ئه‌ڤرۆ نيوز:
ئه‌نجوومه‌نێ ئاسايشا هه‌رێما كوردستانێ راگه‌هاند د ئوپه‌راسيونا كونترولكرنا ده‌ڤه‌رێن رۆژهه‌لاتێ مووسل دا، 120 كيلومترێن چوار گوشه ژ ده‌ست تيرورستێن داعش هاتينه ده‌رێخستن و 140 چه‌كدار ژى هاتينه كوشتن.
ئه‌نجوومه‌نێ ئاسايشا هه‌رێما كوردستانێ ئاماژه ب وێ يه‌كێ ژى كريه كو ئوپه‌راسيونێ ئارمانجا خوه يا سه‌ره‌كى بده‌ستڤه‌ئينايه كو ئازادكرنا چه‌ند گوندێن كاكه‌يى و شه‌به‌كان بوو كو رووبه‌ره‌كێ به‌رفره‌هـ يێ ئه‌ردى هاتيه رزگاركرن.
ئه‌ڤرۆنیۆز، سالار دۆسكى:
نه‌جیبا نه‌جیب ئه‌نداما په‌رله‌مانێ عیراقێ ژ فراكسیۆنا پارتى دیموكراتى كوردستان بۆ ئه‌ڤرۆ نیۆز ئاشكراكر د جڤینا دوهى یا په‌رله‌مانى دا كو 167 ئه‌ندام په‌رله‌مان به‌رهه‌ڤ ببون، حه‌یده‌ر عه‌بادى گوتاره‌ك پێشكێشكر و به‌حسێ ئازادكرنا فه‌لوجه و كاودانێن ئابوورى عیراقێ كرن، مه گۆتێ ئه‌ڤ قه‌یرانه یا تونده ل سه‌ر هه‌رێما كوردستانێ و ژلایێ حوكمه‌تا عیراقێ و جهێن نیف ده‌وله‌تى به‌رچاڤ نه هاتیه وه‌رگرتن و هه‌تا نوكه هه‌رێم ل گه‌ل عیراقێ یه لێ ب شێوێ داد په‌روه‌رانه ره‌فتار گه‌ل هه‌رێما كوردستانێ ناهێته‌كرن. نه‌جیبایێ ئاشكراكر كو حه‌یده‌ر عه‌بادى دوهى د رونشتنا په‌رله‌مان دا سوزداینه پارێ جوتیارێن هه‌رێما كوردستانێ ب مه‌زێخیت یێن سالا 2104 به‌رى هه‌یڤا حه‌فت.
ئه‌ڤرۆ نیۆز، قائید میرۆ
نیڤرۆیا ئه‌ڤرۆ هێزێن پێشمه‌رگه‌ی ل میحوه‌رێ بادۆش هێرشه‌كا به‌رفره‌ها تیرۆرستێن داعش شكاند و هه‌شتێ چه‌كدارێن داعش هاتینه كوشتن.
موقه‌ده‌م قه‌تحی مزیری، ل میحوه‌رێ بادۆش ب ئه‌ڤرۆ نیۆز راگه‌هاند” به‌ریا نیڤرۆیا ئه‌ڤرۆ چه‌كدارێن داعش ب رێیا پێنج ترۆمبێلێن بۆمبه‌كری هێرشی سه‌ر هێزێن پێشمه‌رگه‌یكر و بۆده‌مێ سێ ده‌مژمێران شه‌ڕه‌كێ گران كه‌فته ناڤبه‌را هێزێن پێشمه‌رگه و چه‌كدارێن داعش، به‌لێ پێشمه‌رگه شیا هه‌ر پێنج ترۆمبێلێن داعش په‌قینیت و هێرشا وانژی هاته شكاندن.
موقه‌ده‌م فه‌تحی گۆتژی” پێشمه‌رگه‌ی ب پشته‌ڤانیا هه‌ڤپه‌یمانان ئه‌ڤرۆ مه‌زنترین هێرشا داعش شكاند و نێزیكی هه‌شتێ چه‌كدارێن داعش هاتینه كوشتن و هژماره‌كژی ره‌ڤین و برینداربوون.
