ئه‌ڤرۆ نيوز، فاتما مزوورى:
پرۆگرامێ تۆڕا په‌يوه‌نديان “ڤايبه‌ر” چه‌ندين تايبه‌تمه‌ندى يێن تێدا و نوكه ژى تايبه‌تمه‌نديه‌كا نوو ئاشكه‌را بوو.
ئه‌و كه‌سێن به‌رده‌وام كار ل سه‌ر ڤايبه‌رى دكه‌ن، هه‌ر ده‌مێ نامه‌ك بۆ بهێت، لايتا شاشا وان روون دبيت و ئه‌ڤێ ژى چه‌ندين كه‌س بێزار كرينه، چنكو پاتريا موبايلێ كێم دبيت و مرۆڤى ژى بێزار دكه‌ت.
ئه‌ڤ تايبه‌تمه‌نديه ژى ئاشكه‌را بوو كو تو دشێى چاره‌سه‌ريێ بۆ بكه‌ى، ده‌مێ نامه‌ك بۆ ته هات، لايتا شاشێ پێ نه‌بيت، ڤێرژنێ نوو يێ ڤايبه‌رى دانلۆد بكه و پاشان ل دووڤ ڤان رێيان هه‌ره:
– ڤايبه‌رى ڤه‌كه و هه‌ره (Setting).
– پاشان هه‌ره پشكا (Notifications).
– ل وێرێ نيشانا راست ل به‌ر (Light screen for messages) راكه.
ئه‌ڤرۆ نيوز:
سترانبێژا کورد دلنیا قەرەداغی نھا ل وەلاتێ مسرێ مژویلی دروستکرنا سترانەکا نوی یە
موزیکژەنێ ناڤدارێ مسری (وەلید مونیر) ل سەر پەیجێ خو یێ تایبەت ل تورا کومەلایەتی یا فەیسبوکی وێنەیەکێ خو و سترانبێژا کورد دلنیا قەرەداغی بەلاڤکریە ئاماژە ب وێ چەندێ دایە کو ھەردو پێکە کارەکێ بو سترانبێژا ناڤبری دکەن .
و دیسان ھەتا نھا ناڤێ سترانا نوی ئاشکرا نەکریە لێ ئەوی موزیکژەنی نڤیسیە و ئاشکرا کریە کو بلا حەژێکەرێن وێ چاڤەرێ سترانەکا خوش ب دەنگێ قەرەداغیێ بن و (ئەحمەد شەتا) پەیڤ بو سترانێ داناینە و ئاوازا وێ سترانێ ژلایێ (تاریق حەسیب)ڤە ھاتیە ئامادەکرن.
دلنیا قەرەداغیێ بەری دەمەکێ بو چەند دەزگەھێن راگەھاندنێ ئاشکرا کربو کو دوماھیک کارێ وێ دێ تومارکرنا سترانەکێ بیت بو زنجیرە درامایەکا مسری ئەوا بناڤێ ( سولتان و شاە) کو بریار بو د ھەیڤا رەمەزانا پیروز دا ل چەند کەنالێن عەرەبی بھێتە پەخشکرن
ھەژی گوتنێ یە سترانبێژا کورد دلنیا قەرەداغی پشتی کو دگەل کونسلێ مسرێ ل ھەولێرا پایتەخت ھەڤژینی پێک ئینای بریارا وێ چەندێ دا کو ئێدی ل وەلاتێ مسرێ ژیانا خوە ب سەر ببەت و ئاکنجی بیت.
ئه‌ڤرۆ نيوز:
ژنەکا 28 سالی ئاریشا خوە ددەتە رۆژناما ئەڤرۆ و داخوازا رێیە چارەیەکێ دکەت و دبێژیت: ئەڤە سێزدە سالە من شوو کری و د عەزابێ دامە، ژبەرکو زەلامێ من گەلەک یێ تەماعە، خەلەتیا مەزن ئەوە بۆ شووکرنا خوە من یا ب خوە کری، لەوا یا بێ دەستھەلاتم و نەشێم چو بکەم خوزی من گوھداریا دایک و بابێن خوە کربا و پاش بلا ئەز مربام، مە ب عەشق و ئەڤینی خێزان یا پێک ئینایی بەس ئەو روژا ب رەش بیت.
