ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 16ى ئادارا 2017ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1257 |
| 1 يۆرۆيێ ئه‌ورۆپى | 1330 |
| 1 ليرێ توركى | 335 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز:
سەرۆکێ ئێکەتیا مامۆستایێن کوردستانێ دیار کر کو ھەکە دەستکاریا پاشەکەفتا مووچەی بھێتەکرن، پێشبینی دھێتەکرن حوکمەت دەرمالێ ھاندانا مامۆستایان ببڕیت و دبێژیت: بڕیارە رۆژێن داھاتی دەرمالێ ھەیڤا ئێک ل سەر مامۆستایان بھێتە بەلاڤکرن.
عەبدولواحد محەمەد حاجی، سەرۆکێ ئێکەتیا مامۆستایێن کوردستانێ بۆ رۆژناما ئەڤرۆ ئاشکرا کر، دەمێ بڕیار ھاتیە دان پارێ ھاندانا مامۆستایان بھێتە مەزاختن کو جێگرێ سەرۆکێ حوکمەتێ و لایەنێن بەرپرس بەرھەڤ ببوون ل سەر وێ چەندێ ھاتبوو دانان، دەرمالە ب تنێ دێ بۆ دەمێ وەرزێ خواندنێ بیت، ئانکو ب تنێ دێ شەش ھەیڤان ھێتە مەزاختن و گۆت: “د وەرزێ ھاڤینێ دا دەرمالێ ھاندانا مامۆستایان دێ ھێتە بڕین، لەوڕا ھەتا نوکە ب تنێ دەرمالێ ھەیڤەکێ یێ ھاتیە مەزاختن و بڕیارە ل ڤێ ھەیڤێ دەرمالێ ھەیڤا ئێک ژی ل سەر مامۆستایان بھێتە بەلاڤکرن و ھەتا ھەیڤا شەش دێ بۆ ھێتە ھژمارتن”.
عەبدولواحد محەمەد گۆتژی: “ئەم پێشبینی دکەین ل گەل دەستکاریکرنا پاشەکەفتا مووچەی، دەرمالێ ھاندانێ ژ لایێ حوکمەتێ ڤە بھێتە بڕین، بۆچوونا مە ژی ھەر ئەڤەیە، ھەکە ب شێوەیەکێ باش دەستکاریا رێژەیا پاشەکەفتا مووچەی بھێتەکرن، بلا وی دەمی دەرمالێ ھاندانێ بھێتە بڕین و زێدەکرنا مووچەی ژ دەرمالەی باشترە، ھەر چەندە ھێشتا چو بڕیارێن فەرمی ژ لایێ حوکمەتێ ڤە نەھاتینەدان، بەلێ وەکی پێشبنی، ئەم وەسا دبینین نوکە حوکمەت یا پێداچوونێ بۆ کێمکرنا پاشەکەفتێ مووچێ فەرمانبەران دکەت و دێ دەرمالە ھێتە بڕین”.
ئه‌ڤرۆ نيوز:
سەرۆکێ جڤاتا ناحیا سنوونێ، دیار کر ژبەر ئالۆزیێن خانەسۆرێ ھەموو رێکخراوان خوە ژ دەڤەرێ ڤەکێشان، ب تنێ دەزگەھێ خێرخوازیێ بارزانی ل دەڤەرا سنوونێ بەردەوامیێ ددەتە خزمەتکرنا وەلاتیان و کارێ خوە دکەت.
شێخ ئلیاس خدر رەڤو، سەرۆکێ جڤاتا ناحیا سنوونێ دیار کر ھەر جھەکێ ئالۆزی لێ دروست بن، رێکخراو قەستا وی جھی ناکەن، لەورا پشتی ل خانەسۆرێ پەکەکێ ئالۆزی دروست کرین، رێکخراوان خوە ژ دەڤەرێ ڤەکێشان و ب تنی دەزگەھێ خێرخوازیێ بارزانی ل دەڤەرێ بەردەوامە ل سەر خزمەتکرنا خەلکێ شنگالێ و ھەموو رێکخراوێن دی خوە ژ سنوونێ ڤەکێشان.
