ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 26ى ئادارا 2017ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1257 |
| 1 يۆرۆيێ ئه‌ورۆپى | 1350 |
| 1 ليرێ توركى | 345 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
دەمێ تو و ھەڤژینێ خوە قەستا نڤستنێ دکەن، داخوازێ ژێ بکە تە ھەمبێز بکەت، ژبەرکو ئەو چەندە دێ شەش مفا گەھینیتە ھەوە ئەو ژی:
1- فشارا بند و فشارا دەروونی سڤک دکەت: ھەکە ھەڤژینێ تە ل دەمێ نڤستنێ تو ھەمبێز کری، ھورمۆنێ دلخۆشیێ یێ ب ناڤێ ئوکسیتوسین زێدەتر دھێتە بەردان، ئەو ژی ب رۆلێ خوە مەترسیا تووشبوونا ب نەخۆشیێن دلی کێمتر لێ دکەت و فشارا دەروونی سڤک دکەت. ئەو چەندە ژی ئێشانا سەری و نەخۆشیێن دی سڤک دکەت.
2- نڤستنەکا باشتر، دەمێ ھەڤژینێ تە ل دەمێ نڤستنێ تە ھەمبێز دکەت دێ یا ھاریکار بیت خەوەکا خۆشتر و باشتر بکەن. ڤەکۆلینێن نوو ئاشکرا دکەن کو ھەمبێزکرن کورتیزۆلی کێم دکەت یێ ھاریکار بۆ کێمکرنا فشارا دەروونی، دەمێ کورتیزۆل کێم دبیت نڤستن خۆش دبیت.
3- دبیت ھەمبێزکرنا ھەڤژینی ببیتە خۆشی دەمێ بابەت دبیتە یاری و ترانە: ھەڤژینێ تە دێ خۆشیێ ژ دەستکرنا پیستێ تە بینیت، یا بەرھەڤ بە دەمێ دگەھنە ئێک دا باوەریێ و ھەستا ھەڤپشکیێ ئاڤا بکەی.
4- ھەڤگەھشتنەکا جوان: ھەمبێزکرن رێیەکا بۆ ھەڤگەھشتنێ بێ ئاخفتن، ئەو ھەڤگەھشتنەکا باشە بۆ ھەڤژینان.
5- نە بۆ ب ھەروە چوونا دەمی: ڤەگەرە سەر تەختێ خوە و بزانە تەخت یێ ھەمبێزکرنێ یە، تەلەفۆن و تێلەڤزیۆن و پرتووکان بھێلە و بکەڤە خۆشیا ھەمبێزکرنێ، ئەو دێ ھزرێن تە بەرفرەە کەت.
6- ھەمبێزکرن ھەستا رازیبوونێ چێدکەت: دەمێ ھوون ھەڤدو ھەمبێز دکەن بێی نیازا سیکسی ل نک ھەوە ھەبیت، دێ ھەست ب رازیبوونێ کەن.
ڤەکۆلین ئاشکرا دکەن، ئەو ھەڤژینێن ھەڤدو ھەمبێز دکەن ژ یێن دی پتر ژ خوە درازینە.
ئه‌ڤرۆ نيوز:
جۆدابوون ئێکە ژ وان دیاردێن کو ھێرشەکا تۆند ل سەر خێزانێ دروست دکەت، ھەروەسا تاکە ھۆکارە کو ژیانا ھەڤژین و زارۆیان بەر ب رۆخاندنێ و ژێکجۆدا بوونێ ڤە دبەت.
بیر و بۆچوونا ھندەک ژ بسپۆرێن دەروونناسی ھۆکارێن ھندەک ژ ژێکجۆدا بوونا ڤەدگەرینن بۆ ڤان چەند دیاردان، ھندەکێن دی ژی بیر و بۆچوونێن جۆدا ل سەر ژێکجۆدا بوونا ژن و مێران ھەنە.
1.نڤستن ل سەر جھێ جۆدا: نڤستنا ھەڤژینی ل سەر جھەکێ دیتر و جۆدا ژ جھێ ھەڤژینا خوە، ئێکە ژ وان ھۆکارێن کو گۆمانێ دروست دکەت، ل دەف کەسێ بەرامبەر ژبەرکو ئەڤ چەندە پەیوەندیان بەر ب لاوازیێ و ساربوونێ ڤە دبەت.
