ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 10ى چريا دويێ 2016ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1305 |
| 1 يۆرۆيێ ئه‌ورۆپى | 1455 |
| 1 ليرێ توركى | 425 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئەڤرۆ نیوز:
ھونەرمەندێ سترانبێژ عەمەر گوندی، د کورتە دیدارەکێ دا بۆ ئەڤرۆ گۆت: پشتی بەرنامێ من (مۆزیک شوو) ل وار تیڤی ب دووماھی ھاتی، ئەڤە ماوێ سالەکێ یە من چ کارێن نوو تۆمار نەکرینە، ھەروەسا چ ددەستێ من دا نەمایە ژبلی سازا من، نوکە من چ پرۆگرام ژی نەماینە، لەورا ھەر ناڤ بەین ناڤ بەین ب رێیا فێسبووکێ ئەز کار و سترانێن خوە یێن نوو بەلاڤ دکەم، کو پتری 20 سترانانە و پتریا وان ل دۆر پێشمەرگەی و شەھیدێن کوردستانێ نە و ئێک ژ وان سترانا ژی من ب شەھید دکتۆر سلێمانی گۆتیە، لێ ژبەر نەبوونا پشتەڤانیێ ئەز نەشیایمە وان سترانان تۆمار بکەم، ھەروەسا شیان و مەزاختن بۆ چێکرنا بەرھەمان دڤێن ھەتا مرۆڤ بشێت کارەکێ ھونەری یێ جوان و سەرکەفتی تۆمار بکەت، و گۆت ژی: من د ژیانا خوە ھەموویێ دا چ جاران خوە ھەوجەی کەسێ نەکریە، ھەروەسا ھەتا نوکە ژی نە کەسێ و نە چ دەزگەھان ھاریکاریا من نەکریە بۆ تۆمارکرنا بەرھەمێن من، ھەموو بەرھەمێن خوە من ژ بەریکا خوە مەزاختن لێ کریە، لێ ھەردەم یێ ئامادەمە خزمەتا ھونەرێ کوردی بکەم،خوە ھەکە ب رێیا فێسبووکی ژی بیت.
ئەڤرۆ نیوز:
چاڤەرێ دھێتەکرن ئەڤرۆ سوباھی شەش یاری ژ خولا پێشمەرگەی کوردستانێ یا پلا نایاب بۆ یانێن ھەرێمێ بھێتەکرن ژ چارچوڤێ یاریێن گەرا دوێ ھەر چار یانێن پارێزگەھا دھۆکێ ئەرکێ ئەوان یێ ب سانەھی نابیت کو ھەرسێ یانێن زاخۆ دھۆک زێرەڤانی دێ یاریێن خوە ل دەرڤەی یاریگەھێن خوە کەن و یانا گارە دێ ل یاریگەھا خوە کەت ل گەل نوونەرا کەلار ئەوژی یانا شێروانە .
بریارە ئەڤرۆ سێ یاری بھێنەکرن کو ھەردوو نوونەرێن پارێزگەھێ یێن د کوما دوێ دا دێ یاریێن خوە کەن ئەوژی تیما گارە دێ یاریا خوە ل یاریگەھا خوە مێڤانداریا یانا شێروانە کەت کو ھەردو یانە ل یاریێن حەفتیا ئێکێ دا نەشیان سەرکەفتنێ توماربکەن تیما گارە ل دەرڤەی یاریگەھا خوە وەکھەڤبوو شێروانە ل ناڤ ئەرد جەماوەرێ خوە دا وەکھەڤبوو دڤێ یاریێ دا ھەردو یانە دێ بزاڤێن مەزن کەن بۆ دەستڤەئینانا سەرکەفتنا ئێکێ ل ڤی وەرزی، ژلایەکێ دیڤە تیما تەپا پێ یا زاخۆ دێ یاریا خوە یا ئێکێ ل وەرزێ ئەڤ سالە ئەنجام دات پشتی ل حەفتیا بوری یا چاڤەرێکری بوو یاریا خوە نەکری ئەڤرۆ دێ کەڤیتە د تاقیکرنا ئێکێ یا وەرزێ ئەڤ سالە دا دەمێ ل یاریگەھا پیرمام ل گەل یانا ئارارات کەت کو دڤێ یاریێ دا راھێنەرێ زاخۆ پشت بەستن ل سەر یاریزانێن خوە یێن تیما خولا کوردستانێ کریە ئەوێن ماوەکێ درێژە راھێنانان ل گەل ئەوی کەن کو دێ بیتە یاریا ئێکێ یا فەرمی یا راھێنەرێ تیما زاخۆ محەمەد یوسف ل گەل زاخۆ تیما ئارارات دبیتە یاریا وێ یا دوێ ل وەرزێ ئەڤ سالە د یاریا ئێکێ دا وەکھەڤبوو ل گەل شێروانە ل دەرڤەی یاریگەھا خوە، د یاریەکا دی دا ژ ھەمان کوم تیما ھندرین ئەوا د یاریا بوری دا توشی خوسارەتیێ بووی دێ مێڤانداریا یانا کەرکوک کەت ل یاریگەھا خوە ل باژێرێ ھەولێر و تیما سیروان نوو دێ دڤێ حەفتیێ دا یا چاڤەرێکری بیت .