ئەڤرۆ، فاتما مزووری:
ھەکە تو ژ وان کەسانی یێن رۆژانە شەکرێ گەلەک ب کاردئینی، دێ سەرسام بی ب وان مەترسیێن زێدە یێن ل سەر ساخلەمیا تە ژ ئەگەرێ وێ شەکرێ و دبیت ب ئێکجاری ئێدی نەخۆی. ل ڤێرە دێ ھندەک پێزانینان ل دۆر مەترسیێن شەکرا سپی بەرچاڤ کەین.
ژ بەر ڤان ئەگەران پێدڤیە شەکرێ کێم ب کار بینی:
شەکر پیراتیێ چێدکەت
شەکر گەلەک ژ ھورمونێن ب مفا بۆ لاشی دئینیتە خوار و کارێ ئەکسیدێ زێدە دکەت ئەوان دبیتە ئەگەرێ دروستبوونا پیراتیێ و دبیتە ئەگەر گوھۆڕین د تۆڤێ مرۆڤی دا دروست دبن، ھەکە ژ وان کەسان بی یێن شەکرێ دخۆ‌ی، ئانکو تو یێ/یا پیراتیێ ل دەف خوە دروست دکەی.
شەکر دبیتە ئەگەرێ بەردەوامبوونێ(ئیدمان)
شەکر مادەکێ بلندێ بەردەوامبوونێ یە، 8 جاران د سەر کوکاینێ دایە، بۆ کارتێکرنا خوە ل مرۆڤان و کارتێکرنەکا وەسان ل مرۆڤان دکەت چەند شەکرێ بخۆن، زێدەتر پێدڤی ببنێ ھەتا دگەھیتە رادەکی مەترسیێ بگەھیننە ساخلەمیا مرۆڤی.
شەکر کێشێ زێدە دکەت
گەلەک پلێن گەرمێ یێن مەزن یێن د ناڤ شەکرێ دایە و ئەڤە دبیت ئەگەرێ زێدەبوونا کێشێ ب رەنگەکێ گەلەک زێدە و قەلەوبوونێ. ژ بەر ھندێ ھەر مرۆڤەکێ بڤێت کێشا خوە راگریت، دڤێت خوە ژ شەکرێ دوور بێخیت.
شەکر گێولێ مرۆڤی نەخۆش دکەت
ژ بەر کو ھەر خوارنەکێ رێژەکا مەزن یا شەکرێ یا تێدا، رێژا شەکرێ د خوینێ دا زێدە دبیت و کریا حەلاندنێ کێم دبیت، ئەڤ بلند بوون و نزمبوونە کارتێکرنەکا مەزن ل گێولێ مرۆڤی دکەن ژ بەر ھندێ ژی دڤێت ب رێژەکا گەلەک کێم شەکرێ بخۆین.
شەکر مرۆڤی برسی دکەت
خوارنا شەکرێ کێشا مرۆڤی زێدە دکەت و ھەمبەر وێ شەکر دبیتە ئەگەر مرۆڤ ھەست ب برسێ بکەت، ژ بەر ھندێ مرۆڤ زێدە خوارنێ دخۆت و ئەڤە ژی دبیتە ئەگەر مرۆڤ کێشا خوە ژی زێدە کەت.
شەکر رێگرە ل ھەمبەر کارابوونا ئالاڤێ بەرەڤانیێ
زێدە خوارنا شەکرێ ئالاڤێ بەرەڤانیێ لاواز دکەت و مرۆڤ تووشی ژمارەکا زێدە یا نەخۆشیان دبیت وەکو سەرمابوونێ و ئەنفلۆنزایێ و کێمبوونا شەکرێ د ناڤ ھایدرۆجینێ دا و دبیتە ئەگەر کو لاشێ مرۆڤی ببیتە ژینگەھەکا گۆنجای بۆ چەندین جۆرێن پەنجەشێران.
ئەڤرۆ، فاتما مزووری:
قەلەوی ئێکە ژ کێشێن زێدە یێن مرۆڤ ب ھەردو رەگەزان ژێ نەیێ ئارام، باشترین رێ ژی بۆ گەھشتن ب لاشەکێ جوان و رێک، حەلاندنا وی دوھنی وەرزش کرن و خوارنا ساخلەمە، بەلێ باشترین ئەو شەربەتێن بۆ دابەزاندنا کێشا لاشی ددەن کیشن؟
ب گۆرەی مالپەرێ”ounousa” باشترین جۆرێ شەربەتێ بۆ حەلاندنا دوھنی شەربەتا حلیکایە، چونکو ڕێ ل قەبزیێ دگریت و رێژا کلوری تێدا یا کێمە و گەلەک یا باشە بۆ دابەزینا کێشێ.
