ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 27ى ئادارا 2017ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1260 |
| 1 يۆرۆيێ ئه‌ورۆپى | 1360 |
| 1 ليرێ توركى | 345 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئەڤرۆ نيوز:
بەنکا رافیدەین بڕیار دا قەرێ 75 ملیۆن دیناری بدەتە نۆشدارێن عیراقێ و مەرجێن وێ ژی دیارکرن.
قەر دناڤبەرا 25 تا 75 ملیۆن دیناران دا بیت و بۆ نۆشدارێن گشتی و ددان و ڤێتێرنەری و دەرمانسازان دێ ھێتەدان.
بەنکا رافیدەین د بەیاننامەیێ دا مەرج و چاوانیا وەرگرتنا قەری دیارکریە کو تێدا ھاتیە: 25 ملیۆن دینار ب پشتراستیا فەرمانبەری و ھەبوونا کلینیکێ یان دەرمانخانە و دابینکرنا کەفیلەکی دھێتەدان ئەگەر فەرمانبەر نەبوو سەنەدەکا خانوویەکی وەکو بارمتە دھێتەدان.
ژ 25 تا 45 ملیۆن دیناران ب پشت راستیا فەرمانبەری و ھەبونا کلینیکێ یان دەرمانخانە و دابینکرنا دوو کەفیلان دھێتەدان، ھەکە فەرمانبەر نەبو دشێن سەنەدەکا خانوویەی وەک بارمتە دابنیت.
ژ 40 تا 75 ملیۆن دیناران ب دانانا سەنەدەکا خانوویەکی کو بھایێ وی ژ 90 ملیۆن دیناران کێمتر نەبیت، پێدڤیە داخازکار ئەندامێ سەندیکا نوژداران و دەرمانسازان بیت، پێدڤیە داخازکار گرێبەستا کلینیکێ یان دەرمانخانیێ ل گەل خو بینیت، دەمێ دانا قەری پێنج سالن، پێدانا وی قەری ھەموو فەرمانبەرێن عیراقێ و پارێزگەھا کەرکووکێ بخوەڤە دگریت.
ئەڤرۆ نيوز:
شیرەتکارەکێ جڤاتا وەزیرێن ھەرێما کوردستانێ راگەھاند، کو دەستکاریکرن د پاشکەفتێ مووچێ فەرمانبەران دا دێ ھێتە کرن، لێ نە دەم و نە ژی رێژا دەستکاریکرنێ د دیار نینن.
بەحسێ وێ چەندێ دھاتە کرن کو د ھەیڤا چار یا ئەڤ سالە دا دەستکاریکرن دێ د پاشکەفتکرنا مووچێ فەرمانبەران دا ھێتە کرن، لێ دارا خەیلانی دیار کر کو ھەتا نوکە دەم و رێژا دەستکاریکرنێ نەھاتینە دیارکرن و وەزارەتا دارایی بۆ ڤێ مەرەمێ یا ھاتیە سەرپشککرن دا ب ھاریکاریا وەزارەتا پلاندانانێ کار سەر ڤێ چەندێ بکەن و بۆ رووداو گۆت:(چەند سیناریۆیەک بۆ دەستکاریکرنێ د پاشکەفتکرنا مووچەی دا یێن ھەین، لێ باشترە پشتی تمام بوونا سیستەمێ بایۆمەتری دەستکاری بھێتە کرن، چونکو ل وی دەمی ھەموو زانیاری ب ھووری ل سەر ھژمارا مووچەخوران دێ ل بەر دەست بن).
ئەڤرۆ نیوز:
ھەڤسەرۆکێ بەرێ یێ باژێرڤانیا مەزنا مێردینێ راگەھاند کو حوکمەتا ئاکپارتی یاریان ب پاشەرۆژا تورکیا دکەت و ل ژێر ناڤێ ریفراندۆما بۆ بجیە کرنا سیستەمێ سەرۆکاتیێ تورکیا بەر ب ژ ناڤچوونێ ڤە دبەت و دڤێت حوکمەت ژ شاشیا خوە ڤەگەریت و ژ بۆ چارەکرنا پرسا کوردی ژی دڤێت جارەکا دی ڤەگەریتە سەر مێزا دانوستاندنان.
