ئەڤرۆ نيوز:
وەزارەتا خاندنا بلند و ڤەکۆلینێن زانستی ل بەرە سیستەمێ وەرگرتنا قوتابیان ل زانکۆ و پەیمانگەھێن ھەرێمێ ب گوھۆڕیت.
د. یوسف گۆڕان دوھی ل گەل نوونەرا رێکخراوا ئایرێکس ل عیراقێ کۆمبوو و دیارکرن، کو گوھۆرین ب سەر سیستەمێ وەرگرتنا قوتابیان ل زانکۆ و پەیمانگەھان ھێتە کرن و ھەڤ شێوەیێ جیھانی ل دووڤ حەز و خواستا قوتابیان دێ ھێتە بجھئینان و رێکخراوا ئایرێکس دێ ھاریکاریا ھەرێمێ بۆ بجھئینانا ڤی سیستەمی کەت.
ئه‌ڤرۆ نيوز:
سه‌رۆك بارزانى پێشوازیا شانده‌كێ بلندێ ئێكه‌تیا ئوروپا ب سه‌رۆكایه‌تیا نیك وێستكوت رێڤه‌به‌رێ باكوورێ ئه‌فریقیا و رۆژهه‌لاتا ناڤه‌راست ل كومسیونا كاروبارێن ئێكه‌تیا ئوروپا كر و دیاركر بۆ چاره‌كرنا كێشان نابیت پێداگیریێ ل دووباره‌كرنا ئه‌زموونه‌كا شكه‌ستنخوارى بهێته كرن.
د دیداره‌كێ دا سه‌رۆكێ شاندى سلاڤێن خانم فێدریكا موگیرینى رێكخه‌را گشتى یا سیاسه‌تا ئێكه‌تیا ئوروپا ب سه‌رۆك بارزانى گه‌هاند و رژدى ل سه‌ر بایه‌خدان و پشته‌ڤانیكرنا ئێكه‌تیا ئوروپا بۆ هه‌رێما كوردستانێ كر ژ پێخه‌مه‌ت چاره‌كرنا كێشان و به‌ره‌ڤ پێشبرنا ئابوورى و سه‌قامگیریا سیاسى.
سه‌رۆ ك بارزانى به‌حسێ وان ته‌حه‌دیاتێن ئابوورى و ئه‌منى كر كو روو ب روو گه‌لێ كوردستانێ بووى و دیاركر سه‌ره‌راى ته‌حه‌دیاتان، به‌ره‌ڤانیێ ژ خوه و بهایێن بلند دكه‌ت.
بارزانى ب كورتى به‌حسێ مێژوویا گه‌لێ كوردستانێ ل گه‌ل ده‌وله‌تا عیراقێ كر و دیاركر كو بۆ چاره‌كرنا كێشان نابیت پێداگیریێ ل دووباره‌كرنا ئه‌زموونه‌كا شكه‌ستنخوارى بهێته كرن.
ئه‌ڤرۆ نيوز:
مه‌كته‌با سياسى يا پارتى ديموكراتى كوردستان ئه‌ڤرۆ هه‌لويستێ خوه ل دۆر رێككه‌فتنا گۆران و ئێكه‌تيێ راگه‌هاند و دياركريه كو د ڤێ رێككه‌فتنێ دا تشته‌ك هاتيه به‌رچاڤكرن كو بزاڤه‌ك يا هه‌ى بۆ به‌رفره‌هكرنا ناكوكيێن ناڤخويى و پارتى ژ بلى ئيرادا گه‌ل ، چ ئيراده‌كا دى قه‌بوول ناكه‌ت.
هه‌روه‌سا ئاماژه ب وێ يه‌كێ هاتيه دان كو ئێكه‌تییا نشتیمانى رێككه‌ڤتنا ستراتیژى ل پێش چاڤ وه‌رنه‌گرتییه‌و دوپاتكر؛ رێككه‌ڤتنا گۆڕان و ئێكه‌تیێ دێ مه‌به‌ره‌ڤ ره‌وشا نه‌خواستییا جاران ڤه‌گه‌ڕینیت.
