ئه‌ڤرۆ نيوز:
حكومه‌تا هه‌رێما كوردستانێ به‌رسڤا داخويانيێن ئه‌ميندارێ ئه‌نجوومه‌نێ ده‌ستنيشانكرنا به‌رژه‌وه‌نديێن كومارا ئيسلاميا ئيرانێ دده‌ت و راگه‌هاند: هه‌موو ئه‌و پێزانين د راست نينن و لێكدانه‌ڤه‌يێن به‌رێز موحسنى ره‌زايى د شاشن و چ بنه‌مايه‌ك بۆ نينه.
موحسن ره‌زايى ئه‌ميندارێ ئه‌نجوومه‌نێ ده‌ستنيشانكرنا به‌رژه‌وه‌نديێن كومارا ئيسلاميا ئيرانێ دياركربوو حزبێن كومه‌له و ديموكرات تومه‌تبار كربوو كو ب پارێ سعودێ چالاكيان دژى ئيرانێ ساز دكه‌ن و هوشداريا دابوو به‌رپرسێن هه‌رێما كوردستانێ.
%3
ئەڤرۆ نيوز:
کەسەکێ نێزیکی ھونەرمەندا ناڤدارا لوبنانی نانسی عەجرەم بۆ کەنالەکێ تەلەفزیۆنی ئاشکەراکر، ل حەفتیا بھێت نانسی دێ دو ملیۆن دۆلاران وەرگریت، بەرامبەر دانانا وێنەکێ وێ بێی وەرگرتنا رازیبوونا وێ ل سەر جۆرەکێ مکیاجێ ئافرەتان.
وی کەسی گۆت: ل سالا 2014 کۆمپانیەکا چێکرنا مکیاجی بێی کو روخسەتێ ژ نانسیێ بخوازیت، وەکو ریکلام بۆ بەرھەمێ خوە وێنەکێ وێ ھونەرمەندێ دا نابوو سەر قالکا وی مکیاجی، و پشتی نانسی ب وێ چەندێ ئاگەھداربووی و چەند دانەکێن وی جۆرێ مکیاجی ب دەست خوە ڤە ئیناین، ب رێیا پارێزەرێ خوە سکالایەک ل سەر وێ کۆمپانیێ تۆمارکر و دەملدەست ئەو کۆمپانی نەچار بوو وی جۆرێ مکیاجی ژ بازاری ڤەکێشیت، ھەروەسا وەکو قەربوو داخوازا دو ملیۆن دۆلاران کر، و ل رۆژێن بۆری دادگەە ل سەر داخوازا وێ رازی بوو، و ئەو کۆمپانی نەچارکر وی گۆژمی بدەتە ناننسیێ، و ل چەند رۆژێن بھێن دێ وی پارەی بۆ ڤەگوھێزنە سەر حسابا وێ یا بەنکی.
ئه‌ڤرۆ نيوز:
رێڤه‌به‌ريا پۆليسێن پارێزگه‌ها دهۆكێ راگه‌هاند كو زيندانيه‌كێ 35 سالى ل چاكسازيا زركا خوه خه‌ندقاند و دووماهى ب ژيانا خوه ئينا.
رائيدێ مافپه‌روه‌ر، هێمن سلێمان، به‌رپرسێ راگه‌هاندنێ ل رێڤه‌به‌ريا پۆليسێن پارێزگه‌ها دهۆكێ بۆ ئه‌ڤرۆ نيوز گۆت: “ئه‌ڤرۆ سپێدێ ل ده‌مژمێر 7:00 پاسه‌وانێن چاكسازيا زركا هاتنه ئاگه‌هداكرن ب هه‌بوونا روودانه‌كا خوه‌كوشتنێ”.
زێده‌تر گۆت: “پشتى ئاماده‌بوونا ئه‌فسه‌ر و دادوه‌رێن ڤه‌كولينێ دياربوو كو زيندانيه‌كێ 35 سالى ب ناڤێ سيابه‌ند ل ژوورا خوه ب لێڤا به‌ته‌نيێ خوه خه‌ندقانديه و دووماهى ب ژيانا خوه ئينايه”.
