ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 17ى كانوونا دويێ 2016ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1296 |
| 1 يۆرۆيێ ئه‌ورۆپى | 1370 |
| 1 ليرێ توركى | 340 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ب سۆپاسى ڤه، برایێ سه‌رنڤیسكار و ستافێ ڕۆژنامه‌یا ئه‌ڤرۆ ده‌رگه‌هه‌كیان به ڕوودا كردینه‌وه، بۆ ئه‌وه‌ی بشێین هه‌فتیانه و له ڕۆژانی پێنجشه‌مبی و ل ڤێ ستوونێدا (بیاڤ) ل گه‌ل خوێنه‌رێن هێژا كۆمبین.
ده‌سپێك و به‌ری هه‌ر تشته‌كی ئه‌ز ب فه‌ڕ دزانم بێژم، د ناڤبه‌را من و به‌هدینان دا پێوه‌ندیه‌كی مكوم و جوان و پڕ ڕامان هه‌یه، ل سالا ١٩٨٩ بۆ ئێكه‌م جار بوومه قوتابی ل پشكا ژمێریاری ل په‌یمانگه‌ها ته‌كنیكی/دهۆك، دوای ٢٢ سال، جاره‌كا دی هه‌ر ل دهۆكێ بوومه‌وه قوتابی، لێ ڤێ جارێ بۆ خواندنا دكتۆرا د ئه‌ده‌بیاتێ كوردیدا ل زانینگه‌ها دهۆكێ، ئه‌م دو جاره‌ی خواندن و هاموشۆی به‌رده‌وامم بۆ كارێن میدیا و ڕۆشنگه‌ریی ل به‌هدینان، تایبه‌ت دهۆك و ناسینی كۆمه‌كا هه‌ڤالێن ئه‌زیز، خۆشه‌ویستیه‌كا بێ سنووری بۆ دروست كردووم، كه بووه ئه‌گه‌ری ئه‌وه‌ی یه‌كێ له كتێبه‌كانم (هێرمینۆتیكا) ل سالا ٢٠١١ پێشكه‌شی دهۆك و حه‌نینه جوانه‌كانی دهۆك بكه‌م.
ب ڤێ خۆشویستن و ڕێزگرتنێ هه‌وڵ دده‌ین د ڤێ ستوونێ دا (بیاڤ)، هه‌فتیانه گه‌ڕیانه‌ك ب ناڤ بیاڤێن جودا جودایێ ژیان، ژیار، سیاسه‌ت، كلتوور، جڤاك و پرسێن گه‌رم دا بكه‌ین، لێ گه‌ڕیانه‌كی نه‌ته‌وه‌یی، گه‌ڕیانه‌ك به‌ره‌ف چاره‌سه‌ریی، گه‌ڕیانه‌ك به‌ره‌ف كۆمكرنا په‌یڤێن خێر بۆ رسته‌گه‌لێن نیشتیمانی، چونكی وه‌ك هه‌می دزانین چ قووناخێك ب درێژیایێ دیرۆكێ میلله‌تێ مه ب قه‌د ڤێ قووسناغێن هه‌نووكه‌یی پێدڤی ب په‌یڤێن خێر، هاریكاری، لێبۆرین، ئاشتی و پێكڤه‌ژیانێ نینه. ئارمانجا دووهه‌م پێكڤه‌گریدانا تێگه‌ه و تێگه‌یشتنێن جودایه د ناڤبه‌را جوگرافیه‌ین جیاواز، چونكی ب دلنییایی ئێك ل ئه‌ركێن هه‌ره ل پێشی ڕۆشنفكرێن ولاتی، تایبه‌ت میدیاكارێن ولاتپارێز شكاندنا جوگرافیایه، لێ شكاندنه‌كا پۆزه‌تیڤ، شكاندنه‌كا بنیاتنه‌ر بۆ گه‌هشتن ب ئاسۆیه‌كا نه‌ته‌وه‌یی فراوانتر. ده‌لیڤه‌كی باشه، ل ڤر، گه‌ر ب كورتیش بێت، باسی ڤان سیاسی و میدیاكارێن به‌رچاڤ ته‌نگ بكه‌ین، كو كوردستان ب ته‌نێ له په‌نجه‌ره‌یه‌ت بچووك دبینن و نه‌شێن نۆڕینا خوه مه‌زن بكه‌ن، نۆڕینا بچووك ژی سیاسی و میدیاكارێن بچووك چێ دكات و نه‌شێن بگه‌هنه ئاستێ مه‌زنیا خه‌ونێت مه‌زن، تایبه‌ت بۆ نه‌ته‌وه‌كی خودان خه‌ونێن مه‌زن.