هه‌ر د راگه‌هاندنا پارتى دا هاتییه؛ ب چو ره‌نگان رێكێ ناده‌ن بزاڤ بۆ تێكدانا ئارامییا ئیدارى و سیاسى بهێنه‌كرن و پارتى ب هه‌ستیارى ته‌ماشایى ره‌وشا نها یا هه‌رێمێ دكه‌ت و رژده ژىكو نابیت خوینا پێشمه‌رگه‌ى ب هه‌روه‌بچیت و دڤێت گه‌لێ كوردستانێ ب رێكا ریفراندۆمێ ئیراده‌یا خوه نیشا هه‌موو جیهانێ بده‌ت.
ئه‌ڤرۆ نيوز:
رێڤه‌به‌ريا به‌ره‌ڤانيا باژێرى راگه‌هاند كو دوهى ئێڤارى گه‌نجه‌ك ل نێزيك بێدارێ كه‌فته د ناڤا ئاڤێ دا و جانێ خوه ژ ده‌ست دا، ل باتيفا ژى شوفێره‌ك د ترۆمبێلێ دا ما ئاسێ.
رائيدێ مافپه‌روه‌ر بێوار عه‌بدولعه‌زيز، به‌رپرسێ راگه‌هاندنێ ل رێڤه‌به‌ريا به‌ره‌ڤانيا باژێرى ل دهۆكێ بۆ ئه‌ڤرۆ نيوز گۆت: “دوهى رۆژا سێشه‌مبى رێكه‌فتى 17ى گۆلانێ و ل ده‌مژمێر 5:00ى ئێڤارى گه‌نجه‌ك ل ناڤێ ئوزان حه‌جى حسێن د ژيێ 18 ساليێ دا ب مه‌ره‌ما ماسيگرتنێ دچيته سه‌ر ئاڤا گۆندێ خێله‌خى ل نێزيك بێدارێ و كه‌ڤيته د ناڤ ئاڤێ دا و نقۆم دبيت”.
به‌رپرسێ راگه‌هاندنێ ل رێڤه‌به‌ريا به‌ره‌ڤانيا باژێرى ل دهۆكێ زێده‌تر گۆت: “تيمێن نقۆمڤانێن به‌ره‌ڤانيا باژێرى ل زاخۆ به‌رده‌وام يێ ل لاشێ وى گه‌نجى دگه‌ريێن، به‌لێ ب مخابنى ڤه هه‌تا نوكه نه‌هاتيه ديتن”.
رائيدێ مافپه‌روه‌ر بێوار عه‌بدولعه‌زيز دا زانين ژى كو هه‌ر دوهى ئێڤارى و ل ده‌مژمێر 6:00 ئاگر به‌ربوو ترۆمبێله‌كا بارهه‌لگر و شوفێر د ناڤ ترۆمبێلێ دا مابوو ئاسێ، “به‌لێ خۆشبه‌ختانه تيمێن به‌ره‌ڤانيا باژێرى ل باتيفا شيان كۆنترۆلێ ل سه‌ر ره‌وشێ بكه‌ن و شوفێرى ب سلامه‌تى قورتال بكه‌ن”.
رێڤەبەرێ گشتی ل وەزارەتا دارایی یا حوکمەتا ھەرێما کوردستانێ راگەھاند، ھەر فەرمانبەرەکێ بەری نھا مۆلەتا بێ مۆچە یا سالەکێ یان پێنچ سالی وەرگرت بیت و پشتی ھینگی داخوازا ھەلوەشاندنا وێ مۆلەتێ بکەت، داخوازیا وی ناھێتە قەبوولکرن و مۆلەت ب چو رەنگان ناھێنە ھەلوەشاندن.
یاسین عەبدولواحد، رێڤەبەرێ گشتی ل وەزارەتا دارایی یا حوکمەتا ھەرێما کوردستانێ بۆ ئەڤرۆ راگەھاند، ل گۆرەی رێنمایێن نوو یێن وەزارەتا ھەر فەرمانبەرەکێ بەری نھا داخوازا مۆلەتا بێ مۆچە بۆ سالەکێ یان پێنچ سالان کربیت، دڤێت ماوێ مۆلەتا خۆ ب دووماھی بینیت و ژ نوو داخوازا دەستبکاربوونا دەواما خوە یا میری بکەت و گۆت: د ماوێ بۆری دا ھژمارەکا مەزن یا فەرمانبەرێن حوکمەتێ داخوازا مۆلەتا بێ مۆچە ژ حوکمەتێ کریە، گەلەک ژ وان ژی پشتی ھینگی داخوازا ھەلوەشاندنێ کریە، بەلێ داخوازیا وان ب چو رەنگان ناھێتە قەبوولکرن و ھەتا ئەو دەمێ مۆلەتێ ب دووماھی نەئینن، نەشێن جارەکا دی بڤەگەرنە سەر دەواما خوە یا میری.
