ئه‌ڤرۆ نيوز:
له‌يلا فه‌ريقى سترانبێژا كورد نووترين ڤيديۆ كليپا خوه ب ناڤێ منيش لێره‌م به‌لاڤكر.
د. ئاراس عه‌بدولكه‌ريم، تێكست بۆ سترانێ نڤيسيه و هه‌لكه‌وت زاهر كارێ ئاوازدانان و به‌رهه‌مئينانێ بۆ كريه، فادى حه‌داد، ده‌رهێنه‌رێ ب ناڤوده‌نگێ لوبنانى كارێ ده‌رهێنانێ بۆ كليپێ كريه.
له‌يلا فه‌ريقى خووشكا سترانبێژا وه‌غه‌ركرى مه‌رزيا فه‌ريقى يه و نێزيكى 10 سالايه چو به‌رهه‌مه‌كێ نوو يێ هۆنه‌رى به‌لاڤ نه‌كريه.
ئەڤرۆ نیوز:
سەرۆکا لیژنا ساخلەمیێ ل پەرلەمانێ کوردستانێ دیار کر، ژ ئەگەرێ دانەمەزراندن و کێمیا مووچەی ب تنێ د دو سالێن بۆری دا 130 نۆشدارێن ھەرێما کوردستانێ چووینە ژ دەرڤەی وەلاتی و مزگینیەکێ ددەت و دبێژیت: بڕیارە ھژمارەکا دەرچوویێن کۆلیژێن نۆشداری بھێنە دامەزراندن و دووڤچوون بۆ دامەزراندنا وان یا بەردەوامە.
مریەم سەمەد، سەرۆکا لیژنا ساخلەمیێ ل پەرلەمانێ کوردستانێ بۆ رۆژناما ئەڤرۆ ئاشکرا کر، حەفتیا بۆری وان سەرەدانا وەزیرێ ساخلەمیێ کربوو، دا کو ژ نێزیک دووڤچوونا دیاردا مشەختبوونا نۆشداران بکەن و گۆت: “ل گۆرەی ئاخڤتنێن وەزیرێ ساخلەمیێ یێ حوکمەتا ھەرێما کوردستانێ، ژ سالا بۆری ھەتا نوکە ژ ئەگەرێ کێمیا مووچەی و دانەمەزراندنا دەرچوویێن کۆلیژێن نۆشداری ھژمارەکا بەرچاڤا نۆشداران، ھەرێما کوردستانێ بجە ھێلاینە و چووینە ژ دەرڤەی وەلاتی، ژ بلی ڤێ چەندێ کو ناھێنە دامەزراندن و ئەوێن دھێنە دامەزراندن ژی مووچەکێ کێم بۆ ھاتیە دیارکرن، ئەو نۆشدارێن دچنە ژ دەرڤەی وەلاتی ب مووچەکێ باش دھێنە دامەزراندن و مافێ پەنابەریێ ژی پێ دھێتە دان”.
مریەم سەمەد ئاماژە ب وێ چەندێ ژی کر، ل دووڤ ئامارێن بەردەست، ب تنێ د دو سالێن بۆری دا نێزیکی 130 نۆشدارێن ھەرێما کوردستانێ چووینە ژ دەرڤەی وەلاتی و گۆت: “320 دەرچوویێن سالا بۆری یێن کۆلیژێن نۆشداری ژ لایێ حوکمەتا ھەرێما کوردستانێ ڤە ھاتینە دامەزراندن، لێ ھەتا نوکە بڕیارا دامەزراندنێ بۆ دەرچوویێن کۆلیژێن نۆشداری یێن گشتی دەرنەکەفتیە”.
مریەم خانێ گۆتژی: “بڕیارە ھزار و 600 نۆشدارێن دی ل ھەموو پکشێن ساخلەمیێ بھێنە دامەزراندن و گەلەک بزاڤ بۆ دامەزراندنا وان دھێنە کرن”.
