NO IORG
Facebook

ئەڤرۆ نیوز:
ل باژێرێ ئامەدێ شەش پارتێن باکورێ کوردستانێ د پرێس کۆنفرانسەکێ دا راگەھاندن کو ژ بەر شەرێ نھا ل باژێرێن باکورێ کوردستانێ زیان گەھشتیە خەلکێ مەدەنی و رۆژانە ژن و زارۆ دھێنە کوشتن و باژێرێن کوردان ب تایبەتی ژی سورێ و جزیرێ وێران بووینە و دڤێت PKK ھێزێن خوە ژ باژێران دەرخینیت و دەولەتا تورکیا ژی ئۆپەراسیۆانێن خوە بدەتە راگرتن.
دوھی ل باژێرێ ئامەدێ سەرکردێن ھەر شەش پارتێن باکورێ کوردستانێ (پارتی ئازادی کوردستان-باکور، پارتی دیموکراتی کوردستان-باکور، پارتی سوسیالیت کوردستان، بزاڤا ئازادیێ، پارتیا ئازادی و سوسیالیست و پلاتفۆرما کورد)، پرێس کۆنفرانسەک ساز کرن و راگەھاندن کو ئەڤرۆکە ژ بەر شەرێ د ناڤبەرا PKK و دەولەتا تورکیا دا کو کەفتیە ناڤ باژێران زیانەکا مەزن گەھشتیە خەلکێ کورد و ژ بەر ھندێ ژی ئەم داخوازا راگرتنا شەری دکەین.
سکرتێرێ گشتی یێ پارتا سوسیالیستا کوردستان-باکور مەسعود تەک ژی د ئاخڤتنەکێ دا راگەھاند کو مە دڤێت پرسا کوردی ل تورکیا دوور ژ شەری و ب رێیێن سیاسی بھێتە چارەکرن، لێ مخابن شەرێ نھا ل باژێرێن باکوری ئاستەنگیەکا مەزن ل ھەمبەر چارەسەریا سیاسی دروست کریە و دڤێت بەری ھەموو تشتەکێ PKK ھێزێن خوە ژ باژێران دەرخینیت و ل ھەمبەر وێ یەکێ ژی دەولەتا تورکیا ئۆپەراسیۆنێن خوە بدەتە راگرتن و گۆت: (ژ بەر شەرێ نھا کو کەڤتیە ناڤ باژێران گەلەک کەسێن مەدەنی بووینە قوربانی و ب سەدان مال و جھێن کاری یێن وەلاتیان وێران بووینە. ئەو یەک ژ د خزمەتا دۆز رەوا یا گەلێ کوردستانێ دا نینە و دڤێت بلەز شەرێ نھا د ناڤ باژێران دا بھێتە راگرتن).
ھەر شەش پارتێن ناڤھاتی د داخۆیانیەکا ھەڤپشک دا دیار کرینە کو وان پشتی کۆنفرانسەکێ دو رۆژی ل سەر گەلەک بابەتان گەنگەشە کرینە و ژ بەر ھندێ ژی ئەو وەسا دبینن کو پرسا کوردی ئەڤرۆکە بوویە پرسەکا مەزن ل دەڤەرێ و دڤێت دوور ژ شەری و ب رێیێن سیاسی بھێتە چارەکرن، چونکو گەلێ کورد دڤێت بریارێ ل سەر پاشەرۆژا خوە بدەت و خوە برێڤە ببەت و ئەو یەک مافەکی رەوا یێ گەلێ کوردە و دڤێت دەولەتێن ھەرێمێ ژی رێزێ ل داخوازیێن کوردان بگرن.
ھەر شەش پارتێن باکور سەبارەت ب رۆژئاڤایێ کوردستانێ ژی داخواز ژ ھێز و ئالیێن سیاسی یێن وێ پارچا کوردستانێ دکەن کو پێکڤە ل سەر بنەمایێ بەرژەوەندیێن ھەڤپشک کار بکەن و ئەو دەلیڤا دیرۆکی یا کو ل وێرێ بدەستڤە ھاتیە ژ دەست نەدەن.
ھەر وەسا ھەر شەش پارتێن باکور پشتەڤانیا خوە بۆ سەربخوەیا ھەرێما کوردستانێ دیار دکەن و ھەروەسا داخواز ژ پارتێن رۆژھەلاتێ کوردستانێ ژی کرن کو خەباتا خوە بۆ بدەستڤەئینانا مافێ گەلێ کورد ل رۆژھەلاتێ کوردستانێ بەرفرەھتر لێ بکەن.
د دووماھیا داخۆیانیا ھەر شەش پارتێن کوردی دا ئەو یەک ھاتیە دیار کرن کو ئەو دێ بۆ راگرتنا شەری دەست ب ھەڤدیتنان ل گەل ئالیێن پەیوەندیار کەن و دێ داخواز کەن کو دوور ژ شەری پرسا کوردی ب رێیا دانوستاندنان ل گەل نوونەرێن کوردان بھێتە چارەکرن.