ئەحمەد تورک ھەڤسەرۆکێ بەرێ یێ باژێرڤانیا مەزنا مێردینێ د داخۆیانیەکی دا بۆ دەزگەھێن راگەھاندنێ دیار کر کو نەورۆزا سالا ٢٠١٧ ل باکورێ کوردستانێ بەرسڤەکا گەلەک رون و ئاشکرا بوو کو گەلێ کوردستانێ دێ بەرخوەدانا خوە ل ھەمبەر زۆلم و زۆرداریا دەستھەلاتدارێن تورکیا بلندتر کەت و گۆت: (حوکمەتا ئاکپارتی و سەرۆک کۆمارێ تورکیا بۆ سەرخستنا ریفراندۆمێ تورکیا دھاڤێژنە ناڤ ئاگری و ھەر ئاخاڤتن و کریارەکا وان رەوشا وەلات ئالۆزتر دکەت و دڤێت دەست ژ سیاسەتێن خوە یێن کرێت بەردەن و ڤەگەرنە سەر مێزا دانوستاندنان و پرسگرێکا کوردی و پرسگرێکێن دی یێن تورکیا ب دیالۆگێ چارە بکەن، ھەکە وەسا نەبیت تورکیا رۆژ ب رۆژێ بەر ب پارچەبوونێ و شەرێ ناڤخوەیی ڤە دچیت و ئەو یەک رێ بۆ کارەساتەکا مەزن ڤەدکەت).
سەبارەت ب گرتنا سیاسەتمەدار، سەرۆکێن باژێرڤانیێن کوردان و پەرلەمانتارێن ھەدەپێ ژی ئەحمەد تورک راگەھاند کو دیرۆکا تێکۆشینا گەلێ کوردستانێ بۆ ھەموو کەسەکێ سەلماندیە کو گەلێ کورد و شۆرەشگێرێن کورد ب سیاسەتێن زۆرداری و کوشتن و گرتنان ناھێنە تەسلیم گرتن و گۆت: (گەلێ کورد ب دۆزا خوە را گرێداییە و نەورۆزا ئەڤسالە ژی دا خوەیا کرن کو گەلێ کورد ئێدی ژ بلی ئازادی، ژیانەکا ب رومەت و وەکھەڤ چو تشتەکی دی قەبوول ناکەت و داخواز ژ سەرۆک کۆمار و بەرپرسێن دی یێن تورکیا دکەم کو تورکیا نەکەنە گۆلا خوونێ و گەلێن تورکیا نەکەنە قوربانا سیاسەتێن خوە یێن شاش و پارچەکری).
ئەحمەد تورک ھەروەسا راگەھاند ژی دڤێت دۆرپێچا ل سەر رێبەرێ پەکەکێ عەبدولا ئۆجەلانی بھێتە راکرن و پەرلەمانتار و سیاسەتمەدارێن کورد بھێنە ئازادکرن و گۆت: (ئەڤە ٤٠ سالن ژ بلی ئاشتیێ و دیالۆگێ ھەموو رێ ل تورکیا ھاتنە جەرباندن و د ئەنجام دا دەرکەڤتیە ھۆلێ کو ب شەری و کوشتنان پرسگرێکا کوردی چارە نابیت و دڤێت ئەقلێ راست یێ چارەسەریێ بکەڤیتە پێش ئەقلێ تێکدەر و قۆناغا ئاشتیێ جارەکا دی بھێتە دەستپێکرن و دۆرپێچا ل سەر ئۆجەلانی بھێتە راکرن و سیاسەتمەدارێن کورد بھێنە ئازاد کرن ھەکە پێنگاڤەکا وەسا ل تورکیا بھێتە ئاڤێتن دێ رێ بۆ چارەکرنا پرسگرێکا کوردی ڤەبیت).