ئه‌ڤرۆ نيوز:
رێژەیێن کولیسترولی ب گوھۆرینا وەرزێن سالێ ب کارتێکرن دکەڤن، کولیسترۆل ل وەرزێ زڤستانێ بلند دبیت و ل وەرزێ ھاڤینێ کێم دبیت، سایتێ (دکتور) دیاردکەت کو ھەکە پەریزادە ب دروستی کارنەکەت وێ شیانێن حەلاندنا کولیسترولی دناڤ خوینێ دا نامینن، پێکھاتێ قنێتی مرۆڤی پەیدابوونا کولیسترولی دیاردکەت، رەنگە فاکتەرێ زکماکی یێ ب ھێز یان بێ ھێز پالپشتیێ ل سەر ژمارا جینێن مرۆڤی بکەت ئەوێن کو ژ دایبابان دھێنە وەرگرن.
زێدەخوارنا روینێن توورکری ئەوێن دناڤ گوشتێ سۆر و چەرمێ مریشکێ و ھێکا و پەنیری و نیڤشکی دا ھەین، سەقایەکێ ئارام بۆ پەیدابوونا کولیسترولی دابین دکەت.
گەلەک ژ مە ھەڤبەندیێ دناڤبەرا قەلەویێ و کولیسترولی دا پەیدادکەن و وەسان ھزر دکەن کو ھەبوونا قەلەویێ تووشبونا مرۆڤی یە ب کولیسترولی، ھەروەسان ئەم سەرسومان دمینین دەما کەسەکێ زەعیف دبینین و رێژا کولیسترولێ وی یێ بلند بیت، نوشدار وەسان دبینن کو پێکھاتێ قنێتی تووشکرنا مرۆڤی ب کولیسترولی دیاردکەت، رەنگە ئەڤ فاکتەرە یێ ب ھێزبیت و رەنگەژی یێ بێ ھێز بیت و پالپشتیێ ل سەر وان جینان دکەت ئەوێن مرۆڤ ژ دایبابان یان ئێک ژوان وەردگریت، دەربارەی خوارنێ، گەلەک خوارنا روینێن تویرکری کو دناڤ گوشتێ سۆر و چەرمێ مریشکێ و ھێکا و پەنیری و نیڤشکی دا ھەنە، سەقایێ پەیدابوونا کولیسترولی دابین دکەن و ئەڤ چەندە دبیتە جھێ مەترسیێ دەما مرۆڤ وەرزشێ نەکەت و کاوریێن لەشی نەھێنە سۆتن، پاشی جگارەکێشان ژی دھێتە دناڤ تیورێ دا، کو ھاریکارە بۆ رەقبوونا خوینھنێران و زێدەتر تووشبۆنا مرۆڤی ب ئاریشەیێن دلی.
ئه‌ڤرۆ نيوز:
رێڤەبەرێ ناحیا سنوونێ دیارکر پتر ژ 300 خێزانان ژ خانەسۆری و سنوونێ جارەکا دی ئاوارە بوون و مالێن خوە ھێلان و بەر مەزارگەھێ شەرفەدین و کۆمەلگەھا دوگری و مەزارگەھێ شێشمس ئاکنجی بوون و ھندەک خێزان ژی ھاتنە دھۆکێ.
نایف سەیدو، رێڤەبەرێ ناحیا سنوونی، بۆ ئەڤرۆ دیار کر نوکە رەوش یا ئارامە و بازارێ ھاتیە ڤەکرن و ھاتنوچوون ژی یا ھەی، لێ ھەر ترس د دلێ خەلکی دا ھەیە، لەورا پتر ژ 300 خێزانێن ڤەگەریاین دووبارە ژبەر ئالۆزیێن پەکەکێ مالێن خوە ھێلاینە و گۆت “گومان تێدا نینە خەلک دێ پتر ئاوارە بنەڤە و دێ قەستا کەمپان کەن ل دھۆکێ و ھەولێرێ”.