ناڤبری ئاماژە دا وێ چەندێ، دەمێ فەرمانبەرەک مۆلەتا بێ مۆچە وەردگریت و د وی دەمی دا دچیت د خوونیت و باوەرنامەکێ وەردگریت، ئەو باوەرنامە ژ ئالیێ حوکمەتێ ڤە ناھێتە قەبوولکرن، خوە چو جۆرێ باوەرنامێ بیت و گۆت: چو وەزارەت و فەرمانگەە د پابەند نینن وێ باوەرنامێ قەبوول بکەن.
رێڤەبەرێ گشتی ل وەزارەتا دارایی ئاشکرا کر، دەمێ فەرمانبەرەک مۆلەتا بێ مۆچە وەدرگیت، چو مۆچە بۆ ناھێنە دان، بەلێ سالێن وی بۆ خزمەتکرنێ دھێنە ھژمارتن و ئەو ژی ب تنێ بۆ مەسەلا خانەنشینیێ نە و گۆت ژی: ئەو فەرمانبەرێن ژ نوو ھاتینە دامەزراندن سۆزنامە ئیمزاکرینە کو داخوازا چو مۆلەتا نەکەن ھەتا پێنچ سالان ژ دامەزراندنا خۆ ب دووماھی نەئینن. ل گۆرەی بریارا ھژمارە 38 ئەوا ل 5/4/2015 ژ ئالیێ ئەنجوومەنێ وەزیرێن ھەرێما کوردستانێ دەرچووی، دەستھەلات داینە وەزیر و سەرۆکێن دەستەیان کو مۆلەتا بێ مۆچە بدەنە فەرمانبەران، ب مەرجەکی ژ پێنچ سالان زێدەتر نەبیت.
ئه‌ڤرۆ نيوز:
رێڤەبەرێ رێکخستنا پلێتێن ئاھێن خوارنێ ل پارێزگەھا دھۆکێ بۆ رۆژناما ئەڤرۆ ئاشکرا کر کو ژبەر ئیمزا وەزیرێ بازرگانیا عیراقێ ھەموو گرێبەستێن گرێدایی وەزارەتا بارزگانی گیروبووینە و گۆت: “ھەتا نوکە پلێتێن نوو یێن ئاھێن خوارنێ نەھاتینە چاپکرن”.
حسێن سەبری، رێڤەبەرێ رێکخستنا پلێتێن ئاھێن خوارنێ ل پارێزگەھا دھۆکێ ئاشکرا کر کو برنج و شەکر د ئەڤ سالە دا ھەتا ھەیڤا شواتێ یێن ل پارێزگەھا دھۆکێ ھاتینە بەلاڤکرن، بەلێ چو کەرەستێن دی ژ بەر ئیمزا وەزیری نەھاتینە بەلاڤکرن و گۆت: “بەری دو رۆژان سەلمان جەمیل، پۆستێ وەزیرێ بازرگانیا عیراقێ ب وەکالەت وەرگرتیە و ل دەمەکێ نێزیک دێ دەست ب ئیمزاکرنا گرێبەستان کەت و ئاھێن خوارنێ یێن پارێزگەھێن دھۆک و بەسرا دێ وەکو ئێک ھێنە ھنارتن و چو جوداھی ناھێتەکرن”.
ناڤھاتی ئاماژە دا وێ چەندێ کو ئەڤ سالە ھیشتا پلێتێن نوو یێن ئاھێن خوارنێ نەھاتینە چاپکرن و ل سەر چو پارێزگەھێن عێراقێ و ھەرێما کوردستانێ نەھاتینە بەلاڤکرن، چونکی وەزیرێ بازرگانیا عیراقێ دەست ژ کار کێشابوو و چو گرێبەست ئیمزا نەکربوون و گۆت: “ژ بلی وەزیری چو کەسان دەستھەلات نینە ل وەزارەتا بازرگانیا عیراقێ گرێبەستان ئیمزا بکەت ژ بەر ڤێ چەندێ گرێبەست نەدھاتنە ئیمزاکرن و ئاھێن خوارنێ نەدھاتنە بەلاڤکرن و پلێتێن نوو یێن ئاھێن خوارنێ ژی نەدھاتنە چاپکرن”.