شەربەتا پرتەڤالا ب ھەمان رەنگ ئێکە ژ وان پێکھاتیێن رێژا کلوری د ناڤ دا یا کێم، گەلەک یا ب مفایە بۆ حەلاندنا دوھنی و ھاتنە خوارا کێشێ، دشیان دایە کەرەفسێ ژی تێکەل بکەی، دا مفایێن وێ زێدەتر و ب لەزتر لێ بھێن.
شەربەتا سندیان پێکھاتەکێ ریشالی یە و رێژا کلوری تێدا گەلەک یا کێمە، ھاریکاریا پاراستن و وەکھەڤیا رێژا شەکرێ ددەت و وزێ ژی ددەت و دوھنێ د لاشی دا کۆمکری د حەلینیت، د شیان دایە ل گەل پرتەقالێ یان کەرەفسێ تێکەل بکەی.
ئه‌ڤرۆ نيوز:
رێڤەبەرێ گشتی یێ باژێرڤانیێن پارێزگەھا دھۆکێ بۆ رۆژناما ئەڤرۆ ئاشکرا کر کو ب بڕیارەکا جڤاتا وەزیرێن حوکمەتا ھەرێما کوردستانێ ژ نوکە وێڤە کریا راکرنا گلێشی ھەیڤانە دێ ژ خودانێن جھێن بازرگانی و گەشتوگۆزاری ھێتە وەرگرتن و گۆت: “ئەڤ کرێ یە ژ مالان ناھێتە وەرگرتن”.
ھەڤال ئەحمەد، رێڤەبەرێ گشتی یێ باژێرڤانیێن پارێزگەھا دھۆکێ دیار کر کو ژ نوکە وێڤە ھەیڤانە پارێ راکرنا گلێشی دێ ژ ھەموو جھێن بازرگانی و گەشتوگۆزاری وەکو (نڤێسینگەە و خارنگەە و پێشانگەە و ھتد…) ھێتە وەرگرتن و گۆت: “ژ بەر قەیرانا دارایی ئەڤ پارە ژ مالان ناھێتە وەرگرتن، بەلێ ھەر دەمێ رەوشا دارایی یا ھەرێمێ باشبوو جڤاتا وەزیران دێ بڕیارێ ل دۆر ڤێ چەندێ دەت”.
ناڤبری ئاماژە دا وێ چەندێ کو ئەڤ بڕیارە دێ ل ھەموو باژێرڤانیێن ھەرێما کوردستانێ ھێتە بجە ئینان و گۆت: “ل دووڤ بڕیارا جڤاتا وەزیران 20% ژ وی پارەی دێ بۆ ھەر باژێڕڤانییەکێ بیت چو ل ناحی یان دەڤەرداری یان ھەر جھەکێ دی بیت و 80% ژی دێ بۆ گەنجینەیا حوکمەتێ ھێتە زڤراندن”.
ئەڤرۆ نيوز:
بالیۆزێ تورکیا ل بەغدا ئاشکرا کر، بالیۆخانەیا وەلاتێ وی ل بەغدا رێیێن نوو دگریتە بەر بۆ دانا ڤیزێ بۆ وان وەلاتیێن عیراقێ و ھەرێما کوردستانێ یێن دخوازن سەرەدانا تورکیا بکەن و ئاسانکاری ژی بۆ رۆژنامەڤانان دێ ھێنە کرن.
فاروق قەیماقچی، بالیۆزێ تورکیا ل بەغدا د کۆنفراسەکێ رۆژنامەڤانی دا، بۆ رۆژنامەڤانان ڕاگەھاند، ئەو مەرجێن تورکیا بۆ دانا ڤیزا تورکی بۆ وەلاتیێن عیراقێ داناین، رۆژنامەڤانێن عیراقێ ڤەناگرن، مینا دانانا تاپۆیا خانی و ١٥ ملیۆن دیناران ل ئێک ژ بانکێن عیراقێ و چەند مەرجێن دی و گۆت: “ب تنێ مەرجێن ساخلەمیێ و تژیکرنا فورما ئەلکترۆنی و پشتگیریەک ژ وێ سازیا رۆژنامەڤان لێ کار دکەت یان ژی نڤیسارەکا سەندیکا رۆژنامەڤانان دێ ڤەگرن”.
