ئه‌ڤرۆ نيوز:

عەلی رەزا بیکدیلی بالیۆزێ کۆمارا ئیسلامیا ئیرانێ ل تورکیا ژ بەر تەمامبوونا ئەرکێ وی یێ ل ڤی وەلاتی پرێس کۆنفرانسەک سازکر و تێدا ل سەر رەوشا رۆژھەلاتا ناڤین، رەوشا سووریێ، پەیوەندیێن د ناڤبەرا تورکیا و ئیرانێ و ئالۆزیا د ناڤبەرا ئیرانێ و سعوودیێ دا راوەستیا و راگەھاند کو ل رۆژھەلاتا ناڤین ھندەک ھێزێن مەزن دخوازن ئالۆزیان دروست بکەن و گەلێن ھەرێمێ بکەن دوژمنێن ھەڤدو و گۆت: (پرسگرێکا سەرەکی یا ل رۆژھەلاتا ناڤین تێنەگەھشتنا ھەڤدویە و ھندەک ھێزێن دەرەکی ژ ڤێ تێنەگەھشتنێ مفای وەردگرن و گەلێن ھەرێمێ و دەولەتان دھیننە ل ھەمبەری ھەڤدو، بۆ ڤێ چەندێ ژی ھەم پرسگرێکا ل سووریێ و ھەم ژی ئالۆزیێن دی یێن ل ھەرێمێ ب دیالۆگێ چارە ببن و شەر و دوژمناتی نە د بەرژەوەندا ھەرێمێ دایە).
بالیۆزێ ئیرانێ ھەروەسا راگەھاند کو نھا شەرەکی دژوار ل سووریێ ھەیە و گەلێ سووریێ ل دژی تیرۆرێ تێکۆشینێ دکەت و ئەڤ رێکخستنێن تیرۆرست نە ب تنێ بۆ سووریێ بەلکو بۆ ھەموو رۆژھەلاتا ناڤین و جیھانێ ژی مەترسیان دروست دکەن و گۆت: (پشتی پێنج سالان نھا ھێزا رێکخستنێن تیرۆرست وەک بەرێ نەمایە و دڤێت تورکیا ژ ھەر وەلاتەکی زێدەتر ھەڤکاریا دەولەتا سووریێ بکەت بۆ ژناڤبرنا مەترسیا تیرۆرستان و نابیت دەستێوەردانێ د کاروبارێن ناڤخوە یێن سووریێ دا بکەت).
ل دۆر پەیوەندیێن ل گەل سوودیێ ژی بالیۆزێ ئیرانێ ل ئەنقەرە راگەھاند کو مخابن دەولەتا سعوودیێ ل رۆژھەلاتا ناڤین رۆلێ دروستکرنا ئالۆزیان دبینیت و د بن ھەر پرسگرێکەک و ئالۆزیەکێ دا دەست و پیلانێن سعوودیێ ھەنە و ئەو یەک د بەرژەوەندا دەڤەرا مە دا نینە و گۆت: (دڤێت دەستھەلاتا سعوودیێ رۆلەکێ باش و ئەرەنی و چارەنڤیساز بۆ ئارامیا دەڤەرێ بگێریت نە کو رۆلێ دروستکرنا ئالۆزیان ئەز باوەر دکەم د دەمێن داھاتی دا پەیوەندیێن مە باشتر ببن و پرسگرێکێن د ناڤبەرا مە دا ژی ب روونشتن و بزاڤێن دبلۆماسیێ چارە ببن، دیسان دڤێت دەستھەلاتا سعوودیێ دەستێن خوە درێژی ناڤ سووریێ و چو وەلاتەکی دی یێ ھەرێمێ نەکەت).
ئەڤ داخۆیانیا بالیۆزێ ئیرانێ د دەمەکێ دایە کو تورکیا راگەھاند فرۆکێن شەری یێن سعوودیێ گەھشتنە تورکیا و رەنگە ئەم ژی ل گەل سعوودیێ دەست ب ئۆپەراسیۆنەکا سەربازی ل سووریێ بکەین.

ئەڤرۆ نیوز:
ئیلانا روس سیناتورا ئەمریکی ژ پارتا کۆماری د داخۆیانیەکێ دا بۆ دەزگەھێن راگەھاندنێ دیار کر کو ل عیراقێ و سووریا پێشمەرگە د شەرێ ل دژی داعشێ دا ھەڤپەیمانێ مە نە و دڤێت ئەم رێزێ ل وان بگرین و د ھەموو بیاڤەکێ دا ھاریکاریا وان بکەین، چونکو پێشمەرگە شیا ب چەکێن سڤک بەرخوەدانیەک بێ وێنە نیشا بدەن و دربێن مەزن ل داعشێ دان و ترسا وێ رێکخراوێ ژناڤ برن، ژ بەر ھندێ ژی دڤێت نھا ئەم رێزێ ل پێشمەرگەی بگرین و پێدڤیاتیێن وان ژی دابین بکەین.
سیناتورا ئەمریکی د پشکەکا دی یا ئاخڤتنا خوە دا ئەو یەک ژی دیار کر کو ھەکە ئەمریکا بڤێت شەرێ داعشێ ب رەنگەکێ سەرکەڤتیانە ب دووماھی بینیت دڤێت پتر ھاریکاریا پێشمەرگەی بکەت، ئەز رێزێ ل پێشمەرگێن ژن و زەلام دگرم کو وەک قارەمانان ل دژی داعشێ شەر کرن و شیان گەلەک دەڤەران ژ دەستێ تیرۆرستان ئازاد بکەن و بەرەڤانیێ ژ خەلکێ مەدەنی بکەن.
د دووماھیا ئاخڤتنا خوە دا ناڤھاتیێ دیار ژی کر کو دڤێت ئەمریکا بریارەکا وێرەکانە سەبارەت ب ھاریکاری کرنا پێشمەرگەی بدەت، چونکو دیارە ھەتا نھا وەک پێدڤی ھاریکاریا وان نەھاتیە کرن و پێشمەرگە د شەرێ ل دژی تیرۆرێ دا ھەڤپەیمانێ مە یێ سەرەکی نە ژ بەر ھندێ دڤێت ھەموو ھاریکاریێن پێدڤی بۆ وان بھێنە دابین کرن.