NO IORG
Facebook

1321

ئەڤرۆ نيوز:
سترانبێژا گەنج پەروازحسێن دیارکر، ل دەمێ بھێت ئەو دێ بەرھەمەکێ نوو بەلاڤ کەت، کو ئەو ژی سترانەکا دوقولی یە ل گەل ھەڤژینێ خوە گۆتیە.
ناڤھاتیێ وێنەکێ خوە یێ نوو ل گەل ھەڤژینێ خوە یێ ھونەرمەند گۆران سالحی ل فیسبووکی بەلاڤکریە، و دبندا نڤیسی یە: ئەز حەزژێکەرێن دەنگێ خوە ئاگەھدار دکەم کو ل ڤێ دووماھیێ من و ھەڤژینێ خوە یێ خۆشتڤی گۆرانی پێکڤە سترانەک تۆمارکریە، و ل رۆژێن بھێن دێ بۆ ھەوە کەمە دیاری.
پەرواز خەلکا باژێرێ ھەولێرێ یە، بەری چەند سالان ل کەنالێ (mbc) پشکداری د بەرنامەکێ ھونەری دا کربوو، و ھەتا قۆناغا بەری دووماھیێ چوو بوو، و پشتی وی بەرنامەی ھەتا رادەکێ باش ل ناڤ کوردستانێ و چەندین وەلاتێن عەرەبی بەرنیاس بوو.

