ئه‌ڤرۆ نيوز:
وەک دیار بەریا چەند رۆژان ب بریارا پارێزگارێ دھۆکێ رێڤەبەرێ ناحیا چەمانکێ ھاتە ڤەگۆھاستن بۆ ناحیا (کانی ماسێ)، لێ دەرکرنا ڤێ بریارا پارێزگارێ کارڤەدانێن جودا ب خوە ڤە دیتن و خەلکێ چەمانکێ ھاتە سەر خەت و ب چو رەنگان دگەل بریارا پارێزگاری نینن.ژ ژلایەکێ دیتر ڤە رێڤەبەرێ ناحیا چەمانکێ بو رۆژناما ئەڤرۆ ئاشکرا کر، ئەز ژ بەر کەیسێن گەندەلیێ ھاتمە ڤەگوھاستن و ھەموو رێڤەبەرێن مە حەز دکەن گەندەلی بھێتە کرن.
رێڤەبەرێ ناحیا چەمانکێ ل دور بابەتی بۆ ئەڤرۆ دیاردکەت: ل رێکەفتی ١/٦/٢٠١٤ ئەز وەک رێڤەبەرێ ناحیا گردەسین ل سنورێ قەزا ئاکرێ دەستبکار بوویمە کو پشتی دەستبکار بوونا من ب حەفتیەکێ چەکدارێن داعش روو ب روو سنورێن ھەرێما کوردستانێ بووینە، لەورا د وی ماوێ نەخۆش و بێ دەراڤ دا ل ناحیا (گردەسین) من ب ھەموو شیان ڤە کارێ خوە یێ رۆژانە ئەنجامدایە، چونکو ل وی دەمی ئەز ئاکجیێ باژێرێ دھۆکێ بوم و ھەموو سپێدەھیان ب درێژاھیا پتر ژ (١) دەمژمێر و نیڤان من قەستا وێ ناحیێ کریە و زێدەباری وێ چەندێ د وی ماوەی دا جھێن شولەژێ وەک پێدڤی خزمەتا من نەکر و چو ترۆمبێلێن میری بۆ من نە راسپاردن، بەلکو ئەز ب ترۆمبێلا خوە یا تایبەت د چوومە دەواما خوە و رۆژەکا ب تنێ ژی جھێن شولەژێ (١) لیترا پەنزینێ بۆ من نە مەزاختیە.
زێدەتر گۆت: زێدەباری وێ چەندێ من ھەر یا خوە بێ دەنگ کری، چونکو رەوشا ھەرێمێ یا باش نەبوو و من نەخواستیە ھاریکاریا من بھێتە کرن، ژبەر دەستکورتیا دارایی و ئەو د دەمەکی دا بۆ کو ھەر رێڤەبەرەکێ ناحیێ ترۆمبێلەکا حکوومی و (٢) زێرەڤان ل گەل دا بوون، لێ چاڤێ من ل وێ یەکێ نەبوویە و گوت: لێ پشتی چەند گوھۆرین د پوستێن رێڤەبەرێن ناحیان دا ھاتینە کرن ل سەرانسەری پارێزگەھا دھوکێ ئەز ژی ل ناحیا گردەسین ھاتمە ڤەگوھاستن و ٢٣/١٠/٢٠١٦ وەک رێڤەبەرێ ناحیا (چەمانکێ) ل سنورێ قەزا ئامێدیێ دەستبکار بوویمە و ھەر ل دەمێ خەلکێ ناحیا چەمانکێ سەرەدانا من دکر و پیرۆزباھی ل من دکر من دزانی دلێ وان یێ تژی ژان و گازندەیە و من دزانی ھندەک کەسێن (مافیا) ل سنورێ ناحیا چەمانکێ ھەنە.
ھەر رێڤەبەرەکی ل دووڤ دلێ مافیێن وێ ناحیێ بیت دێ ژیانا وان خوەش بیت، لێ ھەر رێڤەبەرەکێ خودان ھەمان ھەلویستێ من بیت، دێ وەک من ھێتە ڤەگوھاستن و گەلەک جاران داخواز ژ من ھاتیە کرن ئەز گەندەلیێ ل ناحیا چەمانکێ بکەم، لێ ب چو رەنگان ئەو چەندە قەبیل نەکریە و بۆ رازیبوونا من کەسێن شولەژێ و ئەوێن وەک مافیان کاردکەن کۆژمێن پارەی دگەل من گۆتنە ب تنێ دا کو ئەز رازی بم و وەک وان کاربکەم، لێ من ھەموو جاران رەتکریە، لەورا نھا دا ئەڤە بوویە چارەنڤیسێ من و ئەو چەندە دگەل من ھاتیە کرن.
