ئه‌ڤرۆ نیوز:
به‌رپرسه‌كێ وه‌زاره‌تا شه‌هید و ئه‌نفالكریان یا حوكمه‌تا هه‌رێما كوردستانێ ئاشكرا كر كو پتریا زیندانیێن سیاسی دو مووچه‌ هه‌نه‌، چونكى فه‌رمانبه‌رن و مووچێ زیندانیێن سیاسی وه‌كو پاداشت ل دووڤ قانوونێ بۆ هاتیه‌ مه‌زاختن و گۆت: “ئه‌ڤ ساله‌ چو مووچه‌ بۆ زیندانیێن سیاسی نه‌هاتینه‌ مه‌زاختن ژبه‌ر ڤێ چه‌ندێ بڕیاره‌ ڤێ حه‌فتیێ سه‌رۆكاتیا جڤاتا وه‌زیران بڕیارێ ل سه‌ربده‌ت”.
ئه‌حمه‌د مام ره‌سول، رێڤه‌به‌رێ گشتى یێ زیندانیێن سیاسی بۆ رۆژناما ئه‌ڤرۆ دیار كر كو ژ ده‌ستپێكا سالا 2016ێ حوكمه‌تا هه‌رێمێ مووچێ زیندانیێن سیاسی راگرتیه‌ و بۆ ڤێ چه‌ندێ ژى وه‌زاره‌تا شه‌هید و ئه‌نفالكریان د گه‌ل لژنا بلندا به‌رهه‌نگاربوونا قه‌یرانان كۆمبوویه‌ و داخوازى یێن خوه‌ ئاراسته‌ی جڤاتا وه‌زیران كرینه‌ بۆ به‌لاڤكرنا مووچێ زیندانیێن سیاسی و گۆت: “هژمارا زیندانیێن سیاسی یێن مووچه‌ بۆ هاتیه‌ دیار كرن پێنج هزار و 160 كه‌سن و به‌هرا پتریا وان دو مووچه‌ هه‌نه‌، چونكى زۆربه‌یا زیندانیێن سیاسی فه‌رمانبه‌رن و ژبه‌ر هه‌بوونا دو مووچان حوكمه‌تێ موچێ وان راگرتیه‌”.
ناڤهاتى ئاماژه‌ دا وێ چه‌ندێ كو ئه‌ڤ مووچێ بۆ زیندانیێن سیاسی هاتیه‌ مه‌زاختن به‌رانبه‌ر زیندانیكرنا وانه‌ و ل دووڤ قانوونا هژماره‌ 11 بۆ ده‌مێ 10 سالان ڤی مووچه‌ی دێ وه‌رگرن و وان ئه‌ڤ چه‌نده‌ بۆ حوكمه‌تێ دیاركریه‌ كو هه‌شت سال بۆرین و بتنێ دو سال ماینه‌ و گۆت: “حوكمه‌تێ سۆزدایه‌ چاره‌یه‌ك بۆ مینحه‌ و مووچێ زیندانیێن سیاسی ببینن و بڕیاره‌ ڤێ حه‌فتى یێ به‌رسڤا وه‌زاره‌تا شه‌هید و ئه‌نفالكریان بهێته‌دان و چاره‌نڤیسێ مووچێ زیندانیێن سیاسی بهێته‌ دیاركرن”.

