ئەڤرۆ نيوز:
کچا کورد یا بناڤێ جوانا پالانی ل رۆژا سێشەمبی رێککەفتی 20 کانوینا ئێکێ سالا 2016، ب سەدەما پشکداریا د شەرێ دژی داعشێ دا ل ھەمبەری دادگەھا وەلاتێ دانیمارکێ ل کوبنھایگن، ل گۆڕ قانوونا چەکدارێن بیانی ھاتیە دادگەھکرن و دبیت سزایێ وێ بگەھیتە زیندانکرنێ بۆ دەمێ 6 ھەیڤان.
کچا کورد جوانا پالانی یا ژیێ وێ 23 سال ل وەلاتێ دانیمارکێ بۆ دەمێ 20 سالایە دژیت، خواندنا خوە یا ل دۆر فەلسەفا سیاسی ل زانکۆیا کوبنھایگن ب دووماھیئینایە، پشتی شەرێ داعشێ قەستا ھەرێما کوردستانێ کریە و پاشی بەر ب کوردستانا سووریا چوویە ب مەرەما پشکداریا د شەرێ دژی داعشێ دا، جوانا پالانی سەدەما دەستبەردانا ژ ژیانا بەختوەریا کوبنھایگنێ و ھاتنا بەر ب رۆژھەلاتا ناڤەراست بۆ سەدەما باوەریا ب بەرخودانا ژ بۆ مافێن مرۆڤی کو ھەموو کەسەکێ ئەو ماف ھەبیت خوەیاکر.
ل رۆژا 14 چریا دوێ یا سالا 2014 جوانا پالانی دگەھیتە ھەرێما کوردستانێ، دگەھیتە رێزێن ئێکەنەیا پاراستنا گەل، جوانا بۆ مالپەرێ (برودلی فایس ) دبێژیت، من بۆ دەمێ شەشە ھەیڤان دناڤا رێزێن ئێکەنەیا پاراستنا گەل دا خەبات کریە، و شەش ھەیڤان دناڤا رێزێن پێشمەرگەی دا من بەرخوەدان کریە.
پاشی ل چریا ئێکێ یا سالا بۆری 2015 ڤەگەریا دانیمارک بۆ وەرگرتنا بێھنڤەدانەکا کورت، بەلێ وێ ل سەر مالپەرێ فیسبۆکێ خوە بەلاڤکریە کو پۆلیسێن دانیمارکی پاسپۆرا وێ دەستەسەرکرینە و چوونا وێ بۆ دەرڤەیی وەلاتی بۆ دەمێ سالەکێ قەدەغەکرن.
جوانا بالانی حیبەتیا خوە دەربری، سەبارەت دادگەھکرنا وێ و ھەڤبەرکرنا وێ ل گەل چەکدارێن بیانی یێن شەر بۆ داعشێ کرین، و دبێژیت چەوا ئەز دێ بمە مەترسی ل سەر دانیمارکێ و وەلاتێن دی، ددەمەکی دا ئەز لەشکرەکەم دھێزەکێ دا وەلاتێ دانیمارک ب مەشقکرنا وێ رادبیت د شەرێ دژی داعشێ و ھاریکاریێن لەشکری بۆ دکەت.
جوانا پالانی کو دبیتە کچا پێشمەرگەکێ ھەرێما کوردستانێ ژی، ب تومەتا بنپێکرنا بڕیارا قەدەغەکرنا چوونا ژ دەرڤە وەلاتی ل خزیرانا بۆری ھاتیە تومەتبارکرن، دەمێ بەر ب قەتەرێ ڤە چووی، کو نەیا دیارە کا پشتی وی ھاتیە کوردستانێ یان بەرب کوردستانا سووریا ڤە چوویە.
ھەر سەبارەت بابەتێ جوانا پالانی ژ ئالیەکێ دی ڤە مالپەرێ ئەنەخیل یێ عیراقی بابەت بەلاڤکریە، کو چەکدارێن داعشێ ل 17 کانیانا ئێکێ ل سالا 2015 خەلاتکرنا بۆ ب ملیۆن دۆلاران بەرانبەری کوشتنا کچەکا کورد ل وەلاتێ دانیمارک دژیت دەستنیشانکریە، ب سەدەما پشکداریا وێ دشەرێ دژی داعشێ ل عیراقێ و سووریا کریە.