ئه‌ڤرۆ نيوز:

وه‌زاره‌تا خواندنا بلند و ڤه‌كولينێن زانستى ده‌رچوويێن 12ێ ئاماده‌ ئاگه‌هدار دكه‌ت كو سيسته‌مێ “يوزه‌ر نه‌يم و پاسۆرد” دێ ب رێيا سيسته‌مه‌كێ تايبه‌ت گه‌هيته‌ وان قوتابيێن هه‌تا نوكه‌ وه‌رنه‌گرتين.

د راگه‌هاندنه‌كێ دا كو دانه‌ك بۆ ئه‌ڤرۆ نيوز ره‌وانه‌كريه‌، وه‌زاره‌تا خواندنا بلند و ڤه‌كولينێن زانستى ده‌رچوويێن 12ێ ئاماده‌ ئاگه‌هدار دكه‌ت كو ب تايبه‌ت ئه‌وێن ناڤێ بكارئينه‌ى و په‌يڤا ده‌ربازبوونێ “يوزه‌رنه‌يم و پاسۆرد” ب رێيا په‌روه‌ردێ و خواندنگه‌هێ نه‌گه‌هشتيێ، د حه‌فتيا داهاتى دا ب رێيا سيسته‌مه‌كێ ئه‌لكترۆنى دشێن كۆدێ ئه‌زموونێن قووناغا 12ێ ئامادى بچنه‌ ناڤ سيسته‌مێ زانكۆ لاين، پاشان ژى ژمارا تله‌فۆنا خوه‌ يا يا كه‌سه‌كێ نێزيكى خوه‌ تۆمار بكه‌ن و پاشان ژى د رێيا كورته‌ نامه‌كێ دا ناڤێ بكارئينه‌رى/ێ و په‌يڤا ده‌ربازبوونێ “يوزه‌ر نه‌يم و پاسۆرد” بگه‌هيتێ و دشێن بچنه‌ ناڤ سيسته‌مێ زانكۆلاين.

بۆ وێ چه‌ندێ وه‌زاره‌تا خواندنا بلند و ڤه‌كۆلينێن زانستى ئاگه‌هداريا هه‌موو ده‌رچوويێن 12ێ ئاماده‌ى دكه‌ت كو ناڤێ بكارئينه‌رى و په‌يڤا ده‌ربازبوونێ “يوزه‌ر نه‌يم و پاسۆرد” بگه‌هيته‌ ده‌ستێ وان و دشێن بچنه‌ ناڤ سيسته‌مێ زانكۆلاين بۆ هه‌لبژارتنا پشك و كوليژان ل زانكۆ و په‌يمانگه‌هان.

ئه‌ڤرۆ نيوز:

شاندەکێ وەلاتێ ئیتالیا و نوونەرێ ئێکەتیا ئورۆپا دیار دکەن کو بۆ پتر پێشڤەبرنا کەرتێ ساخلەمیێ و خزمەتکرنا وەلاتیان، ئەو پرۆژەکێ مەزنێ ساخلەمیێ ل دھۆکێ دێ ئەنجام دەن، پارێزگەرێ دھۆکێ ژی دبێژیت: پارێزگەھا دھۆکێ پێدڤی ھەموو جۆرێن ھەڤکاریان ھەیە، نەمازی د بیاڤێ ساخلەمیێ دا.
شاندەکێ وەلاتی ئیتالیا پیکھاتی ژ مارکو کارنیلوس، بالیوزێ وەلاتێ ئیتالیا ل عیراقێ و ئەلیساندرا دی پیپو، قۆنسلێ وەلاتێ ئیتالیا ل ھەرێما کوردستانێ و کلایس پاستۆری نوونەرێ ئێکەتیا ئورۆپا و رێڤەبەرێ رێکخراوا ئیسپو و فرھان ئەمین ئەترووشی، پاریزگەرێ دھۆکێ دوھی 12/10/2016 سەرەدانا ساخلەمیا دھۆکێ دان و ژ لایێ دکتور نزار عسمەت، رێڤەبەرێ گشتیێ ساخلەمیا دھۆکێ ھاتنە پێشوازیکرن و د ھەڤدیتنەکێ دا بەحسێ کەرتێ ساخلەمیێ و چاوانیا پێشڤەبرنا وی ھاتە کرن.
پاشی د پریس کۆنفرانسەکی دا فرھاد ئەمین ئەترووشی، پاریزگەرێ دھۆکێ دیار کر دەمێ ئوپەراسیۆنا مووسلێ دەست پێ دکە ت دێ گڤاشتنەکا مەزن ل سەر دھۆکێ دروست بیت وەکو خوە بەرھەڤکرن بۆ ڤێ چەندێ، ھەر ژ نوکە دھۆکێ دەست ب ئامادەکاریان کرینە، ب تایبەتی ژی ساخلەمیا دھۆکێ و گۆت: “ل دھۆکێ پینج جە بۆ ڤەحەواندنا ئاواران ھاتینە دەستنیشانکرن و کەمپ و ئاڤاکرنا کەمپان یا بەردەوامە، ھەتا نوکە دو کەمپ ب دووماھی ھاتینە و ل نێزیک دێ دەست ب دروستکرنا کەمپا سیێ ھێتە کرن، پارێزگەھا دھۆکێ پێدڤی ھەموو جۆرێن ھەڤکاریان ھەیە بۆ ئاواران، لەو داخواز دکەین پتر دەولەتێن جیھانێ ھەڤکاریا پارێزگەھا دھۆکێ بکەن”.
د. نزار عسمەت تەیب، رێڤەبەرێ گشتیێ ساخلەمیا دھۆکێ دیار کر کو بەرپرسێن حکومی یێن پارێزگەھا دھۆکێ ل گەل شاندێ وەلاتێ ئیتالیا گەنگەشە ل سەر پێشئێخستنا کەرتێ ساخلەمیێ ل دھۆکێ ھاتەکرن، ل نەخۆشخانا ھیڤی یا زارۆیان دو پشکێن تایبەت ھاتنە ڤەکرن و گۆت: “وەلاتێ ئیتالیا بەردەوام پرۆژێن نوو دئینیتە پێش، پرۆژێ ل نەخۆشخانا ھیڤی یا زارۆیان ھاتیە ڤەکرن، ئێک ژ پرۆژێن ھەرە گرنگ و پێدڤی بوو بۆ زارۆیێن ژ نوو دھێنە سەر دونیایێ کو ژیێ وان ژ 28 رۆژان کێمتر نەبیت، چاڤدێریا چر بۆ وان بھێتە دروستکرن، دەمێ پێدڤی دبنێ، ئەڤ پرۆژە ب ھەڤکاریا رێکخراوا ساخلەمیا جیھانی و رێکخروەکا ئیتالی ھاتیە بجھئینان”.
رێڤەبەرێ گشتیێ ساخلەمیا دھۆکی خویا ژی کر، پرۆژەکێ مەزنێ ساخلەمیێ ل دھۆکێ ھاتە راگەھاندن و گۆت: “ئیکەتیا ئورۆپی پشتەڤانیێ دێ ل پرۆژەی کەت و ژ لایێ رێکخراوەکا ئیتالی ڤە ب ھەڤکاری ل گەل ساخلەمیا دھۆکێ دێ ھێتە ب رێڤەبرن، پرۆژی پێک دھێت ژ برفرەھکرنا نەخۆشخانا ھیڤی یا زارۆیان و دروستکرنا کارگەھەکا ئوکسجینی بۆ نەخۆشخانا ھیڤی و دوبارە چێکرن و نووژەنکرنا ھۆلێن نشتەگەریان ل نەخۆشخانا ھەوارھاتنا دھۆکێ، ھەروەسا دروستکرن و برفرەھکرنا چەندین پرۆژێن دی ل نەخۆشخانێن دھۆکێ، دیسا ل ئاکری ژی دێ نووژەنکرن و برفرەھکرنا نەخۆشخانان ھێتە کرن ب تایبەتی ھۆلین نشتەگەریان ل نەخۆشخانا ئاکری”.
د. نزار عسمەت گۆتژی: “مەرەم ژ پرۆژێ ل گەل وەلاتێ ئیتالیا ھاتیە ڕاگەھاندن ئەوە، ژێرخانا ساخلەمیێ ل سەرانسەری دھۆکێ پێشڤە ببەین بۆ وێ چەندێ ل گەل ھژمارا خەلکێ پارێزگەھێ بگونجن، چونکو ھژمارا ئاکنجیان یا زێدە دبیت، لەو پێدڤیە پووتەکێ مەزنتر ب کەرتێ ساخلەمیێ بھێتە دان”.
د. نزار ئەو ژی ئاشکرا کر، پرۆژێ ل گەل وەلاتێ ئیتالیا ھاتیە راگەھاندن دێ پێشڤەبرنا شیانێن نۆشدار و کارمەندێن ساخلەمیێ ژی بخوە ڤە گریت و تیمێن ساخلەمیێ دێ ژ ئیتالیا قەستا دھۆکێ کەن بۆ مەشقدان و راھینانانکرنێ ب نۆشدار و پەرستاران ھەروەسا دێ تیمێن ساخلەمیێ ژ دھۆکێ ژی چنە وەلاتێ ئیتالیا.

ئەڤرۆ:
بەرپرسەکێ حوکمەتا ھەرێما کوردستانێ ئاشکرا کر کو د کۆمبوونا رۆژا 11/10/2016ێ یا جڤاتا وەزیرێن حوکمەتا ھەرێما کوردستانێ دا بڕیار ھاتەدان لژنەکا تایبەت بھێتە پێکئینان ب مەرەما دامەزراندنا چەند ڤەکۆلەران ل چەند وەزارەتێن حوکمەتێ.
محەمەد ھاودیانی، وەزیرێ کار و کاروبارێن جڤاکی ئاشکرا کر کو ئێک ژ وان خالێن د کۆمبوونا جڤاتا وەزیران دا ھاتیە بەحسکرن یا تایبەت بۆ ب وان رێنمایێن جێبەجێکرنا قانوونا 11 کو یا تایبەتە ب پێدانا پێزانینان ب دەزگەھێن راگەھاندنێ ڤە و بۆ کوردستان 24 گۆت: “رێنما ژ لایێ فەرمانگەھێن حوکمەتێ ڤە ھاتینە پەسەندکرن و پاش ب نڤیسارەکێ دێ ئاراستەیی ھەموو دەزگەھێن حوکمەتێ ھێتەکرن داکو ھاریکاریەکا باش دگەل دەزگەھێن راگەھاندنێ بھێتەکرن و ب شێوەکێ شەفاف ئەو پێزانینێن ھەین د چارچۆڤێ پاراستنا بارێ ئێمناھیا نەتەوەیێ ھەرێما کوردستانێ دا بێخنە بەردەم دەزگەھێن راگەھاندنێ”.