ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 7ى ئيلۆنا 2016ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1295 |
| 1 يۆرۆيێ ئه‌ورۆپى | 1440 |
| 1 ليرێ توركى | 435 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز، فاتما مزوورى:
كۆمپانيا سامسونگ ژ ئه‌گه‌رێ كێشه‌كێ 2.5 مليۆن مۆبايلێن گالاكسى نوت 7 ژ بازارى ڤه‌كێشان و ب گۆژمێ مليار دۆلاران دێ زيانێ كه‌ت.
ڤه‌كێشانا گالاكسى نوت 7 ژ بازارى پشتى دو حه‌فتيان هات ژ خستنا وێ بۆ بازارى و چاڤدێر وه‌سان پێشبينى دكه‌ت زيانێن كۆمپانيا سامسۆنگ بگه‌هينه ملياره‌كێ.
ئه‌گه‌رێ ڤه‌كێشانا گالاكسى نوت 7 ژ ئه‌گه‌رێ كێشه‌يا پاتريێ يه كو هێشتا يا ديار نينه كۆمپانيا به‌رهه‌م هێنه‌را پاتريێ دێ پشكه‌كێ ژ زيانا ب ستوويێ خوه ڤه‌گريت يان ژى نه.
30% ژ پاتريێن گالاكسى نوت 7 ژ لايێ كۆمپانيا ته‌كنولوجيا چينێ Amperex هاتينه به‌رهه‌م ئينان.
ئه‌ڤرۆ نيوز:
پیڤاز تانجەکا زێرینە بۆ ب ھێزکرنا ساخلەمیێ گەلەک خوارنا پیڤازان، رەنگە ببیتە ئەگەرێ ھندەک ئاریشەیێن سڤک وەکو بێھنتەنگی و تەنگەزاریێن گەدەی.
سەرەرای بێھنا وێ یا نەخۆش کو گەلەک کەس نەخۆشیا خۆ ژێ دبینن، بەلێ پیڤاز کلیلا زێرینە بۆ ساخلەمیێ و رێکەکا ب ساناھی یە کو لەشێ مرۆڤی ھەست ب ھێزێ و ڤەژاندنێ بکەت. گەلەک رەنگێن پیڤازان ھەنە بۆ نموونە پیڤازێن زەر و سۆر و کەسک و سپی و ھەر ئێکێ تاما خۆ یا تایبەت ھەیە کو ھندەک ژێ گەلەک د دژوارن و ھندەک ژی د شرینن، دشیاندایە پیڤاز ب خاڤی و بژارتی بھێتە خوارن یان بھێتە کەلاندن، ھەروەسان دشیاندایە ل سەر زەلاتە و گەلەک جورێن خوارنێ بھێتە زێدەکرن.
گەلەک ژێدەرێن خوارنێ دناڤ پیڤازێ دا ھەنە کو ئەم دشێین بێژین پتریا ڤیتامینان وەکو ( ڤیتامین B و C و کالسیوم و فسفور و پوتاسیوم و کاربوھیدر و پرۆتین) دناڤدا ھەنە.
مفایێن ب کارئینان و خوارنا پیڤازێ بۆ ساخلەمیا مرۆڤی گەلەکن و بۆ چارەسەریا گەلەک نەخۆشیێن بەربەلاڤ دھێتە ب کارئینان بێی کو کارتێکرنێن لاوەکی ل دووڤ خۆ بھێلیت و ژوان نەخۆشیان ژی ( بەرسەرمابوون، کوخک، رەبۆ، نەخۆشیێن بەکتری، ئێشێن دلی، ئاریشەیێن ھەناسێ، کێم خوری، رەقبوونا دەمارێن خوینێ، ھەودانێن ھەناسێ، ھەستداری) دیسان ھاریکارە بۆ ب وەرارئێخستنا بەکتریایێن باش و کوشتنا بەکتریایێن ب زیان ئەوێن دناڤ قولونێ دا ھەین.