ل دووماهیێ ده‌ستخۆشی ل ڕۆژنامه‌یا ئه‌ڤرۆ دكه‌م، كه ب جیهانبینیه‌كی فراوان سه‌ره‌ده‌ری ل گه‌ل كارێ میدیایی دكه‌ت و ل پێخه‌مه‌ت شكاندنه‌كا پۆزه‌تیڤ سنووربڕیی دكه‌ت به‌ره‌ف فراوانتر، كه بێگومان روئیای فراوان چاره‌سه‌ری فراوان ل گه‌ل خوه دا هه‌لدگری و خوه ب خودانی هه‌می ڕه‌گێن جیاواز دزانی، چونكی وه‌ك دیاره و خۆیا دكه و هه‌می دزانین كوردستان ب ڕه‌نگێن جودا، ب كلتوورێن جودا، ب نه‌ته‌وه و ئایین و ئۆل و حزبێن جودا زه‌نگینه و ئه‌م ژی، تایبه‌ت ره‌ۆشه‌نبیر و میدیاكارێن ب خه‌م پێدڤیه هه‌می ل خه‌می كوردستانێ و پاشه‌ڕۆژێ كوردستانێ بین و په‌یڤێن خوه د خزمه‌تا ڕوناهیا ڤێ پاشه‌ڕۆژێ ڕه‌نگڕێژ بكه‌ین.
هه‌تا (بیاڤ) ـه‌كی دی و پێنجشه‌مبی دادێ،، ب خاترا وه‌یێ هێژا.
ئه‌ڤرۆ نيوز:
بەرپرسەکێ وەزارەتا ئەوقاف و کاروبارێن ئایینی یا حوکمەتا ھەرێما کوردستانێ ئاشکرا کر کو گۆتارێن رۆژێن ئەیینی دێ د ھەیڤا ئادارا ئەڤ سالە دا ھێنە سنووردارکرن و نابیت مامۆستایێن ئایینی ب کەیفا خوە گۆتاران بێژن، چونکی وەزارەت دێ تەوەرێ گۆتارێ دیار کەت و نابیت دەمێ پێشکێشکرنا گۆتارێ ژ 20 دەقیقا بۆریت.
مەریوان نەقشبەندی، رێڤەبەرێ پەیوەندیان ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ بۆ رۆژناما ئەڤرۆ دیار کر کو نوکە گۆتارا رۆژا ئەیینی ل سێ ھزار و 11 مزگەفتێن ھەرێما کوردستانێ دھێتە خواندن و ھەتا نوکە مامۆستایێن ئایینی د پێشکێشکرنا گۆتاران دا د ئازاد بوون، بەلێ د کۆنفرانسێ ئایینی دا کو 300 مامۆستایێن ب ناڤودەنگێن ھەرێمێ تێدا د پشکداربوون وەزارەتێ بڕیار دا پێداچوون د گۆتارێن ئەینیێ دا بھێتە کرن، چونکی وەلاتیان گازندە ژ گۆتارێن ھندەک مامۆستایێن ئایینی ھەبوو و گۆت: “ئێدی وەزارەت دێ تەوەرێ گۆتارێن ئەیینیێ دیارکەت و مامۆستا دێ ب درێژی ل سەر ئاخڤن”.