بالیۆزێ تورکیا د وی کۆنفراسێ رۆژنامەڤانی دا خویا کر، مەرجێن نوو یێن دانا ڤیزێ ژ وان کەسێن ژیێ وان ژ ٥٠ سالیێ پترە ڤەناگریت، و ب تنێ مەرجێ ساخلەمیێ و تژیکرنا فورما ئەلکترۆنی دێ ژ وان گریت.
بالیۆزی ئاماژە ب وێ چەندێ ژی کر کو ئەو کەسێن ڤیزا شنگن ھەین یان ژی ڤیزا ویلایەتێن ئێکگرتیێن ئەمریکا، بریتانیا یان ئیرلەندا ھەبیت، بێ کو ڤیزا ئەلکترۆنی ل بالیۆزخانا تورکیا ل بەغدا یان کۆنسولخانا تورکیا ل ھەولێرێ وەربگرن، ئەو دشێن بچنە تورکیا “.
دەربارەی وان نەخوشێن کو دخوازن ب مەرەما چارەسەریێ بچنە تورکیا، بالیۆزێ تورکیا گوت: “پێدڤیە کەسێ نەخوش بانگھێتشنامەیا وێ نەخۆشخانێ ھەبیت کو دخوازیت تێدا بھێتە چارەسەرکرن، پاشی کوپیەکا وێ بدەتە بالیۆزخانا تورکیا، دا کو کار ل سەر بھێتە کرن بۆ وەگرتنا ڤیزێ بێ بەرامبەر و دێ ب رەنگەکێ ب لەز ڤیزە بۆ نەخوشی ھێتە دان”.
بالیۆزێ تورکیا ل بەغدا د وی کۆنفراسەکێ رۆژنامەڤانی دا ل دۆر دانا ڤیزێ بۆ گەشتیاران گۆت: “پێدڤیە ڤیزە ب رێیا ئێکەتیا کۆمپانیێن گەشت و گوزارییا تورکیا یان ژی وان نڤێسینگەھێن کو گرێدایی وێ ئێکەتیێ نە بیت، چونکو بۆ وان مافێ ھەی داخوازا ڤیزێ ژ بالیۆزخانە یان کۆنسولخانا تورکیا بکەن، ھەروەسا دڤێت نڤیسینگەە کەفالەتا وێ ئێکێ ژی بکەت کو ئەو گەشتیار پشتی گەشتا وی تمام دبیت دێ ڤەگەریتە وەلاتێ خوە، لێ ھەکەر گەشتیارەک ب خوازیت ڤەنەگەریتە ڤە بۆ عیراقێ پێدڤیە ١٥٠ ھزار دۆلاران بدەت”.
ئەڤرۆ نيوز:
رێکخراوا مافێ مرۆڤی یا رۆژھەلاتێ کوردستانێ دوھی د داخۆیانیەکێ دا راگەھاند کو ھەفت گرتێن کورد کو خەلکێ باژێرێ مھابادێ یێ رۆژھەلاتێ کوردستانێ نە ل زیندانا کەرەج بریارا سێدارەدانێ ل سەر وان ھاتیە سەپاندن، ئەو ھەفت گرتی چار سال بەری نھا ل مھابادێ ھاتنە گرتن و ب تاوانا کوشتنا سەربازەکێ ئیرانێ ھاتنە دادگەە کرن و د ھەموو روونشتنێن دادگەھێ دا وان ھەفت گرتێن کورد ئەو تومەت رەد کرینە و دیار کرینە کو وان چو پەیوەندی ل گەل وی بابەتی نینن و ئەو تنێ رۆژنامەڤان و چالاکڤانێ مەدەنی نە.
د بەردەوامیا داخۆیانیا رێکخراوا مافێ مرۆڤی یا رۆژھەلاتێ کوردستانێ دا ئەو یەک ژی ھاتیە دیار کرن کو ئەو ھەفت گرتیە بۆ ماوەیێ چار سالانە ل زیندانێن ئورمیێ و کەرەجێ ماینە و گەلەک ئەشکەنجە ل وان ھاتیە کرن و ئەو مافە ژی بۆ وان نەھاتیە دان کو پارێزەرەکێ بۆ خوە بگرن و د ماوەیێ چار سالان دا رێ نەھاتیە دان کەسوکارێن وان سەرەدانا وان بکەت و دو رۆژ بەری نھا ژی بریارا سێدارەدانێ ل سەر وان ھاتیە سەپاندن.