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا دوشەمبی رێکەفتی 28ی ئادارا 2017ێ ئه‌سمان دێ ئه‌وره‌كێ باراناوى بيت و ل پتريا ده‌ڤه‌ران باران دێ باريت.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو ژ ئەنجامێ فشارێن نزمێن ده‌ريا سۆر و هاتنا فشارێن بلندێن وه‌لاتێ توركيا دھێتە پێشبینیکرن ئه‌سمان ئه‌وره‌كێ باراناوى بيت و ل پتريا ده‌ڤه‌ران باران دێ باريت
پشکا پێشبینیان دایە زایە زانین کو دێ ئاراستێ بای ژی دێ باکوورێ رۆژھەلات بیت ب رەنگەکی د ناڤبەرا 10 بۆ 20کم دا و ماوێ دیتنێ ژی دێ د ناڤبه‌را 7 بۆ 9 دا بیت، پلێن گەرمێ ژی دێ د ناڤبەرا 9 بۆ 17 پلان دا بن.
ئەڤرۆ نيوز:
سەرۆکێ فڕاکسیۆنا پارتی دیموکراتی کوردستان ل پەرلەمانێ عیراقێ راگەھاند، د کومبوونا سەرۆک وەزیرێن عیراقێ دا وەک پارتی دێ پشکدار بین، و ژمارەکا بابەتێن گرنگ دێ بەحس کەین.
د. عەرەفات کەرم بۆ مالپەرێ پارتی دیموکراتی کوردستان راگەھاند، بڕیارە سەرۆک وەزیرێن عیراقێ حەیدەر عەبادی ل گەل سەرۆک فڕکاسیۆنێن پەرلەمانێ عیراقێ کومبیت، وەک فڕاکسیۆنا پارتی ئەم دێ پشکدار بین و ژمارەکا بابەت و تەوارن دێ گەنەگشە کەین کو ب باوەریا مە دگرنرگن بھێنە بەحسکرن.
سەرۆکێ فڕکاسیۆنا پارتی ئەو چەندە ژی نەڤەشارت و گۆت: ھەر چار فرَاکسیۆنێن کوردان داخواز ژ فڕاکسیۆنا پارتی کریە پشکداری وێ کومبوونێ نەبیت، بەلێ مە بریار دایە پشکداری وێ کومبوونی ببین، چونکی ئەوان بەری نوکە چەندین کار بێی رازیبون و پشکداریا مە ئەنجام داینە، بیێ کو دانوستاندنێ ژی ل گەل مە بکەن، لەورا دێ پشکدار بین و دێ مە ئاخفتنا خوە ژی ھەبیت.
ھەژی گۆتنێ یە، ل گۆڕ دیتنا چاڤدێرەکێ سیاسی ل پەرلەمانێ عیراقێ، پشکداری نەکرنا ھەر چار فڕاکسیۆنێن دیتر دکومبوونا سەرۆک وەزیرێن عیراقێ حەیدەر عەبادی دا، ب فەرمانا نوری مالکی و کارتێکرنا وی بوویە، کو ھەتا نوکە ژی دژاتیا حوکمەتا عەبادی دکەت، دڤێت ئەو حکومەت بھێتە ھەلوەشاندن یان ژی شکەستنێ بخوت.
ئەڤرۆ نيوز:
ب سەدەھان سالە کورد ژبۆ سەربخوەیا کوردستانێ بەرەڤانیێ ژ خوە دکەن، بەلێ ھێشتا ئارمانجا سەربخوەیێ نە ھاتیە بەری، زلھێزێن جیھانی ب ئەلتەرناتیڤان دگەرن و بزاڤا بۆ گوھوڕینا نەخشێ رۆژھەلاتا ناڤەراست دکەن، چونکی ھەد وەلاتێن سوریا و عیراقێ نە دەستھەلات و نە سەروەری نەماینە، ب شێوەکێ پراکیتیکی ژی یێن ھاتینە پارچە پارچەکرن، ب ئەگەرێ دەستھەلاتێن دکتاتوری و مەزھەبی ل عیراقێ پرۆژێ ئێکگرتنێ ل عیراقێ شکەستن خواریە، چ دکتاتوریا سونی بیت ( 1921ـ 2003) یان ژی دکتاتوریا مەزھەبی یا شیعی بیت (2003 ـ 2017)، ئەڤە بەلگەیێ وێ راستیێ یە کو ئێدی ل عیراقێ کورد و شیعە و سونە دناڤا مالەکێ و ئاخەکێ دا کومنابن و پێکڤە ناژین.