2.پاشخستنا پرۆسا زارۆبوونێ: گەلەک جاران ئێک ژ ھەڤژینان رەت دکەت کو زارۆ ب بیت، ئەڤە ژی ڤەدگەریت بۆ ترسا بەرپرسیارەتیێ و پابەندبوونێ، ھەروەسا پاشخستنا زارۆیان ئێکە ژ وان ھۆکارێن کو جۆدا بوونا ھەڤژینان ب ساناھی دکەت.
3.ڤەگۆھاستنا کاری: گوھۆرینا کاری و ڤەگوھاستنا وی بۆ باژێرەکێ دیتر ئێکە ژ وان ھۆکارێن ژێک دوورکەفتنا ھەڤژینان ژ ئێکدۆ و دروستبوونا مەترسیێ ل سەر پەیوەندیێن وان.
ئه‌ڤرۆ نيوز:
ژنەکەکا 24 سالی دلێ خوە بۆ ئەڤرۆ ڤەدکەت و دبێژیت: ب حەزژێکرن مە خێزان پێک ئینایە و ئەز قونتابیا دوازدێ ئامادەیی مە، لێ دەرەکی دخوینم ، مە دو زارۆ ھەنە و ھەڤژینێ من 34 سالە و میلازمە و یێ ژ من رازیە، لێ ئاریشا من ئەوە ئەڤە 8 سالە ئەم ل گەل خەسوویا من دژین و خەسوویا من ناھێلیت ئەم جودا ببین، ئەز گەلەک تورە دبم و ئەگەر ژی خەسوویا منە، چونکی گەلەک یا نەخوشە و ئاخفتنێن کێم دبێژیتە من ئەز ژی نەشێم چ بێژمێ لەورا داکو کەرب و کینا من دەرکەڤیت ئەز زارۆێین خوە ب توندی دقوتم، ھەرچەندە دلێ من دمینیتە ب زارۆیێن منڤە ژبەرکو وان چ گونەھا خوە نینە، لێ نزا چ بکەم ئەز ھەموو دەما دکەمە گری ل پێش چاڤێن زارۆیێن خوە ئەو ژی ژبەر من تێک دچن و خەمگین دبن، مە چ ئاریشەیێن مەزن نینن لێ خەسوویا من تشتێن بچووک مەزن دکەت و زەلامێ من دزانیت دایکا وی یا ھوسایە بەس دایکە نەشێت چ بێژیتێ ئەڤجا ھیڤیە ھوون بێژنە من ئەز چ بکەم دا کو خەسوویا من ل گەل من باش ببیت،چونکی براستی من تەحەمول نەمایە و دلێ من یێ ب زارویێن منڤە چارەیەکێ بو من ئەز دین بوم؟.
خوشکا ھێژا:
وەک دیار تە ل ژیەکی بچووک شوو کریە و تە ئەزمونەک باش د ژیانێ دا نە دیتیە، تشتێ باش تو ژنەکا ب تموحی و تە دڤیت پێش بکەڤی ژبەرھندی تو خواندنا دەرەکی دخوینی, بەس خواندنا مرۆڤی دڤێت رەفتارێن مرۆڤی ژی بگۆھوریت. ھەڤرکی دناڤبەرا بووکێ و خەسوویێ تشتەکێ سروشتی یە و کێم بووک و خەسوو پێک دکەن، ئەگەر ژی ژیێ ھەوە ژێک جودایە وحەزێن ھەوە ژێک جودانە, لێ مادەم تو حەز زەلامێ خوە دکەی بلا ئەڤ چەندە ببیتە ئەگەر تو حەز ژ خەسوویا خوە ژی بکەی, حەزژێکرن و نەڤیان ژ ھەوە ھەروکایە، ژبەرکو ھەکە تە ب دروستی حەزژێکر ئەو ژی دێ حەز ژ تە کەت و ھەول نەدە ل بەرامبەر ئێکدو راوەستن یان خەلەتیان ل سەر ئێکدو بگرن, ھەکە تو حەز ژ خەسویا خوە بکەی ئەو ژی دێ چاڤێ خوە دەتە زارۆیێن تە، ئەڤ رەفتارا تو ل گەل زارۆیێن خوە دکەی یا خەلەتە چونکی زاروکێن تە چ گونەھا خوە نینە و دێ زارۆیێن تە کەرب ژ تە ڤەبن ھەروەسا توژی ھەست بگونەھێ دکەی تو زارۆیێن خوە دقوتی ,ژبیر نەکە چەند سالەکن و ھوون دێ ژێک جودا بن,تو دێ ھەر قەستا وێ خەسوویێ کەی,ڤێجا جھێ پێ خوە بھێلە، ژبەرکو دەمێ ئەو وەخت دھێت دا تو ب سەر فەرازی بچیە دەف وان، لەوا تو ھەولبدە رەفتارێن خوە بگوھورە دێ بینی رەفتارێن خەسوویا تە ژی دێ ھێنە گوھورین، یانژی داخوازێ ژ زەلامێ خوە بکە تە جودا کەت زەلامێ خوە ئاگەھدار بکە.
