ئه‌ڤرۆ نيوز:
نێچيرڤان بارزانى د گۆتاره‌كێ دا د په‌راوێزا كۆنگرێ سيێ يێ ئێكه‌تيا ژوورێن بازرگانى دا كو ئه‌ڤرۆ ل هه‌ولێر هاته سازكرن راگه‌هاند كو حوكمه‌تێ بزاڤێ دكه‌ت ب ره‌نگه‌كێ گه‌له‌ك باش پشته‌ڤانيا كه‌رتێ تايبه‌ت بكه‌ت و كه‌رتێن خزمه‌تگۆزارى ژى بده‌ته ده‌ست كه‌رتێ تايبه‌ت.
نێچيرڤان بارزانى دا زانين كو رۆلێ كه‌رتێ تايبه‌ت د پێشڤه‌چوونا ئابوورا هه‌رێما كوردستانێ كو ناڤونيشانێن ڤى كۆنگره‌يه، بابه‌ته‌كێ گرنگه و هه‌رده‌م جهێ گرنگيدانا حوكمه‌تا هه‌رێما كوردستانێ بوويه.
تێگه‌هشتن و ديتنا حوكمه‌تا هه‌رێما كوردستانێ بۆ كه‌رتێ تايبه‌ت كو ب باوه‌ريا نێچيرڤان بارزانى، دينه‌موويا پێشكه‌فتنا ئابووريه و هه‌رده‌م ئه‌ڤه بوويه ئه‌و كه‌رت يێ دشێت رۆله‌كێ گرنگ و مه‌زن د پێشڤه‌چوون و به‌ر ب پێشڤه‌برن و به‌رفره‌هكرن و هه‌مووجوركرنا ئابوورا هه‌رێما كوردستانێ بگێريت.
سه‌رۆك وه‌زيرێن حوكمه‌تا هه‌رێما كوردستانێ گۆتژى: “حوكمه‌ت هزر ل وێ چه‌ندێ دكه‌ت كو هێشتا ئاسانكاريێ بۆ كه‌رتێ تايبه‌ت بكه‌ت و بۆ ڤێ مه‌به‌ستێ ژى بزاڤێ دكه‌ت كه‌رتێن خزمه‌تگۆزاريا گشتى ژى پێنگاڤ ب پێنگاڤ بده‌ته كه‌رتێ ده‌ست كه‌رتێ تايبه‌ت دا كو ده‌رفه‌ته‌كا دى يا مه‌زنتر د ڤى وارى دا بۆ كه‌رتێ تايبه‌ت هه‌بيت.
هه‌ر وه‌كو نێچيرڤان بارزانى گۆتى: “ئه‌ڤ سياسه‌ته د كاودانێن وه‌كو نوكه يێن ئابوورى دا، دێ بيته ئه‌گه‌رێ سڤككرنا بارێ حوكمه‌تا هه‌رێما كوردستانێ و دروستكرنا بزاڤه‌كا باشتر يا ئابوورى و بازرگانى ل هه‌رێما كوردستانێ”.
ئه‌ڤرۆ نيوز:
پەرلەمانتارەکا کورد ل پەرلەمانێ عیراقێ ئاماژە ب پێک ئینانا لیژنا پەرلەمانی بۆ ڤەگەڕاندنا مووچێ فەرمانبەرێن ھەرێما کوردستانێ دکەت و دبێژیت: لیژنە ب تنێ دێ پێشنیاران کەت نەک دێ مووچەی ڤەگەڕینیت، بەلێ ھەرێم بۆ ڤەگەڕاندنا مووچێ فەرمانبەرێن خوە یا دانوستاندنان ل گەل بەغدا دکەت.
نەدا مێرگەسۆری، پەرلەمانتارا کورد ل پەرلەمانێ عیراقێ بۆ رۆژناما ئەڤرۆ ئاشکرا کر، سەرۆکایەتیا پەرلەمانێ عیراقێ ب شێوەیەکێ فەرمی لیژنەیەک بۆ دووڤچوونا بڕینا مووچێ فەرمانبەرێن ھەرێما کوردستانێ ژ لایێ حوکمەتا بەغداڤە ڕاسپاردیە کو ڤەکۆلینێ ل دۆر ئەگەرێن بڕینا مووچێ فەرمانبەرێن ھەرێمێ بکەت و گۆت: “ئەڤ لیژنە ل گەل ھەردو حوکمەتێن ھەرێما کوردستانێ و عیراقا فیدڕال دێ خالێن لاواز دەستنیشان کەت، ھەتا بزانین بۆچی و چاوا مووچێ فەرمانبەران ھاتیە بڕین، دیسا ئەڤ لیژنە دێ پێشنیارێن خوە بۆ پەرلەمانی بلند کەت، بێگومان ئەڤا گونەھبار و دێ ئەڤان پێشنیاران بجە ئینیت حوکمەتا عیراقێ یە، چونکو ھەر وانا مووچە و بودجێ ھەرێما کوردستانێ بۆ دەمێ سالانە بڕیە”.