د دووماھیا داخۆیانیێ دا ئەو یەک ژی ھاتیە دیار کرن کو دەمەکە ل ئیرانێ گرتن و سێدارەدانا کوردان ب رەنگەکێ بەرچاڤ زێدە بوویە و گەلەک کەس ژی ب رەنگەکێ نھینی ل زیندانان دا ھاتنە سێدارەدان و ھەتا نھا ژی چارەنڤیسێ وان دیار نینن و بەرپرسێن زیندانێ ژی ناھێلن کەسوکارێن گرتیێن سیاسیێن کورد وەکو پێدڤی سەرەدانا وان بکەن.
ئه‌ڤرۆ نيوز:
کەریم نوری پەیڤدارێ حەشد شەعبی دداخویانیەکێ دا بۆ رۆژناما ئەڤرۆ دبێژیت، ھەتا نوکە مە چو پێزانین ل سەر ھەبوونا کچێن ئێزدی یێن دەستەسەرکری ل دەف داعشێ ل باژێرێ فەلوجە نینن و د شەڕێ چەندین رۆژێن بۆری دا ژی ل دەوروبەرێن فەلوجە، مە وەکو حەشد شەعبی و ھەتاکو ھێزێن لەشکرێ عیراقێ ژی چو کچێن ئێزدی نەدیتینە.
کەریم نوری پەیڤدارێ حەشد شەعبی زێدەتر بۆ ئەڤرۆ گۆت” ھێزین لەشکرێ عیراقێ و حەشد شەعبی و ھێزێن عەشیرەتان چەندین دەڤەرێن دەوروبەرێن فەلوجە یێن ئازادکرین ژوان ژی (سجەر، گەرمە و سەگلاویە) و ھەتا نوکە گەلەک خێزان یێن ژ دەستێ داعشێ قورتال بووین، بەلێ ھەتا نوکە مە چو ژن و کچێن ئێزدی نەدیتینە، شەڕ ژی یێ بەردەوامە و ھێشتا مە ھێرشا سەرەکی ل سەر ناڤەندا باژێرێ فەلوجە دەست پێ نەکریە”.
ڤیان دەخیل ئەنداما جڤاتا نوونەرێن عیراقێ ژ لیستا پارتی دداخۆیانیەکا رۆژنامەڤانی دا راگەھاندبوو” ل دووڤ پێزانینێن مە 100 ھەتا 200 کچ و ژن و زارۆیێن ئێزدی یێن دەستەسەرکری ژلایێ داعشێ ڤە یێن ل فەلوجە”. ڤیانێ داخواز ژ لەشکرێ عیراقێ و حەشد شەعبی کر کو ل دەمێ ئازادکرنا فەلوجە ژدەستێ داعشێ، ئەو ئێزدی بھێنە دەستنیشانکرن ورەفتارەکا جوان ل گەل بھێتە کرن”.
بەلێ پەیڤدارێ حەشد شەعبی رەتکر وان چو پێزانین ل سەر ڤێ ھژمارا دەستەسەرکریێن ئێزدی ل فەلوجە ھەبن و بۆ ئەڤرۆ خویاکر” ئەم نەشێن ڤان پێزانینان پشت راست بکەین ھەتاکو باژێرێ فەلوجە ب تمامی کونترۆل نەکەین و ھێشتا ھێرشا سەرەکی ل سەر باژێرێ فەلوجە دەست پێ نەکریە و ل دەمەکێ نێزیک دێ فەلوجە ژ داعشێ پاقژکەین و ل وی دەمی دێ مە ھەلویستەک ل دۆر وی بابەتی ھەبیت”.
کەریم نوری دیارکر ژی کو گەلەک خێزان ژ وان دەڤەرێن دەوروبەرێن فەلوجە ئەوێن ژلایێ ھێزێن لەشکرێ عیراقێ و حەشد شەعبی ڤە ھاتینە ئازادکرن وەکو یێن ھاتین و چو کچ و ژنێن ئیزدی دگەلدا نەبوون و گوت” ئەز باوەردکەم ھەکە کچ و ژنێن ئێزدی دناڤ دا ھەبان دا خوە دیارکەن، بەلێ مە نەدیتینە”.