بریارە سوباھی بەردەوامی ب یاریێن حەفتیا دوێ ژ خولێ بھێنەکرن و د یاریێن کوما دوێ دا چاڤەرێ دھێتەکرن یاریێن ب ھێز و پری ھەڤرکی بھێنە ئەنجامدان ل یاریگەھا فرانسو حەریری یا ئێکێ تیما ھەولێر مێڤانداریا یانا زێرەڤانی بکەت ئێک ژ ب ھێزترین یاریێن ڤێ حەفتیێ کو دڤێ یاریێ دا ھەردو تیم دێ یاریێ بۆ دەستڤە ئینانا سێ خالێن یاریێ کەن کو تیما ھەولێر پشت بەستن ل سەر کومەکا یاریزانێن خوە یێن سەرەکی یێن تیما خولا عیراقێ کرینە بۆ دەستڤە ئینانا سێ خالێن یاریێ بەردەوامی ب دەتە کاروانێ خوە بۆ دەربازبوونێ بۆ قوناغا چار گوشا زێرین و پاراستنا ناسناڤێ خوە یێ وەرزێ بوری بەرامبەر یانا زێرەڤانی ئەوا ل وەرزێ ئەڤ سالە ب ھێز خوە بەرھەڤکری ئارمانجا وێ ژێ بتنێ ئەوە بۆ سێ خالێن یاریێ ھەر یاریەکا وەرزێ ئەڤ سالە بکەت چو ل یاریگەھا خوە بیت یان دەرڤەی یاریگەھا خوە یاریێ بکەت ژبەرکو کومەکا یاریزانێن خودان شیان ھەنە و شارازیا ئەوان تێرا وێ چەندێ کەت سەرکەفتنا ل سەر یانێن مەزن توماربکەن ل دەرڤەی یاریگەھا خوە.
ل یاریگەھا زانکو تیما دھۆک ئەوا ل حەفتیا بوری توشی خوسارەتیێ بووی دێ بیتە مێڤانا یانا نەوروز ئەوا ل حەفتیا بوری شیای سەرکەفتنەکا گرنگ ل دەرڤەی یاریگەھا خوە توماربکەت ل سەر یانا پێشمەرگا ھەولێر، یاریزانێن دھۆک ئەوێن ل حەفتیا بوری نەشیان سەرکەفتنێ ل ناڤ ئەردو جەماوەرێ خوە توماربکەن دێ بزاڤێ کەن ل ڤێ حەفتیێ دەستڤالە ژ سلێمانیێ نەڤەگەرن ھەر چەندە باش دزانن یاریا ئەوان دێ یا ب زحمەت بیت ل گەل یانا نەوروز لێ یانا دھۆک ژێ بۆ ڤێ یاریێ بەرھەڤیەکا باش کریە بۆ وێ چەندێ چو ئەنجامێن نە چاڤەرێکری تومارنەکەن ژبەرکو دەستەیا راھێنەری و یاریزان باش دزانن خوسارەتیا ئەوان یا دوێ ل دیڤ ئێک دێ رێیا ئەوان ب زحمەت ئێخن بۆ دەربازبوونا چار گوشا زێرین ھەردیسان دێ مەترسی کەڤیتە سەر ئەوان چونکو دڤێ کومێ دا قەرەبولکرن نینە ھەر حەفت تیمێن پشکدار ھەڤرکیا دەربازبوونێ کەن و تیمەک ژ ئەوان پاشڤەزفریتە خولا پلا ئێک لەورا مەترسی ل سەر ھەمی تیمان ھەیە و رێیا دەربازبوونێ بۆ ھەمی یانا ژێ ھەیە، د یاریەکا دی دا ھەردو یانێن برایەتی و گازی باکور دێ ھەمبەری ئێک بن ل یاریگەھا برایەتی ل باژێرێ ھەولێر.