بەرسڤدان، ڤەکولەرێ جڤاکی: عەبدولجەبار عەبدولرەحمان
ئه‌ڤرۆ نيوز:
مەبەست ژ بجھئینانا بریارێن دادوەری ئەوە زڤراندنا مافان بۆ ژێدەرێ وان، ئەڤ چەندە دروست نابیت ھەکە بریاڕا دادوەری نەھێتە بجھئینان ژلایێ دەزگەھێ بجھئینانا بریاڕان ڤە ل دادگەھێ و دبیتە ئێک ژ ئاریشێن گرنگ د رێیا بجھئینانا قانوونێ دا، ماموستایەکێ زانکویێ دبێژیت: بجە نەئینانا بریاڕێن دادوەری ژلایێ دەزگەھێ بجھئینانا بریاڕان ڤە دبیتە ئەگەرێ ژ دەستدانا کەسێن مفادار ژ مافێن خوە و دبیتە خەلاتکرنەک بۆ کەسێ بریاڕ ل سەر دەرچووی، ئەڤ چەندە ژی دبیتە جھێ نەباوەریێ و نە رێزگرتنا خەلکەکی بۆ سەروەریا قانوونێ.
د. فارس عەلی جانگیر مامۆستایێ زانکۆیا نەورۆز بۆ ئەڤرۆ دبێژیت: (بجە نەئینانا بریاڕێن دادوەری ژلایێ دەزگەھێ بجھئینانا بریاڕان دبیتە جھێ بێ باوەریێ و راوستاندنا قانوونێ و ژ دەستدانا کەسێن مفادار ژ مافێن خوە و دبیتە وەک خەلاتکرنەک بۆ کەسێ بریاڕ ل سەر دەرچووی، ئەڤ چەندە ژی دبیتە جھێ نەباوەریێ و نە رێزگرتنا خەلکەکی بۆ سەروەریا قانوونێ).
د. فارس گۆتژی: (ھەکە بریاڕێن دادوەری نەھێنە بجھئینان دێ بیتە ئەگەرێ پەیداکرنا مەترسیێ ل سەر پاشەرۆژا دەوڵەتێ و بەڵاڤبوونا گەندەڵیێ د دام و دەزگەھێن حکۆمەتێ دا، ئەڤجا دادگەە چەند یا رژد بیت بۆ دەرئێخستنا بریاڕان دڤێت دەزگەھێ کارێ ب جھئینانا بریاڕان ژی یێ رژدبیت، چونکی ھەکە بریار ژ دادگەھێ دەرچوون و نەھاتنە بجھئینان چ رامان بۆ دادگەھان نامینن).
سەبارەت بریارێن دادگەھا ئاسایی د. فارس دبێژیت: (ب شێوەکێ گشتی ئەو بریار گەلەک ئاریشان پەیدا ناکەت وەک ئەوان بریاڕێن ژ دادگەھا کارگێری دەردچن، ئەڤ چەندە ژی ژ ئەگەرێ سستی و پشتگوە ھاڤێتن و خەمساریا دەزگەھێ بجھئینانا بریاڕانڤەیە ل دادگەھێ، ھەروەسا ئەو دەزگە بخۆ چەندین جاران دبیتە ئاستەنگ و دەستێن خوە دکەتە ل گەل بجە نەئینانا بریاڕێن دادگەھێ ژ بۆ چەندین بەرژەوەندیێن تایبەت یان نەبوونا پشتەڤانیا پێدڤی ژلایێ دەستھەڵاتێ ڤە).