ئەڤرۆ نيوز:
جێگرێ سەرۆکێ پەرلەمانێ کوردستانێ د رۆھنکرنەکێ دا ل دۆر خشتێ نوو یێ بەلاڤکرنا مووچان دیار دکەت، کو چو دادپەروەری د وێ چەندێ دا نینە مووچێ کێم دەرامەتان یێن مووچێ وان ژ 500 ھزار دیناران کێمتر بھێتە بڕین.
جەعفەر ئیبراھیم د راگەھاندنێ دا، ژ لایەکی پالپشتیا بریارا حوکمەتێ دکەت و دبێژیت: ئاراستەکێ دروستە، ژ لایەکێ دی ڤە داخوازێ ژ کەرتێ تایبەت دکەت، کو ب رۆلێ خوە راببیت و دبێژیت: ئەو کەسێن ل کەرتێ تایبەت بۆ ماوێ 20 سالانە دەولەمەند بووینە، وەختێ وان ژی ھات کو ب ئەرکێ خوە راببن و رێژەکێ ھەتا 80% ژ قازانجێ خوە وەکو باج بدەنە خەزینا حوکمەتێ، و نابیت ب تنێ تەخا مووچەخوران بکەڤنە بن بارێ ڤێ قەیرانێ، و دبێژیت دڤێت دەستکاری د بھایێن بازاری دا نەھێتەکرن.

ئه‌ڤرۆ نيوز:

وه‌زاره‌تا دارايى و ئابوورى ل حوكمه‌تا هه‌رێما كوردستانێ خشتێ به‌لاڤكرنا مووچێ هه‌يڤا كانوونا دويێ يا سالا 2016ێ راگه‌هاند كو ب ڤى ره‌نگێ ل خوارێ يه‌ دياركرى يه‌، دا كو ب زووترين ده‌م ليستا مووچێ فه‌رمانبه‌ران ژ لايێ يه‌كێن ژمێريارى يێن داموده‌زگه‌هێن حوكمه‌تا هه‌رێمێ ڤه‌ بهێته‌ ئاماده‌كرن.

ب گۆره‌ى خشته‌ى ئه‌ڤرۆ رۆژا سێشه‌مبى رێكه‌فتى 9ى شوباتا 2016ێ دێ مووچێ هه‌يڤا كانوونا دويێ يا سالا 2016ێ يێ وه‌زاره‌تا پێشمه‌رگه‌ى هه‌ر ئێك ژ يه‌كێن 70 و 80 هێته‌ به‌لاڤكرن.

ئه‌ڤرۆ نیوز: ڤه‌ده‌ر ره‌شاڤایی:
وه‌لاتێ مه‌قدۆنیا دیواره‌كێ نوو ل سه‌ر سنۆرێ خوه‌ دگه‌ل یونان ئاڤا دكه‌ت بۆ راگرتنا كۆچبه‌ران ژ ده‌ربازركنا سنۆرێن وێ.
به‌ریا نها مه‌قدۆنیا دیواره‌ك چێكربوو لێ ل دووڤ گۆتنا به‌رپرسێن مه‌قدۆنی ئه‌ڤ دیوارێ نوو بۆ بێهیڤیكرنا كۆچبه‌رانه‌ یێن دڤێن ب رێیێن نه‌قانوونی سنۆرێ وی وه‌لاتی ده‌رباز كه‌ن.
د ئه‌ڤ ساله‌ دا 68 هزار په‌نابه‌ر هاتینه‌ تۆماركرن كو گه‌هشتینه‌ مه‌قدۆنیا و پتری 4 هزاران ژی هاتینه‌ راوه‌ستاندن لده‌مێ بزاڤكری ب نه‌قانوونی ده‌رباز ببن.

