ئەڤرۆ نیوز، نەوزاد زادە ھلۆری:
ئاخفتنکەرێ وەزارەتا ساخلەمیێ یا حکومەتا ھەرێما کوردستانێ دیارکر کو د دەمێ بوری دا ب دەھان جھێن مەساجێ ھاتینە دائێخستن و لیژنەیێن تایبەت ژی د بەردەومن ل سەر دائێخستنا وان جھان ژ بەر کو مولەتێن وان تمام بووینە.
دکتور خالس قادر بو خەلک ئاماژە ب وێ یەکێ کر کو مولەتێن جھێن مەساجێ بو سالا 2016 نەھاتینە نووکرن، ب تنێ ئوتێلێن چوار ستێر و پێنج ستێر مافێ مەساجێ ھەیە و جھێن دن نینە.
گۆتژی: (د دەمێ بوری دا رێگری ل چەندین ژنان ھاتیە کرن کو بھێنە ھەرێما کوردستانێ چونکی د پشکنینێن وەزارەتا ساخلەمیێ دا دەرنەچووینە و وەسا باشترە کو گەنج خوە ل وان ژنان دوور بکەن ژ بەر کو ھندەک ژ وان ھەلگرێن نەخوشیانن).
ئاخفتنکەرێ وەزارەتا ساخلەمیێ رونکر ژی کو جھێن مەساجێ ھەتا رۆژا 31 کانویا ئێکێ یا سالا بووری مولەت ھەبوویە و دووڤ دا مولەتێن وان نەھاتینە نووکرن، نھا لیژنێن سەر ب حکومەتێ ڤە بەردەوامن ل سەر دائێخستنا وان جھان.
ل گورەی زانیاریان د دەمێ بوری دا ب تنێ ل ھەولێرێ 44 جھێن مەساجێ و جھێن گشتی بو لەشفروشیێ ھاتینە بکارئینان، بەلێ پشکەک ژی ژ وان د بەردەوامن ل سەر کارێن خوە و ئەو ژی ب بوچوونا شارەزایێن نوشداری مەترسیێن مەزنن بو سەر گەنجان ل ھەرێما کوردستانێ.
پێشتر تورا میدیایی یا خەلک د دووڤچونەکا تایبەت دا ئەو یەک سەلماند کو رۆژانە دەھان ئافرەت ل دەرگەھێن سنوری و فروکخانەیێن ھەرێما کوردستانێ دھێنە ھەرێمێ و ل باژێر و باژێرکان دا لەشفروشیێ ب وان ددەن کرن.

ئەڤرۆ نیوز:
رێڤەبەرێ گشتیێ کۆچ و رەڤەندا کوردی ل ھەرێما کوردستانێ راگەھاند، ھژمارەکا قاچاخچیان ل ھەرێما کوردستانێ و تورکیا و یونان ھاتینە دەستەسەرکرن و ھژمارا وەلاتیێن چووینە دەرڤە ناھێتە زانین و ئامارێن دھێنە بەلافکرن چو راستی بۆ نینن و گۆت: چارەنڤیسێ 300 ئاکنجیێن ھەرێما کوردستانێ یێن چووینە ئورۆپا دیار نینە و ھژمارەکا زۆر ناڤێن خوە تۆمارکرینە بۆ ھندێ ڤەگەڕنە ھەرێما کوردستانێ.
نەزھەت حوسێن، رێڤەبەرێ کۆچ و رەڤەندا کوردی ل وەزارەتا نافخۆیا ھەرێما کوردستانێ بۆ رۆژناما ئەڤرۆ زانیاریێن ھوور ل دۆر کۆچا وەلاتیێن ھەرێما کوردستانێ ئاشکراکرن و گۆت “گەلەک دەزگەە و کەس ئامارێن ڤان وەلاتیان بەلاف دکەن، بەلێ ھەتا نوکە چو ئامارێن فەرمی نینن ل دۆر ھژمارا وەلاتیێن ھەرێما کوردستانێ یێن چووینە دەرڤە و کۆچکری، ئەڤ ئامارێن ل راگەھاندنێ دھێنە بەلافکرن ب تنێ بۆ سەردابرنا خەلکیە و چو راستی بۆ نینن، چونکو کەسێن دچنە دەرڤە ب رێیا قاچاخ ل چو لایەنەکیڤە ناھێتە تۆمارکرن.