وەیسی نایف سەرۆکێ جڤاتا قەزا شنگال، دیار کر، ھژمارەکا خێزانان جارەکا دی ژ خانەسۆرێ دەرکەفتنە و قەستا چیایێ شنگالێ کریە و ل وێرێ ھاتینە ئاکنجیکرن و ھەتا پێنج خێزانان ژی دھۆکێ و ھەولێرێ کریە و گۆت “ئالۆزیێن پەکەکێ و گرۆپێن سەرڤە ل رۆژا 3ى ئادارا 2017ێ ل دەڤەرا خانەسۆری دروست کرین ترس بۆ وان وەلاتیان دروست بوویە، راستە شەڕ یێ ھاتیە راوەستاندن، لێ پەکەکێ و گرۆپێن سەر ڤە ترس بۆ وەلاتیان دروست کریە”.
ئەڤرۆ نیوز:
رۆژناما (الشرق الاوسط) یا لەندەنی د ھژمارا خوە 13977 دا ، پێزانین ل دۆر روودانێن ڤێ دووماھیێ د ناڤبەرا ھێزێن پێشمەرگێن رۆژئاڤا و یەکینەیێن پاراستنا شنگالێ یێن ب سەر پەکەکێ ڤە ل دەڤەرا خانەسوورێ یا ب سەر ناحیا سنوونێ ڤە ل قەزا شنگالێ.
ژێدەرێن عیراقی یێن ئاگەھدار ب رۆژناما ناڤبری راگەھاندیە، یەکینەیێن پاراستنا شنگالێ ھەیڤانە مووچەی ژ دەستەیا حەشدا شەعبی یا عیراقی وەردگرن، بەرپرسەکێ یەکینەیێن پاراستنا شنگالی ژی ئاشکراکریە کو ئەفسەرێن ب سەر پاسدارێن ئیرانێ ڤە ل دەمێن بۆری سەرەدانا بارەگایێن وان ل شنگالێ کریە ژبۆ بەحسکرنا ھەبوونا وان ل دەڤەرێ و چاوانیا ھنارتنا چەکێ گران بۆ وان یەکینەیان.
سەرکردەکێ حزبا دەعوا ئیسلامی یا عیراقی کو نوری مالکی سەرۆکاتیا وێ دکەت ب (الشرق الاوسط) راگەھاندیە” ل دووڤ داخوازیا مالکی، یەکینەیێن پاراستنا شنگالێ ژلایێ پەکەکێ ڤە و ب ھەڤکاری ل گەل پاسدارێن ئیرانێ، ل دەڤەرا شنگالێ ھاتیە دامەزراندن، پشتی داعشێ شنگال و گوند و کۆمەلگەھێن ب سەر ڤە داگیرکرین”.
پتر رۆھنکر ژی” ئارمانج ژ دامەزراندنا وان یەکینەیان دابینکرنا کونترۆلا حەشدا شەعبی یە ل سەر رێیا د ناڤبەرا عیراقێ و سووریێ، ژبۆ گەھاندنا ھاریکاریێن لەشکری بۆ ھێزێن ئیرانی و میلیشیێن ب سەر ڤە ل سووریێ، چونکی ئەو رێ گەلەک یا گرنگ و ستراتیژی یە و تەھران ژ دەستھەلاتا پێشمەرگەی ل وێ دەڤەرێ دترسیت”.
وێ سەرکردێ حزبا دەعوا ئیسلامی بۆ وێ رۆژنامێ خویاکریە” تەھرانێ گەلەک جاران ب شێوەکێ فەرمی داخواز ژ ھەرێما کوردستانێ کریە کو رێیا عیراقێ – سووریێ بۆ ڤەکەت ژبۆ گەھاندنا چەکی و ھێزێن لەشکری بۆ سووریێ، بەلێ ھەولێرێ ل ھەموو جاران ئەو داخوازیا ئیرانی رەتکریە” گۆت ژی” ھەلکرنا ئاگرێ شەڕی د ناڤبەرا کوردان دا، دێ رێ ل بەرامبەر حەشدا شەعبی ڤەکەت ل بن سیبەرا ھێزێن عیراقی ل رۆژئاڤایێ مووسلێ، کونترۆلا شنگالێ بکەت و دەستھەلاتا ئیرانێ لێ زال بکەت و رێ ل بزاڤێن سەرۆکێ ھەرێما کوردستانێ و حزبێن کوردی یێن دی سەبارەت سەربخوەییا کوردستانا عیراقێ بگریت، کو ئیران ب ھەموو شێوەیان بزاڤا رێگریکرنێ لێ دکەت”.