ئەڤرۆ نیوز:
رۆژنامەڤانەکێ ناڤدارێ تورکیا دیار دکەت کو پشتی سەرنەگرتنا کۆدەتایا سەربازی یا ل تورکیا ئەردۆگان دێ پتر خوە نێزیکی روسیا کەت، چونکو ئەردۆگان و ھەڤالێن وی دبێژن کۆدەتا ژ ئالیێ دەزگەھێ ھەوالگیریا ئەمریکا ڤە ھاتبوو رێکخستن کرن و ژ بەر ھندێ ژی ئەردۆگان دێ خوە ژ ئەمریکا دوور کەت و ھەروەسا ئەز باوەر دکەم ھەتا مەھەکا دی ئەردۆگان شاندەکێ رەوانەی ھەرێما کوردستانێ کەت یان ژی داخواز ژ بارزانی کەت دا سەرەدانا تورکیا بکەت و ئەردۆگان دێ پشتەڤانیا خوە بۆ دەولەتا کوردی دیار کەت.
رۆژنامەڤانێ ناڤدارێ تورکیا عەون ئوزگورەل د نڤیسەکا خوە دا بۆ مالپەرێ T24 یێ تورکیا دیار کریە کو ئەردۆگان و کەسێن نێزیکی وی دبێژن کو پیلانا کۆدەتایێ ژ ئالیێ دەزگەھێ ھەوالگیریا ئەمریکا ڤە ھاتبوو رێکخستن و وان دڤیا فەتوللا گولەن بکەنە سەرۆکێ تورکیا لێ کۆدەتا سەرنەگرت و ژ بەر ھندێ ژی ئەردۆگانی دڤێت ھەموو دەزگەھێن سەر ب گولەنی قەپات کەت و کەسێن نێزیکی وی ژی بکەتە زیندانێ و گۆت: (پشتی سەرنەگرتنا کۆدەتایێ دێ گوھۆرینێن بەرچاڤ ل سیاسەتا تورکیا دا دروست ببن و ئەردۆگان ل گەل شیرەتکارێن خوە بەحسێ پێنگاڤێن خوە یێن نوو دکەت و ئەز باوەر دکەم ھەتا مەھەکا دی ئەم دێ گەلەک گوھۆرینان ل سیاسەتا دەرڤە یا تورکیا دا ببینین).
نڤیسەرێ ناڤدارێ تورکیا دیار دکەت کو تورکیا دێ خوە ژ ئەمریکا دوور کەت و خوە نێزیکی روسیا بکەت، من زانیاریێن باش بدەستڤە ئیناینە کو نھا ل سەر باشکرنا پەیوەندیان ل گەل روسیا کار دھێتە کرن و ئەو یەک دێ کارتێکرنێ ل سیاسەتا تورکیا ل ھەمبەر سووریێ ژی کەت و تورکیا دێ نەچار بیت گەلەک تشتێن کو بەری نھا دگۆتن ژێ ڤەبیت و ئەو یەک ژی دھێتە واتەیا گوھۆرینا گۆتارا سیاسی یا تورکیا.
ناڤھاتی ھەروەسا دیار دکەت کو تورکیا خوە بەرھەڤ دکەت دا ھەلویستێ خوە ل ھەمبەر رەوشا عیراقێ و ھەرێما کوردستانێ پتر ئاشکرا کەت، چونکو تورکیا گەلەک باوەریا خوە ب ھەلویستێ بارزانی دئینیت و ژ بەر ھندێ ژی ئەز ھوسا دبینم رەنگە ھەتا مەھەکا دی شاندەکێ بالا یێ تورکیا سەرەدانا ھەرێما کوردستانێ کەت یان ژی تورکیا ب رەنگەکێ فەرمی داخواز ژ مەسعود بارزانی سەرۆکێ ھەرێما کوردستانێ بکەت کو سەرەدانا تورکیا بکەت و گۆت: (تورکیا دێ ڤێجارێ ب رەنگەکێ جدی پێشوازیێ ل داخوازیێن بارزانی کەت و ئەز ب باوەرم دێ ئەردۆگان پشتەڤانیا خوە ب رەنگەکێ فەرمی بۆ دەولەتا کوردی ژی دیار دکەت و ئەو یەک دێ گوھۆرینێن مەزن ل دەڤەرێ ژی دروست کەت).
رۆژنامەڤانێ ناڤدارێ تورکیا ھەروەسا دیار دکەت کو ئێک ژ خالێن دی کو دھێتە پێشبینی کرن ژی چارەکرنا پرسا کوردی یە ل تورکیا و ئەردۆگانی دڤێت د دەمەکێ نێزیک دا ھندەک گوھۆرینان بکەت، چونکو ھەلویستێ کوردان و پارتیا وان ل ھەمبەر کۆدەتاچیان ب دلێ ئەردۆگانی بی و ژ بەر ھندێ ژی ئەردۆگان دێ جارەکا دی دەست ب قۆناغا ئاشتی و چارەکرنا پرسا کوردی کەت، چونکو مەترسیا گولەنی و جەماعەتا وی ل سەر تورکیا یا ھەی و ئەردۆگان ژی باش دبینیت کو د رەوشەکا وەسا زەحمەت دا دڤێت کوردان نەکەتە دوژمنێ خوە و رەنگە ئەو یەک باشترین دەلیڤە بیت دا جارەکا دی دەست ب دانوستاندنان بھێتە کرن و قۆناغا ئاشتیێ بھێتە دەستپێ کرن.