تاوانبار و قۆربانییا وی

ئه‌ڤرۆ نیوز: ڤه‌ده‌ر ره‌شاڤایی:
ئازاد غالب عه‌لی كورده‌كێ هه‌رێما كوردستانێ یه‌، ژبه‌ر تاوانا كوشتنا ژنه‌كێ ل نه‌رویج بۆ ده‌مێ 12 سالانه‌ ل سه‌رانسه‌ری جیهانێ یێ داخازكرییه‌ و هێشتا چ شوونوارێن وى نینه‌ و نه‌هاتیه‌ گرتن. .
ئازاد ژنه‌كا نه‌رویجی یا 34 سالی ل باژێرێ (كۆنگسڤینگه‌ر) ل نه‌رویج ب ده‌ستێن خوه‌ خه‌ندقاندبوو، تاوانبارییا وی ب دیتنا شوونوارێن خوینێ (DNA) یێن وی په‌نابه‌رێ كورد ل جهێ روودانێ هاتییه‌ دیاركرن.
ئاسبیۆرن هانسێن ژ لێكۆله‌رێن نه‌رویجییه‌ كو د ڤێ كه‌یسێ دا كاردكه‌ت و نها د به‌رنامه‌كێ تیله‌ڤزۆنی دا ب ناڤێ (Åsted Norge) ل كه‌نالێ (TV2) بزاڤا دیتنا وان تاونبارێن هێشتا ده‌ستێ دادوه‌ریێ نه‌گه‌هشتیێ دكه‌تن،
هانسێن خویاكر كو نۆكه‌ ژیێ تاوانبار ئازاد بوویه‌ 44 سال و ژ ئالیێ پۆلیسێن ئینته‌رپۆل ل سه‌رانسه‌ری جیهانێ بۆ ڤێ تاوانێ یێ داخازكرییه‌، لێ هئشتا نه‌هاتیه‌ ده‌سته‌سه‌ركرن،
ژ بلی هه‌رێما كوردستانێ ناڤهاتی كه‌سوكار و هه‌ڤال ل هۆله‌ندا و ئینگلته‌را و نه‌رویج هه‌نه‌، داوی جار شوونوارێن ویل ئه‌مستردام هاتینه‌ دیتن.

تاوانبار و قۆربانییا وی
تاوانبار و قۆربانییا وی

ئه‌ڤرۆ نیوز: ڤه‌ده‌ر ره‌شاڤایی:
نەورۆز مەولود وەزیرا باژێرڤانی و گەشتوگوزارێ یا هەرێما کوردستانێ د هه‌ڤپه‌یڤینه‌كێ دا دگه‌ل به‌رنامێ ره‌نج سه‌نگاوی یێ كه‌نالێ رووداو راگه‌هاند: ” مه‌ بریار دایه‌ پارچه‌ زه‌ڤییان بۆكرێدار و كێم ده‌رامه‌تان دابین كه‌ین، و ئه‌ڤ یه‌كه‌ ژی دێ ب چه‌ند قۆناغان بیت، قۆناغا ئێكێ دێ بۆ وان کەسان بیت یێن گه‌له‌ك حال نه‌خۆش و ده‌ستكورت بۆ وێ یه‌كێ مفادار ببن. ”
نەورۆز مەولود هەروەسا گوت: “پارچه‌ زه‌ڤیێن دهێنه‌ دابەشكرن واسته‌كاری و حیزبایەتیێ دەور تێدا نابیت، ئه‌وێن وەردگرن ماف نینه‌ بفرۆشنه‌ ڤه‌ چونكی نه‌ بۆ بازرگانی پێكرنێ یه‌. “