ناڤھاتی خویا کر کو لیژنەکا بسپۆر ژ وەزارەتا ئەوقافێ دێ گۆتارێن ئایینی دەستنیشان کەت و مامۆستا نەشێن ب حەزا خوە گۆتارا پێشکێش بکەن و سەرەرایی ڤێ چەندێ دێ دەمێ گۆتار خواندنێ ژی ھێتە دیارکرن، چونکی ھندەک مامۆستایێن ئایینی پێشکێشکرنا گۆتارا خوە ژ دەمژمێرەکێ دبۆرینن و وەلاتی گازندا ژێ دکەن ژ بەر ڤێ چەندێ دەمێ پێشکێشکرنا گۆتارێ دێ 20 دەقیقە بیت و گۆت: “ل ھەیڤا ئادارا ئەڤ سالە دێ کار ب ڤێ بڕیارێ ھێتەکرن”.
ئەڤرۆ نيوز:
بەرپرسێ پشکا راگەھاندنێ ل رێڤەبەریا بەرەڤانیا باژێری ل قەزا ئاکرێ ئاشکرا کر کو پشتی ل شەڤا 15 ل سەر 16-1-2016ێ تیمێن وان یێن ئاگرڤەمراندنێ ب روودانەکا ئاگربەربوونێ ل تاخێ سەرنیە د ناڤ سەنتەرێ قەزا ئاکرێ دا ھاتینە ئاگەھدارکرن ئێکسەر گەھشتنە جھێ روودانێ و دیاربوو کو ئاگر یێ بەربوویە مالەکێ شیان وێ روودانێ کۆنترۆل بکەن.
رائید فیراس یاسین، بەرپرسێ پشکا راگەھاندنێ ل رێڤەبەریا بەرەڤانیا باژێری ل قەزا ئاکرێ بۆ رۆژناما ئەڤرۆ دیار کر کو ژ ئەگەرێ پەیدابوونا وێ روودانا ئاگری ژنەک ب ناڤێ (ن، غ) د ژیێ 35 سالیێ دا ھاتە سۆتن و ئێکسەر بۆ نەخۆشخانا تەنگاڤیان ل قەزا ئاکرێ ھاتە ڤەگوھاستن، بەلێ ژ بەر کو لەشێ وێ گەلەک ھاتبوو سۆتن بۆ نەخۆشخانا سۆتن و جوانکاریێ ل پارێزگەھا دھۆکێ ھاتە رەوانەکرن و گۆت: “ل دووڤ پشکنینێن نۆشداران 80% ژ لەشێ وێ ژنێ یێ ھاتیە سۆتن و نوکە مەترسی یا ل سەر ژیانا وێ ھەی”.
ناڤھاتی ئاماژە دا وێ چەندێ کو ب گۆرەیی پێزانینێن دەستپێکی وێ ژنێ ب دەستێن خوە ئاگر بەردایە خوە و مالا خوە ژی سۆتیە، بەلێ ڤەکۆلین دگەل کەس و کارێن وێ یا بەردەوامە، چونکی ئەو ب خوە نەشێت باخڤیت و گۆت: “بادەکێن ڤێ روودانێ بۆ رێڤەبەریا بەرھەنگاربوونا توندوتیژیێ ل ئاکرێ ھاتینە رەوانەکرن داکو ڤەکۆلین ل دۆر بھێتەکرن”.
ئه‌ڤرۆ نيوز:
پەرلەمانتارەک دبێژیت، پارێزگارێ سەلاحەدین بڕیار دایە ناحیا ئامرلی ببیتە قەزا و ئەڤە د دەمەکی دایە ئامرلی ناحیەیە سەرب قەزا خورماتوڤە و پرس ب ھەرێما کوردستانێ ژی نەھاتیەکرن، لەوڕا دڤێت کوردان ھەلویست ھەبیت ل دۆر دەرچوونا ئەڤێ بڕیارێ و بھێتە ھەلوەشاندن.