714

ەئڤرۆ نیوز:
شیرێ بزنان گەلەک مفا بۆ ساخلەمیا مرۆڤی ھەنە، ژ وان مفایان ژی لەشی ب بزاڤ دئێخیت و مرۆڤی ژ وەستیانێ و کەرخینێ قۆرتال دکەت، ھەروەسا ھەستیان و ددان ب ھێز دئێخیت ژبەرکو قەبارەکێ باش یێ کالسیۆمی یێ د ناڤ دا ھەی، ئەو چەندە ژی مرۆڤی ژ پشبوونا ھەستیان دپارێزیت.
شیرێ بزنان بۆ ژنا دوگیان گەلەک یێ ب مفایە، ئەو کار بۆ قەرەبووکرنا رێژەیا کالسیۆمی دکەت یێ ژنا دوگیان ژ دەست ددەت، ھەروەسا وێ ژ وەرمینا دەست و پێیان دپارێزیت ئەوا ژن د قۆناغا دوگیانیێ دا تووش دبیتێ ژبەر رێتنا تەڕاتیان د ناڤ دەمارێن خوینێ دا، ھەروەسا وێ ژ تووشبوونا ب ژەھراویبوونێ دپارێزیت ژ بەر ھەبوونا مەگنیسیۆمی.
شیرێ بزنان یێ ھاریکارە بۆ ئاڤاکرنا زەپلەکان، ژبەرکو پرۆتینێن گرنگ د ناڤ دا ھەنە بۆ ئاڤاکرنا زەپلەکان، ھەروەسا کەرستێن ھاندەر بۆ وەرارێ د ناڤ دا ھەنە وەکو ریبۆفلافین، ھەروەسا بھێزکەرێ خوینێ ئەو ژی ئەلبۆمین. ھەروەسا یێ ھاریکارە بۆ ب ھێزکرنا تەپێن سۆرێن خوینێ.
سەبارەت مفایێن شیرێ بزنان بۆ پیستی ژی، یێ ھاریکارە بۆ نەرمکرن و تەڕکرنا پیستی، ژبەرکو پرۆتینەکێ ب ھێز بۆ پاراستنا تەڕاتییا پیستی د نا دا ھەیە و ناھێلین ھشک بیت، ھەروەسا چارەکرنا ئەکزیمایێ ژی دکەت.

ئوڕۆ نيوز:

دەستپێکرنا وەرزێ نویێ پەرلەمانێ عێراقێ ب کومەکا ئاریشەیان دەسپێکر و نوونەرەکێ کوردژی دبێژیت، ھژمارەک پرسێن گرنگ ماینە ھەلاویستی و نەھاتینە چارەسەرکرن، ھەروەسا دیارکر، ھەیڤا تەباخا داھاتی وەزیرێن حوکمەتا عێراقێ دێ ھێنە پەرلەمانی و ھوشیار زێباری وەزیرێ دارایی و ئابۆری ژی دێ تووشی لێپرسینا پەرلەمانتارانبیت.
دکتۆر عەرەفات کەرەم، پەرلەمانتارێ پارتی دیموکراتی کوردستان ل پەرلەمانێ عێراقێ بۆ رۆژناما ئەڤرۆ گۆت” ھەرچەندە کۆمبوونێن جڤاتا نوونەرێن عێراقێ ھاتینە دەستپێکرن، بەلێ ھێشتا پەرلەمان نەشیایە بتەمامی کارێ خوە بکەت، چونکە زۆر ئاریشە ماینە ھەلاویستی و نەھاتینە چارەسەرکرن، بۆ نموونە ئاریشا دەستەیا سەرۆکایەتیا پەرلەمانی وەکی خوە مایە و فرکسیۆنا چاکسازی یاکو ھژمارا وان نێزیکی 100 پەرلەمانتارانە درژدن لسەر لادانا سەرۆک و جێگرێن پەرلەمانی، بڤێ تۆمەتێ سەرۆکێ پەرلەمانی سەلیم جبوری ئاریشە بریە دادگەھێ و سکالا لسەر دەھە پەرلەمانتاران تۆمارکریە، کو بووینە ئەگەرێ خۆنیشاندانێن بۆری و ھێرشکریە سەر ئاڤاھیێ پەرلەمانی، ھەروەسا ئاریشە ل ناڤبەرا حوکمەتێ و پەرلەمانی ھەیە و حوکمەت نەشیایە وەزیرێن خوە بگوھۆڕیت، خۆنیشاندان ھێشتا د بەردەوامن، یا ھەموویێ گرنگتر ئەڤە ئاریشە دناڤ عەرەبێن شیعەدا ھەیە و پێشبینی دھێتەکرن ھێشتا ئاریشەیێن وان مەزنتر ببن، بڤی شێوەی بیت رەوش تەنا نابیت و ھێشتا ئالۆزی کەڤیتە رەوشا عێراقێ بگشتی و بەغدایا پایتەخت.
دکتۆر عەرەفاتی گۆتژی” بڕیارە ھەیڤا تەباخا داھاتی وەزیرێن حوکمەتێ بھێنە پەرلەمانی بۆ لێپرسینێ، دناڤ وەزیراندا ھوشیار زێباری وەزیرێ دارایی و ئابۆری ھەیە، بڕیارا گازیکرنا وەزیرا ھاتیە دەرکرن، بەلێ ھێشتا پەرلەمانتار دبەرھەڤ نینە و مژۆلی کۆمکرنا زانیاریانن لدۆر کارێ وەزارەت و فەرمانگەھێن حوکمەتێ، ھەردەمێ گەھشتنە قۆناغا دووماھیێ ئەڤە ئەز باوەرم دەستپێکا ھەیڤێ دێ وەزیر ھێنە پەرلەمانی بۆ لێپرسینێ، ھەروەسا ئەم وەک پەرلەمانتارێن کورد مژولی کۆمکرنا زانیاریانین لدۆر گازیکرنا ھوشیار زێباری، ژبەر کو مە گۆمان ھەیە دەستەکێ سیاسی لپشت گازیکرنا وەزیرێ کورد یێ دارایی ھەبیت، ھەکە گەھشتینە ڤێ باوەریێ چو مەرەمێن سیاسی لپشت نینە ئاسایە لێپرسین دگەل ھەر وەزیر و بەرپرسەکی بھێتەکرن ھەتا کوردیش بیت، پێدڤیە بەرنامێ گازیکرنا وەزیرا یێ دیاربیت و بزانین پەرلەمانتارا لدۆر چو پرسەکێ پرسیار ھەنە ل وەزیرێن پەیوەندیدار.