شێخ ئلیاس خدر، گۆت “ئەم ھەموو بزاڤا دکەین بۆ ئاڤەدانیا دەڤەرێ و ھاتنا رێکخراوێن بیانی و نێڤدەولەتی بۆ ئاڤاکرنا سنوونێ، لێ مخابن لایەنێن نەقانوونی و دەستووری ئالۆزیان دروست دکەن”.
سەرۆکێ جڤاتا ناحیا سنوونێ خویا ژی کر نوکە ھەتا رادەکی رەوش ئارام بوویە، لەورا ب ھیڤینە ھەموو رێکخراو ڤەگەرنە دەڤەرێ و دەست ب خزمەتکرنا وەلاتیان بکەن و گۆت “ئەو خێزانێن ژبەر ئالۆزیێن 3/3 مالێن خوە ھێلاین، جارەکا دی یێ ڤەدگەرنە سەر مالێن خوە، ب تایبەتی ژی ل سنوونێ و ب رێژا 75% خەلک ڤەگەریاینە”.
دبێژن: (ئاڤ د ده‌نیدا گه‌نى دبیت!) ئێدى ئه‌و ئاڤ ناهێته ڤه‌خوارن، خوه بكێرى ئاڤدانێ ژى ناهێت چنكو یا پرى میكرۆبه و زیانێ دگه‌هینیته سروشتى، ئه‌ڤه دسروشتیدا و د ژیانێ دا ژى ب هه‌مان ره‌نگییه و ب تایبه‌تى دسیاسه‌تێدا و نموونه دمشه‌نه لێ یا هه‌رى نێزیك و نوكه ئه‌م به‌رخۆرێن وێ دبینین ئه‌ردۆغانێ سه‌رۆكێ توركیایه. ژ سالا 2002ێ وه‌ره ئاكپارتى ب سه‌رۆكاتیا ئه‌ردۆغانى ده‌ستهه‌لاتا توركیا د ده‌ستاندایه، د ڤى ماوێ درێژ دا گه‌له‌ك گوهۆڕین كه‌فتنه زهنیه‌تا سه‌ركرداتیا توركیا و ب لۆژیكه‌كێ نوو سه‌ره‌ده‌رى ل گه‌ل كێشێن ناڤخوه‌یى و ده‌ره‌كى كرن و گه‌له‌ك تابۆ و هێلێن سۆرێن ئه‌تاتۆركى كێشاین به‌زاندن ب تایبه‌ت ده‌رباره‌ى كێشا كورد ل باكور.
سه‌ده‌مێن ڤێ گوهۆڕینا سیاسه‌تا توركى گه‌له‌ك فاكته‌ر هه‌نه و یێن هه‌رى به‌رچاڤ نه‌مانا دوو باسكیا جیهانێ و گلۆبالیزم و هلكشیانا ئێكه‌تیا ئه‌ورۆپى وه‌ك هێزه‌كا ئابوورى و جڤاكى كو د سه‌ر جوداهیێن ئتنى و سه‌رهاتیێن دیرۆكى یێن پرى شه‌ر و هنگام دا شیایه وه‌ك ئێكه‌تیایه‌كا هه‌مئاهه‌نگ و خوه‌دى باندۆر ل سه‌ر سیاسه‌تا جیهانێ خوه بده‌ت نیشاندان.