ل دووڤ ھندەک ژێدەران بۆ رۆژناما ناڤبری بەحسکری، ل وێ دەڤەرا شەڕ د ناڤبەرا پێشمەرگێ رۆژئاڤا و یەکینەیێن پاراستنا شنگالێ روودای، ھژمارەکا ھەلیکۆپتەرێن عیراقی بەری وی شەڕی گەھشتبوونە نێزیک یەکینەیێن پاراستنا شنگالێ و بەرپرسەکێ پلە بلند سەرەدانا وێ دەڤەرێ کربوو. و ھژمارەکا چەکدارێن یەکینەیا پاراستنا شنگالێ پێزانین ل دۆر وان کەسایەتیێن ل ڤێ دووماھیێ سەرەدانا بارەگایێن وان کری دانە (الشرق الاوسط) ئەوژی ھژمارەکا ئەفسەرێن پاسدارێن ئیرانی و سەرکردێن حەشدا شەعبی ب شێوەکێ بەردەوام دھێنە بارەگایێن یەکینەیێن پاراستنا شنگالێ و ل گەل فەرماندێن وان کۆم دبن و ل رۆژێن بۆری چەندین سەرەدان ژلایێ بەرپرسێن لەشکری یێن مەزن ژ فەیلەقا قودس یا ئیرانی ھاتینە بارەگایێن یەکینەیان ل دەڤەرا شنگالێ و پاشی فەرمان بۆ چەکدارێن یەکینەیان ل دۆر ھێرشکرنێ ل سەر پێشمەرگەی ھاتینە دەرکرن.
ئەڤرۆ نیوز:
ھێرشا چەکدارێن پەکەکە بۆ سەر ھێزێن پێشمەرگەی ل دەڤەرا سنوونێ کارڤەدان ل دووڤ خوە ئینان و چاڤدێرێن سیاسی و نونەرێن شنگالێ ژی دبێژن، ئەڤە پیلانەکا دژی شنگالێ و ھەرێما کوردستانێ دھێتە گێڕان و چاڤدێرەکێ سیاسی ژی دیارکر، پەکەکە پیلانێن نووری مالکی و دەولەتێن دەڤەرێ بجە تینن و ھەرێم ب چو شێوەیەکی رازینابیت بازرگانی ب خاکا کوردستانێ و خەلکێ شنگالێ بھێتەکرن.
شێخ شامۆ، نوێنەرێ کوردێن ئێزدی لپەرلەمانێ کوردستانێ بۆ رۆژناما ئەڤرۆ گۆت” ھەردەستپێکێ چەکدارێن پەکەکە ل شنگالێ بن کراسێ ھەوارھاتنا ئێزدیان رێگربووینە لھەمبەر ئاڤاکرنا دەڤەرێ و رێگریکرنا وانژی ل ھێزێن پێشمەرگەی رەفتارەکا رەشە ژلایێ پەکەکە دھێتەکرن، رۆژانە پەکەکە یا بزاڤان دکەت تەناھی نەڤەگەڕیت دەڤەرێ و لڤینێن پێشمەرگەی ل دەڤەرێ ب فەرمان و رێنمایێن وەزارەتا پێشمەرگەی بوویە و پێشمەرگەیێن رۆژئاڤا ل محیوەرێن باشیک و پتریا میحوەرێن پێشمەرگەی پشکداری شەڕێ داعش کریە و ھژمارەک شەھید و بریندارژی ھەبووینە، ھەر لڤینەکا تێتەکرن ژلایێ لەشکرێ رۆژ ب فەرمانا وەزارەتا پێشمەرگەیە و چو ھێز نینە بشێن رێکێ ل ھێزێن لەشکرێ رۆژ و ھێزێن پێشمەرگەی بگرن.