ل گۆڕ دەنگۆباسەکێ مالپەرێ (ێوت کوردستان) ویلایەتێن ئێکگرتیا ئەمریکی نەخشێ دەولەتا کوردستانێ ل سوریا و عیراقێ بەرھەڤ دکەت، و بڕیارە پشتی نەمانا شەرێ داعشێ ل دەڤەرێ ھەلوەشاندنا کۆمارا سوریا یا بەعسی ب دووماھی بھێت.
ھەر ل گۆڕ مالپەرێ ناڤبری ویلایەتێن ئێکگرتیا ئەمریکی داخوازێ ژ کوردان دکەت، ئێکگرتنێ بکەن و خودان ھەمان ئارمانجا دروستکرنا دەولەتا کوردستانێ ل عیراقێ وسوریا بن، وی دەمی ئەمریکا ژی دێ پشتەڤانیا ھێزێن کوردی بۆ راگەھاندنا دەولەتا کوردستانێ کەت.
ل گۆڕ پێزانینان بڕیارە ل ھەاڤینا بھێت کو بتەمامی (عیراق و سوریا) ژ چەکدارێن تیرۆرستێن داعشێ بھێنە پاقژکرن، و دووماھی ب نەخشێ کەڤنێ ھەر دو وەلاتان بھێت.
ئەڤرۆ نیوز:
پشتی بوردۆمانکرنا ھژمارەکا زۆرا وەلاتیێن سڤیل ل باژێڕێ مووسل و کوشتنا ژن و زارۆیان کارڤەدانێن جودا لدووف خوە ئینان و بەرپرسەکێ پارێزگەھا نەینەوا ژی دبێژیت، ب ئەگەرێ توپبارانکرن و شەڕۆ پێکدانێن بەرێ راستێ یێ مووسل ھەتا نوکە ھژمارەکا زۆرا وەلاتیێن سڤیل بووینە قوربانی، ئەمریکا ژی د بەیاننامەیەکێ دا ئاماژە بوێ چەندێ کر، کو دەست ب ڤەکۆلینێ ھاتیەکرن لدۆر چێبوونا روویدانێ.
غەزوان حامد، سەرۆکێ لیژنا مافێ مرۆڤی ل ئەنجوومەنێ پارێزگەھا نەینەوا بۆ رۆژناما ئەڤرۆ گۆت” پشتی دەستپێکرنا ئۆپەڕاسیۆنا گرتنا باژێڕێ مووسل رۆژانە ھژمارەک وەلاتیێن سڤیل دبنە قوربانی، بتایبەتی لڤان رۆژێن بۆری ھژمارا قوربانیان بلندبوویە و گەھشتیە ئاستەکێ مەترسیدار، ژبەرکو بەرێ راستێ یێ باژێڕێ ھژمارەکا زۆرا وەلاتیان تێدا ماینە و وەکی بەرێ چەپێ نەبو کو وەلاتی ئاوارە ببن، تنێ ل تاخێ مووسل جەدید یێ لایێ راستێ ب ئەگەرێ بوردۆمانا فڕۆکەیێن ھەڤپەیمانان ب ئێکجار پتری 200 وەلاتی ھاتینە کوشتن، کو پتریا وان ژی ژن و زارۆک بووینە، ئەگەرێ چێبوونا روویدانێ ژی بۆ وێ چەندێ ڤەدگەڕیت، کولانێن بەرێ راستێ زۆر بچووکن و چەکدارێن داعش خوە دناڤ خەلکێ سڤیلدا ڤەشارتیە، راستە تنێ ھەڤپەیمان چەکدارێن داعش و پێگەھێن وان دکەنە ئارمانج، بەلێ دەمێ ھەڤپەیمان چاڤدێریا رەوشێ دکەن تنێ داعش و تڕۆمبێلێن بۆمبەکری دھێنە دیتن لەوڕا تێنە بوردۆمانکرن و دوماھیێ دەرکەڤیت ئەف داعش دناف وەلاتیاندانە، وەکی ئەڤێ روویدانا ل مووسل جەدیدە چێبووی ب مخابنی ڤە بۆ گیان ژدەستدانا ئەڤێ ھژمارا وەلاتیێن بێ گونەھێن سڤیل.