ئێكه‌تیا ئه‌ورۆپى و ئه‌ندام بوون د ڤێ ئێكه‌تیێ دا خه‌ون و داخازا مێژینه‌یا ده‌ستهه‌لاتدارێن توركیایه لێ ئارمانجێن ئێكه‌تیا ئه‌ورۆپى و جیهانبینییا وێ دگه‌ل یێن ده‌وله‌تا توركیا تم دناكۆك و ل هه‌ڤ ناكن. دڤێتن توركیا گه‌له‌ك پاریێن ته‌حل ب داعووریتن تا خوه د گه‌ل مه‌رجێن ئه‌ورۆپا ب گونجینیتن، ژ وان مه‌رجێن توركیا گه‌له‌ك پێ د ئێشیتن پرسا مافێن مرۆڤى، كێشا گه‌لێ كورد و ئاشنابوونا تورگیایه ل گه‌ل دیرۆكا خوه و دانپێیانه ب وان كوشتارێن توركیا چ ل سه‌رده‌مێ ده‌وله‌تا ئۆسمانى ئه‌نجامداین (كوشتارا گه‌لێ ئه‌رمه‌ن و ئاسورى و كوردێن ئێزدى) یان ژى یێن ل سه‌رده‌مێ كۆمارا توركیا هاتینه ئه‌نجامداین(كوشتارا دێرسمێ، گه‌لیێ زیلان و مه‌راشێ)، كو هه‌تا نوكه توركیا چ به‌رهه‌ڤیێن بڤى ره‌نگى نه‌كرینه و تم پاساوا بۆ وان روودان و كریاران دبینیت.
د سه‌ر ڤان هه‌موو ئاسته‌گیان ڕا لێ ده‌وله‌تا تورك چ جارا بێهیڤى نه‌بوویه تم ب خه‌ونا ئه‌ندامبوونێ ده‌رگه‌هێ ڤێ ئێكه‌تیێ قۆتایه و دانوستاندن ل گه‌ل كریه و ئێكه‌تیا ئه‌ورۆپى ژى بئێك جارى ده‌رگه‌ه ل توركیا نه‌گرتیه و یاریا تۆم و جێرى ل گه‌ل كریه، ئه‌ڤێ یاریێ به‌رده‌وام كریه هه‌تا بهارا عه‌ره‌بى ده‌ستپێكرى و سه‌رتیشك گه‌هشتینه سوریا. ئێدى سیناریۆیێ ئه‌ندامبوونا توركیا گه‌هه‌شته قۆناغه‌كا نوو و توركیا 180 پله‌یا مه‌نگه‌نێ سیاسه‌تا خوه گوهۆڕى و ته‌ڤى كۆربه‌قا سوریێ بوو ب مه‌ره‌ما بكار ئینانا كێشا سوریێ وه‌ك كارته‌كا فشارێ بۆ سه‌ر ئێكه‌تیا ئه‌ورۆپى ب تایبه‌ت كێشا ئاواره‌یان و د ڤه بیاڤى دا توركیا شیا چه‌ند ده‌ستكه‌فتێن ئابوورى ب ده‌ستڤه بینیت.
هه‌لبه‌ت ته‌ڤى بوونا توركیا بۆ كێشێن ناڤخوه یێن سوریا نه ژ پێخه‌مه‌تا راوه‌ستاندنا كوورها شه‌رێ تائیفى و ئتنى بوو به‌لكو دا ل پێگه‌هێ كوردان بده‌ت كو پشتى گرۆپێن تۆندڕه‌وێن ئیسلامى سه‌ر ژ ئۆپوزسیۆنا سوری وه‌رگرتى، پێگه‌هێ كوردان ل شه‌رێ دژى تیرۆرێ بلندبوو و بوویه جهێ متمانا هه‌ڤپه‌یمانیا ناڤده‌وله‌تیا دژى تیرۆرێ. ئه‌ڤێ چه‌ندێ ده‌وله‌تا توركیا حێچ و هاركر، نه‌خاسمه ل پێش چاڤێن توركیایه، ژ ئه‌نجامێ كه‌فتنا رژێما سه‌ددامێ دكتاتۆر(9.04.2003) ده‌وله‌تا دیفاكتۆیا هه‌رێما كوردستانێ هاته