ل یاریگەھا خوە کەت ئەوژی ئوساسونا و ڤیاریال و ئیبار دو یاریان چیتە دەرڤەی یاریگەھا خوە ئەوژی ل گەل ئیسپانیول و لاس پالماس بەرامبەر یانا ریال مەدرید شەش یاری مانە لێ ئەرکێ ئەوێ ھەتا رادەیەکی یێ ب زحمەتە ئەوژی بتنێ دو یاریان ل یاریگەھا خوە کەت ئەوژی ل گەل سیڤلیا و ڤالنسیا بەرامبەر چار یاریان ژ دەرڤەی یاریگەھا خوە کەت ئەوژی ل گەل دیپورتیڤو لەکەرونیا گرناتە و مەلەگە و سالتاڤیگو .

ئەڤرۆ،بیستێر حکمەت
ل ژێر دروشمێ بەرەف کوردستانەکا سەربەخۆ ئەڤرۆ سەرۆکاتیا زانکۆیا پۆلیتەکنیک ل گەل پەیمانگەھا تەکنیکی یا ئامێدیێ ب ھەڤکاری ل گەل دەڤەرداریا قەزا ئامێدیێ رابوون ب ئەنجامدانا غاردانەکا درێژ (ماراسون) بۆ زێدەتر ٢٥٠ یاریزانان کو پێکھاتی بون ژ ماموستا و قوتابی و فەرمانبەرا کو پشکداران ب درێژاھیا پێنج کیلومەتران غاردا دڤێ ماراسونێ دا کو ل دەستپێکا ھاڤینگەھا سیلاڤێ ھەتا ئاڤاھیێ پەیمانگەھا تەکنیکی یا ئامێدیێ.
پشتی ھەڤرکیەکا درێژ دناڤبەرا پشکداران یاریزان سەیدو شەمو ژ ئاکرێ ل رێزا ئێکێ ھات و ئاراس بەشار ژ بەردەرەش ل رێزا دویێ ھات پشیو بیروس ژ دھۆکێ ل رێزا سیێ ھات و ل دووماھیێ خەلات ل سەر دەە یاریزانانێن ئێکێ ھەتا دەھێ ھاتنە بەلاڤەکرن.

زاخۆ,ھشیار دوبانکی:
یاریزانەکێ باژێرێ زاخۆ ب یاریا شەرێ ئازاد د دیدارەکێ دا بۆ رۆژناما ئەڤرۆ ئاشکرا کر ئەوی نوکە سەرەدانا وەلاتێ تایلەند کریە ب مەرەما پشکداری کرنێ د خولەکا راھێنانی دا ل وی وەلاتی بۆ ماوێ پازدە رۆژان.
زێدەتر مەریوان ئیبراھیم حەمید یاریزانێ یاریا شەرێ ئازاد ل زاخۆ دیارکر ئەو کەسێ ئێکێ یە ل سەر ئاستێ پارێزگەھا دھۆک و ھەولێر پشکداریێ د ڤان جورە خولا دا دکەت و راھێنانێ وانا دبێژیتی دڤێ خولێ دا قارەمانێ وەلاتێ تایلەندە و ھەردیسان چەندین ناسناڤ ل سەر ئاستێ وەلاتێن ئورۆپی و ئاسیا ب دەستخوڤە ئینای نە.
ناڤبری زێدەتر گوت: بەری دەمەکێ درێژ من خوە ماندی کر بتنێ بۆ وێ چەندێ بشێن پشکداریێ د خولەکا ناڤدار دا بکەم ل سەر ئاستێ ئورۆپا و ئاسیا سوپاس ب خودێ شیام پشکداریێ دڤێ خولێ دا بکەم و دێ یێ بەردەوام بم ل سەر کاروانێ خوە بۆ ڤێ یاریێ و ئارمانجا من ئەوە ل ماوێ بھێت پشکداریێ د خولەکا ب ھێزتر دا بکەم .
مەریوان ئاماژە ب وێ چەندێ ژی کر ئەڤ یاریە یتا ھەی ل سەر ئاستێ ھەرێمێ لێ شارەزایێن ڤێ یاریێ نین بتنێ چەند کەسان باوەرنامە ب ڤێ یاریێ وەرگرتی یە ب مەرەما وێ چەندێ بشێن خولێن وەرزشی ل کوردستانێ ڤەکەن و ھیڤیا من ئەوە ئەو کەسێن باوەرنامە ھەی پتر خوە ماندی بکەن ب ڤێ یاریێ پشکداری د خولێن ب ھێزتر دا بکەن و داخوازی ژ بەرپرسێن وەرزشی ل کوردستانێ کەم خولێن ب ھێز ل کوردستانێ ڤەکەن بۆ پێشئێخستنا ڤێ یاریێ .