سەربەست خالد بانی رێڤەبەرێ ناحیا چەمانکێ تایبەت بۆ ئەڤرۆ دا دیارکرن ژی: ل سنورێ ناحیا چەمانکێ و ل (٤) گوندان گەلەک (گاز ) ھەیە و دەرکەفتیە ل دەڤەرێ و ھندەک کەساتیان ل دەڤەرێ دگەل نوونەرێن وان کومپانیێن ل سەر بیرێن گازێ کار دکەن رێکەفتینە کو ھەر مفایەکێ ل سەر وان بیرێن گازێ دەربکەڤیت رێژەکا بەرچاڤ یا وی مفای بو وی گرۆپی بیت و داخواز ژ من کر ئەز ژی دگەل وێ گەندەلیێ یێ پشکدار بم، لێ من ب ھەموو مرۆڤایەتیا خوە ڤە رەتکریە و دگەل کارنەکریە و بۆ مە رێگر ل ھەمبەری وی مفای ئەوێ ژ بیرێن گازی کو دگەھتە وان کەسان و من خواستیە مافێ خەلکێ دەڤەرێ و مافێ خودان وان ئەردان نەھێتە خوارن ئەوێن بیرێن گازێ لێ دەرکەفتین، لێ ژبەر نەرازیبونا مە و دیارکرنا وان کەیسێن گەندەلیێ ئەو نەچار بوون بۆ من نەخوەش بکەن و گازندێ ژ جەنابێ پارێزگارێ دھۆکێ بکەن و پارێزگارێ دھۆکێ بێ ڤەکۆلینا کەیسی رابوویە ب ڤەگوھاستنا من بۆ ناحیا (کانی ماسێ). لێ ئەز ب چو رەنگان یێ بەرھەڤ نینم ل سنورێ ناحیا کانی ماسێ دەستبکار بم و ئەز ژ ئاشکراکرنا وان کەیسێن گەندەلیێ یێ پەشیمان نینم.
رێڤەبەرێ ناحیا چەمانکێ خواست دیار بکەت ژی: ئەگەر ب تنێ کێماسیەک ژلایێ من ڤە ھەبیت، ئەز ب ھەموو شیانێن خوە ڤە داخوازێ ژ دادگەھا دھۆکێ و نەزاھێ دکەم پێرابوونێن یاسایی ل بەرامبەری من ب گرنە بەر و یێ بەرھەڤم ل بەرسینگێ دادوەری یێ ئامادەبم، لێ ب تنێ ئەگەر خەلەتی و کێماسیەک د من و کارێ من دا ھەبیت، لێ ژبەر کو ئەز کەسەکێ بێ گونەھم و وان خواستیە ئەز خوە بێ دەنگ بکەم، لێ خوە بێ دەنگ ناکەم و من نەرازیبونا خوە وەک رێڤەبەرێ ناحیا چەمانکێ من گازندە و نەرازیبونا خوە گەھاندیە ئەنجوومەنێ پارێزگەھا دھۆکێ کو دووڤچوونا ڤی کەیسی بکەن و ئەگەر بزانم چو پێڤە ناھێت، ئەز یێ بەرھەڤم سکالایێ تۆمار بکەم.
سەربەست خالد بانی نەڤەشارت ژی: ناحیا چەمانکێ ب ھەموو رەنگەکی ڤە یا دوورە ژ خزمەتگوزاریان، مینا ھێلا ئەنترنێتێ و نەبوونا چو پارکان و نە جادەکا پێدڤی و یا مرۆڤ شەرم ژێ دکەت بێژیت بەریا چەند رۆژان ئافرەتەکا وێ دەڤەرێ چو بەردلوڤانیا خودێ و باژێرڤانیا چەمانکێ ژ سالا (٢٠٠٥) ھاتیە دامەزراندن و ھەتا نھا دا (حەفارەک) نینە بشێت گۆرا بکۆلیت و مە ب (مەربێلا و قەزمان) گۆر کولایە، لەورا من خوە ل گەلەک ئاریشێن دەڤەرێ کرە خوەدان، لێ ل شوونا دەستخوشی ل من بھێتە کرن، ئەو رابووینە ب ڤەگوھاستنا جھێ من یێ کاری و ئەو د وی دەمی دایە ئەز خودان مالباتەکا خودان شەھیدم و شورەشگێرم و گەندەلیێ قەبوول ناکەم، لەوا بەریا دو رۆژان خەلکێ ناحیا چەمانکێ خواست خوپیشاندانەک ئەنجام دا دژی وێ چەندێ ئەز ل وێ دەڤەرێ ب مینم دا کو بەردەوام خوە ل گازندێن وان بکەمە خوەدان و گەلەک جاران گەفێن کوشتنێ لمن ھاتینە کرن و گۆتیە ئێدی بەسە ژ ڤان کاران ڤەبە، لێ ئەز ھەر بەردەوام بوویمە ل سەر کارێ خوە کو من نەھێلا یە مافێ خەلکێ دەڤەرێ بھێتە خارن.