ئەڤ ژنە زێدەتر بۆ ئەڤرۆ دبێژیت: من چوار زارۆ یێن ھەین زەلامێ من پێشمەرگەیە و ئەم کرێدارین زەلامێ من یێ باشە و ئەز حەز ژێ دکەم بەس پا بۆ پارا خولی بسەریە، ژبەرکو گەلەکێ تەماعە بێ حساب خۆ ئەس بمرم پارا نادەتە فمن، ھەما بەس ئەس ھزرا دکەم و دکەمە گری یەعنی بو مەزاختیێ مال یێ روژی َھەموویێ دو ھزرارا دەتەڤە راستە ئەم کرێدارین بەس ئەز دبینم خۆ ئەم بخانی ژی بکەڤین و چەند زەنگین ژی ببین ئەو دێ ھەر ئەڤ مالە بیت و ناھێتە گوھۆرین .. ئەڤە سێزدە سالە من شوو کری و د عەزابێ دامە، مە ب عەشق و ئەڤینی خێزان یا پێک ئینایی بەس ئەو روژا ب رەش بیت.
ھەروەسا گۆت: یا ژ ھەموویێ نەخوشتر ئەوە من پێگوھرکا ھەی و ئەو دولارا سەر سەرێ خوە ڕا دھاڤێژیت و بلا ئەز ژی بو دو ھزرارا بکەمە گری. برایێ من گەلەک یێ مەردە بو وێ و پێگوھرکا من ھەرگاڤ یا ل خارنگەھا حەتا ھەکو ئەز دچمە سەرەدانا مالبابا خوە وان ئەز دبێژمێ شەرمە دەست خالی بچین ھەر چو نەبیت تشتەکی بکرە لێ ناکریت شولا من ژی گریە.
ل دووماھیێ ڤێ ژنێ گۆت: خەلەتیا ژ ھەموویا مەزنتر ئەوە بۆ شووکرنا خوە من یا ب خوە کری، لەوا یا بێ دەستھەلاتم و نەشێم چو بکەم و ئەز ھەردەم خوە ب گونەھبار دبینم و بزاڤێ دکەم ژ ڤێ دونیایێ دەرکەڤم، چونکی دایکا من و بابێ من خوە ھاڤێتە بەر پێت من و گوتە من شوو پێ نەکە بیانیە ئەم نانیاسین و یێ نیاس چێترە، لێ ئەز رازی نەبوم و من گوت ئیلا دێ من دەنێ و من ئەو نەچار کرن حەتا ئەز دایمێ نھا من گەلەک تشتێن ژ دەست داین خوزی من گوھداریا دایک و بابێن خوە کربا و پاش بلا ئەز مربام، ھەکو ئەز خوشکێن خوە و ھەڤالێن خوە دبینم دلێ من دسوزیت چونکی ئەو د بێ کێماسینە، ئەڤجا ھیڤیدارم ھوون بو ڤێ ئاریشا من چ دبێژن و ئەز چ بکەم ؟
چارەسەری:
دەربارەی چارەسەریا ڤێ ئاریشێ د. محەمەد سەعید کزویی تایبەتمەندێ دەروونی دبێژیت: ھزر کرن ل دەمێ بەری نھا دا یا بێ مفایە کا کی ئەگەر بو یان چەوا چێبو، نھا تو خودان زارۆیی و دڤێت ژیانا خوە و یا وان بباشترین رێک ببەیە سەری لەوا باشترە تو و ھەڤژینێ خوە ھەول بدەن لدووڤ شیانێن دارایی یێن ھەوە ژیانەکا بەختەوەر پەیدا بکەن و ڤەھاندنا چیروکا و بەراوردکرنا خوە دگەل کەسانێن دی ھزرێن تە ئالوزتر دێ کەن ئەڤجا چاڤێن خوە ڤەکە و واقعێ خوە بەرچاڤ دانە. ژلایەکێ دیڤە باشترە تو حەددەکی بو ڤان رەوشتا لنک ھەڤژینێ خوە دانی و ب رون و ئاشکەرایی گەنگەشێ دگەل بکە و دیتنا خوە بۆ دیار بکە و بەرژەوەندیا خێزانێ لبەر چاڤ دانن نەمازە پێدڤیێن زارۆیا و ژبیر نەکەن ھەردەم ھەول بدەن کو ژیانا خوە باشتر لێ بکەن، ب کورتی نھا چو کێماسیا نەھێلن و سوبەھی ژبیر نەکەن. ھەروەسا بزانە ھەردەم بێ دەنگی نەچارەسەریە لەوا بەردەوام ھەول بدە ھەر ژ دەستپێکێ ھەر ئاریشەکا ھەبیت بدووماھی بینە و چەند بلەزتر بیت دێ بساناھیتر بیت و بەروڤاژی دێ ئالوزتر بیت.
ئه‌ڤرۆ نيوز، بارزان مزوورى:
ل سه‌ر جادا به‌رده‌ره‌ش بۆ كه‌له‌ك د روودانه‌كا هاتنوچوونێ دا پێنج كه‌شان ژ ئێك خێزان گيانێ خوه ژ ده‌ست و د روودانه‌كا دى ل سێريانا خه‌نس حه‌فت كه‌س بريندار بوون كو هه‌موو يێن ئێك خێزان بوون.
