ئەڤرۆ نيوز:
بەرپرسێ پەیوەندی و پێکڤەژیانێ ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ بۆ رۆژناما ئەڤرۆ ئاشکرا کر کو بڕیارە ئەڤ سالە سێ ھزار و 656 کەس ژ ھەر چار پارێزگەھێن ھەرێمێ بچنە حەجێ، بەلێ ژ وی سەرجەمی 600 کەسێن ناڤێ وان بۆ چوونا حەجێ دەرکەفتی نەشێن بچن و ل جھێ وان دێ ھندەک کەسێن دی ھێنە دانان.
مەریوان نەقشەبەندی، بەرپرسێ پەیوەندی و پێکڤەژیانێ ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ خویا کر کو ژ ئەگەرێ قەیرانا دارایی 600 کەسێن ناڤێن وان بۆ چونا حەجێ دەرکەفتی ئەڤ سالە نەشێن بچنە حەجێ، چونکی ھەر کەسەکێ ناڤێ وی بۆ حەجێ دەرکەفتی دێ سێ ھزار و 500 دولار ژێ ھێنە وەرگرتن و گۆت: “ھندەک خەلک ھەیە ناڤێ وان یەدەک بۆ چوونا حەجێ دەرکەفتیە دێ ل جھێ ڤان کەسان ھێنە دانان”.

ئەڤرۆ نیوز:
ل دووڤ ئامارەکا ئێکەتیا زەلامێن کوردستانێ دیار دبیت کو کێشێن خوە کوشتن و کوشتنا زەلامان ل ھەرێما کوردستانێ د زێدەبوونێ دایە، ئەڤ چەندە بوویە جھێ دلگرانیا ڤی رێکخراوێ لەوما داخوازێ ژ وەلاتیان دکەن پەنایێ بەنە بەر قانوونێ بۆ تۆلڤەکرنێ.
بورھان عەلی فەرەج، سکرتێرێ زەلامێن کوردستانێ راگەھاند، ئەڤ سالە 307 حالەتێن جوراوجور یێن توندتیژیا زەلامان تومارکرینە، 31 ژ وانا حالەتێن خوە کوشتنا زەلامان بووینە، سێ زەلام ژی ژ لایێ ژنان ھاتینە کوشتن ب ھاریکاریا چەند کەسەکان.
گۆتژی: “ھەموو قوربانی کوردن و د ڤان چەند رۆژان دا گەلەک زێدەبووینە ل ھەرێمێ، پتریا سکالا ل سەر زەلامان ل پارێزگەھا سلێمانیێ تومارکرینە و حالەتێن کوشتنێ ژی ل پارێزگەھا ھەولێرێ و دەوروبەرێن وێ تومارکرینە”.
سکرتێرێ زەلامێن کوردستانێ بۆ NNA دیارکر ژی کو پتریا کێشێن توندوتیژیێ ژ بەر قەیرانێ بووینە کو پشکەکا زەلامان شیانێن دابینکرنا پێدڤیێن مال و زارۆیێن خوە نینە، ھەروەسا مایتێکرنا کەس و کارا د ژیانا ھەڤژینی دا رێژا سکالا زێدەتر لێ کریە، دیسان کێمیا ئاستێ ھووشیاریا جڤاکی لنک خێزانان پشکەکە ژ کێشان.
بورھانی گۆتژی: “گەلەک زەلام ژ لایێ ھەڤژینێن وان ژ مال یێن ھاتینە دەرێخستن چۆنکو دانعەمرن، ژمارەکا زەلامان ژی ھەڤژینێن خوە بەرداینە و رێ نەداینە وان زارۆیێن خوە ببینن، ل پەرلەمانێ کورستانێ بریارەک دەرکەت بۆ کو دەمژمێرێن دیتنا زارۆی زێدەتر لێ بھێن کو د حەفتیێ دا دو رۆژان ببینن، بەری نوکە دو حەفتیا جارەکێ بۆ و ب تنێ دو دەمژمێرا زارۆ ژ لایێ بابێ خوە دھاتە دیتن، ئەڤە پێنگاڤەکا گونجای بۆ چارەسەرکرنا کێشان”.

ئەڤرۆ نیوز:
سیاسەتەمدارێ کورد د. مەحمود ئۆسمان سەبارەت پەیاما سەرۆک بارزانی بۆ ئالیێن سیاسیێن کورد کو کودەنگیەکا نیشتیمانی ھەمبەری دروستکرنا ریفراندۆمێ پەیدا بکەن، دبێژیت، کودەنگیا نیشتیمانی کەلەک باشە و دڤێت بەری نوکە ژی ھەبا، چوکنی ھەرێما کوردستانێ یا ددەستێن حزبان دا، ھەکە بشێن دئێک بەرەدا بن وەکی سالێن نوتان بەرەیێ کوردستانی مە ھەبوو، پێکڤە کاری بۆ ریفراندۆم و سەربخوەیێ و ھەموو تشتەکی بکەن، ھەروەسا پەیوەندیێ ل گەل بەغدا و دەرڤە ژی بکەن، ھەڤدەم چاڤدێرێ سیاسی د. عەبدلوحەکیم خسرۆ دبێژیت، پێدڤیە ھەموو ئالیێن سیاسی دەستبەرداری پشکەکا داخوازیێن خوە بن، ھەموو ئالیەک سازشێ بکەت، خۆ ھیچ ئالیەک ب سەرنەکفتنێ نا ھێتە ھژمارتن، چوکنی ئەڤە یا د مفایێ مللەتێ کوردستان و حزبێن کوردستانی ژی دا، کو دروستبوونا ئارمانجێن سەرەکی یێن رزگارکرنا کوردستان و بەختەورکرنا خەلکی یە.