ئه‌ڤرۆ نیوز:
رێڤه‌به‌رێ گشتى یێ كۆچ و كۆچبه‌ران ل وه‌زاره‌تا ناڤخۆ یا حوكمه‌تا هه‌رێما كوردستانێ ئاشكرا كر كو د ئه‌ڤ ساله‌ دا زێده‌ترى دو هزار كۆچبه‌ران ڤه‌گه‌ڕیاینه‌ هه‌رێما كوردستانێ ژبه‌ر ڤێ چه‌ندێ وان پێشنیاره‌ك دایه‌ حوكمه‌تێ ئه‌و كه‌سێن فه‌رمانبه‌ر و ژ كارێ وان هاتینه‌ دوورخستن و ڤه‌گه‌ڕیاین كارئاسانى بۆ بهێته‌كرن كو جاره‌كادى ڤه‌گه‌ڕنه‌ سه‌ر كارێن خوه‌.
شاكر یاسین، رێڤه‌به‌رێ گشتى یێ كۆچ و كۆچبه‌ران ل وه‌زاره‌تا ناڤخۆ یا حوكمه‌تا هه‌رێما كوردستانێ دیار كر كو ل دووڤ وان دووڤچوونێن ژ لایێ وان ڤه‌ هاتینه‌كرن ژ ده‌ستپێكا سالا 2016 و هه‌تا نوكه‌ زێده‌ترى دو هزار كۆچبه‌ران ڤه‌گه‌ڕیاینه‌ هه‌رێما كوردستانێ و سه‌ره‌رایى ڤێ چه‌ندێ وان به‌رنامه‌ك ل گه‌ل رێكخراوا كۆچا جیهانى دانابوو بۆ پێشۆازیكرنا وان كۆچبه‌رێن هاتینه‌ سنوورداشكرن بۆ هه‌رێما كوردستانێ و بۆ رووداو گۆت: “د هه‌مان ده‌م دا مه‌ نڤیساره‌ك بۆ حوكمه‌تا هه‌رێما كوردستانێ هنارتبوو كو ئه‌و فه‌رمانبه‌رێن قه‌ستا ده‌رڤه‌ى وه‌لاتى كرین و ژ كارێ وان هاتینه‌ دوورخستن و جاره‌كا دى ڤه‌گه‌ڕیایین كارئاسانى بۆ بهێنه‌كرن كو جاره‌كا دى ڤه‌گه‌ڕنه‌ سه‌ر كارێن خوه‌، به‌لێ هه‌تا نوكه‌ به‌رسڤا مه‌ نه‌هاتیه‌دان”.
ناڤهاتى ئاماژه‌ دا وێ چه‌ندێ كو ل 17ى هه‌یڤا بۆرى ل برۆكسل وان پشكدارى د كۆمبوونه‌كا جیهانى دا ل دۆر چه‌وانیا هاریكاریا په‌نابه‌ران و ڤه‌گه‌ڕاندنا وان كربوو و گه‌له‌ك سۆز ب وان هاتبوونه‌دان كو هاریكاریا په‌نابه‌ران بكه‌ن ڤه‌گه‌ڕنه‌ وه‌لاتێ خوه‌ و گۆت: “نوكه‌ ئه‌م چاڤه‌رێ ب جه ئینانا وان سۆزاینه‌”.
نه‌زهه‌ت حسێن، رێڤه‌به‌رێ پشكا په‌نابه‌ر و ره‌ڤه‌ندا كورد ل رێڤه‌به‌ریا كۆچ و كۆچبه‌ران ئاشكرا كر كو نوكه‌ كۆچكرنا وه‌لاتیان بۆ ده‌رڤه‌ى وه‌لاتى ب رێژا 90% كێم بوویه‌ و بۆ مالپه‌رێ فه‌رمى یێ پارتى دیمۆكراتى كوردستان گۆت: “ل وه‌لاتێ ئه‌لمانیا بتنێ نێزیكى شه‌ش هزار كه‌سان ناڤێن خوه‌ نڤێسینه‌ كو ڤه‌گه‌رنه‌ عیراق و هه‌رێما كوردستانێ”.

ئه‌ڤرۆ نیوز:
سه‌رۆك بارزانى ل سه‌لاحه‌دین پێشوازیا برێت مه‌كگورك نوونه‌رێ تایبه‌تێ سه‌رۆك ئوباما بۆ هه‌ڤپه‌یمانیا نێڤده‌وله‌تى یا دژى شه‌رێ داعش كر.
د هه‌ڤدیتنه‌كێ دا كو ستیوارت جونز بالیوزێ ئه‌مریكا ل عیراقێ به‌رهه‌ڤ بوو، هزر و بیر سه‌باره‌ت ره‌وشا سیاسى یا عیراقێ و ئه‌گه‌رێن قه‌یرانێن سیاسیێن به‌غدا لێكگوهارتن و بریار هاته‌ دان هه‌ردو ئالى به‌رده‌وام بن ل سه‌ر ئه‌نجامدانا راوێژان بۆ دیتنا رێیێن ده‌ربازبوونێ ژ قه‌یرانا سیاسى .
د پشكه‌كا د یا كومبوونێ دا ئاماژه‌ ب په‌یوه‌ندیێن هه‌ردو ئالیان و هه‌روه‌سا به‌رهه‌ڤیێن ئوپه‌راسیونا ئازادكرنا مووسل و قوناغا پشتى ئازادكرنا مووسل كرن.

ئه‌ڤرۆ نیوز:

رائیدێ مافپه‌روه‌ر، بێوار عه‌بدولعه‌زیز، به‌رپرسێ په‌یوه‌ندى و راگه‌هاندنا به‌ره‌ڤانیا باژێرى ل دهۆكێ دیاركر ئەڤرو سپێدێ رێکەفتی 2016/4/3 لدەمژمێر 9:23 تیمێن بەرەڤانیا باژێرێ زاخو هاتنە ئاگەهدارکرن کو ئاگر بەربیە خێمێن پەنابەران ل کەمپا بێرسڤێ پشتی گهەشتنا تیمێن وان، ئه‌و شیان کونترولێ لسەر رویدانێ بکەن کو ئاگر بشێوەکێ بلەز ڤێرا دچو ، لىێ رێک ل ئاگرى هاتە گرتن و روێدان هاتە کونترول کرن .
رائیدێ مافپه‌روه‌ر، بێوار عه‌بدولعه‌زیز دیاركر ژى كو چ زیانێن گیانی نەبون لێ بمخابنیڤە حەفت چادرێن ئاوارەیان ئاگر بەربویێ و زیانێن ماددی ب کالوپەلێن ڤان هاولاتێن ئاوارە کەفتن.
رائیدێ مافپه‌روه‌ر، دیاركر ژى تیمێن بەرەڤانیا باژێرێ زاخو ڤەکولین دەسپێ کریە بو دیار کرنا ئەگەرێ رویدانێ.