ئەو گرۆپێ مینا (مافیان) ل سنورێ ناحیا چەمانکێ ھەردەم ب وی رەنگی بووینە کو ھەردەما پرۆژەیەک یان ھەر کارەکێ ل سنورێ ئەوێ ناحیێ ھاتبا کرن ئەوی گرۆپی کو ژ چەند کەسێن شولەژێ پێک ھاتبوون خواستیە دەستێ خوە داننە سەر وی پرۆژەی یان ژی بەھرا خوە بکەنە تێدا و ب ڤێ چەندێ مافێ ھەژار و دەستکورتێن دەڤەرێ دھاتە خوارن و مە وەک رێڤەبەرێ ناحیا چەمانکێ نەخواستیە ئەو مافێن خەلکی بھێنە خارن و چو دەمان مە خەلەتی ل سەر خوە قەبیل نەکریە، چونکە ل وی دەمێ ئەز ل رێڤەبەرێ ناحیا (گردەسین) ل سنورێ قەزا ئاکرێ مە پتر ژ (٩٠) کەسان رەوانەی دادگەھێ کرینە، چونکە وان کەسان زێدەگاڤی کربوون و مە خوە ل سەر خەلەتیا وان بێ دەنگ نەکر و ل ھەر جھێ کاربکەم قەبوول ناکەم گەندەلی لێ پەیدا ببیت.
ئەم وەک رێڤەبەرێ ناحیێ خوەدان چەند دەستھەلاتەکا کارگێری نە ل دەڤەرێ لێ ھەر جارەکا ئەز بوویمە رێگر ل ھەمبەری وی گرۆپی، گەفێن کۆشتنێ ل من ھاتینە کرن.
ل دووماھیێ سەربەست خالد بانی رێڤەبەرێ ناحیا چەمانکێ بۆ ئەڤرۆ نەڤەشارت ژی: ئەز ب چو رەنگان پابەندی بریارا پارێزگارێ دھۆکێ نابم و ب ئێک رۆژا ب تنێ ژی ل ناحیا کانی ماسێ دەستبکار نابم و یێ بەرھەڤم ب ھەموو خزمەت و کارێن خوە ڤە ل مالا خوە ب روونم خار، ب تنێ پابەندی بریارا ناڤبری نابم، چونکو ئەو بریارە بێ ڤەکولین ھاتیە دان و مافێ من وەک رێڤەبەرەکێ ناحیەکێ ھاتیە خوارن و ل ھەر جھێ کارێ خوە لێ بکەم دێ یێ بەردەوام بم ل سەر وێ چەندێ راستیا ھەر بابەتەکێ بۆ رایا گشتی دیاربکەم و خەلک بزانیت مافێن وان ب چو ئاوایی نە.
ناحیا چەمانکێ دھێتە ھژمارتن ژ ئێک ناحیێن قەزا ئامێدیێ و کەسێن لێ دئاکنجی ٤٠٠٠ کەسان بخوە ڤە دگریت و نێزیکی (٦٤) گوندان ل سنورێ ناحیا چەمانکێ ھەنە و پتریا گوندێن وێ دەڤەرێ د چوولکرینە، چونکو پارتا کارکەرێن کوردستانێ (پەکەکە) ل وان گوندان د نیشتەجێکرینە و پتر (١٠) ھوبێن کارگێری لێ ھەنە کو ھندەک ب سەرسنک و ئامێدی و دھۆک ڤە د گرێدای نە.
