ئه‌ڤرۆ نيوز:

ل دوور وان پێشھات و روودانێن نوو یێن ھەرێما کوردستانێ و رێککەفتنا د ناڤبەرا ئێکەتیێ و گۆرانێ دا چاڤدێرەکێ سیاسی بۆ رۆژناما ئەڤرۆ دبێژیت: گۆران و ئێکەتیێ وەسا بۆ لایەنێن سیاسی یێن کوردستانی دایە خۆیاکرن، کو رێککەفتنا د ناڤبەرا واندا ب دژی چو ئالیان نینە، لێ بەری دەمەکێ پەرلەمانتارەکێ ئێکەتیێ گۆتیە، مە دڤێت سەرکردایەتیا کوردستانێ ب دامودەزگەھی بدانین و ھەڤسەنگیێ ب پارێزین، لەورا مە ئەڤ رێککەفتنە ئەنجامدایە و دیارکر ژی: مە وەک پارتی ل دەستپێکێ ژی گۆتیە، رێککەفتنا ھەر لایەنەکێ ھەکە بۆ ئێکرێزیا کوردان بیت، ئەم ژی دێ دگەل دا دھاریکاربین و ئەم ب مەترسی ل سەر خوە نزانین، لێ ھەکە ئەو رێککەفتن ب نیەتا ھندێ بیت کو ئاستەنگان بۆ پارتی دروست بکەت، پارتی ژی ھند نەیا لاوازە، چونکی ھەر لایەنەکێ ڤیای ئاریشە و ئاستەنگان بۆ پارتی پەیدا بکەت شکەستن یا ئینای و ب سەرنەکەفتیە، ژبەرکو پارتی دیرۆکەکا دوور و درێژ و ب سەربۆر ھەیە.

عەبدولسەلام بەرواری چاڤدێرێ سیاسی زێدەتر دبێژیت: ئێکەتیێ و گۆرانێ گەلەک کێشە ھەنە، وەک جێگرێ مەلبەندێ ئێکەتیێ ل ھەولێرێ گۆتی: ئەڤ رێککەفتنە بۆ ئێکەتیێ زۆرا خرابە، چونکی گۆران دێ مفای ژڤێ رێککەفتنێ بینیت، ژبەرکو گۆرانێ شکەستن د سیاسەتا خۆدا ئینایە، گۆرانێ ب وێ نەزانینا خوە خوە ئێخستیە تەلھەکێ و نەشێت خوە ژێ قورتال بکەت، لەورا بتنێ گۆران دشێت خوە ب ئێکەتیێ بھێز بێخیت و زێدەتر گۆت: گۆرانێ ئەو خەونا کەڤن ھەبوویە کو بشێت برێیا ئێکەتیێ بەرەیەکێ ب ھێز بەرامبەر پارتی دانیت، ھەروەسا ئێکەتیێ ژی کێشەیێن نافخۆیی ھەنە و رەنگە رکابەری دناڤ ھندەک بالێن ئێکەتیێ ھەبن ل سەر ھندێ کو خوە دیار بکەن بۆ جەماوەرێ خوە ل سلێمانیێ و وێ ھزرێ دکەن کو دێ وان پتر لایەنگر و ھاریکار ھەبن، دیسان ئێکەتیێ دڤێت ب ڤێ رێکێ دەمی پێ ب بورینیت، دا ژلایەکێ ڤە نیشانا ھندێ بدەت کو پارتی یا بێ منەتە و ئەو دشێت ھەکە بڤێت دێ کاریگەریەکادی ھەبیت، لێ وان ئەڤە کریە دا پتر دەستکەفتان ژ پارتی وەرگرن، ژلایەکێ دیڤە ئێکەتی دترسیت و دخورا نابینیت روو ب روو بوونێ دگەل گۆرانێ بکەت، چونکی دترسین ئەوا بۆ وان ل سلێمانیێ مای ژی ژ دەست بچیت، لەورا پێدڤیە ئێکەتیێ دگەل گۆرانێ مەرحەبایەک ھەبیت، ھەتاکو ئێکەتی بشێت ل سەر پێن خوە خوە رابگریت ھەتا بەستنا کونگرەی، لەورا گۆان دزانیت ھەکە ڤێ رێککەفتنێ نەکەت،چو ئاییندە بۆ نامینیت.