555

ئەڤرۆ:
پشتی بۆ دەمێ چەندین سالان چو سترانێن نوو نەگۆتین، و ھەتا رادەکی ژچافکێن کامیرا و ھەموو کەنالێن راگەھاندنێ دوور کەفتی، بەری دو رۆژان ل ئاھەنگا ژ دایکبوونا خوە کو ل باژێرێ ھەولێرێ ھاتبوو کرن، ھونەرمەندا دەنگخۆش لەیلا فەیقی ئاشکەرا کر، ئەڤە دەمەکە ئەو ل گەل ھونەرمەندێ ئاوازدانەر ھەلکەوت زاھیر مژوولی کارەکێ نووبە، کو ئەو ژی ژ چەند سترانان پێک دھێت، و ب وان سترانان جارەکا دی دێ ڤەگەرێتە وارێ سترانگۆتنێ.
ناڤھاتیێ بۆ رووداو گۆت: ھەر وەکو ھوون ھەموو دزانن ئەڤە بۆ دەمێ چەندین سالان بوو ژبەر ھندەک ئەگەرێن تایبەت ب منڤە ئەز ژ ھونەری دوورکەفت بووم، لێ بەری چەند ھەیڤان ئەزو ھونەرمەند ھەلکەوت زاھر پێکڤە روونشتین و مە بریاردا جارەکێ ب ڤەگەرینە وارێ سترانگۆتنێ و خزمەتا وان کەسان بکەین یێن کو گۆھداریا دەنگێ مە دکەن، و ب سوپاسی ڤە ماموستا ھەلکەوت بەرھەڤیا خوە بۆ ھەر ھاریکاریەکێ دیارکر، و ئێدی مە دەست ب کارەکێ نوو یێ ھونەری کر، لەورا دبێژمە حەزژێکەرێن دەنگێ خوە چاڤەرێی بەرھەمێ من یێ نوو بن، کو ئەو ژی ژ چەند سترانان پێک دھێت، و ئەڤ سترانە دێ بنە ئەگەرێ دوبارە ڤەگەریانا من بۆ ناڤ وارێ ھونەری، ب تایبەت ژی سترانگۆتنێ، کو ھندی ئەزا ساخبم دی ل گەل ژیم.
لەیلا فەریقی، خووشکا ھونەرمەندا ناڤدارا وەغەرکری ( مەرزیە فەریقی) یە، ئەو ب خوە خەلکا رۆژھەلاتێ کوردستانێ یە، لێ بۆ دەمێ چەندین سالە ل ئورۆپا دژیت، ل رۆژا 19-7-2016 ل ریستۆرانتەکا باژێرێ ھەولێرێ ئاھەنگا ژ دایکبوونا خوە گێرا، لێ یا بەرھەڤ نەبوو دیاربکەت کا ژیێ وی بوونە چەند سال.