ئەڤرۆ نیوز:
رێڤەبەرێ کۆچ و کۆچبەران ل پارێزگەھا دھۆکێ ئیماژە ب وێ چەندێ کر، وەزارەتا کۆچ و کۆچبەرێن عیراقێ دانوستانان دگەل وەزارەتا ناڤخۆیا ھەرێمێ دکەت بۆ ڤەگوھاستنا ئاوارەیێن مووسل بۆ سنوورێ پارێزگەھا دھۆکێ دیار کر، کو رۆژانە ب تنێ ژبەر نەبوونا خوارنێ بیست خێزانێن دەشتا نەینەوا دگەھنە دھۆکێ.
مەجید شوکری، رێڤەبەرێ کۆچ و کۆچبەرێن دھۆکێ بۆ رۆژناما ئەڤرۆ گۆت “ھێشتا پێلا ئاوارەیێن مووسل بەرەف سنوورێ پارێزگەھا دھۆکێ نەھاتیە و نوکە وەزارەتا کۆچ و کۆچبەرێن عیراقێ یا دانوستانان دگەل وەزارەتا ناڤخۆیا ھەرێما کوردستانێ دکەت، ھەتا رێکێ بدەنێ ھژمارەکا ئاوارەیێن بەرێ راستێ یێ مووسل بھێنە ڤەگوھاستن بۆ دھۆکێ و مە جھێ حەواندنا پێنج ھزار خێزانێن ئاوارە ھەیە و دشێین پتری پێنج ھزار خێزانا پێشوازیێ لێ بکەین، ئەڤە ژی دێ ژ رۆژئاڤایێ مووسل ھێنە ڤەگوھاستن بۆ خازری و د دووڤ دا دێ ھێنە ڤەگوھاستن بۆ کەمپا نێرگزلیێ ل سنوورێ قەزا شێخان، ئەم پێشبینی دکەین پتری ڤی جھێ مە بەرھەڤکری ئاوارەیێن مووسل بھێنە ڤەگوھستن بۆ دھۆکێ”.
مەجید شوکری گۆت ژی “مە جۆرەکێ دی یێ ئاوارەیێن مووسل ھەنە، ئەو ژی ئاوارەیێن دەشتا مووسلن کو رۆژانە ھەتا بیست خێزانێن دەشتا نەینەوا خوە دگەھینە پارێزگەھا دھۆکێ، بەلێ ئەگەرێ ھاتنا ئەڤان ئاوارەیان ژبەر شەڕی نینە، بەلکو ژ برسادا ئاوارە دبن، پێدڤیە حوکمەتا عیراقێ خزمەتگوزاریێن ژیانێ یێن بلەز بۆ خەلکێ دەڤەرێ دابین بکەت ھەتا ئاوارە نەبن، ھەتا مە پێشنیار کریە پشکا خوارنا ھەیڤانەیا ئەڤان دەڤەرا ببیتە دو بەرامبەر”.
ئەڤرۆ نيوز:
بەرپرسێ پەیوەندی و راگەھاندنا رێڤەبەریا پۆلیسێن پارێزگەھا دھۆکێ بۆ رۆژناما ئەڤرۆ دیار کر کو ل شەڤا سێشەمبی ل سەر شەڤا چارشەمبیێ ئەفسەرەکێ پێشمەرگەی ب پلا ملازم ژ لایێ چەند کەسان ڤە ل بەر دەرگەھێ مالا خو ب چەکێ کلانشیکوفێ ھاتیە کوشتن.
رائیدێ مافپەروەر ھێمن سلێمان، بەرپرسێ پەیوەندی و راگەھاندنا رێڤەبەریا پۆلیسێن پارێزگەھا دھۆکێ خویا کر، ناڤێ وی ئەفسەری “سیروان محەمەد” ژیێ وی ٣٠ سالە و ژیانا ھەڤژینیێ پێک نە ئینایە و گۆت “تەرمێ وی بۆ نەخۆشخانا شێخان ھاتە ڤەگوھاستن و د دووڤ دا بۆ پزیشکی یا داد ل پارێزگەھا دھۆک ھاتە ڤەگوھاستن و دوھی ٨ى ئادارا ٢٠١٧ێ ل ناحیا کەلەکچی ھاتە ڤەشارتن.
رائیدێ مافپەروەر ھێمن سلێمان گۆت “ل دووڤ پێزانینێن دەستپێکێ، وەسا دیارە بەری دو سالان کێشەیەکا جڤاکی د ناڤبەرا دو مالان دروست بوویە و چەندین جاران بزاڤێن پێکئینانێ ھاتینە کرن ژلایێ کەسایەتیێن جڤاکی ڤە، لێ ھەر پێک نەھاتینە”.