رائيدێ مافپه‌روه‌ر دا زانين ژى كو ئه‌ڤ زيندانيه ل سه‌ر مادێ 405 يێ كوشتنێ هاتبوو زيندانكرن كو كه‌سه‌ك كوشتيه و ئه‌ڤه سێ هه‌يڤه ژ چاكسازيا مه‌زنان ل هه‌ولێر بۆ دهۆكێ هاتيه ڤه‌گۆهاستن و په‌رێن ڤه‌كولينێ بۆ ڤێ روودانێ هاتينه ڤه‌كرن.
ئه‌ڤرۆ نيوز:
عه‌لى ئه‌كبه‌ر ويلايه‌تى، شيره‌تكارێ عه‌لى خامه‌نه‌يى رابه‌رێ شوره‌شا ئيسلامى يا ئيرانى راگه‌هاند كو ئه‌مريكا پلان يا هه‌ى بۆ ئێكگرتنا كوردێن سوريا و عيراقێ و دروستكرنا ده‌وله‌تا كوردستانێ و ئه‌ڤه ژى مه‌ترسيه‌كا مه‌زنه بۆ ده‌ڤه‌رێ و ب “ئسرائيلا دويێ” وه‌سفكر.
د چارچۆڤێ كۆنگرێ نڤيسه‌رێن سه‌رانسه‌رى وه‌لاتێ ئيرانێ، ويلايه‌تى، دا زانين كو بزاڤێن پالدانا كوردان بۆ سه‌ربه‌خۆبوونێ و جودابوونێ د مه‌ترسيدارن و دێ كارتێكرنێ ل سه‌ر ده‌ڤه‌رێ هه‌موويێ كه‌ن و گه‌فن بۆ ئاسايشا نشتيمانى.
داخۆيانيێن عه‌لى ئه‌كبه‌ر ويلايه‌تى پشتى دو حه‌فتيان ژ داخۆيانيا حسێن سه‌لامى جێگرێ فه‌رماندێ سۆپايێ پاسدارێن ئيرانێ دهێت پشتى ژ ئه‌گه‌رێ هێرشێن ڤێ دووماهيێ يێن حزبا ديموكراتا ئيرانێ كرينه سه‌ر هه‌رێما كوردستانێ.
ئه‌ڤرۆ نيوز:
لژنا روو ب رووبوونا قه‌يرانێن داراى ل هه‌رێما كوردستانێ ب سه‌رۆكاتيا نێچيرڤان بارزانى سه‌رۆكێ حوكمه‌تا هه‌رێما كوردستانێ و سه‌رۆكێ لژنێ يێ د كۆمبوونێ دا دا كو دانوستاندنێ ل سه‌ر به‌لاڤكرنا مووچێ وه‌زاره‌تا پێشمه‌رگه‌ى و وى كۆژمێ پاره‌ى بكه‌ن ئه‌وێ ژ لايێ ئه‌مريكا ڤه بۆ هێزێن پێشمه‌رگه‌ى هاتيه دابينكرن.
ب گۆره‌ى پێزانينان سه‌ره‌راى دابينكرنا مووچێ پێشمه‌رگه‌ى دێ 36 مليار دينار ژ خزينا حوكمه‌تێ زێده كه‌ن و ئه‌ڤرۆ دێ بڕيار ل سه‌ر هێته دان كا ئه‌و پاره بۆ وه‌زاره‌تێن دى بهێته به‌لاڤكرن يان ژى بۆ خزينا حوكمه‌تێ بهێته ڤه‌گه‌راندن.
ئه‌ڤه د ده‌مه‌كى دايه كو ل 12ى ڤێ هه‌يڤێ ب ئاماده‌بوونا مه‌سعود بارزانى سه‌رۆكێ هه‌رێما كوردستانێ پرۆتۆكولا له‌شكرى د ناڤبه‌را هه‌ولێر و واشنتۆن دا هاته ئيمزاكرن و د وێ پرۆتۆكۆلێ دا ئه‌مريكا دێ يا به‌رده‌وام بيت ل سه‌ر هاريكاريكرنا هێزێن پێشمه‌رگه‌ى و مووچێ پتريا هێزێن پێشمه‌رگه‌ى دابين كه‌ت.