پیڤاز ب پێکھاتێن خۆ یێن بھێزڤە دھێتە نیاسین ب ھێزترین ژێدەرێن خوارنێ ئەوێن بەرھنگاریا پەنجەشێرێ و وەرارا وەرەمان دناڤ لەشیدا دکەن، و ئەو وەلاتێن گەلەک پیڤاز لێ دھێنە چاندن ژوان وەلاتانە ئەوێن پەنجەشێر دناڤدا یا کێم بیت، بۆ نموونە ل وەلاتێ جورجیا کو گەلەک پیڤاز لێ دھێنە چاندن رێژا پەنجەشێرا گەدەی ل وێرێ ناگەھیتە 1,5% ژی.
راستە ل سەر ئاستێ جیھانێ گەلەک ڤەکولین ل سەر پیڤازێ یێن ھاتینە کرن، بەلێ پێدڤیە ب شێوەیەکێ ھەڤسەنگی بھێتە خوارن، ژبەرکو گەلەک ب کارئینانا وێ رەنگە ببیتە ئەگەرێ ھندەک ئاریشەیێن ساخلەمیێ یێن سڤک وەکو بێھنتەنگیێ و تەنگەزاریێن گەدەی.
ئەڤرۆ نیوز:
پتریا وەلاتیێن رۆژانێن جەژنان سەرا نەخۆشخانەیان ددەن ئەون یێن نەخۆشین دومدرێژ ھەین و بەری بێھنڤەدان دەست پێ بکەت پشکنینێنن خوە ناکەن لەورا ل رۆژانێن جەژنێ تەنگاڤ دبن و سەرا نەخۆشخانەیان ددەن.
د. عەبدوللا ئیبراھیم رێڤەبەرێ نەخۆشخانا تەنگاڤیا ل دھۆکێ دیارکر ل رۆژانێن جەژنان پتریا وەلاتیێن سەرا نەخۆشخانەیا تەنگاڤیان ددەن ئەو کەسن یێن بەری جەژنێ سەرا نوشدارێن خوە یێن تایبەتمەند نەکرین بۆ پشکنینا نەخۆشیا شەکری و فشارا خۆینی وھەموو جۆرین دی نەخۆشیان ل جەژنێ تەنگاڤ دبن لەورا دێ سەرا نەخۆشخانێ دەن پێدڤیە وەلاتیێن ھەلگرێن نەخۆشیێن دومدرێژ بەری جەژنێ سەرا نۆشدارێ خوە بدەن بۆ وێ چەندێ ل رۆژانێن جەژنێ نەساخ نەبن.
زێدەتر گۆت:” گەلەک وەلاتی تووشی روودانێن ھاتن وچوونی و یاریێن ئاگری دبن رێژا وانژی ل رۆژانێن جەژنان زێدە دبیت پێدڤیە شوفێر رێنمایێن ھاتن وچوونێ بجە بینن ب تایبەتی ژی ل جادەیان لەز ھاژووتنا ترۆمبیلێ نەکەن و دایک و باب ژی چاڤدێریا زارۆیێن خوە بکەن ودوور بکەن ژ یاریێن ئاگری”.
د. عەبدوللا ئیبراھیم ئاماژە دا وێ چەندێ کر شریناھی مروڤی قەلەو دکەن و پێدڤیە وەلاتی خوە ژ بپارێزن و زێدە نەخۆن تایبەتی ژی قەلەوی گەلەک یا زێدەبووی دبیتە ئەگەر وەلاتی تووشی نەخۆشیا جەلتێ بن و گیانێ خوە ژ دەست بدەن تایبەتی ژی مروڤێن قەلەو پێدڤیە خوە دوور بکەن ژ خوارنا شریناھیان بۆ پاراستنا ساخلەمیا خوە د رۆژانێن جەژنێ دا.
د. نزار بەکر رێڤەبەرێ نەخۆشخانا ھیڤی یا زارۆیان دیارکر پتریا زارۆیان ل رۆژانێن جەژنێ تووشی زکچوونێ و دل رابوونێ دبن ژبەر خوارنا زێدە یا شریناھیان و نابیت زارۆک رۆژی ژ دوو یان سێ چکلێتان زێدەتر بخوە و ھەکە نەخۆت ھێشتا باشترە، چونکو ئەو خۆارنێن نوکە ئەم دخووین رێژا 50% شریناھیا دناڤدایە لەورا ژی زکچوون و دل رابوون ل دەڤ زارۆیان ل رۆژانێن جەژنێ گەلەک زێدە دبیت و پێدڤیە دایک وباب ل زارۆیێن خوە دھشیاربن و نەھێلن گەلەک شریناھیان بخۆت.