ئەڤرۆ نیوز:
ئیس بی موجومدەر، سیاسەتمەدار و ھزرڤان و سەرۆکی زانکۆیا سمبیاسسە ل ولاتێ ھندستانێ ل دیدارەکا تایبەتدا ب ئەڤرۆ راگەھاند، رەوشەکا ھەستیار و چارەنووس ساز ھاتیە بەردەم کوردان و پێدڤی یە کورد ئەڤێ رەوشێ ل دەست خۆ نەکەن، و سەرخوەبوونا خوە را بگەھینن و پشتەڤانیا سەرۆکی خوە مەسعوود بارزانی بکەن، ھەکە کورد وە نەکەن ئەڤ دەرفەتە ژ دەست وان دێ چیت.
پرۆفیسۆر موجومدەر زێدەتر گۆت: داعشێ نەزانی ب ھێرشکرنا لسەر ئاخا ھەرێما کوردستانێ چو مفایان دگەھینتە ھەرێما کوردستانێ، لەوڕا ھێرشکرە سەر و ھەکە زانی با چو جاران ھێرش نەدکرە سەر، ھەروەسا دیارکر، پشتی ھێرشا داعشێ ھێزین کوردستانێ قارەمانانە بەرگری ل خۆ کر و ئەو شیان بێژنە ئەمریکا و ھەموو وەلاتێن دونیایی کو ئەم ل دژی تیرۆر و تیرۆرستانین و کەس نەشێت دەستێ خوە لسەر مە بلند بکەت، لەورا ھەموو وەلاتین بیانی ژی ھاتنە سەر خەتێ و وانا ھاریکاریا ھەرێما کوردستانێ کر.
ناڤھاتی خویاکر، نووکە چو دەولەتەک بناڤێ عیراقێ نەمایە لسەر نەخشەیا جیھانی و عیراق پارچە پارچە بوویە لێ ھیشتا پێنووس لسەر نەخشەی نەھاتیە ب کار ئینان، پرۆفیسۆری دایە زانین کو ل دیرۆکا رۆژھەلاتا ناڤین حەتا نووکە سەرکردەکێ دروست نەبوویە خەلک شانازیێ پێ ببەت و ببیتە بابێ ئاشتیێ، ل نیزیک ڤە من دیڤچوون لسەر ھەموو سیاسین عیراقێ کریە دناڤ سەرکردەین شیعە و سووننە و کورد و عەرەب و کلدوو ئاشوریان من کەس وەکی بەرێز مەسعوود بارزانی نەدیتی یە بزاڤان بۆ نەتەوەیا خۆ بکەت، لەورا ئەز دبینم ئەو دبیتە کاریزما ل رۆژھەلاتی ناڤین و وەکی ماندیلا و گاندی، بناڤ و دەنگ کەڤیت و ناڤێ وی و سیاسەت و ھزرین وی دێ بنە ڤەکۆلین و ل زانینگەە و فیرگەھان ھێنە خواندن، ئەز پشتراستم ئەو دشێت دەولەتا کوردی رابگەھینیت و سەر بخۆەیی بدەست بینیت، و ناڤێ خۆ ل دیرۆکی دا تۆمار بکەت.
دکتور موجومدەر ھەروەسا گۆت: دڤێت گەلێ کوردستانێ خوە ل ھەموو خۆشی و نەخۆشیان بکەتە خودان، ئەوا بسەرێ کوردان ھاتیە تشتەکێ بەروەختە و ئەز باوەرم پشتی سەرخۆەبوونێ ئەو دشێن ببنە دەولەتەکا بھێز ل رۆژھەلاتا ناڤین.
ئەڤێ پرۆفیسۆری وەک سیاسەتمەدار سەرەدەریێ دکەت و د ھەمان دەمدا خودانێ چەندین ڤەکۆلینین زانستی یە لسەر سیاسەتا ئاستیا رۆژھەلاتا ناڤین و جیھانی، سەرۆکێ زانکۆیا ھندستانی دبێژیت نووکە رۆژھەلاتا ناڤین وەکی شەترەنجێ لێ ھاتیە و یاریەکا بھێز لسەر دھێتە کرن و ھەر کەسەک بشێت باش بفکریت دشێت سەرکەفتنا یاریان مسۆگەر بکەت.
ئیس بی موجومدەر گۆت: جھێ مخابنیێ یە دبینم پتری سەرکردەین رۆژھەلاتی ناڤین ل شوونا بزاڤان بۆ ئاشتی و سەرخۆبوون و بن دەستیا میللەتێ خوە و باشکرنا ژیانا وان بدەن، گرنگی ب پارەو کورسیان ددەن، لەوڕا دبێژم ئەو سەر ناکەڤن.
ھەموو جیھان نھێنیا سەرکەفتا گاندی زانی ئەو خودانێ چو پارەیان نەبوو و چو کورسیک ژی نەبوون حەتا ئەو رۆژا ھاتیە شەھید کرن ژی ھەر یێ برسی بوو، لێ شیایە ببیتە خۆشتڤیی ھندستانێ و ھەموو گەلین جیھانێ، ئەم شانازییێ پێ دبەین.
موجومدەر دیارکر، کو ب دیتنا وی عیراق دێ بیتە 3 پارچە و چو جاران ژی تەناھیێ بخوە ڤە نابینیت، بتنێ پارچەیا کوردستانێ دێ ئارام بیت، و ئەو پارچەین دیتر ھەردەم شەڕ دناڤ زاندا دێ بەردەوام بیت ھەتا شیعە و سوننە بمینن و شەڕێ تایفەگەری ھەر یا بەردەوام بیت ل دەڤەرێ.