ناڤبری زێدەتر گۆت “سیروان دەرچوویێ کۆلیژا ئادابێ پشکا راگەھاندنێ بوو و نھا ئەفسەر بوو سەر ب وەزارەتا پێشمەرگەی ڤە”.
ئه‌ڤرۆ نيوز:
ژیان ب لەز دەرباز دبیت، ھندەک جاران ئەم ناگەھین ھندەک کارێن خوە بکەین، لەورا ئەم پێدڤی نە رێکخستنەکێ بێخینە کارێ خوە دا بشێین پتر کاران بکەین و بێی دودلی و فشارێن دەروونی و لەزێ، ب تایبەت ژنا خوادن کار کو ب کارێ کابانیا مالێ ژی رادبیت و پێدڤی ب رێکخستنەکا باشترە، بۆ پتر رێک و پێکیا کاری ل دووڤ ڤان خالان ھەرە:
بەرنامەکێ رۆژانە بدانە و رێزێ لێ بگرە.
ب شەڤێ جلک و پێدڤیێن خوە بەرھەڤ بکە دا سپێدێ نە شەپلی.
کارەکێ ل دووڤ شیانێن خوە بکە.
ھندەک ھەڤالان بنیاسە و پەیوەندیێن باش د گەل دروست بکە.
کاودانێن خوەیێن تایبەت بۆ بەرپرسێن خوەیێن کاری بێژە، دا دەمێ پێدڤی دەستووریان بی یا بساناھی بیت.
کارێ ئەڤرۆ بۆ سوبە نەھێلە، ژبەرکو سوبە ژی کارێن خوە ھەنە.
ھندەک دەمی بۆ ھزرکرنێ تەرخان بکە.
دەمەکی بۆ ھەڤژین و زارۆیان تەرخان بکە.
دەمەکی بۆ بێھنڤەدانا خوە تەرخان بکە دا فشار ل سەر تە سست ببن.
کارێن خێرێ و مرۆڤاتی ژبیر نەکە چونکو ئەو دەروونێ مرۆڤی تەنا دکەن.
گرنکیێ بدە ساخلەمیا خوە و وەرزشێ بکە.
ئارازوویێن زارۆینیێ بکە دا دلێ تە خۆش بیت و بیرھاتنێن خۆش بھێنە بیرا تە.
دەرگەھێ رۆژێن بۆری بگرە و یێن رۆژێن بھێن ڤەکە و د سنۆرێ رۆژا خوە دا بژی.
ئه‌ڤرۆ نيوز:
سترانبێژا گەنج دیلانار یلدز بۆ ئەڤرۆ دیارکر: ئەڤە دەمەکە ئەو یا ل دھۆکێ و مژوولی تۆمارکرنا سترانەکا نوویە، و نوکە د بەرنامێ وێ دا نینە چ سترانێن دی یێن دوقۆلی بێژیت.
ناڤھاتیێ گۆت: سترانا منا نوو ب زارێ سۆرانی یە، پەیڤ و ئاواز یێن ئەردەوان برادۆستی نە، بۆ جارا ئێکی یە سترانەکا بڤی رەنگی دبێژم.
ل دۆر گۆتنا سترانێن دوقۆلی ژی گۆت: راستە سەربۆرا منا ئێکێ ل گەل ھونەرمەند ئدریس بەدەل بوو، کو مە سترانەکا دوقۆلی ب ناڤێ ( ئەزحەزژ تەدکەم ) پێکڤە گۆت و کلیپکر، سوپاس بۆ خودێ ھەر زو دەنگڤەدا و خەلکەکێ زۆر حەزژێکر، من ژی پێشبینیا وێ چەندێ دکر، چونکو سترانەکا خۆش و غەریب بوو، پشتی بەلاڤ بووی گەلەک سترانبێژان داخواز ژمن کرن کو سترانێن دوقۆلی ل گەل بێژم، لێ ئەز رازی نەبووم ، چنکو نوکە من ل بەر نینە چ سترانێن دی یێن دو قۆلی بێژم، و ئێدی من دڤێت ئەز بتنێ سترانان بێژم. چونکو ئەز یا ددەستپێکا سترانگۆتنێ دا و خەلەتە ل گەل ھەر کەسەکی سترانان بێژم.
ل دووماھیێ گۆت: بەری چەندەکێ ل ئیستەمبۆلێ داخواز ژ من ھاتە کرن وەکو ئەکتەر پشکداریێ د فلمەکێ تورکی و عەرەبی دا بکەم، لێ ئەم رێکنەکەفتین.