ئەڤرۆ نيوز:
پەرلەمانتارەکا پارتی دیموکراتی کوردستان ئاشکەرا کر کو د کۆمبوونا داھاتی یا جڤاتا وەزیران دا بڕیار ل سەر گوھۆڕینان دا پاشکەفتکرنا مووچێ فەرمانبەران دا ھاتیە دان و دبێژیت: “ڤێ حەفتیێ بەلاڤکرنا مووچەی دێ دەسپێکەت”.
ھێڤا حاجی میرخان، ئەنداما پەرلەمانێ کوردستانێ ژ فراکسیۆنا پارتی دیموکراتی کوردستان و ئەنداما لژنا دارای و ئابووری راگەھاند: ب گۆرەی دووڤچوونێن مە ڤێ حەفتیێ دێ مووچێ ھەیڤا خزیرانێ یێ فەرمانبەران ھێتە بەلاڤکرن و ھەکە ھنارتنا پەترۆلێ رانەوەستیێت، دێ مووچێ ھەموو ھەیڤان ھێتە بەلاڤکرن.
دا زانین ژی کو ب گۆرەی دووڤچوون و دانوستاندنان ل گەل وەزارەتا دارایی و ئابووری یا ھەرێمێ دھێتە پێشبینیکرن ڤێ حەفتیێ دەست ب بەلاڤکرنا مووچێ ھەیڤا خزیرانێ یێ فەرمانبەران بھێتە کرن، بەلێ رۆژ نەھاتیە دیارکرن.
دەربارەی گوھۆڕینێن د سیستەمێ پاشکەفتکرنا مووچەی ژی دا گۆت: “ب گۆرەی دووڤچوونێن مە د کۆمبوونا داھاتی یا جڤاتا وەزیران دا، دێ بڕیار ل سەر گوھۆڕینا سیستەمێ پاشکەفتکرنا مووچەی دا ھێتە دان و ھندی بھایێ پەترۆلێ زێدەتر لێ دھێت، دێ پتر پێداچوون د سیستەمێ پاشکەفتکرنا مووچەی دا ھێتە کرن”.
ئەڤرۆ نيوز:
سەرۆکێ زانکۆیا دھۆکێ راگەھاند کو ب ھەڤکاری ل گەل وەزارەتا زانست و ڤەکولینێن زانستی یا ئەلمانی دێ پەیمانگەھەکا تایبەت بۆ چارەکرنا نەخۆشیێن دەروونی بۆ وان کەسێن تووشی روودانێن دەروونی دبن ھێتە ڤەکرن.
پرۆفیسۆر د. مسلح دھۆکی، سەرۆکێ زانکۆیا دھۆک بۆ ئەڤرۆ گۆت: “د سەرەدانا خوە دا بۆ وەلاتێ ئەلمانیا مە سەرەدانا چەندین زانکۆیێن ئەلمانی کر و ل گەل د. تێرێزا باوەر وەزیرا زانست و ڤەکولینێن زانستی ل وەلاتێ ئەلمانیا کۆم بووین”.
زێدەتر گۆت: “د وێ ھەڤدیتنێ دا، گەنگەشە ل سەر دامەزراندنا پەیمانگەھەکا تایبەت بۆ چارەکرنا نەخۆشیێن دەروونی بۆ وان کەسێن تووشی روودانێن دەروونی دبن ھاتە کرن”.
سەرۆکێ زانکۆیا دھۆکێ دا زانین ژی کو ئەڤ پەیمانگەھە دێ ل زانکۆیا دھۆک و ب پشتەڤانیا وەزارەتا زانست و ڤەکولینێن زانستی یا ئەلمانی ھێتە ڤەکرن و گۆت: “مەرەم ژ ڤێ پەیمانگەھێ بەرھەڤکرنا کەسانێن بسپۆرە د وارێ چارەسەرکرنا نەخۆشیێن دەروونی دا،Psycho therapy کو دێ یا تایبەت بیت ب قوتابیێن خواندنا بلند ڤە”.
