ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 4ى كانوونا ئێكێ 2016ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1306 |
| 1 يۆرۆيێ ئه‌ورۆپى | 1390 |
| 1 ليرێ توركى | 370 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز:
ئه‌ڤرۆ 4ى كانوونا ئێكێ 2016 و دێ و ره‌سمه‌كێ تايبه‌ت دا هه‌ر ئێك ژ رێڤه‌به‌رێن فرۆتنا وزێ و رێڤه‌به‌رێ رۆناهيكرنێ هاتنه گوهۆڕين و دو كه‌سێن دى ل جهێ وان هاتنه دانان.
ب گۆره‌ى راگه‌هاندنه‌كا قايمقاميا پارێزگه‌ها دهۆكێ رێڤه‌به‌رێ فرۆتنا وزێ ئه‌نده‌زيار دژوار سلێمان هاته گوهۆڕين و ل جهێ وى ئه‌نده‌زيار دلشاد خه‌ليل هاته دان و نافع مسته‌فا ل جهێ له‌زگين عه‌لى وه‌كو رێڤه‌به‌رێ نوو يێ رۆناهيكرنێ هاته دانان.
جه‌هه‌وه‌ر عه‌لى قايمقامێ قه‌زا دهۆك د ڤێ ده‌ربارێ دا راگه‌هاند كو گوهۆڕين د ناڤ داموده‌زگه‌هێن حكۆمى دا تشته‌كێ ئاسايى نه و گۆت: “ئارمانجا مه پتر خزمه‌تكرنا وه‌لاتيانه”.
ئه‌ڤرۆ نيوز:
رێڤه‌به‌ريا گشتيى يا كه‌شناسى و بيڤه‌له‌رزێ ل هه‌رێما كوردستانێ راگه‌هاند كو چه‌ند ده‌زگه‌هێن راگه‌هاندنێ ب ناڤێ به‌رپرسێ پشكا پێشبينيان نووچه‌ك به‌لاڤكريه كو دێ به‌فر باريت و ئه‌و ژى وى نووچه‌ى ره‌ت دكه‌ن.
د راگه‌هاندنا پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ دا هاتيه: “پشتى به‌لاڤبوونا نووچه‌كى ب ناڤێ به‌رپرسێ پشكا مه بژار ئه‌كره‌م ده‌رباره‌ى كارتێكرنا شه‌پۆلا به‌فر بارينێ ل ده‌زگه‌هێن راگه‌هاندنێ، بۆ هه‌وه ئاشكه‌را دكه‌ين كو چو داخۆيانيێن فه‌رمى ژ وى ره‌نگى نه‌هاتينه دان، به‌لكو زێده‌تر بابه‌ت هاتيه ده‌ستكاريكرن و هاتيه گۆهۆڕين”.
زێده‌تر هاتيه: “ئه‌ڤا مه دڤێت ئاماژه پێ بكه‌ين ئه‌و كو ب گۆره‌ى پێشبينيان ل رۆژا سێشه‌مبى 6ى كانوونا ئێكێ 2016 دێ كارتێكرنا بارسته هه‌وايه‌كێ سار و هشك كو ژێده‌رێ وى ناڤه‌راستا سيبيريايه دێ روو كه‌ته سه‌ر هه‌رێما كوردستانێ و نابيته ئه‌گه‌رێ به‌فر بارينێ ب تنێ دێ پلێن گه‌رمێ نزم بن و ب تايبه‌ت ژى ل ده‌مێن شه‌ڤێ، كارتێكرنا ڤێ چه‌ندێ ژى زێده‌تر دێ ل ده‌ڤه‌رێن چيايى و سنورى هێته ديتن”.
ئه‌ڤرۆ نيوز:
رێڤه‌به‌ريا كه‌شناسى و بيڤه‌له‌رزێ ل هەرێما کوردستانێ راگه‌هاند كو سوبه‌هى رۆژا دوشه‌مبى رێكه‌فتى 5ى كانوونا ئێكێ 2016ێ ئه‌سمان دێ ب درێژاهيا ده‌مى ئه‌ورن بن و ل هنده‌ك ده‌ڤه‌ران هنده‌ك باران باريت و ب تايبه‌ت ده‌ڤه‌رێن چيايى و ل سپێدێ ژى دێ مژ ل هنده‌ك ده‌ڤه‌ران په‌يدا بيت.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ به‌رده‌واميا كارتێكرنا فشارێن نزمێن ده‌ريا ناڤه‌راست كو بارسته هه‌وايه‌كێ سار ل گه‌ل دايه بۆ سه‌ر هه‌رێما كوردستانێ دهێته پێشبينيكرن ئه‌سمان ب درێژاهيا ده‌مى ئه‌ورن بن و ل هنده‌ك ده‌ڤه‌ران هنده‌ك باران باريت و ب تايبه‌ت ده‌ڤه‌رێن چيايى و ل سپێدێ ژى دێ مژ ل هنده‌ك ده‌ڤه‌ران په‌يدا بيت.