سه‌ر ده‌پێ شانۆیا جیهانێ و ژ ترسا دووباره بوونا هه‌مان سیناریۆیى ل رۆژئاڤایێ كوردستانێ، توركیا وه‌ك تاكه كارتا فشارێ دده‌ستدا ماى بۆ ئه‌ندامبوونا ئێكه‌تیا ئه‌ورۆپى كێشا سوریێ داخه‌بتاندن هه‌روه‌ك مه ل ژوور ئاماژه پێداى شیا چه‌ند ده‌ستكه‌فتێن ئابوورى ب ده‌ستڤه بینیت لێ د ئه‌نجامدا بۆ توركیا گه‌له‌ك گران ڕاوه‌ستا و بۆ سه‌ده‌م كو ئێدى ئێكه‌تیا ئه‌ورۆپى ل كێشێن ناڤخوه‌یا توركیا بزڤڕیت ب تایبه‌ت كێشا دیمۆكراتیێ، ئازادیا هزرێ و ڕاگه‌هاندنێ، مافێن مرۆڤى كو حكومه‌تا ئاكه‌پێ ئه‌ڤ پره‌نسیپه بنپێ كرنه و به‌ره‌ف دیكتاتۆریا ته‌ك پارتى دچیت نوكه توركیا بوویه زیندانه‌كا مه‌زن بۆ ئۆپوزڤسیۆنا علمانى و گرتنا پرانیا ئه‌ندام په‌رله‌مانته‌رێن كورد و هه‌ر كه‌سێ ب ئاوازێ ئه‌ردۆغانى نه‌له‌یزیت؛ ژبلى كێشێن ئابوورى كو نوكه توركیا د كریزه‌كا كوور دا ده‌رباز دبیت و بهایێ لیرێ توركیا ژنیڤه‌كا بهایێ خوه پتر ژ ده‌ستدایه و پرانیا وه‌به‌رهێنه‌رێن بیانى پشتا خوه دانه توركیا و بازارێ توركیا بجه هێلانه.
توركیا د قۆناغه‌كێ دا ده‌رباز دبیت گه‌له‌ك یا چاره‌نڤیسازه و ئابووره‌كێ هه‌رفتى، ناڤخوه‌یه‌كا ژ هه‌ڤ ڤه‌قه‌تاى لێ د سه‌ر هندێ ڕا ئه‌ردۆغانى و تیما خوه ده‌رگه‌هه‌كێ پرى مه‌ترسى ل خوه ڤه‌كر كو دخازن دستۆرێ علمانیێ توركیا بگوهۆڕن، ب ڤێ خوه‌سته‌كا خوه ته‌ڤایا جیهانا رۆژئاڤا و هێزێن دیمۆكراتخاز و علمانى ل خوه كرنه دوژمن ب تایبه‌ت ئێكه‌تیا ئه‌ورۆپى و ترۆكرنا وه‌زیرێن ئه‌ردۆغانى ل ئه‌لمانیا، هۆله‌ند و وه‌لاتێن دن یێن ئێكه‌تیێ، مرۆڤ نه‌شێت حه‌سوودیێ ب ره‌وشا نوكه یا توركیا ببه‌ت. ئه‌ردۆغان و تیما خوه ئه‌ڤرۆ لبه‌ر ده‌رگه‌هێ ئێكه‌تیا ئه‌ورۆپا سه‌رگه‌دان مانه و ب دووراتیا رۆژێ ژ عه‌ردى ژ پره‌نسیپێن ئێكه‌تیا ئه‌ورۆپى ل سه‌ر ئاڤابووى، دووره و كه‌فتیه بن گڤاشتنێن جیهانا رۆژئاڤا و دیمۆكراتخاز. ئه‌ڤه خوه‌ش ده‌لیڤه‌یه بۆ كوردان هه‌لكه‌فتى ب تایبه‌ت هه‌رێما كوردستانێ كو پرسا ده‌وله‌تبوونێ ژ پرسا موزایه‌ده‌یا سیاسى بۆ وارێ پراكتیكى بهێته ڤه‌گوهازتن چنكو هه‌ردو زلهێزێن هه‌رێمى توركیا-ئیران ل به‌ر گڤاشتنێن رۆژئاڤا و به‌ره‌یێ دیمۆكراتخازێ جیهانێ شیانێن دژاتیا برایرا كوردان نه‌مایه.