ئه‌ڤرۆ نیوز: ڤه‌ده‌ر ره‌شاڤایی:
ئامانج عه‌بدولا سه‌رۆكێ فێدێراسیۆنا په‌نابه‌رێن ئیراقێ راگه‌هاند كو ته‌رمێن 8 كۆچبه‌رێن دی یێن كورد كو د ده‌ریا ئیجه‌دا خه‌ندقینه‌ هاتینه‌ دیتن و دێ ل ده‌مه‌كێ نێزیكه‌ بۆ هه‌رێما كوردستانێ هێنه‌ ڤه‌گه‌راندن.
ئامانج عه‌بدولا دیاركر ژی كو ناسناما وان ب دروستی ناهێته‌ زانین له‌ورا ئه‌و هێشتا نه‌شێن بێژن خه‌لكێ كیژان باژێرێن هه‌ریما كوردستانێ نه‌.

ئه‌ڤرۆ نيوز:

شارەزایەکێ قانوونا سزایان راگەھاند، ئەو سەرۆک خێزانێن ب رێیێن قاچاخ قەستا دەرڤەی وەلاتی دکەن و ژیانا خێزانا خوە دکەنە د مەترسیێ دا، پێدڤیە ل گۆرەی مادێ 383 ژ قانوونا سزایان بھێنە دادگەھکرن و سزادان و گۆت: داخوازێ ژ داواکارێ گشتی دکەین سکاڵایا سزایێ ب لڤینیت، دژی وان سەرۆک خێزانێن بووینە ئەگەرێ نقوومبوونا زارۆیێن خوە د کاودانێن ل سەری ھاتینە گۆتن و ڤەکۆلین ل گەل وان بھێتەکرن و رادەستی دادگەھێ بکەن.

