ئه‌ڤرۆ نیوز ، نه‌وزاد زاده‌ هلۆرى:
سه‌روك ئوباما بو گوتارا  سالانه‌ ب كه‌ساتیا خوه‌ په‌نابه‌ره‌كێ كورد گازيكربوو  ئه‌و ژى پشتى ماندوبونه‌كا مه‌زن گه‌هشتیه‌ ویلایه‌تێن نه‌ته‌وه‌یێن ئێكگرتیێن ئه‌مریكا.
دكتور رفاعى حه‌موو كورده‌كێ باژێرێ عه‌فرینێ یه‌ و ل بنه‌ماله‌كا هه‌ژارا وى باژێرى مه‌زن بوویه‌ و شیایه‌ ب هه‌ول و بزاڤێن خوه‌ بگه‌هیشته‌ ئاسته‌كێ بلندێ خواندنێ و ببیته‌ كه‌سه‌كێ زانا دوارێ كاره‌بایى دا و چه‌ندین داهێنان كرینه‌.
رفاعى كو ژ باژێرێ حه‌له‌بێ دگه‌ل خێزانا خوه‌ و هژماره‌كا كه‌س و كارێن خوه‌ دژیا به‌لێ ژبه‌ر شه‌رێ نافخویێ سوریا موشه‌كه‌ك ب مالا وى دكه‌ڤیت و د ئه‌نجام دا هه‌ڤژین و كچه‌ك و پێنج ئه‌ندامێن دن یێن بنه‌مالا وان گیانى َخوه‌ ژ ده‌ست دده‌ن و مالا وى ژى وێران دبیت.
پاشان به‌ر ب توركیا دچیت ، و دگه‌ل كچ و كوره‌كێن خوه‌ ل وێرێ ژیانه‌كا ته‌ژى نه‌خوشى دبه‌نه‌ سه‌رى ، و ئه‌و بخوه‌ ژى توشى نه‌خوشیا شێرپه‌نجه‌یا گه‌ده‌یێ دبیت ، و كچا وى ژى هێشتا پارچه‌كا ساجما موشه‌كێ ل جهه‌كێ هه‌ستیارێ ملێ وێ دا دمینیت و نوژداران نه‌كاریه‌ بینن ده‌رێ.
دكتور رفاعى دژیێ 55 سالیێ دا به‌حسا ئه‌ڤێ ژیانا نه‌خوشا خوه‌ د فه‌یس بووكه‌كا بناڤ و ده‌نگ Humans of New York یا ئه‌مریكى به‌حس دكه‌ت و ل وێرێ گه‌له‌ك كه‌سان هه‌ڤخه‌مى و هه‌ڤسوزیا خوه‌ بو دیاردكه‌ن.
سه‌رهاتیا ژیانا رفاعى دگه‌هیته‌ سه‌روك ئوبامایى و د ئه‌نجام دا ئه‌و مافێ په‌نابه‌ریێ ب وى و هه‌ردوو زاروكێن وى ل ئه‌مریكا دده‌تن و ل باژێره‌كێ ویلایه‌تا میشینگن ئاكنجی دبیت.
سه‌روك ئوباما دگه‌ل وێ یه‌كێ ئه‌و بو وتارا خوه‌ گازى دكه‌ت و دگه‌ل وى ژى كومبویه‌.
دكتور رفاعى دچارچوڤێ ڤه‌كولینه‌كا تایبه‌ت دا دگه‌ل به‌شى َكوردى یێ ده‌نگێ ئه‌مریكا گۆت : ( سه‌روك ئوباما كه‌سه‌كێ زور دلسووز و تێگه‌هشتى یه‌ )
گوت ژى : ( بو من به‌حسێ نه‌خوشیێن خه‌لكێ سوریا ب تایبه‌تى نه‌خوشیێن گه‌لێ كورد كرن ، به‌لێ به‌حسى َهوركاریێن هه‌ڤدیتنا خوه‌ نه‌كرن )
پێشتر كه‌نالێ ئه‌لحوره‌ هه‌ڤدیتنه‌ك گه‌ل ئه‌نجام دایه‌ و ل ده‌ستپێكا چاڤپێكه‌فتنێ دا داخوازكر كو بزاڤ بهێنه‌كرن بو راكرنا گه‌مارویان لسه‌ر ده‌ڤه‌رێن كوردى ل سوریا و گۆت كورد ل سوریا ل بن سێ گه‌مارویان دان كو ئه‌و ژى رژێما ئه‌سه‌د و داعش و ده‌وله‌تا توركیانه‌.

ئه‌ڤرۆنیۆز، سالار دۆسكى:
دچاردچووڤێ رونشتنه‌كا ڤه‌كرى دا كو هاتبوو به‌رهه‌فكرن ژلایێ ناڤه‌ندا په‌یامنێرێن میدیایى ڤه‌ ل دهۆكێ، ئه‌ڤرۆ 16/1/2016 دكونگره‌كێ رۆژنامه‌ڤانى دا، د.فارس بریفكانى سه‌رۆكێ لژنا ساخله‌میێ ل په‌رله‌مانێ عیراقێ به‌حسێ ره‌وشا ساخله‌میێ بگشتى ل عیراقێ و پارێزگه‌ها نه‌ینه‌وا ب تایبه‌تى كر.
د.فارس بریفكانى ئاشكراكر كو نوكه‌ خه‌لكێ مووسل د قه‌یرانێن مه‌زن دایه‌ و نان و ئاڤ بوویه‌ هزره‌ت و نه‌خوه‌شیى به‌ر به‌لاڤ بووینه‌ و گۆت: پێدڤى یه‌ هه‌ر ده‌ڤه‌ره‌كا بهێته‌ ئازادكرن كارمه‌ندێن ساخله‌میێ قه‌ستا ده‌ڤه‌را خوه‌ بكه‌ن . هێشتا گۆت: ل گه‌ل وه‌زاره‌تا ساخله‌میا عیراقێ رێكه‌فتى نه‌ كو 80% ژ ده‌رمانێن پارێزگه‌ها نه‌ینه‌وا بهێنه‌ پارێزگه‌ها دهۆكێ و ل سه‌ر ئاواران بهێنه‌ به‌لاڤكر.
هه‌مبه‌ر هنارتنا نه‌خوه‌شان بۆ ده‌رڤه‌ى وه‌لاتى، ناڤبرى گۆت: بریار ده‌ركه‌فتی یه‌ نه‌خوه‌شێن ژ ده‌ستێن داعش رزگاربووین، بۆ ده‌رڤه‌ى وه‌لاتى بهێنه‌ هنارتن.