سەبارەت حوکمێن دادوەریا کارگێڕی ماموستایێ قانوونا گشتی ل زانکۆیا نەورۆز د. سەردار عیمادەلا دبیّژیت: (چێدبیت ھندەک جاران کەسێ دادگەە کری بڕیاڕێ بجە نائینیت ژبەر چەندین ئەگەران، ئەوژی ژ ئەگەرەکێ قانوونێ، مەبەست ژێ کو د شیانێن وی دا نەبیت بجھئینانا بریاڕا (حکم) ێ دادوەریێ، ژبەر ھەبوونا ئەگەرەکێ قانوونی وێ جێبەجێ کرنێ قەدەغە دکەت نموونە ل سەر ڤی ئەگەری راستڤەکرنا تەشریعی ( پەرلەمان )ی بۆ ئەنجامێ بریاڕا دادوەریّ کارگیّری، لدووڤ وێ راستڤەکرنێ ئەو ئەنجامێ قانوونی ئەوێ پەیدا دبیت ل سەر بجھئینانا بڕیاڕا دادوەرێ کارگێری دھێتە ژناڤبرن ژ ئەگەرێ راستڤەکرنا پەرلەمانی بۆ وێ تەشریعێ بریاڕ ژی دھێتە گۆھۆرین، ھەروەسا ئەگەرێ راوەستاندنا بڕیارا دادوەرێ کارگێری لدووڤ داخوازا پەیوەندیداران ھەکە بجھئینانا بڕیاڕێ ببیتە ئەگەرێ پەیدابوونا ھندەک ئەنجامان چارەسەریا وان دێ یا ب زەحمەت بیت).
ھەروەسا د. سەردار عیمادەلا ل سەر ئەگەرێ دویێ دبێژیت: (بجە نەئینانا بڕیاڕا دادوەریّ کارگێری ب ئەگەرەکێ دەرڤە ژ بڕیاڕێ، ئانکو پێگیری ب جھئینانێ د شیان دایە لێ ئاستەنگ کەفتە د رێدا، بۆ نموونە، ئەستەمیا کەسایەتی ( الاستحالە الشخێیە ) کو بجە نەئینانا بڕیاڕێ ڤەدگەرێت بۆ کاودانێن کەسێ بریاڕا دادگەھیّ د بەرژەوەندیا وی دا دەرچووی ( المحکوم لە )، نموونا دویێ ئەستەمیا کاودانی ( الاستحالە الواقعیە ) ئانکو بجە نەئینانا بڕیاڕێ ئەوە کو ھندەک کاودانێن (استسنائی) روو ددەن کارگێڕیێ نەچار دکەن بڕیاڕێ جێبەجێ نەکەت وەک نەزەڵالیا دەقێ بڕیاڕا دادوەریّ کارگێڕی و نەبوونا پشتبەستنا دارایی بۆ بجھئینانا وێ بڕیاڕێ، ھەروەسا روودانا نەسەقامگێریێ کو بەرکەفتنێ ( تمس ) دکەت ل گەل سیستەمێ گشتی ب ئەگەرێ بجھئینانا بڕیاڕا دادوەریّ کارگێڕی ئانکو ل گەل بجھئینانا بریارێ سیستەمێ گشتیێ دەوڵەتێ تێک دچیت).
ئه‌ڤرۆ نيوز:
دچارچوڤێ پڕۆسا چاکسازیا سەرۆکێ ھەرێما کوردستانێ دا داخوازکارێ گشتی فەرمانا دەستەسەرکرنێ بۆ ھەموو ئاکنجیێن ناحیەکا پارێزگەھا ھەولێرێ دەرکریە و رێڤەبەرێ ناحیێ ژی ئاشکرا کر کو بڕیار ب تۆمەتا ئاڤاکرنا خانیێن زێدەگاڤی ھاتیە دان، چونکی چو خانی ل ناحیا وان د تاپۆ کری نینن.