رێڤەبەرێ رێکخستنا پلێتێن ئاھێن خوارنێ ل پارێزگەھا دھۆکێ دیار کر کو وان چو ئاریشە ل گەل وان گەنجێن ژ نوو ژیانا ھەڤژینیێ پێک دئینن بۆ دەرخستنا پلیتا ئاھێن خوارنێ نینن و ھەر دەمێ قەستا رێڤەبەریا وان بکەن کاروبارێن وان بێ راواستان دھێنە ب رێڤەبرن و گۆت: “بەردەوام خێزان ژێک جودا دبن و پلێتێن نوو یێن ئاھێن خوارنێ ب وان دھێنەدان”.
د لایەکێ دی دا ناڤبری گۆت: “ئار بەردەوام دھێتە بەلاڤکرن و ھەتا نوکە چو ئاریشە پەیدانەبووینە بتنێ ھەموو ئاھێن خوارنێ ناگەھن و ئەڤ چەندە ژی نە ئاریشا دھۆکێ بتنێ یە بەلکو یا ھەموو پارێزگەھێن عیراقێ یە”.
ئەڤرۆ نیۆز، قائید میرۆ:
بڕیارە دەمەکێ نێزیک دەست ب کۆلانا گۆڕێن بکۆم یێن قەزا شنگال و دۆڕیانا حەردان بھێتەکرن و وەزارەتا شەھید و ئەنفالکریانژی تەکەزکر راھێنان ب تیما ھلدانا ئەڤان گۆڕێن بکۆم ھاتیەکرن.
فوئاد عوسمان، پەیڤدارێ وەزارەتا کاروبارێن شەھید و ئەنفالکریان ب ئەڤرۆ نیۆز راگەھاند” کو ژلایێ رێکخراوەکا بیانی چەندین خۆلێن راھێنانێ بۆ ئەڤان کارمەندان ڤەکریە یێن بڕیارە پشکداریێ د ھلدانا گۆڕێن بکۆم ل سنورێ شنگالێ بکەن.
فوئادی گۆتژی” بڕیارە داھاتیەکێ نێزیک دەست ب ھلدانا ئەڤان گۆڕێن بکۆم بشێوەیەکێ زانستی بھێتەکرن، تنێ ل دۆڕیانا حەردان دەھە گۆڕێن بکۆم ھەنە و رۆفاتێن دەیان وەلاتیێن سڤیل تێدایە، کو ژلایێ گروپا تیرۆرستیا داعش ھاتینە شەھیدکرن.
ئەڤرۆ نيوز:
قۆنسلێ ئیرانێ ل ھەرێما کوردستانێ رەت دکەت کو کۆمارا ئیسلامیا ئیرانێ بھایێ دانا ڤیزێ بۆ وەلاتیێن ھەرێما کوردستانێ گران کربیت و مەرجدارکربیت و دیار کر کو دانا ڤیزێ بۆ وەلاتیێن ھەرێما کوردستانێ ھەر وەکو بەرێ یە و بھایێ وێ گران نەبوویە و چ گوھۆرین ژی نەکەفتینێ.
ئاشکرا ژی کر، ھەتا نوکە چ نڤیسارەکا فەرمی نەگەھشتیە وان کو گوھۆرین کەفتبنە بھایێ دانا ڤیزێ بۆ وەلاتیێن ھەرێما کوردستانێ.
ل دووڤ پێزانینان، ل قۆنسلخانا کۆمارا ئیسلامیا ئیرانێ ل ھەولێرێ، نڤیسارەک دەربارەی دانا ڤیزێ بۆ وەلاتیێن ھەرێما کوردستانێ ھاتیە بەلاڤکرن و تێدا ئاماژە ب وێ چەندێ ھاتیە کرن، کو بھایێ دانا ڤیزا ب لەز کو د رۆژەکێ دا دھێتە وەرگرتن 63 دۆلارە، دیسا ئەو ڤیزا بۆ ئێڤاری دھێتە وەرگرتن42 دۆلارە و ڤیزا چەند جاریژی بھایێ وێ 135 دۆلارە، ئەڤە د دەمەکی دایە کو بەری نوکە وەلاتیێن ھەرێما کوردستانێ بۆ وەرگرتنا ڤیزا ئیرانی 25 بۆ 40 ھزار دینار د دانە قۆنسلخانا ئیرانێ ل ھەولێرێ.