ئه‌ڤرۆ نيوز:
رێڤه‌به‌ريا كه‌شناسى و بيڤه‌له‌رزێ ل هەرێما کوردستانێ راگه‌هاند كو سوبه‌هى رۆژا ئه‌ينى رێكه‌فتى 11ى چريا دويێ 2016ێ ئه‌سمان دێ د ناڤبه‌را ساهى و هنده‌ك ئه‌ورێن كێم دا بيت، ل هنده‌ك ده‌ڤه‌ران ئه‌و ئه‌ور دێ زێده بن.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ نزمبوونا فشارێن لاوازێن ده‌ريا ناڤه‌راست بۆ سه‌ر هه‌رێما كوردستانێ دهێته پێشبينيكرن ئه‌سمان د ناڤبه‌را ساهى و هنده‌ك ئه‌ورێن كێم دا بيت، ل هنده‌ك ده‌ڤه‌ران ئه‌و ئه‌ور دێ زێده بن.
پشكا پێشبينيان دايه زايه زانين كو دێ ئاراستێ باى ژى دێ باكوورێ رۆژهه‌لات بيت ب ره‌نگه‌كى د ناڤبه‌را 5 هه‌تا 10كم دا و ماوێ ديتنێ ژى دێ 10كم بيت، پلێن گه‌رمێ ژى دێ د ناڤبه‌را 11 بۆ 23 پلان دا بن.
ئەڤرۆ نيوز:
رێڤەبەرێ کۆچ و کۆچبەران ل پارێزگەھا ھەولێرێ ئاشکرا کر کو ل حەفتیا داھاتی ب رێیا فرۆکخانا نێڤدەولەتی یا ھەولێرێ تەرمێن دو پەنابەرێن کورد دێ بۆ ھەرێما کوردستانێ ھێنە ڤەگەڕاندن.
نەزھەت حسێن، رێڤەبەرێ کۆچ و کۆچبەران ل پارێزگەھا ھەولێرێ دیار کر کو رۆژا چارشەمبی یان پێنجشەمبی یا حەفتیا داھاتی تەرمێن دو پەنابەرێن کورد ژ بۆلگاریا ب رێیا فرۆکخانا نێڤدەولەتی یا ھەولێرێ دێ بۆ ھەرێما کوردستانێ ھێنە ڤەگەڕاندن و بۆ دواڕۆژ گۆت: “ئەو دو تەرمێن کو دێ بۆ ھەرێمێ ھێنە ڤەگەڕاندن ل دەستپێکا ھەیڤا تەباخا سالا 2016ێ بەر ب ئورۆپا چووبوون و ل رۆژا 5/9/2016ێ گەھشتبوونە بۆلگاریا و ل رۆژا 8/9/2016ێ دناڤبەرا بۆلگاریا و ئەلمانیا دا خەندقین”.
ناڤھاتی ئاماژە دا وێ چەندێ کو ئێک ژ وان کەسێن کو دێ تەرمێن وان بۆ ھەرێمێ ھێنە ڤەگەڕاندن ب ناڤێ (ھەیام کاروان فکری)یە خەلکێ قەزا شێخان یا سەر ب پارێزگەھا دھۆکێ ڤە یە و یێ دی ژی خەلکێ رۆژئاڤایێ کوردستانێ یە و گۆت: “ل حەفتیا داھاتی ب رێیا فرۆکخانا نێڤدەولەتی یا ھەولێرێ دێ تەرمێن وان ل سەر ئەرکێ نڤیسینگەھا سەرۆکێ حوکمەتا ھەرێما کوردستانێ بۆ ھەرێمێ ھێنە ڤەگەڕاندن”.
ئه‌ڤرۆ نيوز:
ھێزێن پۆلیسان ھەڤژینا بەرێ یا دکتۆر ئاشتی ھەروامی وەزیرێ سامانێن سرۆشتی ل حوکمەتا ھەرێما کوردستانێ ب تۆمەتا گەندەلیێ و کڕین و فرۆتنا چەکێن بەلێندەران دەستەسەرکر و سەرۆکێ دەستەیا دەستپاکیێ ژی دبێژیت، چراخانێ مامەلە ب چەکێن بەلێندەران کرینە و ل گۆرەی قانوونێ قەدەغەیە مامەلە بڤان چەکا بھێتەکرن.