شێخ شامۆ گۆتژی” پەکەکە ھێزەکا دستووری نینە و گورەی قانوونێ نەشێن چو لڤینان بکەت لسەر خاکا ھەرێما کوردستانێ، بەلێ پەکەکێ خوە سەپاندیە بسەر خەلکێ دەڤەرێ دا و دخوازیت شنگال بھێتە پارچە پارچەکرن، ھەردەمێ پەکەکە دەڤەرەکێ رزگاربکەت بۆخوە داگیر بکەت ئەڤە ناھێتە قەبوولکرن، یا ژ ھەمویێ سەیرتر ئەڤە دبێژن شەڕێ کوردێن ئێزدی و پێشمەرگەیە ئەڤە کوشتنا کوردێن ئێزدیە و پەکەکێ ھێرشی سەر پێشمەرگەی کریە و ب چو شێوەیەکی ئێزدی دگەل بۆچوونا پەکەکێ نینە.
دکتۆر عەلی میرانی، چاڤدێرێ سیاسی ل رۆژئاڤایێ کوردستانێ بۆ رۆژناما ئەڤرۆ گۆت” شنگال خاکا ھەرێما کوردستانێ یە و کەس نەشێت حاشاتیێ ل کوردستانی بوونا شنگالێ بکەت، نوکە ھندەک ھێزێن سەربازی پەیدابووینە بن ناڤێن جودا و د ئەسلدا پەکەکەنە و دبێژن ئێزدی کورد نینە، داخواز ل حەیدەر عەبادی سەرۆک وەزیرێن عێراقێ کریە ھەوارا وانا بچیت ئەڤە جھێ قەبوولکرنێ نینە ل دەف کوردا، ئەڤە مەترسیەکا مەزنە لسەر ھەستێ نەتەوەیی، ئەڤرۆ یان سبەی دێ ھێزێن پێشمەرگەی دەڤەرا شنگالێ ژوان کەسان پاقژبکەن و ئەم دەستخۆشیێ ل شەڕێ برا کوژیێ ناکەین، بەلێ ھێزەکا کورد ب نەحەق خۆ بسەپینیت و داخوازا ھەڤکاریێ ل عەرەبا بکەت ئەڤە نە برایێن مەنە و نە شەڕکرن دگەل وانا برا کوژیە، ئەڤا ل شنگالێ روویدەت میحوەرێ ئێرانێ یە بۆ چێکرنا ھیلالا شیعی ھەتا ئەف ھێلا ستراتیژی بکەڤیتە دەستێ شیعە و ئیرانێ دا، ئەڤێن پشتەڤانیا پەکەکە دکەن بۆ مانا وان ل شنگالێ بەری نوکەژی پیلان ھەبووینە و پیلانێن وان سەر نەگرتیە، پارتی دیموکراتی کوردستان و ھەرێما کوردستانێ ب چو رەنگا رازینابن پەکەکە بازرگانیێ ب خاک و خەلکێ کوردستانێ بکەت، زۆر جاراژی ھێز ھەبووینە بزاف کرینە بۆ تێکدانا نافمالا کوردا بەلێ دوماھیێ پەشێمانبووینە.
دکتۆر عەلی میرانی دیارکر” یا خویایە ھندەک ولاتێن دەوروبەر و دەڤەرێ دگەل نووری مالکیێ سەرۆک وەزیرێن بەرێ یێ عێراقێ چەکدارێن پەکەکە پالدەن بۆ شەڕکرنێ دگەل ھێزێن پێشمەرگە و دوماھیێ دڤێت پەکەکە لڤێ حەقیقەتێ تێبگەھیت ودەڤەرا شنگالێ خوە ڤەکێشیت، ژبەرکو پەکەکە بخوە دزانیت مەیدانا شەڕکرنا پەکەکێ نیە تنێ پەکەکە رێگریێ دکەت ل ئاڤاکرنا شنگالێ و دەڤەرێن کوردێن ئێزدی یێن ھاتینە رزگارکرن.
ئه‌ڤرۆ نيوز:
گۆر پلانێ دێ ھژمارەکا مەزن یا ھێزێن ئەمریکی ھێنە ھنارتن، ژ وان ژی ھێزێن ئۆپەراسیۆنێن تایبەت و ھەلیکۆپتەر و تۆبخانە و ھنارتنا چەکی بۆ ھێزێن کوردی و عەرەبی.