د. تەلال رەشید تایبەتمەندێ نەخۆشین پیستی وجوانکاری ل دھۆکێ دیارکر حەساسی ب رێژەکا زۆر کێم ل شریناھیان چێدبیت ئەڤە دۆرین دەە سالانە ھەتا نوکە حالەتەک رەنگە پەیدا ببیت ژبەر شریناھیان تووشی حەساسی ببیت لێ پرسکێن گەنجاتیێ ژبەر خۆارنا شریناھیان گەلەک زێدە دبن و گەلەک برسک ل سەروچاڤ و لەشی مروڤ دروست دبن ژبەر شریناھیان وەکو جکیت و پەقلاوە و…..ھتد.
د. تەلال رەشید خۆیا ژی کر کو پتریا کەسین تووشی حەساسی دبن ل رۆژانێن جەژنا ژبەر خۆارنا ترشی و بوھاراتین ھەمە جۆر ئەڤە گەلەک حەساسی زێدە دبن بۆ مروڤێ پێدڤیە وەلاتی خوە ژ خۆارنا بھارات و ترشی و فراوەلە و بندق دوور بکە نبۆ وی چەندی تووشی حەساسی نەبن چونکو ھەکە مروڤ تووشی حەساسی بیت وچارەسەری نە وەرگریت رەنگە مەترسیی ل سەر ژیانا وی دروست ببیت و حالەت ھەنە ژی ژبەر حەساسی مروڤ گیانێ خوە ژ دەست دەت تایبەتی ئەو جۆرین حەساسی یێن مەترسیدار یێن دەرمان و خۆارنا دروست دبن پێدڤیە وەلاتی چارەسەری وەربگریت.
ئه‌ڤرۆ نيوز، نيوار محه‌مه‌د سه‌ليم:
شڤێدى حه‌جيا ئێكێ يا هه‌رێما كورستانێ ل وه‌لاتێ سعوديێ گيانێ خوه ژ ده‌ست دا كو خه‌لكا ناحيا خه‌ليفانه سه‌ر ب قه‌زا سوران ڤه.
كاروان ستونى، ژ راگه‌هاندنا حه‌ج و عومره‌يا كوردستانێ د داخۆيانيه‌كێ دا بۆ ئه‌ڤرۆ نيوز گۆت: “زه‌ينه‌ب سالح زاناوێر كو ژ دايكبوويا 1947ێ يه و خه‌لكا ناحيا خه‌ليفانه سه‌ر ب قه‌زا سوان، دره‌نگى شه‌ڤا بۆرى ل نه‌خۆشخانه‌كا باژێرێ مه‌ككێ گيانێ خوه ژ ده‌ست دا”.
ب گۆره‌ى راگه‌هاندنا تيما راگه‌هاندن و په‌يوه‌نديێن حه‌جيێن هه‌رێم- سعودى ئه‌ڤێ حه‌جيايێ به‌رى نوكه نه‌خۆشيا دلى هه‌بوو، دبيته حه‌جيا ئێكێ ژى ئه‌ڤ ساله گيانێ خوه ژ ده‌ست دده‌ت.
كاروان ستونى گۆتژى: “ئه‌ڤرۆ سپێدێ ئه‌و حه‌جيا ل گۆرستانا شه‌هيدێن حه‌ره‌م ل باژێرێ مه‌ككێ هاته ڤه‌شارتن و بڕياره ئه‌ڤ شه‌ڤه ژى پرسا وێ بهێته دانان”.
ئەڤرۆ نیوز، سویسرا، ئازاد گولەیی:
شڤێدی د چارچوڤێ یاریێن گەرا ئێکێ دا ژ ڤاڤارتنێن دەربازبوونێ بۆ موندیالا 2018 ل وەلاتێ روسیا ھەلبژارتیێ سویسرا ل ناڤ ئەرد و جەماوەرێ خوە دا شیا سەرکەفتنەکا گرنگ ل سەر قارەنانا یورۆیا 2016 ھەلبژارتیێ پرتوگال توماربکەت ب دو گولان بێ بەرامبەر.