ئەڤرۆ نیوز:
ل گۆر راپۆرتەکا ئاژانسا رویتەرز پشتی کو بەحسێ رێککەڤتنەکا نوو د ناڤبەرا روسیا و ئەمریکا سەبارەت ب شەرێ ل دژی داعشێ و جەبھەت ئەلنوسرا ل سووریێ ھاتە کرن شیرەتکارێن ئۆبامای ب توندی ‌ھۆشداری داینە جۆن کێری وەزیرێ دەرڤە یێ ئەمریکا کو نابیت باوەریا خوە ب گۆتنێن پۆتینی بینن، چونکو پۆتین جھێ باوەریێ نینە و روسیا ھەتا نھا پشتەڤانیێ ل رژێما بەشاری دکەت و ئارمانجا روسیا بۆ ژناڤبرنا داعشێ و گرۆپێن دی ئەڤە دا کو جارەکا دی رژێما بەشاری ل سووریێ ب ھێز کەڤیت و ئەو یەک د بەرژەوەندیا ئەمریکا دا نینە.
د بەردەوامیا راپۆرتێ دا ھاتیە دیار کرن کو ئەمریکا ب گومان ڤە سەرەدەریێ ل گەل ھەڤکاریا د ناڤبەرا خوە و روسیا ل سووریێ دکەت، چونکو ھەتا نھا روسیا ھەڤکاریا ئەمریکا نەکریە و باوەریا ھەر دو وەلاتێن ب ئێکتر ناھێت و ئەو یەک ژی دێ کارتێکرنێ ل سەر شەرێ ل دژی تیرۆرێ و ھەروەسا ئاڤاکرنا سووریایەکا نوو کەت.
ل ئالیێ دی چاڤدێرێن سیاسی ژی دیار دکەن کو ھەکە ھەڤکاریەک د ناڤبەرا ھەر دو وەلاتان دا ھەبیت ژی دێ د چارچۆڤەکا بچیک دا بیت، چونکو روسیا و ئەمریکا ئارمانجێن جودا ل سووریێ ھەنە و ژ بەر ھندێ ژی گەلەک ب زەحمەتە کو ھەر دو وەلات بشێن ل دۆر ستراتیژی و بەرنامەکێ ھەڤپشک پێکڤە ل سووریێ کار بکەن.