د. موسلح دھۆکی نەڤەشارت ژی کو وەزیرا زانست و ڤەکۆلینێن زانستی یا ئەلمانی پشتەڤانیەکا زۆر بۆ ڤی پرۆژەی دەربڕە و بۆ ڤێ مەرەمێ دێ سەرەدانا ھەرێما کوردستانێ کەت و پشتەڤانیا دارای ژی بۆ ڤی پرۆژەی دابین کەت.
ئه‌ڤرۆ نيوز:
وه‌زاره‌تا خواندنا بلند و ڤه‌كولينێن زانستى ل هه‌رێما كوردستانێ دياركر زانكۆيا يورك ل هه‌ولێر يا باوه‌رپێكرى نينه، داخوازێ ژ قوتابيان دكه‌ت كو پارێ خوه ل وێ زانكۆيێ ب هه‌روه نه‌به‌ن.
د راگه‌هاندنه‌كێ دا كو دانه‌ك بۆ ئه‌ڤرۆ نيوز ره‌وانه‌كريه، وه‌زاره‌تا خواندنا بلند و ڤه‌كولينێن زانستى راگه‌هاند: زانكۆيا يورك ل باژێرێ هه‌ولێر شێوازێ خواندنا ئونلاين په‌يره‌و دكه‌ت، به‌لێ خواندن ل وێ زانكۆيێ يا باوه‌رپێكرى نينه و چو په‌يوه‌ندى ب وه‌زاره‌تا خواندنا بلند و ڤه‌كولينێن زانستى ڤه نينه.
هه‌ر د وێ راگه‌هاندنێ دا هاتيه: ماوه‌كه ل باژێرێ هه‌ولێرێ زانكۆيه‌ك ب ناڤێ يورك باره‌گايێ خوه ڤه‌كريه، ژ به‌ر هندێ ئاگه‌هداريا خه‌لكێ كوردستانێ و قوتابيان دكه‌ن كو ئه‌وێ زانكۆيێ چو په‌يوه‌ندى ب وه‌زاره‌تا خواندنا بلند و ڤه‌كولينێن زانستى ڤه نينه و يا بێ مۆله‌ت و يا باوه‌رپێكرى نينه.
خواندنا بلند دبێژيت: “شێوازێ خواندنا ئۆنلاين ل هه‌رێما كوردستانێ و عيراقێ يێ باوه‌رپێكرى نينه، ژ به‌ر هندێ ئه‌ڤێ زانكۆيێ ژى بۆ خواندنێ پشت ب سيسته‌مێ ئۆنلاين به‌ستيه، د هه‌مان ده‌م دا دوور ژ رێنما و رێكارێن قانوونى يێن ڤه‌كرنا زانكۆيانه ل هه‌رێما كوردستانێ كو ب قانوون ل په‌رله‌مانێ كوردستانێ هاتيه رێكخستن و ژ لايێ وه‌زاره‌تێ ڤه سه‌رپه‌رشتى هاتيه كرن، ژ به‌ر هندێ هه‌ڤدژى قانوون و رێنمايانه.
داخواز ژ قوتابيان كريه كو ب چو ره‌نگه‌كى داخوازيێ پێشكێشى ئه‌ڤێ زانكۆيێ نه‌كه‌ن و پارێ خوه ب هه‌روه نه‌ده‌ن، چونكو باوه‌رناما وێ زانكۆيێ ل هه‌رێما كوردستانێ يا باوه‌رپێكرى نينه.
ئەڤرۆ:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند ب گۆرەی نەخشەیێن کەشناسی ھەتا دووماھیا ڤێ حەفتیێ پلێن گەرمێ دێ بلند بن.