پشكا پێشبينيان دايه زايه زانين كو دێ ئاراستێ باى ژى دێ باكوورێ رۆژئاڤا بيت ب ره‌نگه‌كى د ناڤبه‌را 10 هه‌تا 20كم دا و ماوێ ديتنێ ژى دێ د ناڤبه‌را 7 بۆ 8كم دا بيت، پلێن گه‌رمێ ژى دێ د ناڤبه‌را 6 بۆ 13 پلان دا بن.
ئه‌ڤرۆ نيوز:
رێیا دناڤبەرا ” پرا حسێنیێ ، بەردەرەش و کەلەک ” ب رێیا مرنێ دھێتە نیاسین کو ھەردوو پارێزگەھێن ھەولێر و دھۆک پێکڤە گرێددەت و ھەتا نھا وەکو پێدڤی لایەنێن شولەژێ نەشیانە وەکو پێدڤی ڤێ رێیێ خوش بکەن کو روودان درۆست نەبن، نھا وەلاتیێن گوندێن نێزیک رێیا ناڤبری ب رێیا فروتنا فێقی و کەسکاتی وەکو داھێنان کریە دا کو روودان کێم ببن.
سەلمان عومەر وەلاتیەکێ ئێک ژ گوندێن نێزیک رێیا مرنێ یە بۆ ئەڤرۆ گۆت: (ماوەیێ چەندین سالایە رێیا مرنێ ھەیی و رۆژ بو رۆژێ روودان زێدەتر دبن، د بەرامبەر دا لایەنێن شولەژێ وەکو پێدڤی خزمەت بۆ چێکرن و خوشکرنا رێیا مرنێ و رێیێن دن یێن دەڤەرێ نەکریە، ژ بەر ڤێ ئەڤ سالە مە چەند کەسەکان بریار دایە فێقی و کەسکاتی و کەرەستێن ھشک و تەر ل سەر رێیا مرنێ بفروشین، دا کو ترومبێل ژبەر بازارێن مە ھەر چو نەبیت لەزاتیا ترومبێلێن خوە کێم بکەن و د بەرامبەر دا ژی تشتەک بگەھیتە مە ژی کو ئەڤ یەک ژی بوومە بوویە دلیڤە.
ئارام دولێجانی ئەو ژی فروشیارەکێ دن یێ رێیا مرنێ یە بۆ ئەڤرۆ دبێژیت: (سەرەرای رێیا مرنێ ناڤەک نەخۆش و دەستکردە و ژ ئەنجامێ گەلەک قوربانیان ھاتیە، لێ مە ڤیا ل شوونا قوربانیان ئێدی مفای ژ بۆ ژیانێ ل رێیا مرنێ ببینین و ناڤێ وێ ژ رێیا مرنێ بۆ رێیا ژیانێ بگوھۆرین، ژ بەر کو نوکە ل سەر رێیا مرنێ پتر ژ 20 دوکان و بازارێن گەرۆک ھاتینە دانان و ل سێ چوار جھان ترومبێلان نەچار دکەن کو لەزاتیا خوە کێم بکەن.
زێدەتر گۆت: (سەرەرای دانانا بازار و دوکانێن گەروک ل سەر رێیا مرنێ دەمی یە، بەلێ ھندی ژ مە بھێت دێ بەردەوام بین ب تایبەتی د رۆژانێن خوش دا و ب تایبەتی تر ئەم دێ پێشوازیا خەلکی د وەرزێ بھار و ھاڤینێ دا کەین.