ئه‌ڤرۆ نيوز، نيوار محه‌مه‌د سه‌ليم:
فلمێ “ره‌شه‌با” يێ ده‌رهێنه‌رێ ناڤدارێ كورد و كوڕێ باژێرێ دهۆكێ حسێن حه‌سه‌ن دێ فلمێ ڤه‌كرنا فلمه ڤيستڤالا دهۆك4 نێڤده‌وله‌تيا يا سينه‌مايێ بيت.
روودانێن ڤى فلمى ژ ژيوارى هاتينه وه‌رگرتن و ل سه‌ر هاتنا شه‌رێ داعش و گرتن و ره‌ڤاندنا كچێن ئێزدى يه و چاوانيا كرين و فرۆتنێ ب وان كچان ل بازارێن سه‌بايا.
هه‌رديسا ركێش شه‌هباز يێ كو رۆلێ سه‌ره‌كى د ڤى فلمى دا دگێريت تێدا حه‌ز ژ كچه‌كێ دكه‌ت و بابێ وێ كچێ ل سه‌ر رازى دبيت و ماره دكه‌ت و پشتى روودانان دايك و بابێن خوه ل ئێك ژ كه‌مپێن باژێرێ دهۆكێ ئاكنجى دكه‌ت و چه‌كێ شه‌ره‌فێ دهه‌لگريت دا كو به‌ره‌ڤانيا ژ ئاخا خوه بكه‌ت، د ده‌مه‌كى دا كو هه‌ڤژينا وى د ده‌ستێن داعش دايه.
پاشان ژى پشتى ئازادكرنێ ئه‌و كچه دڤه‌گه‌ريته ڤه و جهێ برينان ل لاشێ وێ هه‌يه و ژ لايێ ده‌روونى ژى ڤه ره‌وشا گه‌له‌ك تێكچوويه.
ئه‌ڤ روودانه و روودانێن زێده‌تر دێ د رۆژا ئێكێ يا فلمه فيستڤالێ دا هێنه نمايشكرن ل رۆژا ئه‌ينى رێكه‌فتى 9ى ئيلۆنا 2016ێ.
ئه‌ڤرۆ نيوز:
بڕیاردەرا لیژنا پێشمەرگەی ل پەرلەمانێ کوردستانێ دیار کر کو ھاریکاریا پەرلەمانی بۆ خێزانێن شەھیدێن شەڕێ دژی داعش ھاتیە ڕاگرتن و ھاریکاریا وەزارەتا پێشمەرگەی ژی بۆ خێزانێن شەھید و برینداران ژی وەکی پێدڤی ب ڕێڤە ناچیت.
بھار عەبدولڕەحمان، بڕیاردەرا لیژنا پێشمەرگەی ل پەرلەمانێ کوردستانێ بۆ رۆژناما ئەڤرۆ ئاشکرا کر، ھاریکاریا پەرلەمانێ کوردستانێ بۆ خێزانێن شەھیدێن شەڕێ دژی تیرۆرستێن داعش دو ملیۆن دیناربوون، بەلێ ئەڤە سالەکە ژ ئەگەرێ نەبوونا پارەی، ئەو ھاریکاریە گەلەک ب کێمی دھێتە مەزاختن و گۆت: “ب تنێ د حالەتەکی دا ئەو ھاریکاریە دھێتە مەزاختن، ھەکە خێزانا شەھیدەکی داخوازبکەت و ئەندامەکێ لیژنا پێشمەرگەی ل پەرلەمانی پشتەڤانیا داخوازا وێ خێزانێ بکەت، د وی دەمی دا دێ پارە بۆ ھێتە مەزاختن، ب شێوەیەکێ گشتی ھەتا نوکە پەرلەمانی بۆ نیڤا شەھیدێن شەڕێ دژی داعش ھاریکاری بەلاڤکرینە و پڕۆسا بەلاڤکرنا پارەی ل سەر خێزانێن شەھیدان نوکە ی ھاتیە ڕاگرتن.