ئەڤرۆ نیوز:
رێڤەبەرێ شوونوارێن دھۆکێ راگەھاند، کو ھندەک پارچە شوونوارێن زۆر گرنگ و میژوویی یێن ل دەڤەرا شێخان ھاتینە دیتن و بۆ موزەخانا دھۆک یا نشتیمانی ھاتینە ڤەگۆھاستن، ئەڤرۆ رێکەفتی 25/7 ل دەمژمێر 11:30 سپێدێ دێ د کونگرەکێ رۆژنامەڤانی دا ھێنە راگەھاندن.
د. حەسەن قاسم رێڤەبەری شیوونوارێن دھۆکێ بۆ رۆژناما ئەڤرۆ دیارکر کو پاشمایێن شەرێ گوگەملا یێ سالا 331 پ . ز روودایە دناڤبەرا ئەسکەندەرێ مەزن و داریوسێ سیێ دا یێ فارسی ل دەڤەرا شێخان ھاتنە دیتن ئەڤ پارچەیێن شوونوارێ زۆر دگرنگن ل موزەخانا دھۆکێ دێ ھێنە پاراستن.
زێدەتر گۆت: “د ڤان سالێن بۆری دا رێڤەبەریا شوونواران کارەکێ مەزن ئەنجامدایە، داگیرکەرێن کوردستانێ ھەردەم ھەول داینە شارستانیەتا کوردان ژناڤ ببەن چۆنکو کوردستان لاندکا شارستانیەتێ یە دچاخێن گەڤندا مللەتی کورد خۆدان دیرۆکەکا زۆر گەڤنارە ئەڤ پارچەیێن شوونواری شارستانیەتا کوردستانێ خۆیا دکەن”.

ئه‌ڤرۆ نيوز:
جواد تليباوى ئاخفتنكه‌رێ گرۆپێ چه‌كدارێن عه‌سائبێن ئه‌هلێ حه‌ق كو ميليشايه‌كا شيعى يا عيراقێ يه‌ رادگه‌هينيت كو نابيت هێزێن پێشمه‌رگه‌ى پشكدارى شه‌رێ ئازادكرنا مووسل ببيت.
ئه‌و ئاخفتنكه‌ره‌ د به‌ياننامه‌كێ دا هوشداريێ ل سه‌ر نيشاندانا ره‌زامه‌نديێ ل سه‌ر پشكداريكرنا پێشمه‌رگه‌ى د شه‌رێ گرتنا مووسل دا دكه‌ت و ته‌كستێ ل سه‌ر وێ چه‌ندێ دكه‌ت كو هێزێن حه‌شه‌د شه‌عبى دێ د شه‌رێ گرتنا مووسل دا پشكدار بن و دده‌ته‌ زانين كو پشكداريا ئه‌وان هێزان د شه‌رى دا دێ كارتێكرنا باش هه‌بيت و بنه‌ ئه‌گه‌رێ سه‌ره‌كه‌فتن و رزگاركرنا وى باژێرێ ب ره‌نگه‌كێ زوو.

763

ئه‌ڤرۆ نيوز:

رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 22ى تيرمه‌ها 2016ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه‌:

1 دولارێ ئه‌مريكى 1282
1 يۆرۆيێ ئه‌ورۆپى 1420
1 ليرێ توركى 425

بۆ وه‌رگرتنا نووترين پێزانينان ل سه‌ر ره‌وشا دراڤى ژماره‌ “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه‌.

website security
WP Facebook Auto Publish Powered By : XYZScripts.com