مێرگەسۆری ئاماژە ب وێ چەندێ ژی کر، پەرلەمانێ عیراقێ ب تنێ وەک لایەنەکێ چاڤدێر دێ ب ئەرکێ خوە یێ چاڤدێریێ ڕابیت و گۆت: “ئەڤ لیژنا پەرلەمانی نابیتە ئەگەرێ ڕزگارکرنا ھەرێما کوردستانێ ژڤان قەیرانێن نوکە تێدا دەرباز دبیت، لیژنێ دەستھەلاتێن ڤەگەڕاندنا مووچەی نینن، بەلێ حوکمەتا ھەرێمێ ھەموو بزاڤێن خوە بۆ ڤەگەراندنا مووچە و بودجێ ھەرێمێ کرینە، دیسا نوکە ل گەل حوکمەتا عیراقێ دانوستاندن یێ دھێنەکرن و ھەتا بگەھنە رێکەفتنێ بۆ چارەسەرکرنا ئەڤێ ئاریشێ و مووچێ فەرمانبەران بھێتە ڤەگەڕاندن”.
ئەڤرۆ نيوز:
رێڤەبەرێ کۆنترولا کارەبا ھەرێما کوردستانێ ھوشداریێ ل دۆر کێمبوونا بەرچاڤ یا دانا دەمژمێرێن کارەبا نشتیمانی د وەرزێ زڤستانێ دا ددەت و دبێژیت: رەنگە 10 بۆ 12 دەمژمێران بشێن کارەبێ بۆ وەلاتیان دابین بکەن، ژ بەر زێدەبوونا داخوازیێ ل سەر بکارئینانا کارەبێ د وەرزێ زڤستانێ دا و ژ کارکەفتنا 10 یەکێن بەرھەمئینانا کارەبێ.
ئومێد محەمەد، رێڤەبەرێ کۆنترولا کارەبا ھەرێما کوردستانێ ئاشکرا کر، نوکە وەلاتیان و حوکمەتێ ژی قەیران یا ھەی، لەو د وەرزێ زڤستانێ دا گڤاشتن پتر دێ ل سەر کارەبا نشتیمانی دێ دروست بیت، ژ بەر کو وەلاتی دێ بۆ خوە گەرمکرنێ بکارئینن و بۆ خەندان گۆت: “گرفتا دارایی ل سەر کارەبێ ژ ھەموویان پتر کارتێکرن ل سەر کێمبوونا کارەبێ کریە”.
خویا ژی کر، ئەو 10 یەکێن بەرھەمئینانا کارەبێ ژ بەر نەبوونا سوتەمەنیێ ھاتینە ڕاگرتن، ھەکە سوتەمەنی و پارە ھەبوون دێ کەڤنە کار، ھەکە ئەو 10 یەکە ژی بکەڤنە کار دێ رەوشا کارەبێ باش بیت و ئاسایی بیت.
ئەڤرۆ نیوز:
ئەندامەکێ پەرلەمانێ کوردستانێ ئاشکرا کر کو داھاتێ سنوورێ پارێزگەھا سلێمانیێ ناھێتە ھەولێرێ و دچیتە بانکێن سلێمانیێ و ئەو ب خوە ب کاردئینن، ژ بەر ڤێ چەندێ حوکمەت نوزانیت ئەو داھات ب چو شێوە دھێت و دچیت و بتنێ ئەو داھات ب ھژمارە دھێتە وەزارەتا دارایی و گۆت: “ھەموو وەزارەت و دامودەزگەە ب داھاتێ دھۆک و ھەولێرێ دھێنە برێڤەبرن و ئەو د پشکدار نینن د ئیدارا حوکمەتێ دا”.
د. فەرسەت سۆفی، ئەندامێ پەرلەمانێ کوردستانێ بۆ مالپەرێ فەرمی یێ پارتی دیموکراتی کوردستان ئاشکرا کر کو نابیت ل دەڤەرەکێ گەندەلی ھەبیت و دەڤەرەکا دی فریشەتە بیت، بەلێ یا دبیتە جھێ مەندەھوشیێ ئەوە لایەنەک پشتی ھەبوونا گەندەلیێ خوە ب فریشتە نیشان بدەت و ھەموو کارەکی بێختە ستوویێ لایەکێ دی و گۆت: “داھاتێ سنوورێ پارێزگەھا سلێمانیێ ناھێتە ھەولێرێ و دچیتە بانکێن سلێمانیێ و ئەو ب خوە ب کاردئینن و پارێ نەخت ل سلێمانیێ د مینیت و بتنێ ئەو داھات ب ھژمارە دھێتە وەزارەتا دارایی”.