دوهى رۆژا پێنجشه‌مبى و ل ده‌مژمێر 4:00ى سپێدێ ل سه‌ر رێيا د ناڤبه‌را قه‌زا به‌رده‌ره‌ش بۆ كه‌له‌ك و ل نێزيك گۆندێ گه‌ويلان د روودانه‌كا هاتنوچوونێ دا دو ترۆمبێلان لێكدا و پێنج كه‌سان گيانێ خوه ژ ده‌ست دا.
ئه‌ڤرۆ رۆژا پێنجشه‌مبى ل سێريانا خه‌نس و د روودانه‌كا هاتنوچوونێ دا كو 7 وه‌لاتيێن ئێك خێزان د ترۆمبێله‌كا پيكئاپ دا بريندار بوون و بۆ نه‌خۆشخانێ هاتنه ره‌وانه‌كرن.
وێنێن روودانا به‌رده‌ره‌ش
وێنێن روودانا سێريانا خه‌نس
ئه‌ڤرۆ نيوز:
رێڤەبەرێ پەیوەندی و ڕاگەھاندنێ ل رێڤەبەریا گشتی یا پەروەردێ ل پارێزگەھا دھۆکێ بۆ رۆژناما ئەڤرۆ ئاشکرا کر کو بڕیارە ئەزموونێن گشتی یێن قووناغا 12 ئامادەیی ل 2/6/2016 و یێن قووناغا نەھێ بنەرەت ل 8/6/2016 ل سەرانسەری ھەرێما کوردستانێ بھێنە کرن و ل پارێزگەھا دھۆکێ 82 ھزار و 934 قوتابی دێ پشکداریێ تێدا کەن.
ئەحمەد عەبدوللا زوبێر، رێڤەبەرێ پەیوەندی و ڕاگەھاندنێ ل رێڤەبەریا گشتی یا پەروەردێ ل پارێزگەھا دھۆکێ خویا کر، ئەزموون دێ ل دەمژمێر 8 و 30 ل سەرانسەری ھەرێما کوردستانێ دەست پێ کەن و گۆت: “مە وەکو رێڤەبەریا گشتی یا پەروەردا پارێزگەھا دھۆکێ ھەموو بەرھەڤی بۆ ئەنجامدانا ئەزموونا ب سەرکەفتیانە کرینە، بۆ ئەڤ سالە رێنمایێن تایبەت بۆ ئەزموونان ژ وەزارەتێ دەرکەفتینە سەبارەت چاوانیا ئەنجامدانا ئەزموونان ل بنگەھێن ئەزموونان”.
گۆتژی: “ل قووناغا ئامادەیی ب پشکێن (زانستی، وێژەیی، پیشەیی، خواندنا ئیسلامی ڤە) 41 ھزار و 955 قوتابی ل 664 بنگەھان ل سەرانسەری پارێزگەھا دھۆکێ دێ پشکداریێ د ئەزموونێن گشتیێن ئەڤ سالە دا کەن، ژ وانا 23 ھزار و 505 قوتابی یێن پشکا زانستی، 17 ھزار و 925 قوتابی ێن پشکا وێژەیی، 370 خواندنا ئیسلامی و 155 پشکێن پیشەیی نە”.
دەربارەی ئەزموونێن نشتیمانی یێن پۆلا نەھێ بنەرەت ژی ئەحمەدی گۆت: “ژڤانە ل 8/6/2016 ئەزموونێن نشتیمانی بۆ ئەڤ سالە ل سەرانسەری ھەرێما کوردستانێ دەست پێ بکەن، 40 ھزار و 979 قوتابی دێ پشکداریێ تێدا کەن و ل 568 بنگەھێن ئەزموونان ل سەرانسەری پارێزگەھا دھۆکێ ھاتینە بەلاڤەکرن”.
ئه‌ڤرۆ نيوز:
رێڤەبەرێ نڤێسینگەھا کاروبارێن رەڤاندیان ل دھۆکێ دیار کر کو دۆرێن 150 ھەتا 200 کچ، ژن و زارۆیێن ئێزدی یێن ل دەمێ کارەساتا شنگالێ ژ لایێ تیرۆرستێن داعشێ ڤە ھاتینە رەڤاندن، د ناڤ فەللوجە دا ئاسیێ ماینە و د دەستێن داعش دانە و گۆت: “ئەم داخوازێ ژ ھێزێن ئێمناھیێ یێن ئوپەراسیۆنا رزگارکرنا فەللوجە دکەین پاراستنا ژیانا وان ب ستوویێ خوە ڤە بگریت”.