عەبدولڕەحمان فارس، سەرۆکێ فڕاکسیۆنا ئازادی ل پەرلەمانێ کوردستانێ بۆ رۆژناما ئەڤرۆ گۆت “بڕیارا قەزاکرنا ناحیا ئامرلی بڕیارەکا شاشە و زێدەتر بڕیارەکا سیاسیە، چونکی ناحیا ئامرلی سەر ب قەزا خورماتوڤەیە و دکەڤیتە سنوورێ ماددێ 140 یێ دستوورێ عیراقێ، لەوڕا نابیت تنێ لایەنەک بێی ھەرێما کوردستانێ بڕیارێ ل سەر قەزابوونا ئامرلی بدەت و پێدڤیە بڕیار بھێتە ھەلوەشاندن، ژبەرکو ئەڤ رەوشا دەڤەرێن کوردستانی تێدا یا ھندێ نینە کو بڕیارێن وەسا بھێنەدان ھێشتا ئاریشا ڤان دەڤەرا ژلایێ دستووری ڤە نەھاتیە ئێکلاکرن”.
عەبدولڕەحمان فارس گۆت ژی “نابیت ھەرێما کوردستانێ یا بێدەنگ بیت ھەمبەر ڤێ پرسێ و ئایندەیا دەڤەرێن کوردستانیێن دەرڤەی سنوورێ ئیدارا حکوومەتا ھەرێما کوردستانێ و دڤێت ھەلویست ھەبیت، چونکی ئەڤ ناحیە خاکا کوردستانێ یە و ژلایێ ئیداری ڤە گرێدای قەزا خورماتویە، پێدڤی جڤاتا قەزا خورماتو ئیدارا دەڤەرێ ئەڤێ بڕیارێ قەبوول نەکەت و بھێتە ھەلوەشاندن، وی دەمی دێ بڕیار ل سەر ئەڤان دەڤەرا ھێتەدان کو بھێنە چارەسەرکرن و خەلکێ دەڤەرێ بڕیارێ ل دۆر پاشەرۆژا خوە بدەن، نەکو پارێزگارەک بڕیارەکا سیاسی بدەت”.
ئه‌ڤرۆ نيوز:
د پرێس کۆنفرانسەکی دا دوھی 16-1-2017 بەرپرسێ پشکا پەیوەندی و راگەھاندنێ ل سەرۆکاتیا باژێرڤانیا دھۆکێ دیار کر سالا بۆری 121 پرۆژێن خزمەتگوزاری ھاتینە ئەنجامدان ژ وانا ژی قێرکرن و کۆمکرن و ڤەگوھاستنا بەرمایکێن ئاڤاھیان.
ئیسماعیل مستەفا بەرپرسێ پشکا پەیوەندی و راگەھاندنێ ل سەرۆکاتیا باژێرڤانیا دھۆکێ دیار کر راکرنا نێزیکی 172 ھزار و 800 تەنێن بەرمایکێن گلێشی کو رۆژانە دھێنە راکرن و بۆ کواشێ دھێنە ڤەگوھاستن ئەو ژی رۆژانە دبنە 480 تەن و زێدەباری ئەنجامدانا پتر ژ 500 ھەوێن پاقژی و راکرنا بەرمایکێن سەیرانیان ل جھێن گەشتیاری ئەو ژی ھزار و 100 تەنێن گلێشی بووینە و ئەنجامدانا ھەوێن پاقژیێ ل دەمێ بارانان.
خویا ژی کر کو ب رۆبەرێ 102 ھزار و 300 مەترێن چارگوشە کو پێک دھێت ژ داروباری و گولێن جوانیێ و کەسکاتیێ و دروستکرنا 11 باغچەیان ل ناڤەندێن جادا و دروستکرنا چار باغچە ژلایێ وەلاتیان ڤە و چاندنا ھژمارەکا زۆر دار و گولا و نوکە رێژا کەسکاتیێ ل دھۆکێ 10% یە و 180 ھزار گولێن بوھاری ل ناڤەندێن جادەیان ھاتینە چاندن و چاندنا 169 ھزار گولێن ھاڤینی.