بھار خانێ ئاماژە ب وێ چەندێ ژی کر، وەزارەتا پێشمەرگەی ژی ھاریکاریێن ب ڤی رەنگی بۆ خێزانێن شەھیدێن دژی داعش ھەبووینە و بۆ خێزانا ھەر شەھیدەکێ پێنج ملیۆن دینار و بۆ برینداران ژی ملیۆنەک وەکو ھاریکاری د مەزاختن و گۆت: “مە دووڤچوون ل سەر ڤێ چەندێ کریە، نوکە وەزارەتا پێشمەرگەی ژی وەکی پێدڤی ئەڤێ ھاریکاریێ ناگەھینیتە خێزانێن شەھید و برینداران، ھەروەکو وەزارەتێ بۆ مە دیار کری، ئەگەر ئەوە کو پارە د بانکێ دا نینە، پڕۆسا بەلاڤکرنا ھاریکاریا وەزارەتا پێشمەرگەی یا بەردەوامە، بەلێ گەلەک ھێدی ب ڕێڤە دچیت، ئەم پێشبینی دکەین ھێشتا ھژمارەکا زۆرا خێزانێن شەھید و برینداران ئەڤ ھاریکاریە وەرنەگرتینە”.
ئەڤرۆ نیوز:
سەرۆکێ کوتلا برایەتی و پێکڤەژیانێ ل جڤاتا پارێزگەھا نەینەوا بۆ رۆژناما ئەڤرۆ دیار کر کو بڕیار ھاتەدان ژ نوکە و پێڤە ئاوارە ل نەخۆشخانا ڤین ل پارێزگەھا دھۆکێ و نەخۆشخانا ژیان ل ھەولێرێ ل سەر ئەرکێ وان پارێزگەھان بھێنە چارەسەرکرن.
سەیدۆ چەتۆ، سەرۆکێ کوتلا برایەتی و پێکڤەژیانێ ل جڤاتا پارێزگەھا نەینەوا ئاشکرا کر، ل سەر بودجا گەشەپێدانا پارێزگەھان دێ مەزاختیێن نەخۆشان ھێنە مەزاختن، ئەڤە ژی د دەمەکی دایە کو وەزارەتا ساخلەمیا بەغدا وەکو پێدڤی خزمەتێن ساخلەمیێ ناگەھینتە ئاواران، خەلکەک نەخۆش دبیت و مەزاختی نینن چارەسەریا خوە بکەن بۆ بەرژوەندیا گشتی بڕیار ھاتەدان ئێدی ل دو نەخۆشخانان ل ھەرێما کوردستانێ چارەسەریا ئاواران بھێتە کرن.
سەرۆکێ کوتلا برایەتی و پێکڤەژیانێ ل جڤاتا پارێزگەھا نەینەوا ئاماژە ب وێ چەندێ ژی کر، بڕیار ھاتیەدان ھەر نەخۆشەکێ ئاوارە ل دووڤ ڕاپۆرتا نۆشداری چارەسەریا وی ل ھەرێما کوردستانێ نەھێتە کرن یان چارەسەریا وی د ناڤ عیراقێ دا نەبیت، ئەو نەخۆش دێ ل سەر بودجا گەشەپێدانا پارێزگەھا نەینەوا بۆ ژ دەرڤەی وەلاتی ھێتە ڕەوانەکرن و گۆت: “پشتی مە گەلەک گەنگەشە ل سەر ڤێ چەنتدێ کری، ئەم گەھشتینە وێ باوەریێ کو دڤێت ئەم پشتەڤانیێ ل وەزارەتا ساخلەمیا حوکمەتا ھەرێما کوردستانێ بکەین ھەر چو نەبیت ھندەک ئاوارێن نەخۆش ئەم چارەسەر بکەین و ئەو بارگرانیا مەزن ل سەر دەزگەھێن ساخلەمیا ھەرێما کوردستانێ دروست بووی نەھێلین مەزنتر لی بھیت”.