ئەڤرۆ نيوز:
ھەموو سالان ل 10ی موحەرەمێ ل ھەرێما کوردستانێ و عیراقێ بھێنڤەدانا فەرمیە و حوکمەتا عیراقێ رۆژا چارشەمبی کریە بھێنڤەدانا فەرمی، وەزارەتا ئەوقاف و کاروبارێن ئایینی یا حوکمەتا ھەرێما کوردستانێ ژی رۆژا سێشەمبی ب 10 موحەرەمێ دزانیت.
مەریوان نەقشەبەندی، بەرپرسێ پەیوەندی و پێکڤەژیانێ ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ ئاشکرا کر کو ل دووڤ رۆژھژمێرا کۆچی 10ی موحەرەمێ دکەڤیتە رۆژا سێشەمبی یا ڤێ حەفتیێ دا، بەلێ حوکمەتا عیراقێ رۆژا چارشەمبی یا کریە 10 موحەرەمێ و بھێتڤەدانا فەرمی.
ناڤھاتی ل دۆر بھێنڤەدانا ھەرێما کوردستانێ دیار کر کو دڤێت ئەنجومەنێ وەزیران بڕیارێ بدەت، چونکی بڕیار یا د دەستێ وان دا و بۆ باسنیۆز گۆت: “مە ئەو ئاگەھدارکرینە کو رۆژا سێشەمبی یا ڤێ حەفتیێ 10ی موحەرەمێ یە و ئێڤاری یا ھەمان رۆژ دێ چالاکیێن ئایینی ھەبن”.
ئەڤرۆ نيوز:
ئەندامەکێ لژنا دارایی ل جڤاتا نوونەرێن عیراقێ ئاشکرا کر کو ل دەمێ سەرەدانا سەرۆک مەسعود بارزانی بۆ بەغدا رێککەفتنەکا دەستپێکی ھاتیەکرن دەربارەیی بۆدجێ و بڕیارە بەری پەسەندکرنا پرۆژە قانوونا بۆدجێ شاندەکێ حوکمەتا ھەرێمێ بچیتە بەغدا بۆ وێ چەندێ رێککەفتنێ ئەنجامبدەن.
سەرحان سلێڤانەیی، ئەندامێ لژنا دارایی ل جڤاتا نوونەرێن عیراقێ بۆ مالپەرێ فەرمی یێ پارتی دیمۆکراتی کوردستان ئاشکرا کر کو ل دەمێ سەرەدانا سەرۆک مەسعود بارزانی بۆ بەغدا رێککەفتنەکا دەستپێکی ھاتیەکرن دەربارەیی بۆدجێ و بۆ تمامکرن و ئیمزاکرنا رێککەفتنێ پێدڤیە شاندەکێ حوکمەتا ھەرێما کوردستانێ سەرەدانا بەغدا بکەت و گۆت: “پێدڤیە د ڤێ حەفتیێ دا شاندێ ھەرێمێ بچیتە بەغدا، چونکی ل 15ی ڤێ ھەیڤێ بڕیارە پرۆژە قانوونا بۆدجێ رەوانەیی جڤاتا نوونەران بھێتەکرن”.
ناڤھاتی ئاماژە دا وێ چەندێ کو ھەتا نوکە چو بڕیار نەھاتینەدان کو بەغدا رێژەکا پارەی رەوانەیی ھەرێمێ بکەت و گۆت: “چاڤەرێ دھێتەکرن ھەکە تشتەک ھەبیت پشتی ئەنجامدانا رێککەفتنێ بھێتەکرن”.
ئه‌ڤرۆ نیوز; ڤەدەر رەشاڤایی:
ستێرا سترانێن پۆپێ سترانبێژا ئەمریکا یا ناڤدار دێمی لۆڤاتۆیێ، سەرەدانا ھەرێما کوردستانێ کر، بێی میدیا کوردی رۆمالا ھاتنا وێ بکەت، لێ پێشبینی دھێتە کرن ناڤھاتیێ ھوسا خواست بیت.