د. ئەحمەد مستەفا شارەزایێ قانوونا سزایان ل پارێزگەھا دھوکێ بۆ ئەڤرۆ دیار کر، ئەڤ حالەتێن نقوومبوونا ئەندامێن خێزانێ د دەرییا ئیجەدا پەیدابووین دھێنە ھژمارتن ژ تاوانێن مەترسیدار، چونکو ئەو کەسێ بەرپرس ژ خێزانێ مەترسیێ ل سەر مافێ ژیانا ئەندامێن خێزانا خوە پەیدادکەت و دڤێت وی کەسێ بەرپرس و ئەندام ژ وێ خێزانا نقوومبووی و قۆرتاڵبووی و ڤەگەریە ھەرێمێ بھێتە سزادان، ژ ئەگەرێ نقوومبوونا ئەندامێن خێزانا وی ل دووڤ دەقێ مادەیا 383 ژ قانوونا سزایان ژمارە 111 ل ساڵا 1969.
ھەروەسا شارەزایێ قانوونی گۆت: دەمێ سەرۆک خێزان ھزرا کوچبەریێ بۆ ئورۆپا دکەت ب رێیا دەریا ئیجە، دبیتە ئەگەرێ مەترسێی ل سەر ئەندامێن خێزانا خوە و دڤێت ئەو سەرۆک خێزان بھێتە بەرپرسیارکرن ل دووڤ دەقێ مادا 383 ژ قانوونا سزایان، چونکۆ سەرۆک خێزان دزانیت ئەگەر ب رێیا دەریا ئیجە بۆ کۆچبەریێ بکارئینای رەنگە ب خێزانڤە نقوومبیت یان قورتالبیت، ل ڤی دەمی مەترسیێ ل سەر ژیانا خێزانا خوە پەیدادکەت.
د. ئەحمەد مستەفا ئاشکرا کر، ئەو سەرۆک خێزانێ بوویە ئەگەرێ مەترسیێ ل سەر ژیانا ئەندامێن خێزانا خوە، بەرپرسیارە و دھێنە سزادان ب سزایێ زیندانکرنێ، نە ژ پێنج ساڵان زێدەتر بیت، لێ ئەگەر ئێک ژ ئەندامێن خێزانا وی وەک نقوومبوونا زارۆیەکی یان ھەڤژینا وی د دەریایدا، سەرۆک خێزان ژ ڤێ روودانێ بەرپرسە ل دووڤ مادا 411 ژ قانوونا سزایان کۆ دھێتە ھژمارتن کوشتنەکا ب شاشیڤە کۆ سەرۆک خێزان ب شاشیا خۆ بوویە ئەگەرێ وێ روودانێ ب جۆرەکی ژ جۆرێن ھاتین د مادێن (35-416-411) خەمساری، سەر رەقی، نەچاڤدێریکرنا قانوونان و سیستەم و رێنماییان.
د. ئەحمەد ئاشکەرا کر، تمامکرنا ڤێ تاوانێ شاشیەکا پێشبینکریە (شاشیا ئاگەھدار) ل ڤان کاودانان (زڤستان، دەرییا، ھۆیێ سادەیێ ڤەگوھاستنێ) ل دووڤ دەقێ مادەیا (411) دێ تاوانبار (بەرپرس ژ خێزانێ) ل دووڤ کاودانێن توند ئەوێن ھاتین د ھەمان دەق دا دھێتە زیندانکرن و دبیت بۆ ماوێ نە کێمتر ژ سالەکێ یان ژ سێ ساڵان، ھەروەسا دبیت ماوێ زیندانیکرنا وی نە ژ حەفت ساڵان پتر بیت، ئەو ژی ل دووڤ بارۆدۆخ و کاودانێن تاوانا نقوومبوونا ئەندامێن خێزانا وی تێدا ھتیە ئەنجامدان، ژ بەر ئەڤ ئەگەرێن مە دیارکری ئەم داخازێ ژ داواکارێ گشتی دکەین ل دادگەھێ سکاڵا یا سزایێ ب لڤینیت، دژی وان سەرۆک خێزانێن بووینە ئەگەرێ نقوومبوونا زارۆیێن خوە د کاودانێن ل سەری ھاتینە گۆتن و ڤەکۆلین ل گەل وان بھێتەکرن و رادەستی دادگەھێ بکەن.
ل دووماھیێ د. ئەحمە داخوازێ ژ جھێن ئێمناھیێ کر و گۆت: دڤێت ھندەک مەرجان بێخینە سەر وان کەسێن دچنە تورکیا، بۆ نموونە ھەر خێزانەکا بچیتە تورکیا نابیت ڤەگەریتە کوردستانێ، ئەگەر ھەمان ژمارێن تاکێن خێزانێ ئەوێن چووین نە ڤەگەرێن بۆ ھەرێمێ یان بەلگە ھەبن بۆ نە ڤەگەریانا وان کەسان وەک باوەرناما مرنا کەسەکی د نەشتەگەریێ دا ل نەخۆشخانەکێ ل تورکیا و ھەر وەلاتەکێ دیتر.

1013

ئه‌ڤرۆ نيوز:

کچەکا 25 سالی مامۆستایە دلێ خوە بۆ ئەڤرۆ ڤەدکەت و دبێژیت: ئەڤە ماوێ دو سالایە ئەز و گەنجەک حەز ژ ئێکدو دکەین ئەو گەنجە 26 سالە و خۆدان کارە و یێ حالخوشە، لێ ئاریشە ئەوە دەیکا من رازی نابیت من بدەتێ، ژبەرکو مروڤێ مە نینە و ھەر جارەکێ بەھانەیەکێ دگریت، نە یا رازیە و چەند دان وستاندنێ ژی ل گەل دکەم ھەر یا بێ مفایە، ھیڤیدارم ھوون بۆ من چارەیەکێ بێژن؟
مامۆستایا ھێژا:
دڤێت تە شیان ھەبن ب وێرەکانە پەیاما خوە بگەھینیە ھەر لایەکی نەخاسمە ئەندامێن خێزانا خوە ب تایبەت دەیکێ، بزانە رەوشەنبیریا ئەو دناڤدا ھاتینە پەروەردەکرن ئەڤە بنەمایێن وانە ژ وانا بیانیە یان بۆ پسمامیە یان دڤێت مرۆڤێ مە بیت .. ھتد، لەوا دڤێت مە شیان ھەبن ل دووڤ خواندنا خوە ئەم گۆھورینێن پوزەتیڤ ل سەر وان دیتنا و ھزرا بکەین نە کارێ مە ببیتە شروڤەکرنا وان. راستە دەیک ل دووڤ تێگەھشتنا خوە ھەول ددەت وان کارا ئەنجام بدەت کو د بەرژەوندیا کور و کچان دا بیت، بەلێ نزانیت کو ھندەک بریار دڤێت رۆلێ مەزن بۆ خودانێ کاری بیت، ئەڤجا رۆلێ خوە ببینە ب ھاریکاریا رەوشەنبیریا تە وەرگرتی کارتێکرنێ ل سەر بکە و ب رێیا شرۆڤەکرنێ و گەنگەشەکرنا شارستانی پەیامێ بگەھینێ باوەریێ بۆ چێکە کو دیتنا تە یا دروستە و ئەڤ کارە یێ گرێدایە ب ژیانا تەڤە لەوما دڤێت بریار یا تەبیت.