ئەڤرۆ نيوز:
ئەندامەکێ سەرکردایەتیا پارتی دیموکراتی کوردستان- سووریا راگەھاند کو پشتی ئالۆزیێن ل شەنگالێ و سوتنا چەندین بارەگایێن مە ب دەستێ ھێزێن پەکەکێ ل رۆژئاڤایێ کوردستانێ دو رۆژ بەری نھا ژی ھێزێن ئاسایشا پەکەکێ ھەموو بارەگایێن ENKS ل باژێرێن جودا جودا یێن رۆژئاڤایێ کوردستانێ داخستن و رێ نادەن ھەڤالێن مە بچنە سەر کارێ خوە.
سەعید عومەر ئەندامێ سەرکردایەتیا پارتی دیموکراتی کوردستان- سووریا راگەھاند کو پشتی ئالۆزیێن ل شەنگالێ چەکدارێن پەکەکێ ل رۆژئاڤایێ کوردستانێ چەندین بارەگایێن ENKS و پارتێن دی یێن کوردی سوتن و گەلەک ھەڤالێن مە ژی ھاتنە گرتن، زۆرداریا وان رۆژ ب رۆژێ ل دژی گەلێ کورد ل رۆژئاڤایێ کوردستانێ زێدەتر دبیت و دو رۆژن ژی ل چەندین باژێرێن رۆژئاڤا ھێزێن ئاسایشا پەکەکێ ھێرشی بارەگایێن ENKS و پارتێن دی یێن کوردی کرینە و ھەموو بارەگایێن وان پارتیان ھاتنە داخستن.
ناڤھاتی دیار کریە ئەو یەک د دەمەکێ دایە کو گەلەک پارتێن عەرەبی و پارتیا بەعس یا سووریێ ل ژێر چاڤدێریا پەکەکێ ل رۆژئاڤایێ کوردستانێ کار و خەباتێ خوە دکەن و ئاسایشا پەکەکێ چو ئاریشان بۆ وان دروست ناکەت لێ ئەو رێ نادەن کو پارتێن کوردی و ENKS کار و خەباتا خوە یا نەتەوی ل رۆژئاڤایێ کوردستانێ برێڤە ببەن.
ئەندامێ سەرکردایەتیا پارتی دیموکراتی کوردستان- سووریا ئەو یەک ژی دیار کر کو چەکدارێن پەکەکێ ھێرشی ھەموو پارتێن کوردی دکەن یێن کو ئەندامێن ENKS نە و ناخوازن ئەو چالاکیێن خوە یێن سیاسی ل رۆژئاڤایێ کوردستانێ بەردەوام بکەن و ژ بەر ھندێ ژی ئالۆزیان دروست دکەن و ھەتا نھا ب سەدان ئەندامێن سەرکردایەتیێ و کادیرێن مە ل زیندانێ دانە و رێ نادەن پارتێن کوردی کارێ خوە بکەن و گۆت: (ئەم وی ھەلویستێ دوژمنکارانە یێ پەکەکێ ل رۆژئاڤایێ کوردستانێ قەبوول ناکەن و دێ نەرازیبوونا خوە ل دژی وان دیار کەین و مە دڤێت ھەموو جیھان ژی باش بزانیت کا پەکەکێ و گرۆپێن سەر ب وێ چ زۆلمەکا مەزن ل کوردان دکەن).
ئەو یەک د دەمەکێ دایە کو چەند رۆژ بەری نھا ENKS د داخۆیانیەکێ دا دیار کربوو کو ھێزێن پەکەکێ ل رۆژئاڤایێ کوردستانێ چەندین بارەگایێن وان سوتنە و ئەندامێن وان دەستەسەر کرینە و رێ نادەن ئەو کار و چالاکیێن خوە یێن سیاسی برێڤە ببەن و داخواز ژ پەکەکێ ژی کربوو کو دەستان ژ سیاسەتا خوە یا شاش بەردەت و خزمەتا دوژمنێن گەلێ کوردستانێ نەکەت.