غەزوان حامد گۆتژی: خەلکەکێ زۆر نوکە یێ دنا خانیێن خوەدا مای لەشکرێ عێراقێ ژی بزاڤان دکەت، تانک و تڕۆمبێلێن خوە یێن سەربازی بگەھینن ناڤا جادەیێن تەنگێن باژێڕی، رۆژانە ل مووسل ھژمارەکا بەرچاڤ یا سڤیلان و سەربازێن لەشکرێ عێراقێ دبنە قوربانی شەڕێ تیرۆرستان و بەرێ راستێ وەک بەرێ چەپێ یێ باژێڕی نینە شەڕەکێ گران یێ دھێتەکرن و تیرۆرستێن داعش بەڕەڤانیێ ل خوە دکەن، دەمەکێ زۆرە لایێ راستێ یێ باژێڕی ددەستێ تیرۆرستێن داعشدایە و جھێن خوە چێکرینە بۆ شەڕکرنێ، بەلێ سەرەرای دژواریا شەڕی ئەم پێشبینی دکەین ھەتا ھەیڤەکادی بەرێ راستێ یێ مووسلژی بھێتە کۆنتڕۆلکرن و گرتنا مووسل بدوماھی بھێت، دگەل رێڤەچوونا شەڕی دام و دەزگەھێن حوکمەتێ بەردەوام ھاریکاریان دگەھینن ئەڤان وەلاتیێن تێنە ئازادکرن.
ژلایێ خۆڤەژی فەرماندێ ھێزێن ناڤەندیێن ئەمریکا ل عێراقێ دداخویانیەکێ دا تەکەستکر” کو فەرماندەیا ھێزێن ئەمریکا یا کاردکەت ژبۆی د ئەنجامێ ھێرشان چو وەلاتیەکێ سڤیل نەبیتە قوربانی، بەلێ تیرۆرستێن داعش بشێوەیەکێ وەحشیانە وەلاتیێن سڤیل بۆ پاراستنا خوە کرینە قەلغان و بزۆر وەلاتیان ژمالێن وانا دەرتێخن و دکەنە بنگەھێن خوە یێن سەربازی، ڤەکۆلین لدۆر روویدانێن رۆژێن بۆری ل مووسل ھاتینە دەستپێکرن و ئەم ناخوازین روویدانێن وەسا دوبارە ببن.
ئه‌ڤرۆ نيوز:
حوكمه‌تا هه‌رێما كوردستانێ دێ دو رۆژان ژ هه‌يڤا نيسانا بهێت كه‌ته بهێنڤه‌دانا فه‌رمى ل هه‌موو داموده‌زگه‌هێن حوكمه‌تێ، رۆژه‌ك ب هه‌لكه‌فتا ژناڤچوونا رژێما به‌عس و پرۆسا ئازاديێ يه و يا دژى جه‌ژنا ئێزديانه.
ژێده‌ره‌كى ژ جڤاتا وه‌زيرێن هه‌رێما كوردستانێ راگه‌هاند كو هه‌يڤا نيسانا 2017ێ دێ دو رۆژ ل داموده‌زگه‌هێن حوكمه‌تێ بهێنڤه‌دانێن فه‌رمى بن.
ئاشكه‌را ژى كر كو رۆژا 9ى نيسانا 2017ێ ب هه‌لكه‌فتا ژناڤچوونا رژێما به‌عس ل عيراقێ و هه‌رێما كوردستانێ دێ بهێنڤه‌دانا فه‌رمى بيت.
ئه‌ڤى ژێده‌رێ نه‌خواستى ناڤێ وى بهێته ئاشكه‌را كرن دا زانين ژى كو 19ى نيسانا 2017ێ ژى ب گۆره‌ى بڕيارا په‌رله‌مانێ كوردستانێ و ب هه‌لكه‌فتا جه‌ژنا چارشه‌مبوويا سۆر جه‌ژنا ئێزديان بهێنڤه‌دانا فه‌رمى يه.
نيشاندان