حسێن کورۆ، رێڤەبەرێ نڤێسینگەھا کاروبارێن رەڤاندیان ل دھۆکێ بۆ ئەڤرۆ ئاشکرا کر، وان ب رێیا پەیوەندیێن تێلەفۆنی داخواز ژ فەرماندێن لەشکری یێن عیراقێ و حەشدا شەعبی کریە کو ژیانا وان کچ، ژن و زارۆیێن ئێزدی یێن رەڤاندی یێن نوکە د ناڤ دەستێن تیرۆرستێن داعشێ دا ل فەللوجە بپارێزن و گۆت: “ئەو کچ، ژن و زارۆیێن ئێزدی ب راستی ژی د مەترسیەکا مەزن دانە، چونکو شەرێ رزگارکرنا فەللوجە دەستپێکریە و گەلەک ئێزدی یێن رەڤاندی دناڤ فەللوجە دا گرتی ماینە”.
ناڤبری ئاماژە ب وێ چەندێ ژی کر، گەلەک وەلاتیێن رەڤاندی دناڤ زیندانێن فەللوجە دا ھەنە و گۆت: “ئەم داخواز دکەین ھەر رەڤاندیەکێ ئێزدی بھێتە گرتن بھێتە رەوانەکرن بۆ ھەرێما کوردستانێ، ئەم د وێ باوەریێ داینە ل ھەر جھەکێ تێرۆرستێن داعش لێ ھەبن کوردێن ئێزدی یێن رەڤاندی نوکە ل وێ جھی ھەنە، چونکو تیرۆرستێن داعش ھژمارەکا گەلەکا زۆر یا کوردێن ئێزدی رەڤاندینە و ھەتا نوکە چارەنڤیسێ گەلەک ژ وان یێ دیار نینە”.
ئه‌ڤرۆ نيوز:
ئه‌ڤرۆ وه‌زيرێ خواندنا بلند، رێنمايێن خواندنا بلند، ماسته‌ر و دكتورايێ ئيمزاكرن
پشتى كومبوونا ژماره 3 يا جڤاتا وه‌زاره‌تا خواندنا بلند ل رێكه‌فتى (9/5/2016) هاتيه ئه‌نجامدان و رێنمايێن خواندنا بلند، ماسته‌ر و دكتورايێ بۆ سالا خواندنێ (٢٠١٦-٢٠١٧) هاتيه ده‌رێخستن، ئه‌ڤرۆ وه‌زيرێ خواندنا بلند ده‌قێ وان رێنماييان ئيمزاكر.
بۆ پتر پێزانينان سه‌ره‌دانا ڤى لينكێ وه‌زاره‌تێ بكه‌ن
بۆ خواندنا رێنمايێن هاتينه په‌سه‌ندكرن، ڤى لينكى ڤه‌كه
ئه‌ڤرۆ نيوز:
قایمقامێ قەزا ئامێدیێ ئاشکرا کر کو ب مەرەما چارەکرنا ئاریشا ڕاکرنا گلێشێ ل سنوورێ قەزا ئامێدیێ کارگەھەکا ڤاڤارتنا گلێشی دێ ل قەزا ئامێدیێ ھێتە دانان.
ئسماعیل مستەفا، قایمقامێ قەزا ئامێدیێ بۆ ئەڤرۆ دیارکر کو ئاریشا ڕاکرنا گلێشی ل سنوورێ قەزا ئامێدیێ ئێک ژ ئاریشێن سەرەکی یێن دەڤەرێ بوو و رۆژانە گازندێن وەلاتیان ل سەر ڤێ چەندێ دگەھشتنە وان ب تایبەت ل وەرزێ ھاڤینێ ژ بەر ڤێ چەندێ ئەو ل گەل جھێن پەیوەندیدارێن پارێزگەھا دھۆکێ کۆمبووینە و ھەتا رادەکی گەھشتینە رێککەفتنەکێ کو ئەڤ ئاریشە ب ئێکجاری بھێتە چارەکرن.
ناڤھاتی ئاماژە دا وێ چەندێ کو گلێشێ سەنتەرێ قەزا ئامێدیێ و رۆژھەلاتێ وێ د گەل یێ کومەلگەھا قەدشێ دێ ل کومەلگەھا ناڤھاتی ھێتە کۆمکرن و گلێشێ ئێنیشکێ و سەرسنکی و د گەل یێ مانگێشکێ دێ ل مانگێشکێ ھێتە بن ئاخ کرن و گۆت: “پرۆژێ دانانا کارگەھا ڤاڤارتنا گلێشی ل قەزا ئامێدیێ بۆ کۆمپانیا ھیزل دەرکەفتیە و ژ بەر ئاریشا نەبوونا جھی دەست ب کاری نەدکر، بەلێ نوکە ئەو ئاریشە ژی ھاتیە چارەکرن و ل دەمەکێ نێزیک دێ دەست ب کارێ چێکرنا ڤێ کارگەھێ ھێتەکرن”.
نيشاندان