ناڤبری د درێژاھیا ئاخفتنێن خوە دا گۆت ژی: (پرانیا ئەو کەرەستەیێن ئەم ل ڤێرە د فروشین کەرەستەیێن خومالینە وەکو گویز و ھژیر و سێڤ و تەماتە و خیار و کەراوس و رەشادوک و چەند کەرستەیەکێن دن و ئەڤە سەرەرای ھندەک کەرستەیێن دن کو ئەم ل بازارێن دھۆک و ھەولێر دکرین و رۆژانە ئەم داھاتیەکێ کو دناڤبەرا 50 بۆ 100 ھزار دیناران کوم دکەین و ژیانا خوە پێ د بورینین.
ل گۆرەی زانیاریێن رۆژناما ئەڤرۆ ئەڤ سال نێزیکێ 200 قوربانیان ب تنێ د رێیا مرنێ دا درۆست بووینە و سەرەرای رێڤەبەریا سەخبێریا رێک و پرا ب درێژاھیا 22کم جاددە قێر و سەخبێرکریە، بەلێ رێڤەبەریا ھاتن و چوونێ ژی پێدڤی دزانیت رێیا مرنێ ببیتە جوتساید.
ئەڤرۆ نیوز:
فیدراسیۆنا سەرانسەریا پەنابەران لقێ ھەرێما کوردستانێ راگەھاند، کۆچا نەقانوونی ل ھەرێما کوردستانێ بەرەف کێمبوونێ چوویە و وەلاتێن ئەورۆپا ژی ب تنێ مافێ پەنابەریێ ددەنە کێم ئاین و نەتەوان، نەک ھەر کەسەکێ ئاسایی. ھەروەسا دیارکر، پەنابەرێن دھێنە ڤەگەڕاندن چو ھەڤکاری بۆ ناھێنەکرن و رێ ناھێتە دان ڤەگەڕنە سەر کارێ خوە یێ بەرێ ژی.
ئاری جەلال، سەرۆکێ فیدڕاسیۆنا سەرانسەریا پەنابەران لقی ھەرێما کوردستانێ بۆ رۆژناما ئەڤرۆ گۆت”پشتی دەستپێکرنا شەڕێ داعش و پەیدابوونا قەیرانا دارایی پێلەکا کۆچکرنێ ل ھەرێما کوردستانێ بۆ دەرڤە دەستپێکریە و ل گۆرەی ئامارا ل بەردەستێ مە، ب تنێ ل سالا 2015ێ ھەتا ھەیڤا ئادارا سالا 2016ێ 40 ھزار وەلاتیێن ھەرێما کوردستانێ ب رێیێن جودا چووینە دەرڤەی ھەرێما کوردستانێ و داخوازا پەنابەریێ ل وەلاتێن بیانی کرینە.
زێدەتر گۆت: پشتی رێککەفتنا وەلاتێن ئورۆپا بۆ رێگریکرن ل ھاتنا پەنابەران چوونا وەلاتیێن ھەرێمێ بۆ دەرڤە ب شێوەیەکێ بەرچاف کێمبوویە و پێشبینی دکەین نوکە ھەیڤێ 100 ھەتا 150 وەلاتی بچنە دەرڤە و ب رێیێن قاچاغ خوە دگەھیننە ئورۆپا، ئەف پێلا کۆچکرنێ ب تنێ ل ھەرێما کوردستانێ نەبوویە، بەلکۆ وەلاتێ عێراقێ و دەوروبەر وەک ئیران و سووریا و چەند وەلاتەکێن دی، مخابن حوکمەتا ھەرێما کوردستانێ چو رێ و جھێن پێدڤی بۆ رێگریکرنێ ل کۆچا نەقانوونی نەگرتیە بەر و پێڕابوون نەھاتیە وەرگرتن و د رێیا کۆچا نەقانوونی دا 160 کەس بووینە قوربانی و 52 ژ وان ژی د بەرزەنە و چارەنڤیسێ وان ناھێتە زانین.