ھەژی ئاماژەپێدانێ یە کو پشتی ئالۆزیێن ل شەنگالێ رەوشا رۆژئاڤایێ کوردستانێ ژی ئالۆز بوویە و ئاسایشا رۆژئاڤایێ کوردستانێ یا سەر ب پەکەکێ ناھێلیت پارتیێن سەر ب ENKS کارێ خوە برێڤە ببەن و ھێرشی بارەگایێن وان دکەن و نھا ژی پرانیا بارەگایێن وان پارتیان ژ ئالیێ ئاسایشا پەکەکێ ڤە ھاتینە داخستن و رەوش ناڤخوەیی یا رۆژئاڤایێ کوردستانێ ژی رۆژ ب رۆژێ ئالۆزتر دبیت.
ئه‌ڤرۆ نيوز:
رێڤه‌به‌ريا به‌ره‌ڤانيا باژێرى ل دهۆكێ راگه‌هاند كو ئه‌و دێ رابيت ب لێدانا زه‌نگێن ئاگه‌هداركرنێ ل رۆژا پێنجشه‌مبى رێكه‌فتى 16ى ئادارا 2017ێ و ل ده‌مژمێر 11:00ى سپێدێ.
دايه زانين ژى كو زه‌نگا ئێكێ بۆ ئاگه‌هداركرن و راوه‌ستيانا هاتنوچوونێ يه و زه‌نگا دويێ پشتى پێنج ده‌قيقا دێ بۆ ئاسايبوونا هاتنوچوونێ هێته لێدان.
رێڤه‌به‌ريا ناڤبرى هيڤى ژى ژ وه‌لاتيان خواستيه كو وه‌كو رێزگرتنه‌ك بۆ تووشبوو و زيانڤێكه‌فتيێن ڤێ روودانا دلته‌زين پێگرى پێ بهێته كرن.
بارزان ، نەوزاد زادە ھلۆری:
ب ھەلکەفتا دایکبوونا بارزانیێ نەمر دوھی ١٥ ئادارا ٢٠١٧ ھەر ئێک ژ ھێزێن پێشمەرگێن زێرەڤانی و لەشکەرێ رۆژ ل رۆژئاڤایێ کوردستانێ سەرا مەزارێ نەمران ل بارزان کر و ژلایێ خەلات بارزانی نونەرێ سەروکێ ھەرێما کوردستانێ ھاتنە پێشوازیکرن.
خەلات بارزانی نونەرێ سەروکێ ھەرێما کوردستانێ بۆ ئەڤرۆ نیوز گۆت : ( ب مەرەما دوپاتکرنا سووز و پەیمانان بو رێبازا بارزانیێ نەمر ١٥ێ ئادارێ ھەر ئێک ژ ھێزێن پێشمەرگێن زێرەڤانی کو پێکھاتبوون ژ سوپایێ ئێک و سوپایێ دوو و سوپایێ سێ ، و ل گەل ھێزێن لەشکەرێ رۆژ یێن رۆژئاڤایێ کوردستانێ سەرا مەزارێ نەمران ل بارزان دا و چەند تاجە گولینە پێشکێشی گورێ بارزانیێ نەمر و ئیدریسێ ھەردەم ساخکرن و دوڤدا چەند وتارەک ھاتنە خوارندن و تێدا دوباتبوونا خوە بو رێبازا بارزانیێ نەمر نیشاندا کو لسەر رێبازاوی یا کوردپەروەرانە و نەتەوەیی بەردەوام بن )
زێدەتر گۆت : ( ھێزێن پێشمەرگێن کوردستانێ کو ئەڤە نێزیکێ سێ سالایە بەرامبەر تیرورستێن داعش خەبات و قوربانیدانەکا زۆر دکەن پێخەمەت پاراستنا سەر و مالێ ولاتیان ، و بو ڤێ مەرەمێ ژی دەھان شەھید و بریندار داینە و شیان ل دوماھیێ شکەستنێ ب داعش بینن کو ئەڤ یەک ژی جھێ فەخر و شانازیا گەلێ کوردە ، و بێگومان پێشمەرگێن قارەمان لسەر دەستێ بارزانیێ نەمر ھاتینە پەروەردەکرن ژبەرڤێ بو پاراستنا سەر و مالێ وەلاتیان بەرھەڤن خونا خوە ب رێژن )
ژلایەکێ دنڤە ھەر ب ھەلکەفتا دایکبوونا بارزانیێ نەمر دیبەیتەکا تایبەت لسەر خەبات و قوربانیدانا بارزانیێ نەمر بو ھزرا نەتەوەیی و ژینگەپارێزیێ ل بارزان ھاتە ئەنجامدان .