رۆژنامەکا ئەمریکی پلانەکا وەزارەتا بەرگیریا ئەمریکی ل دۆر ئازادکرنا باژێرێ رەققە یێ سووریێ ژ دەستێ داعشێ ئاشکرا دکەت و ئاماژێ ددەت کو ل دووڤ وێ پلانێ دێ ھژمارەکا مەزن یا ھێزێن ئەمریکی ھێنە ھنارتن، ژ وان ژی ھێزێن ئۆپەراسیۆنێن تایبەت و ھەلیکۆپتەر و تۆبخانە و ھنارتنا چەکی بۆ ھێزێن کوردی و عەرەبی، ل دووڤ داخۆیانیێن بەرپرسێن ئەمریکی.
پلانا وەزارەتا بەرگیریا ئەمریکی ئەوا گەھشتیە کۆچکا سپی، ل دووڤ سایتێ ئەلخەلیج ئۆنلاین، ئیدارا ئەمریکی نوکە ڤەخواندنێ ل سەر دکەت و ھەتا رادەکێ مەزن وان ئاستەنگێن ئیدارا ئۆبامای سەپاندین، سڤک دکەت.
ھژمارەکا بەرپرسێن لەشکری یێن ئەمریکی ئەوێن پشکداری د دانانا پلانا وەزارەتا بەرگیریا ئەمریکی دا کرین، دبێژین ل دووڤ وێ پلانێ ھژمارا ھێزێن لەشکرێ ئەمریکی ل سووریێ دێ ھێنە زێدەکرن، کو تنێ نوکە 500 شیرەتکارێن سەربازی یێن ئەمریکی ل سووریێ ھەنە و پشکداریێ ل گەل ھێزێن کوردی دا دکەن د شەڕی دا.
ل دووڤ وی سایتی، پلانا نوو یا پنتاگۆنێ، چو ئاماژێ ب پشکداریا ئاشکرا یا ھێزێن ئەمریکی د شەڕی ل سەر ئەردی ناکەت، بەلکو داخواز دکەت کو رێ ب ھێزێن ئەمریکی بھێتە دان کو نێزیکی ھێلا بەراھیێ یا شەڕی ببن و دەستھەلاتا وەرگرتنا بریارێ ل مەیدانا شەڕی ھەبیت، بێ لێزڤرین بۆ واشنتۆنێ.
زێدەتر خوەیا دکەت، دەمێ رازیبوون ل سەر وێ پلانا پنتاگۆنێ دھێتە کرن، ئانکو دێ دەرگەە ب ئێکجاری ھێتە گرتن ل بەرامبەر داخوازیێن تورکیا یێن راوەستاندنا پشتەڤانی و پڕچەککرنا ملیشاتێن کوردی ل سووریێ کو ئەنقەرە ب ملیشاتێن تیرۆرستی دھەژمێریت و ئەڤ چەندە ژی ئاخڤتنێن دژوار یێن سەرۆکێ تورکی رەجەب تەیب ئەردۆگان شرۆڤە دکەت، دەمێ گۆتی ( پرۆسا پرچەککرنا یەکینەیێن پاراستنا گەلێ کورد و یەکینەیێن یەپەگێ، کارەکێ پەسەندکری نینە) ھەر د وێ ئاخڤتنا خوە دا، ئەردوگانی سۆز دابوو ھێزێن تورکی یێن تایبەت و گرۆپێن سووری یێن ھەڤپەیمانێن تورکیا پشکداریێ د پرۆسا ئازادکرنا باژێرێ رەققە دا بکەن.
جەنەرالێ ئەمریکی ستیڤن تاونسند، فەرماندێ ھەڤپەیمانیا نێڤدەولەتی ل عیراقێ، راگەھاند بوو کو چو بەلگە نینن کو یەپەگە گەف بیت ل سەر تورکیا، ناڤبری داخواز ژ ھەموو لایەنێن دژی داعشێ کربوو کو شەڕێ د ناڤبەرا ھەڤدوو دا راوەستینن و ھەموو بزاڤێن خوە بکار بینن بۆ شەڕێ دژی داعشێ.