ناڤبری زێدەتر دبێژیت: ل دەستپێکا ژیانێ کۆچ ھەبوویە و ھەتا نوکە یا بەردەوامە، پشتی شەڕێ داعش ھەوەکا کۆچکرنێ ھەرێما کوردستانێ ڤەگرتیە و ھەتا نوکە ھژمارەکا بەرچاڤ یا وەلاتیان چووینە دەرڤە، حوکمەتا ھەرێما کوردستانێ ھەموو بزاڤێن خوە کرینە بۆ رێگریکرنێ ل کۆچا وەلاتیان و پۆلیسێن ئینتەرپۆل و پۆلیسێن تورکیا ل سەر بازرگانیکرن ب وەلاتیێن ھەرێما کوردستانێ ھاتینە ئاگەھدارکرن، ژ بەر کو قاچاخچی یاریێ ب ژیانا وەلاتیان دکەن و کڕین و فرۆتن ب کۆچبەران د ناڤبەرا قاچاخچیاندا دھێتەکرن، بۆ زانیاریێن وەلاتیێن ھەرێما کوردستانێ ل پارێزگەھێن ھەولێر و دھۆک و سلێمانی و رانیە ھژمارەک کەسێن قاچاخچی ھاتینە دەستەسەرکرن و دێ گەھنە سزایێ خوە یێ قانوونی، ھەروەسا ل وەلاتێن یونان و تورکیا ژی ھژمارەکا قاچاخچیان ھاتینەگرتن کو ھژمارەک ژ وان بیانینە و یێن دی ژی کوردن.
رێڤەبەرێ گشتیێ کۆچ و رەڤەندا کوردی گۆت ژی “مە رێنمایی داینە وەلاتیێن ھەرێما کوردستانێ بەرەف دەرڤە نەچن و ئەڤ یەختە و چوپێن کۆچبەر پێ دھێنە دەربازکرن جھێ باوەریێ نینن و دێ وەلاتی بنە قوربانی، وەلاتێن ئەورۆپا ژی ب شێوەکێ فەرمی رەتکریە پەنابەرێن بیانی وەربگرن، ب تنێ ھندەک پەنابەرێن گەھشتینە باژێڕان ھاتینە وەرگرتن وەکی حالەتێ مرۆڤایەتی، بۆ نموونە بریتانیا نەھێلایە ئێک کۆچبەر بچیتە ناڤا باژێڕێن وان و دناڤا دارستان دانە، مە زانیاری ھەنە ل ئەلمانیا ھەموو پەنابەر برینە دەڤەرەکێ ب تنێ ئاڤا ڤەخوارنێ دەست ناکەڤیت، ھندەک تشت دھێنە نیشادان راست نینن.
نەزھەت حوسێن خویاژی کر، ب ھزاران وەلاتیێن کۆچکری ناڤێن خوە تۆمارکرینە ڤەگەڕێنە ھەرێما کوردستانێ، بەلێ سیاسەتا ھەرێما کوردستانێ ئەڤە ب چو شێوەیەکی نابیت پەنابەر ب زۆر بھێنە ڤەگەڕاندن، بەلێ وەکی دیار پەنابەر یێن بێزاربووین، ب تنێ ل ئەلمانیا دو ھزار کەس ڤەگەڕیاینە، حوکمەتا عێراقێ پاسپۆرتێن وەختی ھنارتینە بالیۆزخانێن خوە ب سەر کەمپێن پەنابەران بھێنە بەلافکرن، بۆ ڤان کەسێن بخوازن ڤەگەڕن عێراقێ و ھەرێما کوردستانێ”.
نەزھەتی دیار کر، ھەتا دەستپێکا ڤێ حەفتیێ حوکمەتا ھەرێما کوردستانێ نێزیکی 90 تەرمێن پەنابەران ڤەگەڕاندینە ھەرێمێ و رادەستی کەس و کارێن وان ھاتینەکرن، ھژمارەک تەرمێن دی ماینە دێ ل ڕۆژێن داھاتی ھێنە ڤەگەڕاندن، خەلک بەردەوام پەیوەندیێ ب رێڤەبەرایەتیا گشتیا کۆچ و کۆچبەران ل ھەرێما کوردستانێ دکەت و بەلگێن خوە پێشکێشکرینە، کو کەس و کارێن وان د رێیا ئورۆپا دا بەرزەنە و دیار نەماینە، ئەم ژی ژ لایێ خۆڤە دووڤچوونێ بۆ کەسێن بەرزە دکەین و فۆتۆکۆپی و بەلگێن وان کەسێن چووینە ژ دەرڤە تۆماردکەین، ھند ئەم ھاتینە ئاگەھدارکرن ژ لایێ خێزانێن وان ڤە پتری 300 وەلاتی دیارنینن و چارەنڤیسێ وان ناھێتە زانین”.