دێمی لۆڤاتۆ ل سەر ئەکاونتا خوە ل تۆرا جڤاکی یا تویتەری کو پتری سیھـ و ھەشت ملیۆن فۆلۆوەر ھەنە بەلاڤ کر: نھا ئەز د فرۆکەیەکی دا مە و کوردستانا ئیراقێ بجھدھێلم، من سەربۆرەکا گەلەگ باش ل وێرێ بدەستڤەئینا، بھڤییا وێ یەکێ وان سەربۆران بۆ وە باس بکەم”
لۆڤاتۆیێ سەرباری سترانگۆتنێ پشکدارییەکا سەرەکی د پرۆگرامەکێ ساخلەمییا دەرۆنی دا ھەیە ب مەرەما پێشخستنا ساخلەمییا دەرۆنی ل جیھانێ
ئه‌ڤرۆ نيوز:
ئه‌ميندارێ گشتيێ ئێكگرتوو ئيسلامى كوردستان راگه‌هاند كو به‌رنامه هاتيه دانان كو ب كێمترين زيان و زووترين ده‌م پرسيا رزگاركرنا باژێرێ مووسل بهێته ئه‌نجام دان.
سه‌لاحه‌دين بهائه‌دين ئه‌ميندارێ گشتيێ ئێكگرتوو ئيسلامى كوردستان د هه‌ڤپه‌يڤينه‌كێ دا بۆ ئاژانسا ئه‌نادۆلا توركيا به‌حس ل شه‌رێ رزگاركرنا مووسل دكه‌ت و رادگه‌هينيت كو هه‌بوونا پشكداريكرنا توركيا د شه‌رێ مووسل دا بابه‌ته‌كێ سياسى يه و ژ لايێ قانوونى ژى ڤه پێدڤى ره‌زامه‌نديا حوكمه‌تا عيراقێ يه، به‌لێ د روويێ ژيوارى دا توركيا پشكداريا خوه وه‌كو پێدڤى دزانيت.
ئه‌ميندارێ گشتيێ ئێكگرتوو ئيسلامى كوردستان نه‌ڤه‌شارت ژى كو بڕيار هاتيه دان كو پێشمه‌رگه و حه‌شه‌د شه‌عبى نه‌چنه ناڤ سه‌نته‌رێ باژێرێ مووسل و ل ژ ده‌رڤه‌ى باژێرى بمينن و حه‌شه‌د وه‌ته‌نى و له‌شكرێ عيراقێ ژى بچنه د ناڤ باژێرى دا.
هه‌ر ديسا به‌حس ل وێ چه‌ندێ ژى دكه‌ت كو به‌رنامه‌ك هاتيه دانان كو گه‌له‌ك ب دژوارى باژێر بهێته بۆردۆمانكرن ب مه‌ره‌ما وێ چه‌ندێ كو چو چه‌كدارێن داعش نه‌ميننه د ناڤ باژێرى دا و پێدڤيه رێيه‌ك ژى ل هه‌مبه‌ر بهێته ڤه‌كرن كو هه‌كه هات و وان ڤيا ب ره‌ڤنه سوريا.
ئه‌ڤرۆ نيوز:
ژ ئه‌نجامێ نێزيكبوونا ره‌شه‌بايێ مه‌سيۆ “Matthew” باراك ئۆباما بارێ نه‌ئاسايى ل ويلايه‌تا فلۆريدا راگه‌هاند.
هه‌تا نوكه نێزيكى 320 كه‌سان ژ ئه‌گه‌رێ ره‌شه‌بايێ مه‌سيۆ ل ويلايه‌تا هايتى گيانێ خوه ژ ده‌ست دايه و ب له‌زاتيا 220 كيلۆمه‌تران د ده‌مژمێره‌كێ دا به‌ر ب باشوورێ ئه‌مريكا و كه‌نارێن رۆژهه‌لاتێ ويلايه‌تا فلۆريدا دچيت.
سه‌رۆكێ ويلايه‌تێن ئێكگرتى يێن ئه‌مريكا باراك ئۆباما ئاشكه‌را كر كو بۆ ڤه‌گوهاستنا هاريكارى و ئاماده‌يى و به‌رسينگگرتنا ره‌شه‌باى، بارێ نه‌ئاسايى ل ويلايه‌تا فلۆريدا راگه‌هاند.
ب گۆره‌ى نووچه‌كێ cnn ره‌شه‌بايێ مه‌سيۆ د ماوێ زێده‌تر ژ سه‌ده‌كى يه، خويناويترين ره‌شه‌بايه، ل كه‌نارێن رۆژهه‌لاتێ فلۆريدا دده‌ت.
ژ لايێ خوه ڤه ئاژانسا رۆيترز ژى راگه‌هاند كو ب بڕيارا ب زوورى ڤه‌گوهاستنا دومليۆن كه‌سان ل وان ده‌ڤه‌رێن ئه‌مريكا هاتيه دان يێن دكه‌ڤنه سه‌ر رێيا ره‌شه‌بايێ مه‌سيۆ.
نيشاندان