ئه‌ڤرۆ نيوز:

حوکمەتا ھەرێما کوردستانێ ب ھەڤکاریا رێکخراوەکا بیانی دو ھزار دەلیڤێن کاری ئەشکراکرن و پارێزگارێ ھەولێرێ ژی دبێژیت: ھژمارەکا پڕۆژەیێن خزمەتگۆزارینە دێ ھێنە بجھئینان و وەلاتیێن ھەرێمێ دێ تێدا کارکەن و د ھەمبەر ژی دا دێ مووچەکێ ھەیڤانە بۆ ھێتە مەزاختن.
د کۆنگرەکێ رۆژنامەڤانیدا پارێزگارێ ھەولێرێ و سەرۆکێ رێکخراوا گیز یا ئەلمانی دوھی 25/9/2016 ھژمارەکا دەلیڤێن کاری ڕاگەھاندن، نەوزاد ھادی، پارێزگارێ ھەولێرێ د وی کۆنگرێ رۆژنامەڤانی دا گۆت: “ئەڤ پڕۆژە دێ ل دەستپێکا ھەیڤا بھێت کەڤیتە کاری و ھژمارەکا پڕۆژانە و دو ھزار کەس وەکی کرێکار و کارمەند دێ تێدا کارکەن، ھەر وەلاتیەکێ ژیێ 18 سالیێ تمامکربیت دشێت داخوازا کاری بکەت”.
پارێزگەری گۆتژی: “ئاوارە و خەلکێ ھەرێما کوردستانێ پێکڤە دێ ل وان پرۆژان ھێنە وەرگرتن بۆ کارکرنێ، ئەڤ پڕۆژێن دھێنە بجھئینان بۆ خزمەتا وەلاتیانە و ژ لایێ وەلاتێ ئەلمانیا دێ ھێنە پێشکێشکرن”.
ژ لایێ خوەڤە حەمزە حامد، پەیڤدارێ پارێزگەھا ھەولێرێ بۆ رۆژناما ئەڤرۆ گۆت: “ئەڤ پڕۆژە ب کوژمێ 700 ھزار دۆلارانە و ھەموو پڕۆژێن خزمەتگۆزاریێن رۆژانەنە، وەکی: ئاڤ و سولینان، ژینگە پارێزی و کەرتێن دی یێن گشتینە، ئەڤ دو ھزار وەلاتیێن دھێنە وەرگرتن بۆ دەمێ دو ھەیڤان دێ ل سەر کاری بەردەوام بن و کۆژمەکێ پارەی وەکی مووچە دێ بۆ ھێتە مەزاختن، لەوڕا ھەر کەسەکێ دخوازیت کاربکەت بلا داخوازا خوە پێشکەشی باژێڕڤانی و پارێزگەھا ھەولێرێ بکەت”.

ئەڤرۆ نیوز:
سەرۆکێ لژنا پیشەسازی ل جڤاتا پارێزگەھا دھۆکێ بۆ رۆژناما ئەڤرۆ ئاشکرا کر کو کارگێریا پارێزگەھا دھۆکێ ب ڕێیا پەیوەندیێن خوە ل گەل بەغدا ھندەک گازا سپی بۆ وەزرێ زڤستانێ بۆ وەلاتیان و ب تایبەت یێن دەڤەرێن چیایی دابینکریە و دبێژیت: ھندەک ژوێ بەھرێ ژ بەغدا گەھشتیە و ئەم چاڤەرێی یا دی دکەین ب گەھیت و دێ ل سەر وەلاتیان بھێتە بەلاڤەکرن.
عەبدوسەمەد تێلی، سەرۆکێ لژنا پیشەسازی ل جڤاتا پارێزگەھا دھۆکێ دیار کر کو پارێزگەھا دھۆکێ گازا سپی بۆ وەلاتیان ژ بەغدا کڕیە کو نێزیکی (15) ملیۆن لێترانە و گۆت: “ھەتا نوکە سێ ملیۆن لێتر ژ وێ گەھشتینە دھۆکێ، ھەکە ھەموو گەھشت دێ پرۆسا بەلاڤەکرنێ ل دەڤەرێن چیایی دەست پێ کەت”.
سەرۆکێ لژنا پیشەسازی ل جڤاتێ ئەو ژی گۆت: “پارێزگەھا ھەولێرێ ل دۆر گازا سپی چ پێنگاڤ نە ھاڤێتینە، لێ پارێزگەرێ سلێمانیێ بەری چەند ھەیڤان چووبوو بەغدا و پێشبینی دھێتەکرن ئەوی ھندەک گرێبەست ل سەر گازا سپی بۆ خوە ل گەل بەغدا کربن”.
ناڤھاتی ئاشکرا کر ژی کو وەزارەتا سامانێن سرۆشتی ل حوکمەتا ھەرێما کوردستانێ ل ڕێکەفتی 25/5/2016 ب نڤیسارەکا فەرمی کو بۆ ھەموو فەرمانگەھێن سەر ب وەزارەتێ ڤە ل پارێزگەھێن ھەرێما کوردستانێ ھاتبوو ھنارتن، تێدا دیار کر بوو ژ رۆژا دەرکەفتنا وێ نڤیسارێ و پێڤە ئەرکێ دابینکرن و بەلاڤکرنا گازا سپی دێ ب ستوویێ پارێزگەھان ڤە بیت و گۆت: “ئەز دبینم کو پارێزگەھان شیانێن دابینکرنا گازا سپی بۆ وەلاتیان نین و وەزارەتێ یێ گۆتیێ دابین بکەن، لێ نەگۆتیێ چاوا گازا سپی بۆ وەلاتیێن خوە دابین بکەن، چونکی ھەتا نوکە لێگەریان و دەرئینان و فرۆتنا پەترۆلێ د دەستھەلاتێن وەزارەتا سامانێن سروشتی دایە”. عەبدوسەمەد تێلی خویا ژی کر، ل دووڤ زانیاریان ئەو گازا ھاتیە دابینکرن ژ لایێ کارگێریا پارێزگەھێ ڤە بۆ وەلاتیێن دەڤەرێن چیای یە و بھایێ ھەر بەرمیلەکێ دێ 45 ھزار دینار بن و گۆت: “بزاڤ یێن دھێنە کرن بۆ دەڤەرێن دی ژی بھێتە دابینکرن”.
گۆتژی: “پارێزگەھا دھۆکێ بۆ بەلاڤەکرنا بەرمیلەکا گازێ ل سەر ھەموو وەلاتیان پێدڤی ب 60 ملیۆن لێترێن گازا سپی یە”.