عەبدولسەلام بەرواری زێدەتر گۆت: ھەکە گۆران و ئێکەتی بەرەیەکێ بەرامبەر پارتی دروست بکەن،ل ڤی حالەتی گۆران دێ یا مفادار بیت، چونکی گۆرانێ دیارکریە ژ بلی ئاخفتن و تێکدانێ چو تشتێ دی ددەستدا نینە، چونکی چەندین وەزارەت د دەست دابوون، لێ ھەر نەشیان چو بۆ خەلکێ بکەن و ژ ھندێ دترسن کو ئێدی خەلکێ تەحەمولا وان نەبیت و پشتا خوە بدەنێ، لەورا بتنێ گۆران یا مفادارە ژڤی بارودۆخی و دیارکر ژی: ئیران باش دزانیت کو سەرۆک بارزانی و پارتی وەکی لایەنێن دی نینن، پارتی سیاسەتەکا تایبەت ھەیە، ئیران نەشێت ئەوا وێ دڤێت درێیا پارتی را بکەت، ھەروەسا ئیران رۆل و کاریگاریا بارزانی و پارتی دزانیت و گۆت ژی: ئیران نەشێت راستەوخۆ پلانەکێ دانیت کو پارتی ژناڤ ببەت،کو گۆران خەونێ ب ڤێ چەندێ ڤە دبینیت، لێ وەکو فشارەکێ ل سەر پارتی چێکەن وان ژی پێ خۆشە، لێ پتر مەرەما ئیرانێ ئەوە دڤێت ھەڤسەنگیەکێ پەیدا بکەت و وێ ژی ئاخفتن و دەستێ خوە ھەبیت، لەورا دوور نینە بارودۆخێ ھەرێمێ و ڤێ دەڤەرێ بھێتە گوھۆرین، ئیرانێ ئەو چەندە دڤێت کو بوریەکا نەفتێ یا ھەرێمێ دناڤ ئاخا وێرا ژی بچیت، ئێرانێ ئەڤ چەندە دڤێت، ھەروەسا ئیرانێ دڤێت پتر لایەنگران بۆ حوکمەتا شیعەیا ل بەغدا دروست بکەت و دڤێت چاڤێ سوور نیشا پارتی ژی بدەت.
سەبارەت سەرەدانا لایەنێن عەرەبی بۆ سلێمانیێ عەبدولسەلام بەرواری خۆیاکر: ھەولێرێ بۆ لایەنێن عەرەبی دیارکریە کو مە کار دگەل وەدا نەمایە و ئەم یێ خوە ئامادە دکەین بۆ ریفراندوومێ و سەربەخۆیا کوردستانێ، ھەروەسا لایەنێن عەرەبی ھەلویستێ ھەولێرێ باش دزانن،کو ھەولێر خۆدانا ئاخفتنا خوەیە، لێ چوونا وان بۆ سلێمانیێ بۆ ھندێ بوویە کو دخۆرا نابینن بھێنە ھەولێرێ، چونکی دزانن یا بێ ئۆمێدە، ھەروەسا سەرۆکێ پەرلەمانێ عێراقێ دزانیت کو نیڤەکا پەرلەمانی ئیعتیرافێ پێناکەن و ل روونشتنێن پەرلەمانی بەرھەڤ نابن، وی ئۆمێدا ھندێ ھەیە کو ھەلویستێن ئێکەتیێ و گۆرانێ بەری نوکە ھاتینە تاقیکرن و ئەو ب ھیڤی یە کو بشێت وان قانع بکەت، کو ل روونشتنێن پەرلەمانێ عێراقێ کومبنن، ھەروەسا سەرۆک کۆمار ژی ئێکەتیە، بۆ وی ژی ئیحراجەکا مەزنە ھەکە نەشێت کارتێکرنێ ل پارتا خوە بکەت، ھەروەسا عەبادی ژی یێ ل ھیڤیا ھندێ کو حوکمەتا وی نەکەڤیت، چونکی وی ھیڤی ب حزبا خوە نەمایە، دیسان لایەنێن عەرەبی دزانن کو حوکمەتا ھەرێمێ ژی پتر پابەندی بەرژەوەندیا کوردستانێ یە ژ یا پارتایەتی.
ھەروەسا گۆت ژی: ئەو لایەنێن دڤێن دژایەتیا پارتی بکەن، یا بێ مفایە و چو جاران ئەو لایەن نەشێن ڤێ چەندێ بکەن و بدەست وانڤە ناھێت، ھەر چەندە ئێکەتیێ گۆتیە ئەم یێ دگەل ریفراندوومێ، لێ مەلا بەختیاری بەری چەند رۆژان د کۆمبوونەکا دوور و درێژدا خەلک بێ ئۆمێدکر ژ دەولەتا کوردستانێ و وەسا گۆتیە کو ئەز چوویمە ئورۆپا بتنێ دو دەولەتان پشتەڤانی ل دەولەتبوونا کوردستانێ کریە، ئانکو ئەڤ نەساخیە دناڤ کوردان دا ھەیە، کو ئەز نەشێم چو بکەم و ئەز ناھێلم تۆ ژی چو بکەی، ھەروەسا گۆران ھەتا نوکە یا بێ ھەلویستە، لێ ئێکەتی نەشێت بۆ رایا کوردستانێ ڤێ چەندێ دیار بکەت، چونکی جادەیا کوردی ژێ قەبوول ناکەت، ھەروەسا بارزانی بۆ ھەمی لایەنان گۆتیە، کو کارێ من ئەوە ئەز دەولەتا کوردی ب دامەزرینم و من سەرۆکایەتی نەڤێت.