ئەڤرۆ نیوز:
ئێکەتیا ئورۆپا پشتی کۆمبوونا وەزیرێن دەرڤە و یێن بەرگیریێ بریارا دروست کرنا ھێزەکا تایبەت بۆ دەستێوەردانێن دەرڤە و پاراستنا ئێمناھیا ئورۆپا دا و ناڤەندا ڤێ ھێزێ یێ ل باژێرێ بروکسەلێ و ستراسبورگێ بیت.
ل ئێکەتیا ئوروپا ئەڤ دو سالن گەنگەشە ل سەر یەکخستنا ھێزێن چەکداری یێن وەلاتێن ئەندام د ناڤ ئێکەتیا ئوروپا دا دکەن و پشتی گەنگەشە و بەرھەڤیێن دو سالان بریار ھاتە دان کو ھێزەکا ھەڤپشک بھێتە ئاڤاکرن و ئەڤ ھێزە ھەم ئێمناھیا ئورۆپا ب پارێزیت و ھەم ژی دەستێوەردانێ د روودانێن دەرڤە دا بکەت.
پشتی کۆمبوونا وەزیرێن دەرڤە و یێن بەرگیریێ یێن ل ئێکەتیا ئورۆپا، وەزیرێ دەرڤە یێ ئەلمانیا راگەھاند کو زێدەتر ژ دو سالانە کۆمبوون و گەنگەشێن وان بۆ دروست کرنا ھێزەکا بەرفرەە و ھەڤپشک بەردەوامن و گۆت: (ئورۆپا د چارەکرن و دەستێوەردانا د روودان و ئالۆزیێن مەزن یێن دەرڤە دا گەلەک بێ باندۆر مایە و دەمێ وێ یەکێ ھاتیە کو ئەم وەکو ئێکەتیا ئورۆپا د چارەکرنا ئالۆزیان و پاراستنا سنۆرێن خوە دا پێنگاڤان ب ھاڤێژین و ھەبوونا ھێزەکا بەرفرەە یا ئێکەتیا ئورۆپا دێ ھەم کێماسیێن د پاراستنا سنۆرێن مە دا ژ ھۆلێ راکەت و ھەم ژی ببیتە ھاندەر بۆ چارەکرنا ئالۆزیێن ل دەڤەرێن جودا یێن جیھانێ دا).
زانایێن سیاسەتێ وەسا دبینن کو بریارا دروست کرنا ھێزەکا تایبەت ژ ئالیێ ئورۆپا ڤە بنەمایێ خوە ژ سەرکەڤتنا دۆنالد ترامپ سەرۆکێ ئەمریکا و کریارێن تیرۆرستیێن ل باژێرێن ئورۆپا وەردگریت و ئورۆپا ئێدی دخوازیت ژ بلی ناتۆ، ھەڤپەیمانیەکا سەربازی و ئێمناھیێ تایبەت بۆ ئورۆپا دروست بکەن.
ئه‌ڤرۆ نيوز:
فەرماندێ ئێکەیا حەفت یا ھێزا پێشمەرگەێ کوردستانێ راگەھاند، بۆ کەسەکی نابیت بێژیتن، نابیت شنگال ڤەگەریت سەر ب ھەرێما کوردستانێ ڤە، چونکی شنگال دیرۆک و جوگرافیا خوە ھەیە کو دسەلمینیت ئەو دەڤەر سەر ب ھەرێما کوردستانێ یە.
فەرماندێ ئێکەیا حەفت، و ئەندامێ مەکتەبا سیاسی یا ئێکەتی نیشتیمانی کوردستان گۆت: ھێزا پێشمەرگێ رۆژ ھێزەکا کوردستانی یە و مافێ وێ یە شنگالێ و ھەر دەڤەرکا کوردی یا وێ بڤێت ب پارێزیت.
شێخ جەعفەر موستەفا سەبارەت شنگالێ ژی گۆت: بێگۆمان چو شەڕێن دیتر ل شنگالێ روونادەن، ئەو شەڕێ ھاتیە روودان ژی ب ھەموو ھێزو ئالیێن سیاسی یێن کوردستانا باشوور بزاڤا ئارامکرنا رەوشێ ھاتیە کرن.