ئیسماعیل مستەفا گۆت ژی “دەستووریێن ئاڤاھیان سالا بۆری 967 دەستووریێن ئاڤاھیان ھاتینە دان ژوانا 772 دەستووریێن ئاکنجیبوونێ بووینە و 132 دەستووریێن بازرگانیێ ھاتینە دان و 12 دەستووریێن پیشەسازی و 51 دەستووریێن ھەمە جۆر ل جڤاتا باژێرڤانیا دھۆکێ 49 کۆمبوونێن ئاسایی ھاتینە کرن 317 بریاریێن ھەمە جۆر ھاتینە دان”.
رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ راگه‌هاند كو سوبه‌هى رۆژا چاركشه‌مبى رێكه‌فتى 18ى كانوونا دويێ 2017 ئه‌سمانێ دهۆكێ دێ ئه‌وره‌كێ ناڤه‌ندى بيت.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ كارتێكرنا فشارێن بلندێن وه‌لاتێ توركيا دهێته پێشبينيكرن ئه‌سمانێ دهۆكێ ئه‌وره‌كێ ناڤه‌ندى بيت.
پشكا پێشبينيان دايه زايه زانين كو دێ ئاراستێ باى ژى دێ باكوورێ رۆژهه‌لات بيت ب ره‌نگه‌كى د ناڤبه‌را 5 هه‌تا 10كم دا و ماوێ ديتنێ ژى دێ د ناڤبه‌را 9 بۆ 10كم دا بيت، پلێن گه‌رمێ ژى دێ د ناڤبه‌را 4 بۆ 13 پلان دا بن.
ئه‌ڤرۆ نيوز:
رۆژنامەکا بریتانی دیار دکەت کو ئیران مژوولی دوبارە پێکئینانا ناسناما سووریێ یە ب رێیا ئەنجامدانا کریارێن گوھۆڕینا دیموگرافی و ئیران بزاڤا دەرکرنا سونەیان ژ دیمەشقێ و دەوروبەرێن وێ دکەت و دخوازیت رێیا دیمەشقێ ھەتا سنورێ لوبنانێ کونترۆل بکەت و خێزانێن شیعی ژ عیراقێ و لوبنانێ ل جھێ خێزانێن سونی یێ دەرکری ئاکنجی بکەت.
ئیران مژوولی دوبارە پێکئینانا ناسناما سووریێ یە ب رێیا ئەنجامدانا کریارێن گوھۆڕینا دیموگرافی و ڤێ چەندێ ژی دێ کارڤەدانێن پاشەرۆژی نە تنێ ل سەر سووریێ ھەبن، بەلکو ل سەر دەستھەلاتا ئیرانێ ل دەڤەرێ ژی.
رۆژناما گاردیان یا بریتانی د راپۆرتەکا خوە دا دیار دکەت کو ئیران بزاڤا دەرکرنا سونەیان ژ دیمەشقێ و دەوروبەرێن وێ دکەت و دخوازیت رێیا دیمەشقێ ھەتا سنورێ لوبنانێ کونترۆل بکەت و خێزانێن شیعی ژ عیراقێ و لوبنانێ ل جھێ خێزانێن سونی یێ دەرکری ئاکنجی بکەت.
ل دووڤ راپۆرتا رۆژناما ناڤبری کو ژلایێ الخلیج اونلاین ڤە ھاتیە ڤەگوھاستن، ئیران یا بزاڤێن رژد بۆ دەربەدەرکرنا وەلاتیێن ل گەلیێن دیمەشقێ و لوبنانێ پێکڤە گرێددەت دکەت و ھەر ل دەستپێکا شەڕێ سووریێ بەری شەش سالان ئیرانێ ئەو بزاڤ کرینە د چارچۆڤێ پیلانا زێدەتر دەست ب سەرداگرتنا خوە ل سەر سووریێ ب رێیا کریارێن گوھۆڕینێن دیموگرافی.