تولە مەھدی خۆشناو، رێڤەبەرێ ناحیا دیگەلە یا سەر ب پارێزگەھا ھەولێرێ ڤە بۆ رۆژناما ئەڤرۆ دیار کر کو د چارچوڤێ پڕۆسا چاکسازیا سەرۆک بارزانی دا خوازکارێ گشتی ل قەزا کۆیە بادەکا خانی و ڤێلایێن زێدەگاڤی ل سنوورێ ناحیا دیگەلە ڤەکریە و دادگەھێ فەرمانا دەستەسەرکرنێ بۆ ھەموو ئاکنجیێن سەنتەرێ ناحیا دیگەلە یا سەرب پارێزگەھا ھەولێرێ ڤە دەرکریە و گۆت: “ئەڤە د دەمەکی دایە ھژمارەکا وان خانیێن ھاتینە ئاڤاکرن بۆ سەردەمێ رژێما بەرێ یا عیراقێ ڤەدگەڕیت و ھندەک ژ وان کەسێن خانی ب زێدەگاڤی ئاڤاکرین د ژیانێ دا نەماینە و وەغەرکریە ژ بەر ڤێ چەندێ مە ھەموو لایەنێن پەیوەندیدار ئاگەھدارکرینە و ڤێ حەفتیێ دێ ب رژدی کار ل سەر ئەڤێ پرسێ کەین”.
ناڤھاتی ئاماژە دا وێ چەندێ کو ل گۆرەی بڕیارا دادگەھێ دڤێت ھەموو ئاکنجیێن دیگەلە بھێنە دەستەسەرکرن و گۆت: “راستە ھەتا نوکە ئەڤ بڕیارە نەکەفتیە د وارێ بجە ئینانێ دا، بەلێ ئەڤ بڕیارا داخوازکارێ گشتی بوویە جھێ دلگرانیا وەلاتیێن دیگەلە و دەنگێ مە ژی وەکو ئیدارا ناحیێ دگەل وەلاتیانە، چونکی بڕیار بۆ ھەموو وەلاتیان ب کۆم دەرچوویە و چوونا ئەڤێ ھژمارا زۆرا وەلاتیان بۆ ھەمبەر دادگەھێ دێ قەرەبالغی پەیدابیت”.
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا دوشەمبی رێکەفتی 27ی ئادارا 2017ێ ئه‌سمان دێ د ساهى بيت.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو ژ ئەنجامێ فشارێن نزمێن ده‌ريا سۆر و هاتنا فشارێن بلندێن وه‌لاتێ توركيا دھێتە پێشبینیکرن ئه‌سمان ساهى بيت پاشان دێ بۆ ئه‌ورێن كێم هێته گوهۆڕين.
پشکا پێشبینیان دایە زایە زانین کو دێ ئاراستێ بای ژی دێ باکوورێ رۆژھەلات بیت ب رەنگەکی د ناڤبەرا 5 بۆ 15کم دا و ماوێ دیتنێ ژی دێ د ناڤبه‌را 9 بۆ 10 دا بیت، پلێن گەرمێ ژی دێ د ناڤبەرا 8 بۆ 20 پلان دا بن.
ئەڤرۆ نيوز:
وەزیرێ دەرڤە یێ سویسرا راگەھاند کو ئەو رێ نادەن تورکیا د ناڤا ئاخا وان دا کارێن ھەوالگیریێ برێڤە ببەت و مەترسیێ ل سەر ئێمناھیا وەلات دا دروست بکەت و ئاشکرا ژی کر کو د ڤی واری دا ھۆشداری داینە حوکمەتا تورکیا.