ھەروەسا ل دووڤ پێزانینان، بڕیارا گرانکرنا بھایێ ڤیزا ئیرانێ ل 20 نسانا ئەڤ سالە کەفتیە د وارێ ب جھئینانێ دا.
ل دۆر ڤێ چەندێ قۆنسلێ ئیرانێ ل ھەرێما کوردستانێ ئاشکرا کر، ھەتا نوکە چ نڤیسارەکا فەرمی نەگەھشتیە وان کو گوھۆرین کەفتبنە بھایێ دانا ڤیزێ بۆ وەلاتیێن ھەرێما کوردستانێ و گۆت: “ئەڤ چەندە یا دروورە ژ راستیێ و دانا ڤیزێ بۆ وەلاتیێن ھەرێما کوردستانێ ھەر وەکو بەرێ یە و بھایێ وێ گران نەبوویە و چ گوھۆرین ژی نەکەفتینێ”.
د ڤی واری دا ژێدەرەکی ژێدەرەکی ژ قۆنسلخانا ئیرانێ ل باژێرێ سلێمانیێ بۆ SNN خویاکریە کو ھەتا نوکە چ نڤیسارەکا فەرمی دەربارەی گرانبوونا بھایێ ڤیزا ب لەز بۆ وەلاتیێن ھەرێما کوردستانێ نەگەھشتیە وان و گۆت: “د دەمێ وەرگرتنا ڤیزێ دا ب تنێ 42 دۆلار ژ وەلاتیان دھێنە وەرگرتن”.
گۆتژی: “ڤیزێ چەند جۆر ھەنە، ئەو جۆرێ ب تنێ بۆ جارەکا گەشتکرنێ دھێتە بکارئینان، بھایێ وێ 42 دۆلارن، چەند جۆرێن دیژی ھەنە ژ وان ڤیزا سێ ھەیڤی و شەش ھەیڤی کو بھایێ وان گرانترە و ل دووڤ داخوازا وەلاتی ب خوە و وەرگرتنا ڤیزێ بھایێ وێ دھێتە دیارکرن”.
ژێدەرەکی ژی ژ پەیوەندیێن ئیرانێ کو نەڤیا ناڤێ وی بھێتە ئاشکراکرن، ڕاگەھاند، چ گوھۆرین د دانا ڤیزێ بۆ وەلاتیێن ھەرێما کوردستانێ و بھایێ وێ نەھاتینەکرن و مەرجێن نوو ژی نەھاتینە دانان.
ئەڤرۆ نیوز:
بەرپرسێ ڕاگەھاندنا باژێرڤانیا قەزا ئاکرێ بۆ رۆژناما ئەڤرۆ ئاشکرا کر کو ل گەرەکا سوسنا ل قەزا ئاکرێ نێزیکی 400 پارچێن ئەردی ل سەر وەلاتیان ھاتنە بەلاڤکرن.
زێرەڤان تەمۆ، بەرپرسێ ڕاگەھاندنا باژێرڤانیا قەزا ئاکرێ دیار کر کو ئەو ئەردێ ل سەر وەلاتیان ھاتیە بەلاڤکرن، بەری نوکە گوند بوو، لێ پشتی بزاڤێن سەرۆکاتیا باژێرڤانیا قەزا ئاکرێ ل گەل لایەنێن بەرپرس و قایمقامیا قەزایێ و رێڤەبەریا چاندنێ ل ئاکرێ و نوونەرێ لقێ نەە یێ پارتی ئارێشا وی ئەردی ھاتە چارەکرن و کەفتە د ماستەر پلانا باژێرڤانیا ئاکرێ و ھاتە سەر باژێرڤانیا ئاکرێ ڤە.
زێرفان تمۆ ئاماژە ب وێ چەندێ ژی کر کو پشتی ئەو ئەردە کەفتیە د ماستەرپلانێ دا نێزیکی 400 پارچە ئەرد ل وێرێ ب رێیا پشککێشانێ ل سەر وەلاتیان ھاتنە بەلاڤکرن و وەلاتیان ژی خوەشحالیا خوە ب ڤێ پێنگاڤێ دەربری.
نيشاندان