800

ئه‌ڤرۆ نيوز:

وەزارەتا ناڤخۆیا ھەرێما کوردستانێ تەکەز کر، بڕیار بۆ دەستەسەرکرنا تڕۆمبێلێن جامێن وان رەش دەرچوویە و ھەتا نوکە ھژمارەکا زۆرا تڕۆمبێلان ھاتینە گرتن و گۆت “حوکمەتێ چ پلان نینن بۆ ئازاکرنا وەلاتیان ژ غراما سزایێ کامیرێن ھاتنوچوونێ”.
رزگار عەبدولا، رێڤەبەرێ راگەھاندنا وەزارەتا ناڤخۆ بۆ رۆژناما ئەڤرۆ گۆت “رۆژێن بۆری وەزارەتێ ب نڤیسارەکا فەرمی رێڤەبەریێن ھاتنوچوونێ ل دۆر دەستەسەرکرنا تڕۆمبێلێن جام رەش ئاگەھدار کرینە و بکارئینانا ترۆمبێلێن جام رەش ب ھەموو شێوەیەکی ھاتینە قەدەغەکرن، ب ئاوایەکی ھەتا نوکە ل ھەرسێ پارێزگەھێن ھەرێما کوردستانێ ھژمارەکا زۆرا تڕۆمبێلێن جامێن وان رەش گرتینە و پێڕابوونێن قانوونی ھەمبەر ھاتینە وەرگرتن و ھەر کەسەکێ ترۆمبێلا جام ڕەش بکار بینیت دێ ترۆمبێلاوی ھێتەگرتن، راستە ھژمارەکا زۆرا ترۆمبێلان ھەنە و ل ناڤ باژێڕێن ھەرێمێ ھاتنوچوونێ دکەن، بەلێ ھەر دەمەکێ بکەڤنە مەفرەێن پۆلیسێن ھاتنوچوونێ رزگار نابن”.
ل دۆر کێمکرنا سزایێ کامیرا ھاتنوچوونێ رزگاری گۆت “راستە ژبەر قەیرانا دارایی حوکمەتا ھەرێما کوردستانێ بڕیار دایە بھایێ کەلوپەلان و بازاڕی بھێتە ئەرزانکرن، بەلێ ھەتا نوکە وەزارەتا ناڤخۆ چ پلان نینن بۆ کێمکرنا غراما سزایێ ھاتنوچوونێ و سەرۆکایەتیا جڤاتا وەزیران ژی ھەتا وی دەمێ ئەز داخویانیێ بۆ رۆژناما ھەوە د دەم چ فەرمان بۆ مە نەھنارتینە، ئەگەر پلانەکا وەسا ھەبیت وەلاتی بھێنە ئازاکرن ل پارێ غراما ھاتنوچوونێ دێ کۆمبوون ل سەر ھێتەکرن و بیتە بڕیار بۆ بجھئینانێ”.

website security
WP Facebook Auto Publish Powered By : XYZScripts.com