د راگەھاندنەکێ دا کو وێنەک بۆ ئەڤرۆ رەوانەکریە، رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو ب گۆرەی نەخشەیێن کەشناسی ئەو پارستە ھەوایێ کارکریە سەر ھەرێما کوردستانێ دێ بیتە ئەگەرێ بلندبوونا پلێن گەرمێ و پێشبینی دھێتە کرن ئەڤ فشارە ل رۆژێن چارشەمبی و پێنجشەمبی ب بەرچاڤی ئاشکەرا ببیت.
ھەر د وێ راگەھاندنێ دا ھاتیە ژی: پێشبینی دھێتە کرن ل باشوورێ رۆژھەلاتا ھەرێما کوردستانێ وەکو دەڤەرێن “خانەقین، مەندەلی، کفری، کەلار، مەیدان و مەخمور” دێ بلندترین پلێن گەرمێ ھێنە تۆمارکرن، رەنگە بگەھیتە 50 پلان.
رێڤەبەریا گشتیا کەشناسی و بیڤەلەرزێ ل عیراقێ ژی راگەھاندیە کو ل دووماھیا ڤێ حەفتیێ پلێن گەرمێ دێ گەلەک بلند بن و ل رۆژێن چارشەمبی و پێنجەمبی ل ناڤەراستا عیراقێ گەھنە 50 پلان و ل دەڤەرێن باشووری ژی دێ ژ ڤێ پلێ بۆریت.
ئه‌ڤرۆ نيوز:
سێ سەرکەفتیێن ئێکێ ل سەر ئاستێ پارێزگەھا دھۆکێ ژ قۆتابخانەکا زاخۆ نە، ل گۆرەیی پێشبینیێن کارگێریا قۆتابخانێ دبیت ئەڤ سالە 25 قۆتابیێن وان ل کۆلیژێن پزیشکی بھێنە وەرگرتن، رێڤەبەرێ قۆتابخانێ گۆت: پار سال ژی 23 قۆتابیێن وان ل کۆلیژێن پزیشکی ھاتینە وەرگرتن.
یونس حەمید، رێڤەبەرێ ئامادەیا ھەڤال یا نموونەیی بۆ رۆژناما ئەڤرۆ دیارکر سەرکەفتیێ ئێکێ ل سەر ئاستێ پارێزگەھێ و یێ چوارێ ل سەر ئاستێ ھەرێمێ محەمەد سامی ب سەرجەمێ 694 نمران دەرچوویە، ھەروەسا قوتابی حەسەن ھەڤال ب سەرجەمی 692 سەرکەفتیێ دووێ و قوتابی جودی عەلی 690 نمران ل پلا سیێ ل سەر ئاستێ پارێزگەھا دھوکێ ب دەستڤەئیناینە گۆت: ئەم پێشبیسنی دکەین د ئەڤ سالە دا نێزیکی 25 قۆتابیێن مە رێژەیا نمرێن وان پترن 92% ل کۆلیژێن پزیشکی بھێنە وەرگرتن.
قوتابی محەمەد سامی، ل سەر ئاستێ پارێزگەھێ یێ ئێکێ بوو، ئەڤرۆ دیارکر ژ ئالیێ کارگێریا قۆتابخانێ ڤە ھەر سێ سەرکەفتی دۆھی ھاتنە خەلاتکرن، ل گۆرەیی گۆتنێن وی پتریا دەمێ خوە ژ بوو خواندنێ تەرخانکربوو و رێکخستنا دەمێ خوە و ل دووڤ رێنمایێن ماموستایێن خوە پەیرەو دکرن و گۆت: خشتەیێ تایبەتێ خواندنا سالێ بۆ مە دانا بوون، ھەمی رۆژەکێ پێگیری د ھاتە کرن، ل دووماھیێ گەھشتە ئارمانجا خوە، ئەڤە ژی ڤەرێژا ژێرانەیا دەستەیا کارگێریا قۆتابخانێ بوویە، ژ وێ سەرەدەری و پشتەڤانیا خوە بو سەرکەفتنا مە کرین.
نيشاندان