ئاری جەلال گۆت ژی “دیپۆرتکرنا پەنابەران ژی یا بەردەوامە و دھێنە ڤەگەڕاندن، بۆ ڤێ مەرەمێ رێکخراوا کۆچا نێڤدەولەتی کوژمەکێ کێم یێ پارەی بۆ ھاریکاریا پەنابەرێن دھێنە ڤەگەڕاندن د مەزێخیت، بەلێ پارەیەکێ زۆرێ کێمە، ل ھەرێما کوردستانێ ژی چو ھەڤکاریا وان ناھێتەکرن، بەری نوکە پەرلەمانێ عێراقێ بڕیارا ھژمارە 262 دەرکربوو تێدا ھاتبو ھەر پەنابەرەکێ عێراقی ڤەگەڕیتە وەلاتێ خوە دێ پارچەکا ئەردی و کوژمەکێ پارەی بۆ ھێتە مەزاختن، پڕۆژە قانوونەک ل پەرلەمانێ کوردستانێ ژی بۆ ڤێ مەرەمێ ھاتبوو بەرھەڤکرن، ئەو ژی ژبەر راوەستیانا کۆمبوونێن پەرلەمانی پڕۆژە ھاتیە راگرتن، چونکە ئەڤ بڕیارا پەرلەمانێ عێراقێ پەنابەرێن ھەرێمێ ناگریت.
ناڤبری ئاشکرا ژی کر، نوکە وەلاتێن بیانی ب تنێ مافێ پەنابەریێ ددەنە کێم ئاین و نەتەوا و نادەنە ھەموو پەنابەرەکی، ئاریشەیەکا دی ژی بۆ پەنابەرێن کوردستانێ پەیدابوویە، ژ بەر چوونا وان بۆ دەرڤە ل فەرمانبەریێ دھێنە لادان و د دەمێ ڤەگەڕاندنێ ناچنە سەر کارێن خوە و رێ پێ ناھێتە دان.
ئه‌ڤرۆ نيوز:
کۆمبوونا پەرلەمانێ عیراقێ ل دۆر پەسەندکرنا پڕۆژە قانوونا بودجێ گشتیێ عیراقێ بۆ ئێڤاریا ئەڤرۆ رۆژا ئێک شەمبی ھاتە پاشخستن و پەرلەمانتارەکا کورد ژی دبێژیت، پێشنیارا ھژمارەک فڕاکسیۆنێن کوردستانی ئاستەنگ ئێخستیە ناڤا پشکا ھەرێما کوردستانێ، پێدڤی ب رێکەفتنێ ھەیە ئەگەر نە دێ زیان گەھنە ھەرێما کوردستانێ.
دکتۆرە ئەشواق جاف پەرلەمانتارا پارتی لپەرلەمانێ عیراقێ بۆ رۆژناما ئەڤرۆ گۆت “بڕیار بوو دوھی پڕۆژە قانوونا بودجێ گشتیێ عیراقێ بھێتە پەسەندکرن، بەلێ ژبەر چەند ئەگەرەکان ھاتە پاشخستن بۆ ئێڤاریا ئەڤرۆ رۆژا ئێک شەمبی، ئێک ژ ئەگەرێن نە پەسەندکرنا پڕۆژێ قانوونا بۆدجەی بۆ ڤێ چەندێ ڤەدگەڕیت، نوونەرێن پارێزگەھا بەسرا داخوازا پارێ پتڕۆ دۆلاری دکەن ژ حوکمەتا عیراقێ، ھەروەھا ئەگەرەکێ دی یێ گیرۆبوونێ بۆ ڤێ ئێکێ ڤەدگەڕیت ل بەندا ھنارتنا پتڕۆلێ کو ھژمارەک برادەرێن فڕاکسیۆنێن کوردستانی پێشکێش کریە ئاستەنگ پەیدا کر و ئەم وەک فڕاکسیۆنێن کوردستانی ل دۆر پڕۆژە قانوونا بۆدجەیێ عیراقێ و پشکا ھەرێما کوردستانێ ئێک دەنگ نینە و نەگەھشتینە چ رێکەفتنان، سالانە ژی ئاریشە دکەڤنە د ناڤا پڕۆژە قانوونا بودجێ عیراقێ دا و بۆچوونێن جودا ل سەر ھەنە”.