رائید ھۆگر عەزیز، پەیڤدارێ پۆلیسێن پارێزگەھا ھەولێرێ بۆ رۆژناما ئەڤرۆ ئاشکرا کر کو دوھی رۆژا 9/11/2016ێ ھێزەکا پۆلیسان ل سەر سکالایەکا دەستەیا دەستپاکیێ شیاینە بازرگان چراخان رەفیق ھەڤژینا بەرێ یا دکتۆر ئاشتی ھەورامی وەزیرێ سامانێن سرۆشتی ل حوکمەتا ھەرێما کوردستانێ دەستەسەربکەن و گۆت: “چراخان رەفیق ب تۆمەتا بازرگانیکرنێ ب چەکێن بەلێندەران و فرۆتنا وان د بازاڕی دا ھاتیە دەستەسەرکرن”.
دکتۆر ئەحمەد ئەنوەر، سەرۆکێ دەستەیا نەزاھێ ل ھەرێما کوردستانێ بۆ رۆژناما ئەڤرۆ دیار کر کو حوکمەتا ھەرێما کوردستانێ بەری نوکە مامەلەکرن ب چەکێن بانکی و بەلێندەرا قەدەغەکربوو و ل گۆرەی قانوونێ ژی قەدەغەیە، بەلێ چراخانێ کڕین و فرۆتن ب چەکێن بەلێندەرا کریە، لەوڕا ژ لایێ ھێزێن پۆلیسان ڤە ھاتیە دەستەسەرکرن و تۆمەتبارە ب فرۆتنا چەکێن بەلێندەرا، چونکی ئەڤ چەکە بتنێ وەکو گەرەنتیێ داینە بەلێندەران کو حوکمەت قەڕدارێ وانایە.
ژلایێ خۆڤەژی چراخان رەفیق بۆ دەزگەھێن راگەھاندنێ دیارکریە، دادگەھەکا ھەولێرێ ب تۆمەتا کڕین و فرۆتنا چەکێن بەلێندەرا چار سال سزا ب سەر وێ دا سەپاندینە و رەتکر ژی دەست د گەندەلیێ دا ھەبیت.
ئەڤرۆ نيوز:
وەزیرێ دارایی یێ حوکمەتا عیراقێ ب وەکالەت بۆچوونا سەرۆک وەزیرێن عیراقێ ل دۆر ھنارتنا پارەکێ تایبەت بۆ مامۆستایێن ھەرێما کوردستانێ دیار دکەت و راگەھاند، عەبادی دڤێت پارەکێ زۆر بۆ وەزارەتا پەروەردا حوکمەتا ھەرێما کوردستانێ بھنێریت و نوکە ل میکانزمەکێ بۆ ھنارتنا وی پارەی دگەریێت.
فازل نەبی، بریکارێ وەزارەتا دارایی یێ عیراقێ ئاشکرا کر، دەربارەی مووچێ مامۆستایێن ھەرێما کوردستانێ، وی پرسیار ئاراستەی حەیدەر عەبادی کریە، کا چ مەرەم ھەیە و دێ چاوا شێت ھاریکاریا وەزارەتا پەروەردا ھەرێما کوردستانێ کەت و گۆت: “عەبادی دیارکریە کو ئەو یێ بەرھەڤە پارەکێ زۆر بۆ ھەرێما کوردستانێ بھنێریت”.
بریکارێ وەزارەتا دارایی یێ عیراقێ خویا ژی کر، عەبادی ھزرا ھنارتنا مووچەی و کۆژمەکێ پارەی بۆ پەروەردا ھەرێما کوردستانێ یا ھەی، لێ نوکە ل میکانزما ھنارتنا وی پارەی دگەریێت ھەتا بجە بینیت.
د چارچوڤێ دیدارەکێ دا ل گەل رادیۆیا نەوا، فازل نەبی ئاشکرا کر، حەیدەر عەبادی و وەزیرێن کابینا وی، دیتنا وان دەربارەی کورد و ھەرێما کوردستانێ و پێشمەرگەی ھاتیە گوھۆرین و یا ئەرێنیە.
ئەڤرۆ نيوز:
فرێ نەکرنا پشکا بودجا ھێزێن پێشمەرگێ کوردستانێ ژ لایێ حوکمەتا عیراقێ ڤە بۆچوونێن جودا د دووڤ خوە دا ئینان و پەرلەمانتارەکێ کورد ژ لژنا ناڤخوە یا جڤاتا نوونەرێن عیراقێ ژی ئاماژێ ب گیرۆبوونا وی کۆژمێ پارێ پێشمەرگەی دکەت و دلگرانیا خوە دیار دکەت.