دیدیەر بورکھالتیر وەزیرێ دەرڤە یێ سویسرا پشتی ھەڤدیتنا ل گەل مەولوود چاڤوش ئوگلۆ وەزیرێ دەرڤە یێ تورکیا راگەھاند کو وی ل گەل وەزیرێ دەرڤە یێ تورکیا پەیوەندیێن دو ئالی و رەوشا رەڤەندا تورک ل سویسرا گەنگەشە کرینە و گۆت: (د ڤان چەند ھەیڤێن داویێ دا تورکیا ل وەلاتێ مە دەست ب کارێن ھەوالگیریێ کریە و زانیاریان ل سەر وەلاتیێن مە یێن ب ئەسلێ خوە خەلکێ تورکیا کۆم دکەن و ئەو یەک بنپێ کرنا پەیوەندیێن دو ئالی و قانوونێن نێڤدەولەتیە و ئەم ب چو رەنگەکێ کارێن وەسا قەبوول ناکەین و ڤەکۆلین و لێپرسینێن مە ل سەر ڤێ یەکێ بەردەوام دکەن و ئەم دێ ئەنجامێن ڤەکۆلینان بۆ رایا گشتی ژی ئاشکرا کەین).
وەزیرێ دەرڤە یێ سویسرا ھەروەسا راگەھاند ژی پەیوەندیێن وەلاتان ب ھەڤدو را د چارچۆڤێ رێزگرتنێ دا پێش دکەڤیت و ھەر دەمێ رێزگرتن نەما و کارێن دەرڤەی یێن قانوونێن نێڤدەولەتی ھاتنە ئەنجام دان وێ دەمێ پەیوەندی ژی سار دبن و تووشی شکەستنێ دھێن و گۆت: (ئەم وەلاتەکی دیمۆکراتیکین و ل وەلاتێ مە یاسا سەروەرە و کارێن ل دەرڤەیی یاسایان ناھێنە قەبوول کرن و بۆ مە ئێمناھیا وەلاتیێن مە ژ ھەر تشتەکێ گرنگترە و دڤێت تورکیا دەست ژ کریارێن دوور ژ قانوونێن نێڤدەولەتی ل سنورێ وەلاتێن دی بەردەت ژ بەر کو ئەم قەبوول ناکەین چو وەلاتەکی دی ل ناڤ وەلاتێ مە دا کارێن ھەوالگیریێ ئەنجام بدەت و زانیاریان ل سەر وەلاتیێن مە کۆم بکەت و مە ل دۆر ڤی بابەتی ھۆشداری دایە حوکمەتا تورکیا).
ژ ئالیێ خوە ڤە وەزارەتا دەرڤە یا تورکیا ھەتا نھا چو داخویانیەک ئانکۆ بەرسڤەک د دەربارێ داخۆیانیا وەزیرێ دەرڤە یێ سویسرا دا بەلاڤ نەکریە و بەری ھەیڤەکی ئەلمانیا و بەلجیکا ژی ژ بەر ھەمان سەدەمان نەرازیبوون نیشا دابوون و ژ تورکیا خواستبوون کو ھەموو کارێن ھەوالگیریێ ل وەلاتێن وان راوەستینیت و ھژمارەکا دبلۆماتکار و وەلاتیێن تورکیا ژی دەستسەر کربوون.
ئه‌ڤرۆ نيوز:
ناکۆکیێن رۆسیا و ئیسرائیلێ ل سووریێ زێدەتر بوون پشتی کو رۆسیا نەشیای دەستھەلاتا ئیرانێ و میلیشیا حزب اللە یا لوبنانی کونترۆل بکەت، کو بەردەوام ئیسرائیلێ ھوشداری ژ نێزیکبوونا ئیرانێ ژ سنۆرێ جولانێ ددان.
ل دووڤ راپۆرتێن ھندەک رۆژنامەیێن ئیسرائیلی، وەزارەتا دەرڤە یا رۆسی داخواز ژ بالیۆزێ ئیسرائیلێ ل موسکۆ کربوو رونکرنان ل دۆر ھێرشێن ئەسمانی یێن ئیسرائیلی ل سووریێ بدەت، ئەڤ چەندە ژی نامەک بۆ ژ رۆسیا کو ھەتا نوکە یا زالە ل سەر سووریێ، یان ل سەر وان دەڤەرێن دبن دەستھەلاتا بەشار ئەسەدی دا.