ئەڤرۆ نیوز:
یانا بایرن میونخ یا ئەلمانی جەماوەرێ خوە دلنیا کر ل دور ئەو ھنگافتنا یاریزانێ وێ یێ نەمساوی داڤێد ئەلبا توشبویێ و نەچاربوین پشتی بورینا ١٧ دەقیقا ژ دەمێ یاریا وان ل گەل یانا ماینز د چارچوڤێ خولا ئەلمانیا ل شەمبیا بوری ئەوا ب وەکھەڤی ب دووماھی ھاتی.
زێدەتر یانا ئەلمانی د بەیان نامەکێ دا ل مالپەرێ خوە یێ فەرمی راگەھاندیە کو یاریا وان ل ھەمبەر ماینز ببەروەخت ب ھنگافتنا نە چاڤەرێکری یا ئەلبای ب دووماھی ھات و زێدەتر ئاشکەراکریە پشتی تیمێ نوشداری پشکێنینا ڤی یاریزانی کری دیاربویە کو ھنگافتن ل چوکێ وی یە و نە یا مەترسیە و راھێنەر کارلو ئەنشلوتی یێ چاڤەرێ دووماھی بریارا تیمێ نوشداریە بو بریاردانا کرنا یاریێ یان نە ل روژا چارشەمبی ل ھەمبەر یانا بروسیا دورتموند د چارچوڤێ قارەمانیا کاسا ئەلمانیا.

ب، ئەڤرۆ:
یانا بەرشەلونە یا ئسپانی ئیمزاکرنا ھەڤبەستا ستێرا یانا توتنھام یا ئێنگلیزی کریستیان ئاریکس کریە ئارمانجا خوە بو دەمێ ڤەگوھاستنێن ھاڤینا ئەف سالە یێن یاریزانا ل دووڤ راپورتەکا روژناما سەن یا بریتانی و زێدەتر ئەو چەندە ژی خویاکریە کو یانا بەرشەلونە وەسا دبینت ئاریکس باشترین بژاردەیە بو ھاریکاریا یاریزانێن وان یێن ھێلا ھێرشبەریێ میسی و سوارێز و نیماری.
ھەروەسا ڤێ روژنامێ ئەو چەندە ژی ئاشکەراکریە کو دشیاندایە یانا بەرشەلونە یاریزانێ خوە یێ دانیمارکی یێ بەرێ مایکل لاوردوب ب کاربینت بو رازیکرنا وەلاتیێ خوە ئاریکسی ژبو ڤەگوھاستنێ بو بەرشەلونە و خولا ئسپانیا.
دھێتە زانین ڤی یاریزانی ھەڤبەستا توتنھام ل دووماھیا سالا بوری ھەڤبەست ئیمزاکریە و ل پەی ڤێ ھەڤبەستێ بریارە ھەتا ٢٠٢٢ بمینت، لێ یانەکا مەزنا وەکو بەرشەلونە دشێت وی رازیبکەت بھێتە ڤەگوھاستن.
ئاریکس ھەتا نوکە یازدە گول بو توتنھام تومارکرینە و ١٨ پاسێن ئێکلاکەر ھەبوینە و زێدەتر رولەکێ کاریگەر ل گەل یانا خوە ھەبویە ژبو تومارکرنا ئەنجامێن باش و ئەف چەندە بویە ھاندەر یانا بەرشەلونە وی ب ھەلبژێریت ژبو ب ھێز ئێخستنا ھێلا ھێرشبەریێ.