ئەڤرۆ نيوز:
ئالا تالەبانی سەرۆکا فراکسیۆنا ئێکەتی نیشتیمانی کوردستان ل پەرلەمانێ عیراقێ د ھەڤپەیڤینەکێ دا ل گەل کەنالێ ئافاق یێ سەر ب نۆری مالکی ڤە گۆتیە، دەولەتا کوردی، مەزنترین پیلانگەریا ژ دەرڤەیە ل سەر عیراقێ، ھەروەسا وێ بەرگری ژ ناسناما خوە یا عێراقی کریە، کو نەڤێت ڤەگەریتە سەر ھەرێما کوردستانێ، دیسا دبێژیت، ھەبوونا دەولەتا کوردی ماوێ چەند سالانە مە گوە لێ دبیت، بەلێ بتنێ ئەڤە درۆشمن و چو ژبۆ نینە، د لایەکێ دیدا گۆتیە، نوکە پیلانگەریەک ل سەر ئەزمۆنا دیمۆکراسیێ ل عێراقێ ھەیە و عیراق دێ روو ب روو دابەشبوونێ بیت، لێ ئەز یا ل گەل عێراقێ و ب ھیچ رەنگەکی ئەم ژێ جۆدا نابین و دێ ل گەل برایێن خوە پێکڤە د عێراقەکا ئێکگرتی دا ژین.
ل سەر ڤێ مژارێ عەلی عەونی ئەندامێ سەرکردایەتیا پارتی دیمۆکرات کوردستان و بەرپرسێ لقێ ١٠ یێ پارتی بۆ رۆژناما ئەڤرۆ راگەھاند، ھەکە ئاڤاکرنا دەولەتەکێ بۆ گەلێ کوردستانێ و دەرکەفتن ژ بن زولم و زۆریا ھەر چار وەلاتێن داگیرکەرێن کوردستانێ خیانەت بیت، بلا ئەم د خائین بین، ئەم شانازیێ ب وێ خیانەتێ دکەین و بلا ھەموو جیھان ژی بزانیت مللەتێ مە دەولەت و سەرخوەبوون دڤێت و ئەم ب ئاشکرایی ڤێ چەندێ دبێژین.
زێدەتر دیارکر، ئەوا ئالا تالەبانی گۆتی بەرۆڤاژی وێ ھەموو خەباتا مللەتێ کوردە یا کو چەندین سالان قوربانی مە بۆ داین و ب ھزاران گەنجێن کورد ل زیندانێن بەعسان دا ھاتینە شەھید کرن و سێدارەدان، ڤێ گاڤێ ژی ل دژی دەولەتێ بن، ئەڤە خیانەتە ئەو ل شەھیدا و مللەتێ کورد دکەن، لێ ئەو نوونەراتیا گەلێ کوردستانێ ناکەت و بتنێ ئەڤ ئاخفتنە یێن کەسەکێ کێژن، چونکی چ کورد ڤێ ئاخفتنێ ناکەن، ھەروەسا زۆربەیا ھەرە زۆر یا گەلێ کوردستانێ سەربخوەیی دڤێت، لەورا ئالا تالەبانی نوونەراتیا جادەیا کوردی ناکەت، و نوونەراتیا رێکخستیا ئێکەتیێ ژی نینە، چونکی ئەندامێن سادە یێن ئێکەتیا نیشتیمانی ژی داخوازا سەرخوەبوونێ دکەن، بتنێ ئەو تێ نەبن یێن کو بەرژەوەندیێن وان ل گەل حوکمەتا عێراقێ ھەین، ئەو ل دژی دەولەتا کوردی و سەربخوەیا کوردستانێ نە، ھەروەسا رێکخستیێن سادە یێن ھەموو پارتێن کوردستانی داخوازا سەربخوەیا کوردستانێ دکەن، ئەڤ چەندە ل ریفراندۆما سالا ٢٠٠٥ دیاربوویە، ھەروەسا ھەکە سەربخوەیا کوردستانێ بتنێ درۆشم بن،بۆچی ئالا تالەبانی ل گەل دەستەکا خوە ھندە تەنگاڤ بووینە و ھەکە ئەڤ چەندە موزایەدە بن،بۆچی ئەو مۆزایەداتا ناکەن.