گاردیان ژ زاردەڤێ بەرپرسەکێ لوبنانی یێ مەزن ڤەدگوھێزیت” ئیران و سووریا ناخوازن سونەیان ھەبوون د ناڤبەرا دیمەشقێ و حومسێ و سنۆرێ لوبنانێ دا ھەبن و ئەڤە ژی گوھۆڕینەکا دیرۆکی یە د سروشتێ ئاکنجیێن وێ دەڤەرێ دا”.
ھەر ژ دەستپێکا پرۆسا ئاگربەستێ ل 30 کانوونا ئێکێ 2016 ێ ل ھندەک دەڤەران، دەرکرنا وەلاتی و ئاکنجیان ل سەرێ لیستا داخوازیێن حوکمەتا سووریێ و میلیشیێن پشتەڤانێن وێ و ئیرانێ نە ب تایبەتی ل دەڤەرێن دەوروبەرێ دیمەشقێ.
ل دووڤ پرۆژێ ئیرانی کو ب رێیا گرۆپێن وێ یێن لەشکری یێن ل سووریێ بەربەلاڤ، ب تایبەتی حزب اللە یا لوبنانی، دێ دوبارە دەڤەرێن سووری ژلایێ تائیفی ڤە ھێنە پێکئینان ب رێیا ئاکنجیکرنا خێزانێن شیعی ل دەڤەرێن خێزانێن سونی لێ دھێنە دەرکرن، بۆ نموونە 300 خێزانێن شیعی یێن عیراقی ل ھندەک تاخێن باژێرێ داریا ھاتینە ئاکنجێکرن پشتی ل تەباحا 2016ێ خێزانێن د چارچۆڤێ رێککەفتنەکێ دا کو ل پەی وێ 700 چەکدارێن ئۆپۆزسیۆنا سووری ل گەل خێزانێن وان ھاتینە ڤەگوھاستن بۆ باکوورێ سووریێ.
ل دەستپێکێ، پاراستنا مەزارێن شیعی بەھانا مایتێکرنا ئیرانێ د سووریی دابوو و پاشی دەستھەلاتا ئیرانێ ل سووریێ بەرفرەھتر بوو و دەست ب کڕینا خانوبەران ل دەوروبەرێن مەزارێ زەینەبێ ل دیمەشقێ کر و دووماھی کریارا کڕینێ یا پارچەکا ئەردی یا مەزن بوو ل نێزیک وی مەزاری.
رۆژناما بریتانی ژ ئەبو مازن دەرکۆش کو سەرکردەکێ ئۆپۆزسیۆنا سووری یا چەکدارە و ژ باژێرێ زەبەدانی بۆ گەلیێ بەرەدا دەەرکەفتیە، ڤەدگوھێزیت” مزگەفتا ئەمەوی کو مەزنترین ھێمایێ ئیسلامی یە ل سووریێ، یا بوویە دەڤەرەکا ئەمنی دبن کونترۆلا پشتەڤانێن ئیرانێ و چەندین شیعە یێن ل دەوربەرێن وێ مزگەفتی ھاتینە ئاکنجیکرن”.
گۆت ژی” ئیرانێ پێنگاڤەکا مەزن د رێیا گوھۆرینا دیموگرافی ل سووریێ ھاڤێت، ب رێیا دەرکرنا ئاکنجیان و سوتنا مولکێن وان، پێنگاڤا د دووڤدا دێ ئینانا وەلاتیێن شیعە بیت ژ عیراقێ و لوبنانێ بۆ ئاکنجیکرنا وان ل دەڤەرێن سونە ژێ ھاتینە دەرکرن”.
ئەڤرۆ نیوز:
ھەرپێنج فڕاکسیۆنێن کوردستانی ل پەرلەمانێ عێراقێ کۆمبوونەکا گرنگ لدۆر چەند پرسەکا گرێدا و تێدا بڕیار ھاتەدان حەفتیا بھێت کۆمبوونەکا دی بھێتە رێڤەبرن، سەرۆکێ فڕاکسیۆنا کۆمەلا ئیسلامی ژی دبێژیت، مە نەڕازیبوونا خوە لدۆر قەزاکرنا عامرلی دیارکریە و پێدڤیە جڤاتا پارێزگەھا سەلاحەددین بڕیارا خوە ھەلوەشینیت بەرۆڤاژی دێ توشی لێپرسینا قانوونی بن.