دڤی واریدا محەمەد مێرگەسووری رێکخەرێ ئەوێ دیبەتا بارزاینێ نەمر بۆ ئەڤرۆ نیوز گۆت : ( بارزانیێ نەمر خەبات و قوربانیدانەکا زور بو گەلێ کوردستانێ ب گشتی کریە و بارزانیێ نەمر بێی ل بەر چاڤ وەرگرتنا ھزرا تاکەکەسی و حزبی و بێی جوداھی خەبات و قوربانیدان و شورش و راپەرین بو ھەموو گەلێ کوردستانێ ل ھەر چوار پارچێن کوردستانێ کریە ، ژبەر گرنگی یا ھزر و بیرێن بارزانی و فەلسەفە و ئایدولوژیێن وی ل بارا نەتەوەیی و ژینگەپارێزی مە دیبەیتەکا شەش رۆژی بو کەسایەتی و تایبەتمەندێن ھەرچوار پارچێن کوردستانێ برھەڤکریە و رۆژانە لسەر مەزارێ نەمران دھێتە ڤەکولین کرن )
زێدەتر گۆت : ( ئەنجامێن دیبەیتێ دێ د پرتوکەکا تایبەت دا ھێنە کومکرن و بو جھێن پەیوەندیداێن دوارێ ھزرا نەتەەیی و ژینگەپارێزی دا کاردکەن ھێتە ھنارتن داکو مفا ژێ بھێتەوەرگرتن ، دوڤدا دێ ھێتە چاپکرن و بو رایا گشتی ھێتە بەلاڤکرن )
ئه‌ڤرۆ نیوز،زنار تۆڤى:
وه‌زاره‌تا نه‌فتا عێراقێ ب نڤێسینه‌كا فه‌رمى راگه‌هاندیه كو ب ئه‌گه‌رێ هاتنا بیره‌وه‌ریێن نه‌ورۆزێ و سه‌ر سالا كوردى ئه‌و دێ پشكا هه‌رێما كوردستانێ و باژێرێ كه‌ركوكێ ژ به‌نزینێ و غازێ زێده‌تر لێ كه‌ن.
كۆمپانیا سه‌ره‌كى یا دابه‌شكرنا به‌رهه‌مێن نه‌فتا عێراقێ ب فه‌رمانا وه‌زیرێ نه‌فتێ نڤێسینه‌ك به‌لاڤكریه و تێدا دیاركریه،كو ل رۆژا 14/3/2017 خشتێ دابه‌شكرنا به‌رهه‌مێن نه‌فتێ دێ گوهۆرین ب سه‌ردا هێت و پشكا به‌نزینێ و غازێ بۆ پارێزگه‌هێن هه‌رێما كوردستانێ و كه‌ركوكێ دێ هێنه زێده‌كرن.
هه‌روه‌سا دیاركریه كو ئه‌گه‌رێ ڤێ زێده‌كرنێ ژ به‌ر هاتنا بیره‌وه‌ریێن نه‌ورۆزێ و سه‌ر سالا كوردییه،ئه‌ڤ بریاره دێ بۆ ماوێ 8 رۆژان یا به‌رده‌وامبیت.
دیسا كۆمپانیا ناڤهاتى بره‌یا پانزین و غازێ بۆ هه‌رێما كوردستانێ دیار كریه و ل دووڤ وى خشتێ نوو ل ماوێ وان 8 رۆژان به‌نزین و غاز دێ بۆ پارێزگه‌هێن هه‌رێما كوردستانێ هێته دابینكرن.
نيشاندان