عەلی عەونی ھەروەسا گۆت: د بنەکۆک دا چو ئەزمۆنێن دیمۆکراسی ل عێراقێ نینن، نوکە دەستھەتا تائیفا شیعان ل عێراقێ یا زالە، ھەروەسا پیسترین سیستەم د دیرۆکا ھەموو رۆژھەلاتا ناڤین دا ئەوە ئەوا نوکە د عێراقێ دا ب رێڤە دچیت،ژ ھەموو ئالیان ڤە عێراق وەلاتەکێ فاشلە،لەورا دەربارەی مە سەرخوەبوون نە بابەتێ مۆزایەدێ و درۆشما و بازرگانیێ یە،بەلکو ئەڤە مافێ گەلێ کوردستانێ یە،لەورا ئەم یێ بەرھەڤیا جادەیا کوردی و جادەیا عێراقی ژی دکەین،ھەروەسا ژلایێ دەروونی ڤە ئەم یێ خەلکێ عێراقێ بەرھەڤ دکەین کو ڤی بابەتی ب سرۆشتی ڤە وەربگرن،کو کورد ببنە دەولەت.
زێدەتر خوەیاکر، نوکە ئەم یێ ھەموو بزاڤا دکەین کو ناڤ مالا کوردی رێکبێخین و ئێکبگرین،چونکی نوکە مە تشتەک ل گەل عێراقێ نەمایە،لەورا بریار بوو کو پرۆسا دیمۆکراسی ل عێراقێ ب رەنگەکێ ل ھەڤھاتنێ ب رێڤە ب چیت،ھەروەسا ھەکە ب بیتە زۆرینە و کێمینە ئەم چ جاران مافێن خوە ل عێراقێ وەرناگرین،چونکی چ جاران عێراق ب تەوافۆقێ ب رێڤە نەچوویە و نوکە مە ھیچ تشتەک ل گەل وان نەمایە،وان بۆدجێ ھەرێما کوردستانێ بری یە و میزانیا پێشمەرگێ کوردستانێ ژی نە دایە،ھەروەسا نوکە ژی بێی مە یێ بریاران دەرباز دکەن و بتنێ ئەم یێن ماینە ل بەغدا بۆ ھندێ کو شەرعیەتێ ب دەینە بریارێن وان یێن نە شەرعی یێن کو ب دەنگێن پرانی دھێنە دەربازکرن،ئەم بۆ ھندێ ماینە ل بەغدا بتنێ کو جوانیەکێ ب دەینە دیکۆرێ حوکمەتا تائیفی یا عێراقی،لەورا دەربارەی پارتی ئەم پشکدایێ د حوکمەتا عێراقێ دا ناکەین و ئەم ھزر ل ھندێ دکەین کو خوە ژ حوکمەتێ و پەرلەمانی ژی ڤەکێشین.
دەبارەی ھاتنا سەرۆک وەزیرێن عێراقێ حەیدەر عەبادی بۆ ھەرێما کوردستانێ عەلی عەونی دبێژیت، مە ل گەل حوکمەتا عێراقێ چو نەمایە ژ بلی بابەتێ شەرێ مووسل و ئازاد کرنا ڤی باژێری، چونکی عێراقێ بۆدجێ کوردستانێ بریە و وان ل بەر نینە دستۆرێ عێراقێ ب رێڤە ب چیت، لەورا ھاتنا عەبادی بۆ کوردستانێ چو خێر تێدا نینە، ھەروەسا ھەکە عەبادی جۆداھیەک ل گەل نۆری مالکی ھەبا، د ڤیابا وی بۆدجێ کوردستانێ زڤراندبا و موستەحەقاتێن پێشمەرگێ کوردستانێ ژی لێ زڤراندبان، ھەروەسا دڤێت ماددێ ١٤٠ بجھئینابا، لێ ئەو ژی یێ وەکی نۆری مالکی یاریێ دکەت و چو جۆداھی د ناڤبەرا وان ھەردو یان دا نینە.
ئه‌ڤرۆ نیوز:
ئالا تاله‌بانى سه‌رۆكێ فراكسیونا ئێكه‌تیا نیشتمانیا كوردستانێ د دیداره‌كێ دا ل گه‌ل كه‌نالێ ئافاق یا سه‌ر ب حزبا ده‌عوه یا ئیسلامى كو نورى مالكى سه‌رۆكایه‌تیا وێ دكه‌ت ئاماژه ب وێ یه‌كێ كریه كو ئه‌و وه‌كو ئه‌و ل گه‌ل مافێ چاره‌نڤیس نینن كو پارتى دیموكراتى كوردستان بزاڤێ بۆ دكه‌ت و گۆت” پرسا ده‌وله‌تا كوردى پشكه‌كه ژ وێ پیلانا كو پشتى رزگاركرنا مووسل ل سه‌ر عیراقێ هه‌یه”.
نيشاندان