ئەڤرۆ نیوز:
د چارچوڤێ سەرەدانا خۆ دا بۆ پارێزگەھا دھۆکێ وەزیرێ ساخلەمیێ یێ حوکمەتا ھەرێما کوردستانێ پشکداری رێورەسمێن ب دووماھی ئینانا کۆرسێ پێشڤەبرنا ساخلەمیێ بوو ئەوێ ژ لایێ ساخلەمیا دھۆکێ و ب پشتەڤانیا رێکخراوا رێکخراوا giz یا ئەلمانی ھاتیە ڤەکرن و ھەموو نۆشدارێن پشکدار ھاتنە خەلاتکرن و باوەرنامێن رێزلێنانێ پێ ھاتنە بەخشین و دووڤ دا وەزیرێ ساخلەمیێ سەرا چەندین پرۆژێن خزمەتگوزاری دا و گۆت:”سەرەرایی قەیرانا دارایی و ھاتنا رێژەکا زۆر ئاواران بۆ دھۆکێ ساخلەمیا دھۆکێ ب باشترین شیوە کار و خزمەتێن ساخلەمیێ ل نەخۆشخانان و بنگەھێن ساخلەمیێ و کەمپێن ئاوارە و پەنابەران و بەرۆکێن شەری ئەنجامداینە”.
د. رێکەوت حەمە رەشید، وەزیرێ ساخلەمیێ یێ حوکمەتا ھەرێما کوردستانێ ئاشکرا کر کو چوونا نۆشدارن بۆ دەرڤەی وەلاتی ھەموو پارێزگەھێن ھەرێما کوردستانێ ڤەگەرتینە، رەنگە ژ ئەگەرێ قەیرانا دارایی و کێمیا مووچەی بەھرا پتریا وەلاتێن بیانی دەرگەھی بۆ نۆشداران ڤەدکەن و کاری بۆ وان دبینن ژبەر ڤێ چەندێ نۆشدار بەرەب دەرڤەی وەلاتی دچن و گۆت: “نوکە ئەم دگەل سەرۆکاتیا جڤاتا وەزیرێن حوکمەتا ھەرێما کوردستانێ مژوولی دانانا پلانەکێ نە داکو چارەک بۆ چوونا نۆشدارێن قەستا دەرڤەی وەلاتی دکەن بھێتە دیتن، رەنگە نۆشدارێن ژنوو دەردچن ل جھێ وان نۆشدارێن قەستا دەرڤەی وەلاتی دکەن بھێنە دامەزراندن یان ژی رێگری ل چوونا نۆشداران بۆ دەرڤەی وەلاتی بھێتەکرن و مووچێ وان باش بکەین”.
ناڤھاتی ئاماژە دا وێ چەندێ کو پشتی ل سالا 2014 حوکمەتا عیراقێ بۆدجا ھەرێمێ بری د ھەیڤا شەشا ھەمان سال دا ملیۆنەک و 700 ھزار ئاوارە ھاتنە ھەرێما کوردستانێ و سەرەرایی ڤێ چەندێ تووشی شەرێ تیرۆرستێن داعش ژی بووینە ژ بەر ڤێ چەندێ دەرمان و پێدڤیێن نۆشداری زێدەتر دڤێن و گۆت: “پەیوەندیێن وەزارەتا ساخلەمیا ھەرێمێ دگەل وەزارەتا ساخلەمیا عیراقێ د ئاستەکێ باش دانە و دەرمانان رەوانە دکەن، بەلێ نە د ئاستی پێدڤی دانە، چونکی ئەو دەرمان بتنێ 45% پێدڤیێن نەخۆشخانا و بنگەھێن ساخلەمیی و ئاوارە و پەنابەران پڕدکەن و سالا 2012 و 2013ێ چوو سنوور بۆ کرینا دەرمان و پێدڤیێن نۆشداری نەبوون و ھندی مە ڤیابان ئەم دشیاین دەرمانان و پێدڤیێن نۆشداری بکرین، بەلێ نوکە سنوور بۆ کرینا دەرمانان و پێدڤیێن نۆشداری ھاتیە دانان و ھەیڤانە ئەم دشێن بتنێ ب بھایێ شەش ملیار دیناران دەرمانان و پێدڤیێن نۆشداری بکرین ئەڤ رێژا ئەم دکرین نە ل دووڤ پێدڤیێن ساخلەمیێ نە و تێرا مە ناکەن، بەلێ ھەر چەوا بیت ھەتا نوکە خزمەتێن ساخلەمیێ ب شێوەکێ باش دھێنە پێشکێشکرن”.