هه‌ولێر، قائید میرۆ
پیشه‌نگه‌هه‌كا پرتووكێن ئاینی دێ هێته‌ ڤه‌كرن و وه‌زاره‌تا ئه‌وقاف و كاروبارێن ئاینی ژی گه‌فان ل به‌لاڤكرنا پرتووكێن توندو تیژیێ دكه‌ت.
مه‌ریوان نه‌قشبه‌ندی، رێڤه‌به‌رێ په‌یوه‌ندیێن وه‌زاره‌تا ئه‌وقاف و كاروبارێن ئاین ب ئه‌ڤرۆ نیۆز راگه‌هاند، بڕیاره‌ ل ڕۆژێن داهاتی پیشه‌نگه‌هه‌ك بۆ پرتووكێن ئاینی ل هه‌ولێرا پایته‌خت بهێته‌ ڤه‌كرن و تێدا بهزاران پرتووكێن ئاینی بهێنه‌ نیشاندان، له‌وڕا داخوازێ ژ كۆمپانیا و جهێن پشكدار بكه‌ن ئه‌ڤان پرتووكێن ژێده‌رێن توندوتیژیێ نه‌ بكار نه‌ئینن بۆ پیشه‌نگه‌هێ به‌رۆڤاژی دێ ده‌ست بسه‌ردا هێـته‌گرتن ژلایێ وه‌زاره‌تا ئه‌وقاف و كاروبارێن ئاینی.
نه‌قشبه‌ندی گۆتژی” ل سالا بۆری ژی دده‌مێ ڤه‌كرنا پیشه‌نگه‌ها پرتووكێن ئاینی، مه‌ ده‌ست بسه‌ر چه‌ندین پرتووكانداگرتیه‌، كو ژلایێ ژێده‌ره‌ك بووینه‌ ژبۆی به‌لافكرنا فكرا توندو تیژیێ و پێڕابوون هه‌مبه‌ر هاتینه‌ وه‌رگرتن.

ئه‌ڤرۆ نیوز:
ئه‌ندامه‌كێ كورد ل جڤاتا نوونه‌رێن عیراقێ ئاشكرا كر كو هه‌تا نوكه‌ زێده‌ترى 50 ئیمزایان كۆمكرینه‌، دا كو شنگال وه‌كو باژێره‌كێ وێرانكرى بهێته‌ ناساندن.
سه‌رحان سلێڤانه‌یى، ئه‌ندامێ جڤاتا نوونه‌رێن عیراقێ دیار كر كو خه‌لكێ فه‌للوجه‌ ئیمزا كۆمكربوون، دا كو باژێرێ وان وه‌كو باژێره‌كێ وێرانكرى بهێته‌ ناساندن و د كۆمبوونا دوهى 2/4/2016 یا جڤاتا نوونه‌رێن عیراقێ ده‌نگ ل سه‌ر هاته‌دان و وه‌كو باژێره‌كێ وێرانكرى هاته‌ ناساندن و بۆ مالپه‌رێ فه‌رمى یێ پارتى دیمۆكراتى كوردستان گۆت: “مه‌ وه‌كو كوردان ژى داخواز كر شنگال ژى ب هه‌مان شێوه‌ وه‌كو باژێره‌كێ وێرانكرى بهێته‌ ناساندن و بۆ ڤێ مه‌ره‌مێ په‌رله‌مانى داخواز ژ مه‌ كر كو ئیمزایان كۆم بكه‌ین و پێشكێشى سه‌رۆكاتیا په‌رله‌مانى بكه‌ین داكو په‌رله‌مان ده‌نگى ل سه‌ر بده‌ت”.
ناڤهاتى گۆت: “چو لایه‌نان ئه‌ڤ داخوازیا كوردان ره‌دنه‌كریه‌ و بۆ ڤێ مه‌ره‌مێ په‌رله‌مانتارا پارتى (نه‌جیبا نه‌جیب) زێده‌ترى 50 ئیمزایان كۆمكرینه‌ بڕیاره‌ زێده‌تر كۆم بكه‌ت و پاش پێشكێشى سه‌رۆكاتیا په‌رله‌مانى بكه‌ت، دا كو ده‌نگ ل سه‌ر بهێته‌دان و شنگال ژى وه‌كو باژێره‌كێ وێرانكرى بهێته‌ ناساندن”.