گوت ژی” دەمێ ھێرشێ ل دەمەکێ نێزیک ل سەر فەلوجە ئەنجام ددەین، دێ خێزان و وەلاتیێن سڤیل قورتال کەین و ھەکە دەستەسەرکریێن ئێزدی ژی ھەبن بێگومان دێ قورتال کەین”.
ل دووڤ ئامارێن رێڤەبەریا گشتی یا کاروبارێن ئێزدیان ل ھەرێما کوردستانێ، ھەتا نوکە دو ھزار و 598 وەلاتیێن ئێزدی ژدەستێ داعشێ ھاتینە ئازادکرن و نێزیکی سێ ھزار و 800 وەلاتیێن ئێزدی ژلایێ داعشێ ددەستەسەرکرینە.
ئەڤرۆ نیوز:
ئەندامەکێ سەرکردایەتی پارتی دیموکراتی کوردستان بۆ زڤراندنا یوسف محمد وەک سەرۆکێ پەرلەمانی نا ھێتە کاراکرن، رێککەفتنا گوران و ئێکەتی ژی چو پەیوەندی ب پارتی ڤە نینە، ھەورەسا دڤێت بەرنامەکێ ھەڤپشک ھەبیت و دڤێت سەرۆکێ ھەرێمێ ژ دەرڤەی پەرلەمانی باشترە کو دناڤا پەرلەمانی دا بھێتە ھەلبژارتن.
ھێمن ھەورامی ئەندامێ سەرکردایەتی پارتی بۆ ئەڤرۆ گوت : (پارتی دیموکراتی کوردستان ب زڤراندنا یوسف محمد وەک سەروکێ پەرلەمانی، پەرلەمان ناھێتە کاراکرن، و پارتی ل گەل ھندێ یە کۆ ب گفتوگوو و دیاڵوک ئەو کێشە بھێتە چارەسەرکرن ، دیسا دڤێت بەرنامەیەکێ ھەڤپشک بۆ دروست بوونا ھەلبژاتنا سەرۆکی نوو بۆ پەرلەمانی ھەبیت و ئەڤ سەروکێ پەرلەمانێ نوو ژی باوەری ب تەوافق ھەماھەنگیێ ھەبیت، و دڤێت باوەری ب تەوافقێ ھەبیت دا بگەھینە ئەنجامەکی و ھەکە نەگەھشتینە چو ئەنجامان ژی دڤێت ھەلبژارتنێن پێشوەخت بھێنە ئەنجامدان و کار ل سەر بھێتە کرن).
ل دۆر رێککەفتنا ئێکەتی و گوران ژی ئاشکرا کر، (کو ب ھیچ شێوەیەکی ل گەل وێ چەندێ نینە، ب شێوەکێ ھەڤپشک ل گەل شاندێ ئێکەتی و گوران دانوستاندنان بکەین، بەلکو دڤێت ب جودا جودا سەردان و دانوستاندنێ بکەین، لێ ل گەل شاندێ ھەڤپشک دا چو روونشتانان ئەنجام نادەین و پارتی بەرھەڤ نابیت، چونکی ئەڤێ رێککەفتنێ چو پەیوەندی ب پارتی ڤە نیە و پەیوەندی ب ھندەک بابەتێن لسلیمانێی ڤە ھەیە کو گرێدان ب گۆڕان و ئێکەتی ڤە ھەیە).
بەرپرسێ نڤیسینگەھا پەیوەندیێن دەرڤەیا پارتی دیموکراتی کوردستان گوت: (پارتی ل گەل ئێکرێزیا ھەموو ئالیێن کوردستان یە و دڤێت ئەو ئێکرێزی ژی ھەبیت، و ل ئێک بەستنا ھەڤپەیمانیان ژی پارتی ژی زۆر کارتێن بەردەست ھەنە بۆ رێککەفتنان یان بۆ ھاوپەیمانان بھێتە پێکئینان بۆ سەربەخوەیا و نیشتمانی و ریفراندومێ).
ھێمن ھەروامی ھەروەسا ودیارکر ژی کۆ ب پارتی باشە کۆ سەرۆک ژ دەرڤەیی پەرلەمانی بھێتە ھەلبژارتن و دیموکراسی ترە ژ ناڤ پەرلەمان دا.
نيشاندان