سەرۆک وەزیرێن ئیسرائیلێ، بنیامین نەتانیاھۆ، دانپێدان ب ھێرشا ئەسمانی ل سووریێ کربوو کو دژی چەکێن پێشکەفتی یێن میلیشیا حزب اللە ھاتبوو ئەنجامدان، نەتانیاھۆی د داخۆیانیەکا خوە دا راگەھاندبوو کو وی چەندین جاران داخواز ژ سەرۆکێ رۆسیا کربوو ئیرانێ و حزب اللە ژ نێزیک جولانێ دوور بکەت، خوەیا کربوو ژی کو ئیسرائیل رێ نادەت چەکێ حزب اللە بھێتە ڤەگوھاستن، یان ھەر نێزیکبوونەک ژ جولانێ ھەبیت.
سایتێ ئەلخەلیج ئۆنلاین ژ زاردەڤێ شرۆڤەکارێ سیاسی (د. ئەحمەد ئەلحەمادە) ڤەگوھاستیە، رۆسیا نەشێت رێگریێ ل ئیرانێ و حزب اللە بکەت و ئەڤ ھەلویستێ رۆسی گەلەک جاران دوبارە بوویە، وەکو دەمێ دەربەدەرکرنا وەلاتیێن حەلەبێ ل دووماھیا 2016 ێ، دەمێ میلیشیێن ئیرانی رێگری ل دەرکەفتنا وەلاتیان کری و لەشکرێ رۆسی نەچارکری ھێرشان دژی جھێن وان میلیشیان بکەت.
دیارکری ژی موسکۆ و تەھرانێ بەرێخوەدانەکا جودا بۆ رەوشا سووریێ یا ھەی، ھەرچەندە ھەڤپەیمانیا نەچاری یا د ناڤبەرا واندا ھەی، و رۆسیا دخوازیت ھەبوونا خوە یا لەشکری ل دەریا ناڤەراست بپارێزیت و شەڕێ سووریێ ب دووماھی بینیت ب رێیا ئەنجامدانا گوھۆڕینێن سەرڤەیی ل رژێما سووری یا حوکمڕان، د ھەمان دەمدا ئیسرائیل دژی کونترۆلکرنا سووریێ ژلایێ رۆسیا ڤە نینە.
د سالێن بۆری دا، ئیسرائیلێ چەندین ھێرشێن ئەسمانی دژی جھێن لەشکری یێن سووری یێن تایبەت ب حزب اللە و پاسدارێن ئیرانی ڤە ئەنجام دابوون، لێ د ڤێ مەھێ دا و بۆ جارا ئێکێ لەشکرێ سووری مۆشەکەکا ( سام – 5) ئاراستەی فرۆکێن ئیسرائیلی کر، د ئەنجام دا وەزیرێ بەرگیریێ ئیسرائیلێ ( ئەڤیگدۆر لێبرمان) ل 19 ئادارێ فەرمانا ژناڤبرنا سیستەمێ بەرگیریا ئەسمانی یێ سووری دەرکر، ھەکە جارەکا دی لەشکرێ سووری مۆشەک ئاراستەی فرۆکێن ئیسرائیلی کرن و گۆت ( ئەم ناخوازین مایتێکرنێ د شەڕێ ناڤخوەیی یێ سووری دا بکەین و روو ب رووبوونا رۆسیا ببین، بەلێ ئێمناھیا ئیسرائیلێ بۆ مە یا گرنگە).
ب دیتنا حەمادەی، گەفێن وەزیرێ بەرگیریێ ئیسرائیلێ بۆ بەشار ئەسەدی نینن، بەلکو بۆ رۆسیا بوون، ژ بەر کو ئەسەدی ئەو مۆشەک بێی رازیبوونا رۆسیا ئاراستەی فرۆکێن ئیسرائیلی نەکربوون. گۆت ژی، لێبرمان د گەفێن خوە دا یێ رژد بوو و ھەکە رۆسیا یا بەردەوام بیت د رێگری نەکرنێ ل ئیرانێ و حزب اللە، دێ ئیسرائیل نەچار بیت دەڤەرەکا ئارام ل سەر سنۆری جۆلانێ دانیت، وەکو چاوان تورکیا ب رێیا پرۆسا (مەتالێ فۆرات) ل جەرابلوسێ دژی داعشێ و ھێزێن کوردی دانای.
نيشاندان