ئەمریکا ئەنقەرە پشتراست کربوو کو رێ نادەتە کوردێن سووریێ دەستھەلاتا خوە بگەھیننە رۆژئاڤایێ رووبارێ فوراتێ، بەری نوکە تورکیا گەفێن ئەنجامدانا پرۆسەکا لەشکری کربوو بۆ دەرکرنا کوردان ب تایبەتی پەکەکێ ( ئەوا ژلایێ ئەمریکا و تورکیا ڤە ب رێکخراوەکا تیرۆرست دھێتە ھژمارتن).
پشتی هه‌لكرنا ئالایێ كوردستانێ ل پێشوازیا سه‌رۆك بارزانی ل فرۆكه‌خانا ئه‌تاتورك ل ئه‌سته‌نبۆلێ/توركیا، دیسا پرسا ئالایێ كوردستانێ و مژارێن په‌یوه‌ندار ب ئالایێ هایه به‌ر به‌حس و شرۆڤه و داخۆیانیێن جودا.
به‌ری هه‌ر تشته‌كی پێدڤیه ئه‌م بێژین: ئالا سیمبوله، ناسنامه‌یه، پیرۆزی یه، بنه‌مایه‌كا سه‌ره‌كى یه ژ بنه‌مایێن نه‌ته‌وه‌یی، تایبه‌ت بۆ نه‌ته‌وا كورد، وه‌ك نه‌ته‌وه‌یه‌كا بێ ده‌وله‌ت، وه‌ك نه‌ته‌وه‌یه‌كا خودان تراژیدیا دیرۆكی و تژی ژ كاره‌سات، بوویه كه‌لتۆره‌كێ ئالاناسیا مه كوردان كه‌لتۆره‌كێ پیرۆزه و ل سه‌ر مه هه‌میان، تایبه‌ت ره‌ۆشه‌نفكر و سیاسه‌تمه‌دار و میدیاكاران، ئه‌ركه‌كێ پیرۆزه بایه‌خ و گرنگی ب ڤێ كه‌لتۆرێ: (كه‌لتۆرێ ئالاناسی) بده‌ین. لێ بایه‌خه‌كێ زانستی ب ڕونگه‌كا كورستانی.
ڕاستییه‌كا ته‌حل هه‌یه و پێدڤی ب ئاماژه‌كرنێ یه، ڕاستی ژی ئه‌ڤه: (كه‌لتۆری ئالاناسی) ب شێوه‌كێ ستوونی كوور نه‌چوویه د ناڤ جڤاكێ كوردی دا و هه‌تا نوكه ژى ب شێوه‌یه‌كێ ئاسۆیی دهێته به‌حسلێكرن و شرۆڤه‌كرن، دیاره ئه‌ڤ ڕاستییه، ڕاستیه‌كا ته‌حله و ل هه‌مان ده‌مى كێماسیه‌كا كه‌لتۆری یه و پێدڤی ب چاره‌سه‌ركرنه‌كا ب له‌ز هه‌یه.
كێنه ئه‌وێن ل دژی ئالایێ كوردستانێ دراوه‌ستن؟!..
١ ـ دوژمنێن ته‌قلیدی، هه‌وله‌كا بێ به‌رهه‌م!..
ب درێژاهیا دیرۆكێ دوژمنێن ته‌قلیدی یێن كوردان ل دژی ئالایا كوردستانێ نه، دژبوونا ئالاى دژبوونا بوونێ یه، چونكی كورد بوونه خودان زمان و خاك و دیرۆك و دابونه‌ریتا خوه، ڤان دوژمنێن ته‌قلیدی ل ڕێیا دژایه‌تیا ئالایێ دژاتیا كوردان دكه‌ن، ب ڕامانه‌كا دی ژی دژایه‌تیا كوردان دژایه‌تیا ئینسانیه‌تێ یه، چونكی كورد پشكه‌كن ژ دیرۆكا مرۆڤاتیێ.