ئەڤێ پەرلەمانتارێ گۆت ژی “بەری نوکە ھەردو حوکمەتێن ھەرێما کوردستانێ و یا عیراقێ پێکڤە دانیشتن و پەرلەمانی ژی پەسەند کر، ئەڤ سالە ژی ھەمان شێوە ھاتیە پەسەندکرن ژلایێ ھەردو حوکمەتاڤە تنێ ل پەرلەمانی دەنگ ل سەر بھێتە دان، دڤێت ھەردو حوکمەت ل سەر بجھئینانێ رێکەڤن، فڕاکسیۆنێن گۆڕان و ئێکەتی و ئیسلامی ئاریشە پەیدا کریە ل ڤێ چەندێ د بۆدجەی دا ھاتیە پێدڤیە ھەرێما کوردستانێ رۆژانە 550 ھزار بەرمیلێن پتڕۆلێ بدەتە سۆمۆ، بەلێ برادەرێن پەرلەمانتارێن کورد ئەڤ رێژە جودا کریە و 300 ھزار بەرمیلێن پتڕۆلا کەرکووکێ جودا کرینە ژ 250 ھزار بەرمیلێن کوردستانێ، ھەمان تشت دکەت ل دووماھیێ، بەلێ ئەڤە بوویە ئاستەنگ و حوکمەتا ھەرێما کوردستانێ نەڕازیبوونا خوە دایە نیشادان، خوە ئەگەر بچینە سەر راستیێ دڤێت ھەردو حوکمەت ل سەر ڤێ پرسێ رازیبن، چونکە ئەڤە دشێن بجھبینن نەک پەرلەمان، ھەر بەندەک ژ بۆدجەی بھێتە زێدەکرن دڤێت عیراق و ھەرێم ل سەر رازیبن، خەلکێ ھەرێما کوردستانێ ب ئەگەرێ نەھنارتنا بۆدجەی یێ ژیانەکا دژوار دەرباز دکەت و پێشمەرگە یێ بێ مووچە شەڕێ داعش دکەت، لەوڕا یا فەرە ئەم ھەموو ئێک رێز بین ل سەر بۆدجە و مافێ خەلکێ کوردستانێ، نەک لایەنەک خوە ب دلسۆزتر بزانیت ژ لایەنێن دی.
دکتۆر ئەشواقێ دیار کر” نوکە ئەم یێ چاڤەڕێ دکەین ھەتا بەری دەستپێکرنا کۆمبوونا پەرلەمانی بگەھینە رێکەفتنەکێ و فڕاکسیۆنێن کوردستانی ب ئێک دەنگ بچنە ناڤا کۆمبوونێ، ژبەرکو ئەم نوونەرێن ئێک ملەتینە و رێکەفتنا ھەردولا دێ پتر مافێن ھەرێما کوردستانێ د پڕۆژە قانوونا بۆدجەی دا ھێنە زامنکرن، ئەس باوەر ناکەم ئەڤرۆ بھێتە پەسەندکرن، حوکمەتا ھەرێما کوردستانێ رازیبوونا خوە ل دۆر ڤێ چەندێ نیشا دایە دانوستانا ل سەر پێشنیار فڕاکسیۆنێن کوردستانی بکەت”.
ئەڤرۆ نیوز:
پەرلەمانتارەکێ پارتی ل پەرلەمانێ کوردستانێ ئاماژە بوێ چەندێ دکەت، کو ژلایێ ھندەک کەس و لایەنێن ناڤخوە و دەرڤە پیلان یێ دھێنە دانان بۆ ژناڤبرنا پڕۆژێ پارتی بۆ سەربەخۆیێ و دیارکر، داھاتیەکێ نێزیکی دا دێ تشتێ مەزن و گرنگ بۆ خەلکێ ھەرێما کوردستانێ ل سەر دەستێ پارتی و سەرۆک بارزانی روویدەت.
نازم کەبیر، پەرلەمانتارێ فڕاکسیۆنا پارتی ل پەرلەمانێ کوردستانێ بۆ رۆژناما ئەڤرۆ گۆت” ئەو کەس و لایەنێن ل سەر ئاستێ ناڤخوە و ئەقلیمی دژایەتیا پارتی دیموکراتی کوردستان دکەن، تنێ ئەگەرەک ھەیە ئەوژی بۆڤێ چەندێ ڤەدگەڕیت پارتی پڕۆژێ سەربەخۆیێ بلندکریە و بەرھەڤ نینە دەستا ژێ بەردەت، ئەڤێن دژایەتیا پارتی دکەن تنێ بۆڤێ مەرەمێ یە کو پارتی دخوازیت پڕۆژێ سەربخۆیێ بھێتە بجھئینان و چەندین جارا سەرۆک بارزانی دووپاتکریە، ھەرگیز دەستا ژێ بەرنادەت، مخابن ھندەک لایەنێن ناڤخوە دەرڤەیا ھەرێما کوردستانێ ھەنە ھەموو بزاڤەکێ دکەن، ئەڤی پڕۆژێ پارتی ھەلگرتی رابگرن و بێدەنگ بکەن، بزاڤێن زۆر یێ دھێنەکرن ئاریشە بکەڤنە نێف مالا کوردان و پەیاما سەرۆک بارزانی یا ڤێ دووماھیێ ئەڤ ھەموو پیلانە رەتکرن، ئەڤرۆ ھەرێما کوردستانێ چویە ئاستەکێ بلند ژلایێ نێڤدەولەتی ڤە، ئەف دەم بسەرڤەچوویە خەلکەک بشێت ئەڤا ل ھەرێما کوردستانێ ھەی ب ساناھی ژناڤ ببەت یان رێگریێ لێ بکەت.