ھەتا نوکە حوکمەتا عیراقێ ئەو کۆژمێ پارەی یێ ژ ئەنجامێ رێککەفتنا ھەولێر و بەغدا بەحس لێ ھاتیە کرن، ناھاتیە ھنارتن، ئەڤە ژی د دەمەکی دایە کو ھێزێن پێشمەرگەی ب ھەڤپشکی ل گەل سۆپایێ عیراقێ د ئوپەراسیۆنا ئازادکرنا مووسل دا پشکدارن.
شاخەوان عەبدوللا، ئەندامێ لژنا ناڤخوە ل جڤاتا نوونەرێن عیراقێ بۆ باسنیوز گۆت: “ئەم ژ نەھنارتنا پارێ پێشمەرگەی ژ لایێ حوکمەتا عیراقێ ڤە گەلەک دلگرانین، ل دووڤ رێککەفتنا ھەردو لایان، دڤیا ئەو پارە بۆ کوردستانێ ھتبا ھنارتن و ل سەر پێشمەرگەی ھاتبا بەلاڤکرن”.
وی پەرلەمانتارێ کورد دیار ژی کر، ئەو دێ پەیامەکێ ئاراستەی حەیدەر عەبادی، سەرۆک وەزیرێن عیراقێ کەن و دڤێت عەبادی دەملدەست وی پارەی فرێکەت، چونکو نوکە ھێزێن پێشمەرگەی پێدڤیا پێ ھەی و گۆت: “ھەکە بەغدا پێگریێ ب رێککەفتنێ نەکەت، دڤێت پێداچوون د رێککەفتنا ھەولێر و بەغدا دا بھێتە کرن”.
ئه‌ڤرۆ نيوز:
پەیڤدارێ وەزارەتا خواننا بلند و ڤەکۆلینێن زانستی یا حوکمەتا ھەرێما کوردستانێ دیار کر، ئەڤ سالە چو زانکۆیێن نوو ل ھەرێما کوردستانێ ناھێنە ڤەکرن و دبێژیت: ھێشتا یا رۆھن نینە دێ دەوام ل زانکۆیێن سلێمانیێ و ھەلەبجە ھێتەکرن یان نە و ئەڤێ پرسێ پەیوەندی ب ئیدارا زانکۆیانڤە یا ھەی.
عەباس ئەکرەم، پەیڤدارێ وەزارەتا خواندنا بلند و ڤەکۆلینێن زانستی بۆ رۆژناما ئەڤرۆ خویا کر، ئەڤ سالە بۆ سالا نوو یا خواندنێ 2016 – 2017 چو پشک و کۆلیژ ژ ئەگەرێ قەیرانا دارایی ناھێنەگرتن و دێ خواندن ل ھەموو زانکۆ و کۆلیژان یا بەردەوام بیت، بەروڤاژی ھەکە مەرجێن قانوونی و کارگێری ھەبن، زانکۆیێن ھەرێما کوردستانێ دشێن پشکێن نوو ڤەکەن و گۆت: “ھەر زانکۆ و کۆلیژەکا مەرجێن قانوونی ھەبن، دشێت پشکێن نوو ڤەکەت و وەزارەتژی دێ یا ھەڤکاربیت بۆ پێشڤەبرنا ئاستێ زانستی و خواندنێ ل ھەرێما کوردستانێ؛ نەخاسمە ھەکە پێشنیار و پشکێن نوو ھاتبنە ڤەکرن.
عەباس گۆتژی: “ھێشتا یا رۆھن نینە دێ دەوام ل زانکۆیێن پارێزگەھێن سلێمانیێ و ھەلەبجە ھێتەکرن یان نە، ژ بەر کو دەواما زانکۆیان پەیوەندی ب زانکۆیانڤە ھەیە و وەزارەت نەشێت بڕیارێ ل سەر بدەت دەوامێ دێ کەن یان ناکەن، ئەڤ سالە ل ھەرێما کوردستانێ چو زانکۆیێن نوو، یێن کەرتێ حوکمەتێ و کەرتێ تایبەت ناھێنە ڤەکرن، ھەر ئەو زانکۆ ماینە یێن ل سالێن بۆری ھەین و چو زانکۆیین دی زێدە نەبووینە”.
نيشاندان