دوژمنێن ته‌قلیدی ل هه‌ر ده‌ر و زه‌مانه‌كی ب شێوازێ جودا ل دژی ئالایێ كوردستانێ كار دكه‌ن، لێ كارێ وان بێ به‌رهه‌م بوونه، چونكی ئالایێ كوردستانێ ڕۆژ ب ڕۆژ بلندتر و گه‌شتر دچیته د ناڤ هه‌می نێڤه‌ناڤه‌ندێن نێڤده‌وله‌تی یا فه‌رمی و ئه‌ڤ ده‌سكه‌فته ژى بۆ سه‌رۆك مه‌سعود بارزانی سه‌رۆكی هه‌رێما كوردستانێ دڤه‌گه‌ڕێت.
هه‌ر نوكه ئالایێ كوردستانێ ئالایه‌كێ ناسیاره ل هه‌می جیهانێ دا، ئالایا نه‌ته‌وه‌كا خودان پێشمه‌رگه‌یه كو به‌رسینگێ داعش گرت و به‌ره‌ڤانی ژ ئاشتیێ و ژیانێ و هه‌می مرۆڤایه‌تیێ دكه‌ت.
٢ـ كوردێن ل دژی ئالایی، خه‌م و پرسیاره‌كا نه‌ته‌وه‌یی!
حه‌یف و مخابن هنده‌ك كورد، كو ناڤێ وان كورده و ئه‌ز ب خوه گومانێ ب كوردبوونا وان دكه‌م، دژی ئالایێ كوردستانێنه و ل ڕێیا دژاتیا ئالایێ برین و ده‌رزان دئێخنه د ناڤ جاسته و ڕوحا كوردان دا و ئێكریزیا كوردان تێكدده‌ن!.. مه‌ره‌ما وان هه‌ر چ بیت، نۆڕین و پاساوا وان هه‌ر چ بیت. خه‌م و پرسیاره‌كا مه‌زنه، ئه‌رێ بۆچى كورده‌ك هه‌بیت دژی بوونا خوه، دژی نه‌ته‌وا خوه؟!..
ئه‌ڤ جۆره كورده ژ دوژمنێن ته‌قلیدی پڕ ئازارترن و پێدڤیه ئه‌م هه‌می پێكڤه، مه‌زن و بچووك، وه‌لاتی و حزب، ئه‌ڤان كوردان، كو دشێین ناڤێ وان بكه‌ینه (كورێن نه‌كورد !!) ریسوا و پرۆتستۆ بكه‌ین و ده‌لیڤێ نه‌ده‌ینه چ كورده‌كی ل بن هه‌ر ناڤنیشان و ڕامانه‌كێ ل دژی ئالایا كوردستانێ بیت، چونكی پیرۆزیی: ئالا، یا هه‌ر كه‌سه‌كی یه، یا هه‌ر ڕه‌نگ و ده‌نگ و نه‌ته‌وه و ئۆله‌كی یه كو ل كوردستانێ دژین، كوردستان نه یا كوردانه ب ته‌نێ ، یا هه‌میانه، ئالا ژی ئالایێ كوردستانێ یه و یات هه‌میانه، له‌ورا پێدڤیه ئه‌م هه‌می پێكڤه و ئێك ده‌ست و ئێك ده‌نگ و ئێك هه‌لوێست و ئێكڕیز به‌ره‌ڤانیێ ل پیرۆزیێ، ل ناسناما خوه بكه‌ین. ئالایێ كوردستانێ بكه‌ین.
دوماهیك ئه‌ز حه‌ز دكه‌م بێژم: ل ناڤ په‌كه‌كێ: پارتییا كرێكارێن كوردستانێ هنده‌ك كه‌س و ده‌نگ هه‌نه ب توندی ل دژی ئالایێ كوردستانێ كاردكه‌ن، پێدڤیه كه‌س و ده‌نگێن دلسۆز ل ناڤ په‌كه‌كێ ڕێ ل ڤان كه‌س و ده‌نگێن خراپ بگرن، هه‌تا هه‌می پێكڤه ل بن سیبه‌را ئالایێ كوردستانێ پێنگاڤان به‌ر ب دواڕۆژه‌كا گه‌ش بدانن!..
نيشاندان