نازم کەبیر گۆتژی” ئەف دەستپێشخەریا سەرۆکێ ھەرێما کوردستانێ چەکەکێ ب ھێزە بۆ رێگریکرنێ ل بزاڤێن تێکدەر کو ئەڤە دەمەکی ھندەک لایەن کاری بۆ تێکدانا رەوشا ھەرێما کوردستانێ دکەن، ئەز یێ ل وێ باوەریێ دا دێ تشتێ باشتر و مەزنتر دھێتەکرن، راستە نوکە ژیانا وەلاتیان وەک پێدڤی نینە و چەندین ئاریشە ھەنە بتایبەتی ژلایێ ئابووری ڤە، بچووکترین ئاریشە بۆ وەلاتیان پەیداببیت پارتی زۆر پێ دلگرانە، بەلێ ئەم یێ بزاڤا دکەین چاوا خوە لڤان نەخۆشیان رزگاربکەین، یێن ب ئەگەرێ جودا جودا ب سەر مللەتێ مەدا ھاتین، چونکە ب ساناھی وەلاتەک رزگارنابیت و سەربەخۆیی بێی نەخۆشی و ژیانا گران بدەستڤە ناھێت، مادەم چاڤێ مە ل سەربەخۆیا کوردستانێ یە، نابیت چاڤێ مە ل تشتێ بچووک بیت، داھاتیەکێ نێزیک دێ ھندەک گوھۆڕین چێبن و ھیڤیدارین ئالیێن سیاسی ژی لسەر دەستپێشخەریا سەرۆک بارزانی ل دەرڤەی پەرلەمانی بگەھنە رێککەفتنێ بۆ سەرکەفتنا ئەڤی پڕۆژەی.
ئه‌ڤرۆ نيوز:
رێڤەبەریا ھونەرێ مللی ئەوا سەر ب رێڤەبەریا گشتی یا رەوشەنبیری و ھونەری ل دھوکێ کار بو تابلویەکا نویا ھونەرێ دەواتێ د کەن ل ژێر ناڤێ تابلویا پێکڤەژیانێ کو بریارە ل 8ى كانوونا ئێكێ 2016 ل باژێرێ دھوکێ بھێتە نیشادان.
ئەحمەد مشەختی رێڤەبەرێ رێڤەبەریا ھونەری مللی ئاشکرا کر کو ئەڤ تابلویا یە ژ دەرھێنانا ئەحمەد مشەختیە سایزا ڤێ تایبویێ ژ لایێ ئاوار حەسەن و وارھێل حە سەن و شەرمین موستەفا ڤەیە .
ئەڤ تابیلویە دەربرینێ ژ پێکھاتێت ھەرێما کوردستانێ د کەتن تایبەت یێن پارێزگەھا دھوکێ کو کەلتور و سترانێت ڤان پێکھاتیان د نیشاندانا ڤێ تابیلوێ دا یێت ھاتینە کومکرن، و ژلایێ موزیکێ ڤەژی ھونەرمەند موحەمەد زەکی ڤە ھاتیە چێکرن و سترانا ڤێ تابلویێ ژی ژ لایێ چار ستران بێژان ڤە ھاتیە گوتن ئەوژی دەنڤ بێژەکا کورد موسولمان و کوردەکا ئیزدی و تورکومانەکێ و برا مەسیحیەکێ ڤە ھاتینە گوتن ماوێ ئەڤێ تابلویێ حەفت خولەکن و بریارە ل رێورەسمێن دەزگەھێ رەوانگەدا بھێتە نیشادان کو بریارە ل 8ى كانوونا ئێكێ2016 ل دھوکێ بھێتە نیشادان.
نيشاندان