د لایەکێ دی دا ناڤبری خویا کر کو پرانیا رێکخراوێن جیھانی سەرا ساخلەمیا ھەرێمێ ددەن و دمیننە مەندەھوش و دبێژن ھوون چەوا دشێن خزمەتێن ساخلەمیی بێ بەرامبەر پێشکیشی وەلاتێن ھەرێمێ و ئاواران و پەنابەران بکەن و گۆت: “ئەم یێ بزاڤان دکەین پلانەک بھێتە دارشتن بۆ دانا قەرزێن کۆمپانیێن کرینا دەرمان و پێدڤین نۆشداری، وەزارەتا ساخلەمیێ نێزیکی 100 ملیار دیناران یا قەردارە و نوکە ئەم یێ دگەل سەرۆکاتیا ئەنجومەنێ وەزیران و وەزارەتا دارایی بزاڤان دکەین ڤێ ئاریشێ چارە بکەین”.
وەزیرێ ساخلەمیێ یێ حوکمەتا ھەرێما کوردستانێ ئاشکرا کر کو ل ساخلەمیا دھۆکێ نێزیکی ھەشت ھزار نۆشدار و کارمەندێن ساخلەمیێ ھەنە، بەلێ ل ھەولێر و سلێمانیێ رێژا نۆشدار و کارمەندێن ساخلەمیی پترە ژ دھۆکێ و گۆت: “دەمێ دەستبکاربووین دۆرین ھزار و 100 کەسان ل ساخلەمیا دھۆکێ ھاتنە دامەزراندن ل کابینا حەفتی و سالا بۆری چونکی نۆشدار ل دھۆکێ د کێمبوون ئەم نەچاربووین ھەیڤانە ھندەک نۆشداران ژ ھەولێرێ ڤەگۆھێزینە دھۆکێ ھەر سێ ھەیڤان جارەکێ ھندەک نۆشدار ژ ھەولێر د ھێنە ڤەگوھاستن بۆ دھۆکێ”.
ناڤھاتی دیار کر کو ل کابینا حەفتێ یا حوکمەتا ھەرێما کوردستانێ نێزیکی دو ھزار و 600 نۆشداران ھاتنە دامەزراندن و رێژا نۆشدار و کارمەندێن ساخلەمیێ ل دھۆکێ ھاتە زێدەکرن، بەلێ نوکە ژ ئەگەرێ قەیرانا دارایی نۆشدارێن ناڤەراست و ژێریا عیراقێ ژی دچنە دەرڤەی وەلاتی و گۆت: ” پلانەک ل بەر دەست دایە نۆشدارێن گشتی یێن ئەڤ سالە و دەرمانسازی و ددانان یێن سالا بۆری دگەل پەرستارێن زانکۆیی ب دامەزرینین داکو بشێن ب شێوەکێ بەروەخت ئاریشا کێمایا نۆشدار و ستافێ نەخۆشخانەیان ل دھۆکی چارە بکەین”.
د. رێکەوت حەمە رەشید ئاشکرا کر کو ئەو پێشبینیێ دکەن ل شەرێ رزگارکرنا مووسل ھەتا 400 ھزار ئاواران قەستا ھەرێما کوردستانێ بکەن و پشکا شێری دێ ب بەر پارێزگەھێن دھۆک و ھەولێرێ کەڤیت و گۆت: “ئەم دگەل پتریا رێکخراوێن جیھانی و حوکمەتا عیراقێ و وەلاتێن ورۆپی ئاخفتینە و مە ئاگەھدار کرینە کو ھەرێما کوردستانێ شیان نینن ڤان ھەموو ئاواران ڤەحەوینت و خزمەتان پێشکێشی وان بکەت نەخاسمە نوکە وەرزێ بەلاڤبوونا چەندین جۆرێن نەخۆشیانە ئەم پیدڤی زێدەتر ھاریکاریانە”.
نيشاندان