د. مەحمود ئۆسمان سیاستەمدارێ کورد گۆت: کودەنگیا نیشتیمانی گەلەکا باشە، بەلێ ب مخابنی ڤە ھێشتا وەلێ نەھاتیە، پەیاما (کاک مەسعود بارزانی) باشە وەک کۆمبوون بەلێ وەسا دیارە ھێشتا رێ بۆ نەھاتیە خوەشکرن وەکی ئەم دبھیسین، نزانم ئێکەتی چو بوچوون دێ ھەبیت، گۆڕان بوچوونەکە و ئالیێن ئیسلامی ژی جورەکێ دینە، لەورا دڤێت کێشان چارە بکەن.
سیاسەتمدارێ کورد ھەروەسا راگەھاند، ھیڤیدارم ب ھەر شێوەکێ ھەبیت ئالیێن سیاسی بشێن پێکڤە کێشێن ناڤخوە و کێشێن دیتر ژی چارە بکەن، و مژوولی ریفراندۆم و بابەتێن چارەنڤیسسازێن پەیوەندی ب مللەتێ کورد ڤە بن، چونکی ھیچ رێیەکا دیتر نینە، ھەر دڤێت د ئەنجامدا پێکڤە روونن و ھزرەکێ د بەرژوەندیا مللەتی بکەن، بەرژوەندیێن بەرتەنگ بھاڤێنە ئالیەکی، ھەکە نەکین دێ زەرەرێ کەین و رەنگە ئەو دەلیڤا ھاتیە پێش ژی ژدەست بدەین.
مامۆستایێ زانکۆیا سەلاحەددین و شارەزایێ دبوارێ زانستێن سیاسی دا، گۆت: ئەو گوھۆرینێن نوکە ئەم دبینین زۆر بلەز و کارتێکرنا راستەوخوە دێ ل سەر کوردستانێ ھەبن، ھەکە کوردستان یا ئامادە نەبیت، بۆ بەرھنگاریا ھەموو ئەگەران، ب باوەریا من ئەو ئەزموونا نوکە ژی دێ ژدەست دەین، ژ بلی وێ ژی دەلیەکا دیرۆکی ل ھەمبەری مە ھەیە بۆ سەربخوەیا تەمام وەربگرین، لەورا دڤێت ھەموو ئالیێن سیاسی دەستبەرداری پشککا داخوازیێن خوە بن، ھەموو ئالی دڤێت لسەر پشککا داخوازیێن خوە سازشێ بکەن، خۆ ئەڤە دسەرنەکەفتن نینە، چونکی مفایێ ھەموو مللەتێ کوردستانێ تێدایە و حزبێن کوردستانی ژی ھەورەسا چونکی مەرەم ژێ رزگارکرنا کوردستانێ و بەختەوەریا مللەتێ کورد تێدایە.
عەبدولحەکیم خسرۆی گۆت: ئەز نابینم روونشتنا ل سە رمێزا دانوستاندێ و رێککەفتنێ دڤێ قووناغێ دا شکەستن و داگێرانە بۆ ھیچ ئالیەکێ سیاسی یێ کوردستانی، لەورا دڤێ قووناغێ دا سەدەما رێککەفتنا زۆر زۆر ل سەر گشت پرسێن سیاسی ب تایبەت پرۆسا سیاسی ل ھەرێمێ کو خالەکا زۆر یا بزحمەت نینە و نوکە دشێن پێداچونێ دوان بڕیان دا ب کەنەڤە.
شارەزایێ سیاسی ھەروەسا ئاماژەدا، یا ژ ھەموویان گرنگترە نوکە پەیوەندیا ل گەل بەغدایە، کا کوردان چو ڤێ ھەیە ل گەل بەغدا پێ روونیت و دانوستاندنێ ل سەر خالێن سەرەکی بکەن، پەیاما سەرۆک بارزانی بخوە ئەو بۆ دانوستاندێ بێ ھیڤی نەبن، ئانکو نوکە پەیوەندیێن ئالیێن سیاسی دەست پێ بکەن ھەتا ھەموو ئالیێن سیاسی بھێن و لسەر مێزا گەنگەشێ بوچونێن خوە بێژن و دانوستاندنێ بکەن .