زانا رۆستایی، سەرۆکێ فڕاکسیۆنا کۆمەلا ئیسلامی لپەرلەمانێ عێراقێ بۆ رۆژناما ئەڤرۆ گۆت” دوھی رۆژا دوشەمبی فڕاکسیۆنێن کوردستانی لپەرلەمانێ عێراقێ کۆمبوونەکا گرنگ لدۆر دو پرسێن گرنگ ئەنجامدا و تێدا ب ھویری دانوستان لدۆر ھەردو مژارا ھاتنەکرن، پرسا ئێکێ ب قەزا کرنا ناحیا عامرلیە ژلایێ جڤاتا پارێزگەھا سەلاحەددین کو بەری نوکە ناحیەبویە سەرب قەزا خورماتووڤە، بەلێ جڤاتا پارێزگەھێ بڕیاردایە ببیتە قەزا، ئەڤەژی بەرۆڤاژی دستوورێ عێراقێ یە و ھەتا ماددێ 140 نەھێتە بجە ئینان، نابیت ب چو شێوەیەکی دەستکاریا سنورێ جوگرافیێ ئەڤان دەڤەرا بھێتەکرن، ھەتا وی دەمێ ژلایێ یاسایی تێنە ئێکلاکرن، مە رێز بۆ قوربانیا خەلکێ ناحیا عامرلی ھەیە، بەلێ نابیت جڤاتا پارێزگەھا سەلاحەدین بڕیارەکا وەسا بدەت بێی کوردا و ئەگەر بڕیارا وان نەھێتە ھەلوەشاندن دێ توشی لێپرسینێن قانوونی بن و ئەم وەک کورد ب چ شێوەیەکی رازینینە لایەنەک ب کەیفا دەستکاریا ئەڤان دەڤەرا بکەت، بلا ماددێ 140 بھێتە بجە ئینان وی دەمێ بلا خەلکێ ھەر دەڤەرەکێ بڕیارێ لدۆر پاشە رۆژا خوە بدەت.
زانا رۆستایی گۆتژی” پرسا دویێ کو فڕاکسیۆنێن کوردستانێ دانوستان لدۆر کری، پرسا پڕۆژە قانوونا ھەلبژارتنێن جڤاتێن پارێزگەھێن عێراقێ یە، چونکە حوکمەتا عێراقێ بەری نوکە پڕۆژە قانوونەک لدۆر ھەلبژارتنێن جڤاتێن پارێزگەھان ھنارتیە پەرلەمانی و ڤەخواندنێ ئێکێ بۆ ھاتیەکرن، بەلێ وەک فڕاکسیۆنێن کوردستانی گازندە لسەر ھەیە، چونکە تێدا ھاتیە، چەند مەرجەک ھاتینە دانان بۆ رێڤەبرنا ھەلبژارتنان ل جڤاتا پارێزگەھا کەرکووکێ ئەڤەژی ژلایێ مە ناھێتە قەبولکرن و دڤێت چو مەرج بۆ ھەلبژارتنێن جڤاتا پارێزگەھا کەرکووکێ نەمینن و مینا ھەموو پارێزگەھێن دی یێن عێراقێ ھەلبژارتن تێدا بھێنەکرن، د کۆمبوونێ دا چەند تێبینیەک ھاتنە بەرچاڤکرن و بڕیارە حەفتیا داھاتی جارەکادی کۆمبوون لسەر بھێتەکرن و ھەر فڕاکسیۆنەک دێ دگەل حزبا خوە کۆمبیت و بۆچوون و پێشنیارێن خوە ئینن کۆمبوونا داھاتی و ئەم وەک فڕاکسیۆنێن کوردستانێ دێ ئێک ھەلویست و پێشنیار بۆ ھەلبژارتنێن جڤاتا پارێزگەھێن کەرکووکێ ھەبیت.
نيشاندان
